博洛尼亞 (尖沙咀)

原來BO-LO’GNE已經靜悄悄地開咗一間旗艦店喺LCX! 面積比中環店大上十倍，由中環IFC坐船來到海港城唔洗20分鐘，比起行上鴨巴甸街身水身汗時間差不多，但坐吓天星小輪吹吓海風，只需付出$4的來回船費，輕輕鬆鬆又來到尖沙咀，悠閒寫意好似放假一樣，午飯時段亨受吓也不為過。

來到LCX較中段的位置，BO-LO’GNE大大的茶坐範圍和光猛的開放式廚房已成功吸引我的目光，由於店子很大的關係，錯過它的機會是零。小弟來到時已差不多下午1時但人流不多，可能宣傳不足關係，近來的雜誌也未見它的報導。還好，可以靜靜地亨受這一餐。

侍應問要不要window sit，被安排到望窗外的單邊位置後自由選擇坐位。午飯時段太陽晒得很正，冬季坐這個位置都幾舒服，望著海吃午餐的感覺超豪。吃了一份好好味的漢堡扒三文治喝一杯咖啡，付出$86已可以亨受無敵海景的悠閒午餐，超值。


Burger Sandwich漢堡扒三文治
烘過的Signature Bread酥皮麵包比末烘的感覺更light，自家製漢堡扒肉汁豐富，配上新鮮生菜絲和調了小小酸醬汁的車厘茄，整份三文治絕無油膩的感覺。配上半個奇異果作餐後果，整個感覺非常清新，和餐廳的環境也非常配合。

後記 - Crazy Bread Party
Signature Bread -酥皮麵包
打電話給同事們說我現在BO-LO’GNE，要不要幫他們買酥皮麵包，幾位同事也馬上起哄! 新店的麵包包裝有2片($19)、4片($36)和6片($54)和舊店的價格相同，也是$9一片。同事們七咀八舌的在電話背後不段地說著要買多小，最後買了5包6片、兩包4片和一包2片，共$361。買麵包也買了三百多元也是第一次!! 這片酥皮麵包為我們的辦公室增添不小樂趣，最記得幾位同事為了爭吃一片酥皮包，在辦公室內搶了十五分鐘，之後成班同事也因為此事笑足了一小時，要爭才有得吃的麵包，可想而之有幾珍貴! 現在尖沙咀開了這新店，不用再山長水遠爬上鴨巴甸街，九龍和新界的朋友有褔了。

酥皮麵買回家後，除了烘焙後直接食用的單調食法外，在家裏也可參考餐牌上的幾種做法，將烘焙後的多士配上雪榚、蜜糖、朱古力醬和生果…等等，也可以做成法式多士，為自己和屋企人做些簡單又美味的甜品。以下是小弟的杰作，當然沒有餐廳的那麼專業!

今天也拍了幾張餐牌的照片，對比舊店的餐牌整体上沒有因新店的地點租貴已上調，只有小小的改動和增添幾款新口味。襯著現在沒有太多人留意到新店，又不用等位，去多幾次先!

超羣麵包西餅 (中環)

超羣嘅流心奶皇包真係好好食，我班同事個個都好鐘意食，因為我每次買都會買兩三打請佢地，雖然真係好好食，但食咗好多次之後開始有啲悶，連之前又有新攪作「芳心帝皇蛋撻」都無心機去買嚟試，反而知道14號會出朱古力流心蛋撻(唔知佢個真名!)，雜誌又講到只係中環店限定，今日14號午飯時間一到，立即衝過嚟買咗兩打! 每日限量200隻，我一個人都買咗24隻，噚日買唔到嘅朋友真係唔好意思喇!

十二點幾嚟到，開頭重擔心買唔到，原來第一轉係十二點半出爐，之後不斷會出爐，直到二百隻賣晒為止。想買嘅人其實可以午飯時段去買定飛，同啲阿姐講幾點嚟攞，咁就可以三點三落嚟攞下午茶。啲阿姐真係好鬼熱心，怕你買咗啲蛋撻凍咗唔好食! 想遲啲攞佢哋就不斷提你凍咗要放入微波爐，如果剛出爐攞熱辣辣就最好啦….好似有幾個阿媽係你面前不斷提醒你咁! 嘩，好鬼煩阿! 不過佢哋都係出於好心，唔好怪佢哋! 最後喺半推半就之下決定咗喺二點正攞，啲阿姐重好鬼有心咁同師傅講定幾點要，校定時間等我兩點正有熱辣辣嘅蛋撻攞，真係多謝晒!

