The Taiyaki Crispy Hot Sandwich (Closed)

從開飯網發現這間賣魚形燒餅的舖, 賣相像很吸引, 相約朋友去買嚟食眾多口味之, 揀了一份意大利風情同一件香蕉朱古力食, 各有特色 意大利風情有洋蔥, 芝士腸, 茄汁做配料, 咸之中有小小酸味, 很開胃! 芝士腸雖然已經切成粒狀, 但芝士沒有流走, 令件餅保持一點芝士味!香蕉朱古力則是另一番風味, 可以作甜品看待, 最吸引的, 不只是餡, 而是脆卜卜的外層, 特別食到魚尾的時候, 更覺得香脆!食克令我想起同類型的beard papa, 都是一些值得欣賞的日式街頭小食

好好味呀...德國魚魚...新鮮熱辣...外脆內軟...正呀~~~

啱啱買咗幾條「魚」返公司俾同事做下午茶。我真係要講吓呢間舖頭D服務態度同食物質素！D魚餅愈嚟愈「火農」啦！一達達黑斑。可能你會話我俺尖搵野嚟講，又或者堅持「火農」即係香口嗟。。。但係個賣相差，搞到條魚成隻豹咁，點食得落呀？其實食過好幾次都係咁，所以今次我要問清楚發生咩事。點知個哥哥強調話因為皮薄，有D餡料又易「火農」，所以無辦法。唉。。。我真係無野講，不思改進仲要狡辯嘅話，算！

早幾日search openrice銅鑼灣有d咩好食, 俾我搵到呢間好多人話好好食嘅燒餅, 今日就落去試燒餅呈魚形, 做法有點像八爪魚丸一般用個鐵板, 倒入蛋漿焗成! 我買左一件朱古力香蕉吉士餅食, 味道ok啦, 但係唔覺真係好好食, 無想像之中咁脆, 係食到魚尾先有脆嘅感覺, 香蕉唔係好多, 所以蕉味唔覺重! 朱古力味都係唔覺重, 因為都賣到十幾蚊一隻, 我會expect係一條實心, 咬落去會有醬"必"出嚟嗰種滋味!今次叫做試左就算了, 都唔算係差, 只係我要求太高掛

今日去開CWB, 就試試想食好耐既鯛魚燒啦!!!睇網上食評D人話意大利風情好好味~所以就馬上試下先!一咬落去, 外皮脆脆地甜甜地, 好香!見到入面D餡, 有成兩條腸仔!仲有D洋蔥好爽口, 幾好幾好~下次再試下"德國"先!

第一次試呢條'魚'我揀左意大利風情,係openrice見到d相好似好大條,其實唔係,條魚幾""薄""下,幾啖就會食哂不過魚入面真係"芝"味十足,入面有洋蔥,芝士腸,芝士,粟米由於我買既時候,佢係岩岩整好,所以熱辣辣好好食d芝士真係可以拉出黎咁,而且個魚皮脆脆,好好食略嫌細條左少少,可能有人覺得咁細條唔值$15

見很多人推介, 特登去銅鑼灣買番條"魚"食多款燒魚之中, 個人合意有洋蔥, 蕃茄, 芝士腸做餡料既意大利風情, 用蛋漿漢成既外皮好脆, 因為係剛剛做起, 所以熱辣辣, 味道好, 茄汁主味既烤魚餅好開胃, 芝士腸真係有芝士喺入面, 加埋洋蔥食味道更好!只係唔係好明, 點解個餅一定係魚形?

睇住佢既排名越昇越高, 都真係要去試吓呢間野係唔係真係咁好食呢..小妹我食既係一個朱古力加香蕉味既炸魚形餅, 搞笑既係原來每買一個餅就可以玩即中獎, 結果中左杯可樂味道其實就無咩特別, 只係一般既朱古力加香蕉咁啦, 皮都算脆, 不過個皮都只係甜甜地既格仔餅嗰種味, 無咩驚喜..唔難食, 不過只係個樣比較得意

試左喇, 傳聞好正脆得嚟好食到飛起既Crispy Hot Sandwich 我終於都買左件嚟食, 真係好好食呀意大利風味的夾餅, 有洋蔥,腸仔, 茄汁做餡, 魚形既設計, 加上脆脆既外殼, 真係一件好好食既小食, 仲有好多種唔同既風味, 例如薯蓉, 大千雞, 仲有朱古力等甜味魚, 真係咸, 甜通殺, 唔怪得咁多人食..哈哈, 好似幫佢寫鱔咁既口吻, 不過佢真係好好食架

平日常常路過此店，今日終於捧場試一試呢!!有四種口味，於是點了最穩陣的味道--德國的薯蓉芝士好好彩啊~~俾$$既時候見店員捧著新鮮出爐的德國魚仔餅!!熱辣辣的，咬落去仲有d芝士黏著，好好味丫!!下次要再試下其他味道: )但係十五蚊一小個真係貴左dd,不過都可以食下既~~最緊要係趁熱食丫大家!!

