樂湯雞麵館 x 火鍋 (太子)

又去呢度打邊爐，呢度最好係4、5點就可以打邊爐，啱晒我D時間，仲有9折優惠！
今次叫左個桃膠雪燕椰子雞煲，個湯超好飲，我忍唔住飲左4碗😝😝😝，個煲仲要勁多桃膠同雪燕，食極都有，個響鈴係上次店員推介話即叫即炸，所以今次叫來試吓，店員放低碟響鈴已經好香，配埋呢個椰子雞湯真係超正
個海鮮拼盤D海鮮好新鮮，有半條海𩶘，5隻蝦，4隻貴妃蚌，馬刀貝、蟶子、鮑魚、元貝各有2隻$488，其實都唔貴，因為真係超新鮮超正，特別D蝦，超好食，元貝超厚肉，貴妃蚌同馬刀貝都好鮮甜，另外個手打蝦丸都好正好彈牙，不過個手切牛就有D蘇蘇地！
呢間嘢真心誠意推介😋😋😋😋

大本瀛日式放題 (旺角)

去食放題好多地方都係好逼，點好食但環境唔好都無用，但呢間唔同，唔逼食物又有水準，最讚係服務超好，已經係一個月內第二次幫襯，第一次係同男朋友去食，果日收工突然想食放題，上open rice睇就揀咗去呢間，先唔講嘢食先，我一坐低除低外套後，有個侍應走過來話見我件外套好大件，要唔要幫我掛起佢，驚阻住我，真係第一次食放題有侍應話要幫我掛起件外套！之後其他侍應服務都好好，見我哋未拎嘢飲，特登走過來同我地講飲品櫃在那裏，可以自己出去拎！食完諗住出去拎雪糕，一行出去有個侍應突然拎咗D雪條出來話請我食，話呢D要訂枱或加錢先可以食，就係因為服務太好，所以阿媽生日話要食散放題，二話不說就去返呢間，我book左8點，但因為我早左到，而阿媽細妹未到就坐在出面等啦！點知個侍應哥哥比我入左去先，話呢段時間唔限時間，所以唔使等齊人先入，我可以入去食住等，阿妹來到話要唔凍嘅飲品，個侍應哥哥拎過來時仲幫手開埋罐飲品，食物方面款色多，我有好多都冇影相，有韓日泰國菜，冬陰公湯唔錯，但人參雞湯就麻麻喇，燒大蝦隻蝦真係好大隻，不過有部份D肉梅梅地，但天婦羅蝦要讚咖，好掂，呢度上菜好快，冇漏單，又會勤收碟！我哋食完走喇，阿媽望住個雪櫃話罐椰汁好飲，個侍應其實幫我哋襟緊部lift,但見到我阿媽咁就話：可以拎走飲咖，唔緊要咖，拎啦！但阿媽話唔做呢D嘢，食完走就唔會再拎嘢，咁我哋就搭lift走，但其實我阿妹去左洗手間，點知佢落嚟後我見佢手上拎住罐椰汁，阿妹話佢等lift時個侍應哥哥話：佢哋話叫你拎罐走呀！所以阿妹先會拎！佢哋實在太好人，D服務真係好到一個點！我會再去幫襯的！

鳳雛燉雞 (旺角)

朋友同我食生日飯，呢排又食過韓燒、剌身、打邊爐，所以我選擇左呢間鳯雛燉雞，呢間嘢應該係韓國人開，因為一上到去拎位，係有個韓國人接待！我哋3個人，叫左3樣野，燉雞、牛肉包飯同海鮮煎餅！燉雞我哋叫左小小辣，入面有啲透明粉條，幾好味，碟嘢好大碟，好彩我哋3個人，如果唔係就唔可以叫埋牛肉包飯同海鮮煎餅，個海鮮煎餅個質感有D似薄餐咁，都幾足料，唔錯！呢度多D人來食會好D，因可以叫多幾款野食，但如果小人，食量又細嘅，咁就可能只係可以叫個燉雞食就夠！

倫哥火鍋私房菜 (深水埗)

朋友生日決定去倫哥食，其實一直都想去食，終於因為朋友生日可以去試下，呢間有個好處係任飲任食唔限時，我同朋友7:00去到，因為未齊人，侍應問要唔要上住雞煲食住先，D雞煲係任食嘅，同埋雞煲份量唔算大，我見第二張枱叫左4轉雞煲！但我哋只係食左一煲啫，味道唔錯，等齊人後就開始上菜，先嚟過北寄貝沙律，花膠鮑魚，蒸聖子，我自己就覺得花膠冇乜味！
湯底我就一早book定溫泉雞湯，中間放個冬瓜加小半隻雞同椰青肉，我地先飮碗湯，味道唔錯，不過隻雞肉就鞋左D，同埋有個唔好處係中間個位太細，放唔得太多嘢入去打邊爐，之後就有牛肉啦、海鮮盆、蔬菜盆、炸魚皮響鈴、雲吞九菜餃同魚皮餃、黑墨魚滑、蝦滑等等...
海鮮盆有蝦、蟹、蜆、青口、魚，海鮮都新鮮！
特別要講下黑墨魚滑同蝦滑，堅好味，蝦滑入面有成隻蝦，而魚皮同響鈴就有D失望，唔夠脆！
如果唔夠食可以再叫，仲有甜品，不過我哋實在太飽，所以連甜品都冇食！
店內得2個侍應，見佢地忙於出菜、執嘢、落單，真係好忙

蝦棧 (太子)

打開OpenRice 搵下太子有咩好食啦，就搵到呢間蝦棧，係食台灣嘢，見到D人推介蝦煲，好吸引！所以就同男朋友去試下喇！因為男朋友唔食得辣，所以冇得食檸檬蝦煲，我地揀左個咸蛋蝦煲，醉雞卷，生燒花螺同炒冰菜，再叫左支台灣大啤，先來啤一啤，原來台灣啤酒D味係好清，好啱女仕飲，醉雞卷味道非常清新，酒味唔太濃，仲有小小甜味，口感唔錯，之後咸蛋蝦煲到喇！D蝦其實都算細隻，賣相其實唔太吸引，男朋友食落口後um左一聲, 之後就話不得了，D咸蛋溶哂喺隻蝦入面，特別係蝦頭，加埋D蝦膏，真係勁好味，生燒花螺只係普通咁燒，但又確實幾鮮味，冰菜係第一次食，原來都幾好食，幾爽口，雖然今餐係貴左D，但我覺得係值嘅，因D嘢太好味喇！
題外話，侍應服務超好！