朱古力流心蛋撻
原理同之前嘅流心出品一樣，麻糬包住流心餡，一咬入去就會流晒出嚟。今次嘅流心餡係黑朱古力，一啖咬落去，覺得蛋漿太甜，遮晒啲朱古力味，要淨係食啲朱古力漿先食到朱古力味。麻糬係熱嘅時候都係喺半溶嘅狀態，小小煙煙韌韌同溶咗嘅水牛芝士質感差唔多。外層嘅曲奇底夠厚又夠香脆，蛋撻面放咗啲crumb, 不過好似多餘咗小小，而且個蛋撻變得甜上加甜! 如果可以突出啲朱古力味同無咁甜，個蛋撻就會好味啲。

雖然有特色又有層次感，七蚊隻蛋撻真係好貴，買多啲就平啲，不過買咗兩打平均都要六蚊隻，仍屬偏貴水平。

英記油渣麵 (大角咀)

英記的油渣麵，是美味的回憶，是從前深宵工作的一部份，是凌晨時份必吃選擇之一，但自從轉行之後，已很難配合英記的步伐! 只在晚間營業的英記，很適合一眾夜駕人事，喜歡晚間兜兜風，要在附近找個位置泊車應該不難，但要是一眾無車無牌人事，要來到大角咀可真是隔涉!

今日，竟然有如此衝動來到英記! 晚上七點多在公司等人交報告，預期最快也要等到八時多才會有希望! 等等等! 開始覺得有點餓，無理由餓著肚子工作刻薄自己，掙取那一小時的空檔，由中環坐東涌線到奧運站，再快速步行至福全街，來到英記坐下十五分鐘，幹掉一碗油渣麵($22)加一碗淨餸($30)加一罐王老吉($7) (共$59)，再返回公司繼續搏殺，六十分鐘內跑畢全程!

一別四年，昔日舊舖一帶，是一棟棟等待重建的舊樓，一個個空空如也的舊舖，如今已是一棟棟等待落成的新樓。由細舖變大舖，細街搬到大街，由不足一百呎只有兩張細枱，來到今日的新店可容納九張大枱。最大的變化是廁所! 從前只有一個身位的站廁到現在有男女廁，而且男廁內站廁坐廁都有齊。

由櫸樹街走到福全街，英記的大大招牌清晰可見，走入店內選了最入的坐位，可看清全店的格局。地方光猛清潔，九張摺枱和圓櫈配合的坐位，店內也擺放了多張未打開的摺枱，是宵夜時份在街上加枱的準備。從前只有老闆老闆娘二人，今天由四位女仕坐陣，場面熱閙得多。在逗留期間短短十五分內，客人魚貫入坐，也有專程坐的士來買外賣的。新店地方勝在寛敞，冷氣充足，沒有一點擠迫焗促感覺，反而覺得此地踎食店，環境舒適自在。


食物選擇方面，從以前獨沽一味的油渣麵增加了雞翼、芝士腸和油菜，對我來說我只會吃油渣麵，雖然炸雞翼也是該區回憶之一，但有些東西是不可代替的! 辣椒油仍然是油渣麵的最佳配合，今日雖然咳嗽未癒，但仍是堅持要加點辣油，這裡的辣椒油仍舊是非常辣! 怕辣的加小小可能是經吃不下，建議各位量力而為。

大油渣麵和淨渣

先試試湯底，鹽味較重，有點鮮肉湯味但不夠濃。冬菇如以前的細細隻，還算厚肉，吸了豬肉湯，好味。油渣有整片都是肥肉的，質感似啫哩糖，膠質口感有彈性，半肥瘦的有的部份位置給炸過，口感硬一點勝在有咬口而且肉味香濃。吸了豬肉湯的粗麵，味道好好，軟硬適中，吸了湯也沒有過腍。




比起以前的味道沒有那麼濃，難然叫了碗淨渣一碗子都是肉，但肉味還是不夠，就是湯底不夠濃影響，可以再濃一點和小一點鹽。整體來說還是好好味，一碗大對一個男人來說應該不夠飽，但$22這個份量算是合理，多叫一碗淨渣便剛剛好。

群記牛肉圓豬手 (粉嶺)

聯和墟地方細細但就有好多好嘢食，好彩交通唔係咁方便，好彩粉嶺的住宅唔係堆埋晒係同一個區，如果唔係一到週末呢度肯定旺過旺角! 群記開正係投注站格離，啲馬迷為咗攞過意頭，好多時嚟落注嘅時侯都會嚟食碗豬手，取其意橫財就手，慢慢就變成咗習慣，所以每到賽馬日又特別多人! 前幾日已經突然好都食群記豬手，今日醒目地係開跑前十一點幾嚟到，但店內已經坐無虛席，好彩我係嚟買外賣，不過都要等十分鐘，如果在繁忙時段來，真係試過等二十分鐘先有得攞。

本來真係無咩需要寫呢篇食評，群記啲豬手、牛丸有幾好食真係唔洗多講，加上自家辣椒醬油，食咗十幾年都食唔厭! 就係因為食咗十幾年，唔為佢寫小小食評好似好對唔住佢咁，點懶都好都好要bi幾隻字出嚟讚讚佢。

爽口牛丸
唔洗講，如題，但重有一樣就係，鮮! 一入口就有一輕鮮牛肉香係口腔入面 “浪吓浪吓”，細細粒試吓一次過pak三粒入口重正，又爽又香。有時坐係店內較入的坐位，見到阿叔好努力咁係度唧牛丸，新鮮唧新鮮賣，正!

