MOS Burger (柴灣)

21/4/2024


好耐冇食 mos burger

通常我會食熱狗嘅，今次見到佢有極上鰻魚rice burger , 所以就試吓 。
$33 ， 都比好大舊鰻魚喎😜😜 ，都幾好食，肥美的鰻魚配上甜甜的鰻魚汁。

我通常會配餐，炸雞髀餐+ 可樂。

今次見到連個杯蓋都轉埋係紙。

韓國宮 (尖沙咀)

22/4/2024

多謝朋友請客 ， 我同另一朋友有口福了😋😋😋😋😋😋

去咗尖沙咀 ‘韓國宮’，感覺上係一間比較耐歷史嘅韓國食店，同埋凝住係有啲貴嘅🤪🤪🤪🤪

入到去全場得我哋一枱初時真係有啲驚，不過主理人韓國女士十分親切，見我衝入去嘅時候，流晒汗就即刻開大啲冷氣😂😂。見到暫時冇乜人，所以又俾我哋參觀吓vip room , 超nice . 當然我都曬吓啲韓文啦，佢就超級驚喜咁好開心😁😁😁

我哋嗌咗個3-4人套餐，有牛仔骨、自選牛肉（另外可以選擇雞肉豬肉）， 蝦 （已除中間位置的殼）配上蒜蓉（或者可以選擇魷魚）、泡菜湯 （好辣、但好味的），海鮮煎餅（有用蛋去煎，好香。海鮮就少咗啲，勁多蔥）、韓式拌飯。另外叫了啤酒、2罐桃汁。
所有要燒嘅食物都有侍應負責，非常貼心。主理人係咁叫我哋慢慢食，佢話通常星期一同星期三都比較冷清（好彩食到中途都多咗三枱二人嘅客，其中嗰兩個仲係韓國人，擺咗個cam喺枱面，唔知係咪YouTuber 🤣🤣) 臨走嘅時候主理人仲同我哋講話母親節去食嘅話，會送’cake’ , 咁我哋以為係咩嘢蛋糕啦，跟住佢俾相我哋睇原來係嗰啲’日式雞仔‘ （去日本會買嗰啲手信嗰種呢），真係好貼心，佢係特登搵人喺日本買返香港。另外仲話如果新年嘅話就會送合桃紅豆餅/糕。

Happy

澤記快餐飯店 (柴灣)

15/12/2023

Bookmark 左好耐嘅柴灣名物之一：澤記快餐嘅巨型魚柳包 （作為港島東居民都係第一次去，有啲慚愧）

其實佢係接近大排檔感覺，所以夏天真係去唔到。其實今日都係接近28度嘅12月15日😵‍💫😵‍💫😵‍💫😵‍💫不過因為下晝要去東區醫院複診，早咗有少少時間，所以可以去食 （食店收五點的）

果然一上枱勁巨型，炸得香口，魚肉厚身之餘好嫩滑，好食。

不過都食得幾論盡，因為佢入邊有醬汁，同埋有蕃茄同青瓜，所以都會整濕少少個包，拎上手擺落口都有啲難度🤣🤣🤣🤣

佢本身應該早餐同下午茶時段就會平啲嘅 （平啲加錢配嘢飲）但係我係晏晝時間去，所以就分開計。

品香樓中西風味餐廳 (石硤尾)

23/2/2024

今晚gathering 團拜，好耐冇去南山邨品香樓了

一行六人，叫咗：

南乳雞翼、半隻風沙雞、椒鹽鮮魷、火焰牛柳粒（一上枱，職員會問我地準備好影相未🤣🤣跟住點火👍🏻👍🏻）、蒜蓉蝦蒸糯米飯、金銀蛋豆苗、一人一杯凍忌廉朱古力就梗咖啦👍🏻👍🏻👍🏻👍🏻👍🏻

味道同以往一樣咁好食、服務同以往一樣好忙但仍然keep 到禮貌、仍然同以往一樣咁多人，坐得有d迫夾，熱鬧。

埋單除翻開每人$160。抵

Ps: 只收現金

和順記 (銅鑼灣)

6/10/2023

我今日食咗個麻麻哋嘅下午茶。


本來諗住去大x樂食炸雞比，但sold out 😭行去美x快餐， 執咗笠😅😅

路過一間叫做和順記嘅茶餐廳，佢聲稱自己炸雞髀好勁, 係雞髀王，所以如果入去試吓。下午茶時間，得一兩枱客。叫咗個下午茶‘生炸女皇雞髀’，個名好有霸氣，所以都有啲期待嘅。

但係我覺得佢完全好似冇醃過， 隻雞髀夠大，仲好多肉，但係冇味，浪費左隻髀🙃🙃🙃薯條雖然冇‘林’，但係唔夠熱. 失望。🙈