八方雲集鍋貼水餃專門店 (九龍灣)

夜晚行到尼megabox見到間餃子鋪（我太耐冇番尼，所以覺得新奇）見到價錢都好平，所以就坐低試下。

環境一般啦，唔可以話特別乾淨，都不過不失啦！因為間鋪頭比較細，所以座位都好少有啲逼。不過侍應服務態度就好好，好熱情！

我叫咗個台灣麵線加招牌鍋貼。我初初以為台灣麵線只不過係啲特別湯底加啲米線去整，點知原來有好多料同埋係一個好似茨汁嘅湯底。味道有啲特別，不過我覺得有啲太鹹。食完已經開始飽！招牌鍋貼味道唔錯，係多油咗少少。味道適中，比較淡味，啱哂我～最值得讚嘅係佢地杯豆漿，唔甜但係好香豆味。絕對唔係水汪汪嫁。食完啲咁濃味嘅麵線，杯豆漿啱啱好中和番哂啲味道！好飲～

赤丸製麵所 (九龍灣)

今日行咗好耐都唔知食咩下午茶好，心思思又想試下我以前好中意食嘅稻庭冷烏冬。行到門口，見到人影都唔多隻，心諗會唔會係兩年間變成一個伏呢？

不過都係入咗去，望住嗰餐牌我呆咗！我知香港近年咩都加價，但係冇食一年姐，竟然赤丸啲價錢加咗成倍⋯絕對唔抵食！

仲要一入到去，有位手掌咁大嘅蜻蜓係到周圍飛，嚇到我同其他客人差啲尖叫！但係嗰疑似老闆嘅男人都冇即刻叫啲侍應去捉走佢，佢只係話「蜻蜓尼姐」有一刻，真係想即刻走人唔食嫁！

最後叫咗個下午茶，辣肉田園稻庭冷烏冬配巨蜂提子汁。佢用芝麻醬去配嗰烏冬，我覺得有啲留，其實啲肉配烏冬已經好夠味。佢話辣肉，但一啲辣味都食唔到，只係得鹹味。成嗰餐好似係炸醬面嘅烏冬版咁，啲青瓜蕃茄同成個味完全唔夾。不過巨峰提子汁味道唔錯，唔太甜～

McCafe (尖沙咀)

今日想簡簡單單去食啲下午茶甜品，又唔想太貴。行下行下結果係麥當當門口，出面又熱，就唔諗咁多入咗去先算～

位於尖沙咀嘅麥記，同其他嗰啲環境冇咩分別，都係一樣咁嘈同嘈囉！去咗McCafé叫咗兩杯嘢飲，Mocha同埋Hazelnut Latte，咁諗住加錢換兩粒macaron試下。

叫咗Cappucino同埋Raspberry味嘅macaron（$9蚊換購價一粒），味道絕對唔差過出面啲名牌馬卡龍嫁！唔係好甜，Raspberry帶酸，所以我中意依種味多啲。至於Cappucino呢，咖啡味唔夠濃，仲比較甜添（個人唔多中意）～不過18蚊兩粒macaron又真係抵嘅，拎尼過下口癮都唔錯！

綠林甜品 (深水埗)

話說成班人食完晚飯，咁梗係行去深水埗食埋嗰糖水啦！我地㨂咗去綠林甜品，夜晚8點幾，出面勁多人排隊。我地6個人等咗30分鐘到，先至有得食。不過冇計啦，裡面唔多大枱，通常去食都係2-4個人去食，所以一大班人就要等耐啲啦。環境都可以嫁好乾淨，好熱鬧，啲侍應服務都唔錯！不過食中式甜品，唔會食環境同服務，最緊要好味！

朋友同我share咗個什果大明珠同埋豆腐布甸，其他人叫咗馬蹄露，芒果班戟，仲有芒果布甸。

先講下什果大明珠，我地㨂咗配花奶。啲生果好甜，又蜜瓜木瓜哈蜜瓜西瓜芒果，好足料。成個甜品入口涼快，凍冷冷好好味！加埋啲大明珠，口感一流～

至於嗰豆腐布甸，比我想像中好食好多。不愧係招牌之一！以為豆腐冇咩味，點知配埋跟單嘅紅豆同綠茶雪糕，味道平衡哂。紅豆甜為主，綠茶味又濃，食多啖豆腐布甸，啲味好夾|～絕對值得一試。

雖然其他人嘅甜品我冇影到相，不過都試過下味道。我唔多中意嗰馬蹄露，因為好淡，冇咩味。可能我心目中嘅馬蹄露應該係會甜番少少嘅。

另外，嗰芒果班戟完全唔得！層班戟皮冇芒果味，仲要膠膠地嘅口感，除咗芒果肉有芒果味之外，成個好似係cream加膠～

咁當然都仲有好嘅代表嘅。依間甜品鋪整布甸果然有一手。無論係整豆腐味定芒果布甸，味道都好濃，甜度都適中！絕對推介！

品香樓中西風味餐廳 (石硤尾)

今晚成班同事去食飯聯誼下哈哈，對於一個從來都唔知石硤尾係有美食嘅地方，品香樓嘅出現真係好新奇。入到去，可能早咗啲所以冇咩人，入到去只係間平平無奇嘅中式餐廳。但係就坐得都幾舒服，好多大枱好適合10個人以上嘅聚會。裡面都好乾淨，所以唔好話驚中式餐廳會好污漕。

我地5個人叫咗4款餸，有蜜桃沙拉骨，賽磅蟹，椒鹽九肚魚同埋芝士西蘭花煲。

蜜桃沙拉骨，俾我嘅印象係一定好難咬！但係而個唔同，好軟但有口感，唔會咬極都咬唔開。佢個汁酸酸甜甜好開胃，配上蜜桃真係好好味。

椒鹽九肚魚係我第二樣中意食嘅嘢，個人好中意食魚，佢又整到外脆裡面又啖啖肉，不過小心有時都有啲骨。佢始終都係魚尼嫁！絕對係新鮮整出尼，唔會係返炸菜。香口，大人細路都啱食～

賽磅蟹（冇影到相）比較驚喜嘅佢落足料，唔會好似啲酒樓咁少少蟹子蛋白多過蟹肉交貨。蟹肉同蛋白比例好好，啖啖都有蟹肉同蛋白，唔會係好似食緊齋咁。仲有佢冇咩落鹽，所以絕對食到蟹肉鮮味。

最後係芝士西蘭花（加$18仲有伊麵底），唔多中意芝士，仲要配西蘭花。不過我都食咗少少，點知原來味道唔差，唔鹹但芝士味都唔濃。每食一啖，仲有好重嘅罪惡感～太肥啦！