大淨手
每次都係叫大嘅，根本唔容許自己叫碗細嘅! 一碗清湯豬手入面有齊晒成隻豬腳嘅每個部份，腳指尖、腳指骨、豬踭肉。豬肉其實係韌咗小小，但豬皮同豬軟骨位嘅爽口質感先係最正嘅，如果要啲肉夠腍，豬皮又會太腍，所以好難兩全其美。鐘意食腍嘅朋友其實有個自行加工嘅方法，就係買碗外賣返屋企之後方埋一邊，到夜晚先返熱嚟做餸，豬手浸咗一個晏晝就會變得好腍，連湯倒入個煲度加返熱再加多兩條菜又變成一個餸，晚餐慳返唔小功夫! 哈哈!
食豬手就梗係唔小得自家辣椒油，一個字，香! 有時貪心買一碗豬手都會叫阿姐俾多兩包辣椒油，阿姐多數都好好人俾多兩包我，從不吝嗇。

家鄉炸卷
其實唔係最好食嘅一樣嘢，有時會嫌佢乾得滯，有時又會嫌佢唔夠脆。但物以罕為貴，基本上一點鐘前就賣晒，沒以有時早來都會叫嚟食。腐皮包着牛肉碎的炸卷，牛肉有點鹹，蘸醋吃中和一吓，伴清湯牛丸豬手一流。

店內環境，裝修又舊燈光又唔夠! 摺枱摺櫈放得迫迫，繁忙時段人迫人背對背，啲人不斷係你後面走來走去，有搵位嘅、有阿姐攞住幾碗嘢走來走去，所以好容易俾人撞親。店內又無冷氣，夏天嚟食食埋辣椒油真係食到成身汗! 唔好埋咁多，總之好食就得，怕迫怕熱買外賣行個街口公園食一樣咁滋味!

欽記粉麵 (大埔)

炸魚皮是魚蛋的副產品，潮洲人有個好習慣，就是不會浪費食物。用門膳和九棍魚肉做魚蛋，將魚皮(或有骨)炸脆來配襯味淡的魚蛋粉，為簡單一碗魚蛋粉增添層次，樣食客將門膳的皮肉骨一併吃掉。因為要將魚皮連骨都炸脆，火候很難控制，所以坊間大多只有無骨的炸魚皮。近年魚皮變得“妹仔大過主人婆”，自立門戶跑了出來變成零食，也成了火鍋配料，浸湯不浸湯吃，釋隨尊便，反而把忘記魚蛋了!

香港人對炸魚皮要求也提高了，好吃的炸魚皮必需新鮮，以當天早上炸起最好，入口才夠香脆，浸了湯依然挺身，魚皮要薄粉也當然要夠薄，連調味也要講究。炸魚皮變得比魚蛋更受歡迎，給人家吃掉光了，那魚肉反而變成了副產品，難怪十多年來魚蛋粉價格沒太大得漲幅。

今天兩口子來到了欽記粉麵，正是為了它的炸魚皮。欽記的炸魚皮有兩款，有普普通通薄薄的，也有有骨較硬身的，而今天來到正是想試試那有骨的。之前在蔡潤記吃過又濃又硬似石頭的有骨炸魚皮，本來經已心死，但看過雜誌介紹欽記後，從燃我心中的冒險精神，決定再探究它的美味真諦。

來到時正直午飯時候，人很多，熟食中心內每張枱也加了膠凳，跟鄰枱的食客背貼背，坐在膠凳上還不斷被撞的感覺很差。同枱還有個小朋友不斷在包雲吞，還把製成品放到枱上，超無公德心! 這不是店的錯，是那小朋友媽媽的錯，我倆已被嚴重影響了胃口!

今天簡單地只點了兩碗魚蛋粉，每碗跟了幾片有骨炸魚皮，略嫌每片都很細塊。既然為了這魚皮而來，當然要先試試! 魚皮雖然有骨並無想像中的硬，是香脆帶小小硬的質感，新鮮而且調味適中，浸湯時間長一點也不會變腍，好好味，淨食浸湯同樣好味。魚蛋細細粒比石雞波子大小小，魚味濃但不夠彈牙，因為本身體積細粒所以影響口覺。魚片和魚蛋味道差不多，嫌切得又薄又細片，無咬口可言。湯底清淡，河粉夠滑挾起不易斷，但分量很小。每碗十七個大洋，與同是位於熟食中心內的粉麵店價錢差不多，價錢合理，但必須改善河粉的份量。

後記，剛剛的週末經過英記粉麵(一間在大埔區很有名的粉麵供應商，在靖遠街的地舖廠房有門市)，十個大洋買了十條蝦米腸，超抵! 無意中發現了有骨炸魚皮! 十二個大洋一大包! 味道和欽記的一模一樣，而且也很新鮮，不知欽記是否在這裡取貨。如果到欽記吃不到有骨炸魚皮，可以到此處碰碰運氣。