Fullhouse Signature (尖沙咀)

一向經開K11都有留意呢間裝潢一定吸引到女孩子眼光嘅餐廳，蛋糕賣相精緻。電話訂檯都幾FULL架，終於可以一嚐啦!! FULL HOUSE係西餐加星馬菜。但係食海南雞同碗喇沙都要百幾蚊，真係有啲嚇親，都係食返西餐好。

呢度真係一個飯前飯後的新景點，之所謂景點就當然係有瘋狂影相嘅地方，由門口，落樓梯，餐廳LOBBY，左邊應該係VIP房，右邊係大廳，女士們見到已經嘩嘩嘩。地方甚廣，但絕對唔貪心，為擺多幾張檯賺多幾分錢而迫迫夾夾，地方乾淨，地下磚亦能見反光，蒲坐下已見人群四周影相。裝修唔再講，自己睇相就知景點有幾豐富。就連個MENU都可以影一餐啦!!

燈光選用柔和白光，配返主題，優雅不失可愛，恰到好處。太暗黃扮有情調反而令客人想睡。  

飲品點了兩款，都係SMOOTHIES，我係抹茶味，非常清新，選擇配搭甚多，朱古力、香蕉等…
朋友就點朱古力拼香蕉，香蕉味濃，但怕太甜不是我杯茶。Appetizer 點了菠菜蛋批，細細件，兩個人share剛好，批夠脆亦香，菠菜餡亦豐富，夠熱，味道不錯。湯，龍蝦湯兩份share，份量都唔細，龍蝦味濃唔腥，質地夠「杰」，唔會太水，滿意。不過配湯的大蝦係以天婦羅去炸，失咗蝦味，略嫌此舉有點多餘。MAIN COURSE點了一個露筍意大利飯及雞肉蕃茄醬意大利粉
前者味濃，意大利飯質地剛好，非常喜歡。後者，意大利粉帶辣，不過雞肉質地非常差，「鞋」到以為係煲湯煲到唔要個舊豬肉嘅「鞋」同硬，更加無雞肉味道，朋友唔提，我都唔記得係雞肉~甜品方面，好想點有齊蛋糕、奶凍、心太軟…既甜品SET (絕對唔平，$180)，但已經食唔落…唯有點個香蕉船。賣相同擺設已經同傳統香蕉船有極大出入，香蕉非原條上，係切開一片片，前後兩種味道雪糕，係朱古加同士多啤梨，仲有藍莓圍邊，唔少得就當然有CREAM，咁多種食材放入口，又凍又酸又CREAMY，都幾豐富。最特別要介紹就係香蕉船入面有一粒粒甜甜，賣相似係蜜糖粒嘅餅，甜但絕對唔會令人覺得討厭，但係質地好痴牙，適合混埋CREAM食，中和返少少甜度，味道又唔會搶走，幾有趣新鮮。服務OVERALL亦很不錯，又唔會催你，好落意幫你影相。真係好多人影唔停架!!聞說廁所影相都係一個景點，不過當日女廁全塞，感覺不太良好。

整體嚟講係唔錯，食物就比較參差，價錢方面略嫌貴咗少少。

La Crêperie (灣仔)

街頭小食pancake窩夫等等成行成市，大行其道，而法式的Pancake你又試過未？
去完日本，完食一個簡單而隆重的crepe，味道印象就留係腦中。
朋友生日想食Crepe，就搵呀搵，原來全港做呢種crepe的餐廳大概八隻手指都數得晒。

La Creperie仲要係灣仔上環開店，好似係唯一有分店的Crepe專門店，就來試試!!!全英文溝通，但侍應和SUPER(應該係或是疑似高層/老闆)都非常nice。
唔好以為唔普遍無咩人食，少年你太天真了，唔book檯後果就係要等…七點幾到已全場爆滿，地方的確係幾迫架，難怪d人都話上環個間係闊落d。我哋坐高檯，旁邊就係落地玻璃，感覺很不錯。飲品選擇唔算太多，就算係cocktail類都只係約有四五款。

除咗Crepe，每檯都必點cher recommendation，藍青口，鐵桶仔入住，仲有粗薯條佐，*要留意:其實薯條都食飽你。青口汁味道濃，夠香，洋蔥調味非常得宜。然後一人一個Crepe
朋友點的係薯仔餡、蛋火腿磨茹餡我的特別，係海鮮露筍餡，特別在於原來係ROLL Crepe，同平面有分別。Crepe皮薄但味濃，鍾意食露筍會好開心，成條粗粗露筍被成條ROLL crepe包住，海鮮亦甚多，有墨魚仔、尤魚…餡料十足，用蕃茄醬，夠甜夠濃郁，滿口都係餡料，好豐富!! 感覺大愛!!! 不過…有粒墨魚仔未清理晒d殼，當我開懷的一口咬落去，「咔嚓」一聲，d殼卡住係牙繨之間，好易會插損牙肉，都入得幾深下，口唔敢放下，試過輕輕一放，又插入咗，要好小心同耐性先將d殼挑返出嚟，真係有驚無險。