早前閒逛銅鑼灣，路過喱間著名ge鯛魚燒店，黎遠已經聞到好香喇，怪獸先生都捉唔住我喇，因為我已經一支箭咁衝左埋去！我諗緊要紅豆定玉桂，怪獸先生就幫我揸主意買左紅豆魚仔比我食喇...真係好！不過個架冇，要等佢即刻整，咁仲好新鮮熱辣先好食嘛~其間都好多人買呀，因為d魚仔真係好香好得意！終於都等到喇...拎係手到熱辣辣，所以都等左陣先食，我喱條魚仔都燒得幾靚，睇到塊魚皮個色都燒得好平均下，仲有一睇條魚仔都覺得超多餡的，因為d紅豆餡現左d出黎啊！第一啖食落口，真係好香脆，再食多啖，食到紅豆餡喇...唔會太甜，係真係有豆味ge個種呀，i like！所以我就算剛剛先食完午飯，都要撐住個肚食哂佢呀，Yummy！

上次食完好好味, 今次再食紅豆味見架上有貨, 但佢唔係畀個d我喎佢畀左剛整好的我, 熱到出晒煙的見到都開心但誰知之後食到滴汗因為真係太熱, 要不停吹先可以放入口中食第一口時, 食到有怪味食多口時, 原來係燶味再望望條魚仔, 係全啡色的但買左, 都要照食, 無理由咁浪費, 又唔想行返轉頭叫佢換 (其實唔知佢地會唔會換)但最後都係食剩條魚尾如果只食餡, 係完全無問題的, 一d事都無, 但今次問題係個皮, 係脆到燶左下次唔好了我去個時係兩點半到, 無人的, so the staff was very nice to me.

今日的午餐食左兩條，已經係拎左返公司先食，但都仲係好熱同好脆~~1. 原味紅豆由於個人愛好甜食，餡料好多，亦好甜，所以覺得好好味。2. 意大利口味同原味完全兩個感覺，口感好豐富，好多芝士，不過腸仔同整體感覺好似唔係好夾咁。同事話德國好味D。P.S. $15/1 $40/3 $60/5

某日經過這裡，看見有個牌大大隻字寫了新口味『banana chocolate』就通知了非常喜歡香蕉朱古力的朋友，今天就來了！原來三條$40 ($15@)，買了兩條『香蕉朱古力』，一條『紅豆』我見有條 display 香蕉朱古力魚『lone』了，問收銀員可否要其他的，他說那條凍了，不會賣的 然後去了citysuper food court 品嚐我們也先吃香蕉朱古力，咬第一啖就已經覺得好好味，好香。第一啖（魚頭）及最後一啖（魚尾）也是充滿custard cream!! 魚仔餅內裡有香蕉肉，亦有朱古力味。雖然買了十分鐘後才吃，但依然是脆的！我不是非常喜歡香蕉的但也覺好好味，何況是喜歡朱古力香蕉的！然後吃紅豆魚，即刻覺得『失色』了，還有這次的紅豆過甜…

開完會出來已經係晚上九點十五分，可能已經餓過龍，沒有太大胃口，心想在街邊買點小食搞掂一餐。誰知結果是買了魚型食物曾幾何時，The Taiyaki是十分火爆的。還記得剛開業既時侯我都想湊熱鬧試下新野，但那插針不入的場面令我即時卻步。如今再來，已經不用再排隊了，香港人的口味轉變得真快。眾多選擇之中，揀了German Potato Cheese，餡料即是薯仔、芝士、洋蔥和煙肉。十分好彩，存貨剛剛賣完，我的那件是即製的。新鮮出爐，當然夠晒燙口。外層有點脆口，裡頭的薯蓉幾幼滑，煙肉和洋蔥也能帶出香味，惟嫌佢既芝士不夠香濃，否則會更好。總的說，熱辣辣的芝士薯餅，是幾好味的。$15/個，正常情況之下一定唔夠飽的，但今次…可以了，再留點空間返屋返飲湯好過。