以為一人一個crepe，同小食青口會唔夠喉？哈!! 已經飽到上天了。

不過，甜品係一定要食，甜品選擇非常多，除咗一般cake之外，當然仲有為crepe而設嘅甜品，都係crepe底，不過餡料就換上甜點，成兩大被，花多眼亂，選擇甚多!! 最後揀咗呢個peach ice cream，加埋cream同士多啤梨醬，感覺涼涼地，非常fresh!!順帶一提，如果你有蛋糕要慶祝，只需要點佢地餐廳其中一款甜點(最平好似係40蚊)，就唔會CHRAGE任何費用架啦!! 非常貼心。

牧羊少年咖啡館 (太子)

無數咁多朋友都讚過呢間CAFE，終於有時間去試試，亦正值小妹學完月餅，時間稍夜，CAFE開到半夜兩點，男友說地點可以泊車，其實真不錯。

空間是有點狹窄，裝潢其實不錯，暗淡情調得來又不失多種色彩，檯櫈有不同質料，幾乎張張檯不同，舒唔舒服就見仁見智，只不過我們被安排了我們覺得不舒服的椅子。

CAFE就是這樣，人很多，音樂圍繞全場，前後長檯都係坐了人數較多的客人，我倆被安排在中間，其實真係唔使傾偈，可以對手機食飯，因為嘈到爆，根本聽唔到對方講野。

檯面其實有點細小，男朋友都說「張檯咁細嘅？…」我第一次來，不知上菜安排如何，先給他們補補飛「嗯…可能睇住上呢，如果咁唔醒水一次過推晒上檯，就真係唔會放得到囉。」

友善的waitress姐姐，對答有親切感，加分!!

飲品我點了「黃色」，男朋友點了「榛子朱古力」
黃色味道不錯，是檸檬+芒果+菠蘿的SMOOTHIES，清香，唔太甜，爽，很不錯。

餐湯是羅宋湯，算夠入味，唔似一D餐廳水咁淡。

小食點了帆立貝，上檯熱騰騰，入口都算啖啖肉，醬汁濃郁，入味，絕無欺場，堅係好食! 仲要一客有六隻，一人三隻夠晒滿足!!主菜男朋友點了牛扒，非常熱辣辣，不過只得燒汁，點了七成，其實OVER 7成，坊間10間餐廳9間嘅熟度都唔係standard，雖然有強烈的味道，但男朋友說過了火，有D韌，起碼去到八至九成了…至於呢塊扒要218蚊，抵唔抵都係見仁見智啦。而我點了雜菜咖哩紅粒飯，味道不過不失，咖哩可以香D濃D。OVERALL都無咩大問題係咪？
但點解我講流失客人只需一秒，就要多得一位男侍應，圍觀Serve過我咃嘅都有3-4位waiter，各人都好nice，唯獨是一位身型較高大的男侍應! 

講完野食點都要講下服務嘅~
正當我開頭講過張檯細，男朋友都質疑可以放到幾多野之時…問題就來了
帆立貝用長碟，放在檯的正中心，後來男朋友的牛扒來了，是大圓碟SERVE，上菜的是這身型高大的男侍應，佢棒住碟牛扒，唔出聲，我同男朋友就自然咁推開D碟帆立貝。呢度我還未發現問題所在。
未幾，到我碟咖哩上檯，都係同一位男侍應，佢又係棒住碟咖哩唔出聲，企係我地面前，其實張檯已經無位擺，佢依然係唔出聲唔出手，男朋友好快咁將剩下的帆立貝移到小碟的檯邊，身型較高大的男侍應放底就走。

問題來了，男侍應，你會說話嗎？你會工作嗎？你會動嗎？
作為侍應，見到客人檯面上已經無空間，是否應該幫客人移動位置，而不是齋企唔出聲等客人郁手？
做客人的我們，其實幫手移動也沒所謂，但男侍應以一副老奉等客郁，唔做野，連一句唔好意思，連幫客人騰出空間的意慾也沒有，基於呢個服務態度之下，就算食物不錯(亦唔係真係好食到要翻食不可)，要流失客人，只需要一秒，但創業同守業有幾難，書都有讀過。再講，呢位男侍應可以係工作時間同兩位應該已收工的兼職年輕女侍應玩到眉飛色舞，輕輕講埋粗口。基於cafe一個咁casual嘅地方，傾下偈，客人可能唔太過介意，玩到咁開心連粗口都講埋，係咪應該尊重下你仲係工作中呢？點解上菜時不會說話，不會說不好意思，等客人幫你郁，但竟然可以玩得咁開心呢？

作為老闆的，希望可以指點一下員工。

我們都懂的是，學好要十年，學壞只需一秒。就算其他員工表現再好，呢位男員工表現都足以COVER其他人的表現。

星座冰室 (尖沙咀)

其實想搵平食，老尖真係有難度，終於抽到時間嚟食傳說中嘅蕃茄麵!!!

一向都好鍾意食蕃茄，酸酸甜甜，細個時候記得婆婆將蕃茄炒蛋，蕃茄炒到半腍，蕃茄汁擠晒出嚟，味道特別濃，蕃茄味道一向醒胃。就算到咗大個，生蕃茄都照食，所以坊間所有餐廳有蕃茄麵食我都會試，但味道參差。

點了蕃茄牛肉出前一丁，凍檸茶少甜。先講份量，蕃茄牛肉一丁真係算大碗(對女士而言，一定夠飽; 男士可能要叫多個西多XD) 
熱騰騰，仲要D蕃茄真係舖到碗邊，料十足!!
一丁仲唔使額外加錢呢下先好，不過都成30蚊碗架啦!!
先呷一口蕃茄，係真係蕃茄製成蓉，酸酸甜甜，熱度非常夠，完全令我回憶返婆婆所煮的味道。每一口嘅蕃茄底，都係用足蕃茄足本製成，出面好難可以搵到呢種蕃茄「醬/蓉/湯底」。但唯獨是唔知點解，連麵食反而有少少過鹹。小妹喜歡辣，試完原味，加入辣椒油，嗯……強烈建議千祈唔好咁做，雖然辣椒油唔係加好多，但已經搶咗好多蕃茄味了~~~

仲有牛肉，都真係有牛肉味架!!! 唔似有D茶記咁，牛肉只係一舊肉而完全無味。

檸檬茶要少甜，但入口都偏甜。少甜要較啱自己心水味道，的確係難，即使係你朝朝都幫襯開嘅茶記，唔同師傅沖都有唔同甜度。

總括而言，我相信喜歡蕃茄做食材嘅朋友都會鍾意呢種蕃茄蓉。配搭係簡單，剩係個蕃茄底已經令你回味。對我嚟講，最重要係一口令我腦入面回想多年前婆婆所燒的味道，因為今天想再吃婆婆的手勢已成為不可能，她離開了好幾年，即使味道不完全一樣，但也類似，很難得可以嚐到這種親切感覺。

咖啡弄 (尖沙咀)

一心等尖咀店等到頸都長，老銅店實在太遠人太多。
試業期間快來試試。在九龍區開分店可以分散人流，老實講，當日3點50分先到，見到龍尾一心打家輸數，但其實又唔算多人等，只係一條短樓梯就到地下搭LIFT大堂。而且移動速度尚算理想，等左一個鐘多少少都不為過。(或者加上一心預左要排，係老銅都要等兩粒鐘啦，而家排隊食好野習慣晒，等下已經成自然)

來自店灣的店員依舊好親切，有禮貌。有位年輕既男店員更不時指很喜歡我的頸鍊，這種服務氣氛，真的令人很受落。

店一樣舒服，最令人讚係同老銅店一樣，唔會搭檯，令你食得輕鬆又自在，安排甚佳，這方面香港的餐廳要參考一下。

朋友想點的招牌菜全SOLD OUT，所以點了一個鹹點PIZZA包，外面睇起唻都幾醜下…不過凡事唔好睇外表，個樣唔靚，不過非常好味(我試左一啖)，料足，夠濃!至於我，上次係老銅已經點過鮮果WAFFLE，今次叫個無咁巨既綠茶紅荳。稍為有少少失望，WAFLLE依舊夠熱夠軼，不過味道略嫌太『寡』，因為坊間抹茶配搭要做到出色真的不易。不過此WAFLLE配上CREAM，味道增加左層次。建議都係叫返招牌個兩款會比較安全。飲品方面，迷戀佢嘅果茶，我點了凍，朋友點了熱，大家都非常鍾意。已經捧住個肚，如果仲點奶類同咖啡類，會吃不消…果茶真係一個超好既配搭。香港少飲到咁足料，咁有質素既果茶，真係必然之選!整體唻講非常鍾意咖啡弄，尖沙咀水準KEEP到。下次會再幫襯。*當然…要抽個時間啦~~~