littleyee的個人專頁

上次食花膠燉鮮奶，又貴，花膠又細塊，味道又差，諗住冇下次！ 今次老公話要食甜品，過年冇其他甜品舖開，唯有俾多次機會佢，點知又係失望！今次叫咗四樣嘢，啫喱同芒果布甸，呢啲咁普通嘅嘢諗住唔會好難食，點知真係估佢唔到咁難食啫喱好硬好似啫喱糖咁，芒果布甸冇乜芒果味叫佢俾花奶，點知得一細盒，我叫兩樣嘢點夠分呀！ 咁樣做生意真係唔得囉！南瓜芋頭西米露，我見啲食評話好食，諗住試吓啦，點知冇甜味，連南瓜都唔甜，我都唔覺得自己食緊糖水蛋花馬蹄露，呢個特別啲，超級多馬蹄，好足料，冇乜糖水，好似食緊馬蹄糕咁，又係唔似食緊糖水好後悔比第二次機會佢，嘥咗個quota! 一定唔會有第三次！ …查看更多

喺太古城想搵間餐廳食飯，間間都排長龍，想快食又想有質素，有咩方法呢？🤔Treats 幫到你！ 呢度點餐全自動化，可以online order，又可以用machine 螢幕點餐，非常方便！嚟到呢度，點可以唔食呢度最出名嘅黯然銷魂飯！叉燒半肥瘦，隻煎蛋係流心蛋，加上燒味飯嘅靈魂甜豉油，真係好好味！另外加錢叫咗杯烏龍茶珍珠，呢杯飲品就普普通通啦。我朋友叫咗個Carbonara, 個賣相好得，份量好多，我朋友話味道同喺意大利餐廳入邊食差唔多。如果唔介意嘈吵嘅環境，加上呢度嘅食物質素真係唔錯，又容易搵位！真係可以嚟多啲！ …查看更多

有朋友推薦喺觀塘呢間食Bagel嘅小店，一直諗食bagel做午餐會唔會唔飽㗎？我印象中嘅bagel係好硬又無味嘅麵包🥯，今日嚟呢度食飯真係大開眼戒，原來可以有咁不一樣嘅麵包！我叫咗個Bagel Queen，有雞肉火腿菠蘿做餡，雖然雞肉同火腿有啲乾，個菠蘿油畫龍點睛嘅效果，非常Juicy！雖然個麵包五顏六色，但係原來佢係自家製無添加色素，全天然，非常健康！食完個包，加少少錢有個低脂岩鹽咖啡，嘩！好好飲喎！拍得住出邊賣三四十蚊杯嘅咖啡☕️再叫咗個朱古力蛋糕甜品，賣相好靚，味道都好好！食埋甜品真係好飽！呢間小店坐位唔多，如果嚟食，最好book定位。…查看更多

八點幾放工在銅鑼灣搵食，本來想求其食間就算，但喺世貿中心門口見到呢間新餐廳，食物多元化，又有蛋包飯，又有日式甜品 ，好似好吸引，一於對自己好啲！我叫咗個日式肉汁蛋包飯，加$30有沙律同酥皮粟米湯，個湯粟米湯超級好飲將個個酥皮浸入啲湯度一齊食，勁好味個沙律就非常普通，叫做有啲蔬菜食吓，咁呢餐無咁guilty呢個肉汁蛋包飯賣相好靚，入面啲飯係蘑菇炒飯，都幾好味！終於我嘅主菜出場！宇治抹茶芭菲見到已經口水流，每一層都有不同嘅嘢，上層有抹茶雪糕加cream ，配上紅豆加蕨餅，好有口感，仲有塊脆餅好好味！ 呢度仲有北海度蜜瓜日式疏乎里，好似好好味，可惜只在下午五點前供應做嘢咁辛苦，一於對自己好啲，下次weekend嚟食！…查看更多

今日約咗朋友食午餐，想喺銅鑼灣搵間餐廳坐低舒舒服服傾吓計，呢間餐廳喺禮頓道人流少啲，應該可以坐耐啲。我真係好鍾意食英式早餐All day breakfast，每次嚟到必叫，呢度嘅英式早餐非常正宗，同喺英國食到嘅英式早餐係一模一樣，份量好大，一個人真係食唔晒而朋友叫咗個egg benedict，都好好食！ 佢好鍾意呢個English muffin加上波菜，同一般嘅egg benedict好唔同㗎食完當然要嘆番杯咖啡，叫咗個Rose Latte，個拉花都幾靚，仲有少少玫瑰花葉喺面坐喺度傾吓計咁就過咗一個下午，順帶一提呢度有outdoor嘅枱，望住條街食都幾relax！ …查看更多

我好鍾意呢個品牌嘅傢俬，非常有質素，見到灣仔呢間傢俬店嘅地下，好似一個綠色森林！ 原來係一間 cafe! 喺呢個灣仔鬧市，見到咁多綠色植物，人都放鬆啲我當然就叫我至愛嘅All day breakfast，賣相𣎴過不失啦，味道就好一般，個牛角包都唔脆嘅另外叫咗個紅菜頭意大利飯，好似好健康咁，味道又出奇地好食喎！嚟到cafe點可以唔叫返杯咖啡呢！望住啲綠色植物，嘆番杯cappuccino，咁先係一個relaxing weekend! …查看更多

以前去過某出名食綿綿冰嘅甜品店食過，對綿綿冰並沒有好感，覺得只係一啲冰上面加糖漿其實有咩咁好食呢？今日有女性朋友指定話要去呢度食日式綿綿冰，咁我唯有捨命陪君子我哋叫咗一個伯爵茶綿綿冰，要90幾蚊，都幾貴，食入啲冰入口即溶，伯爵茶味好濃，入面仲有啲白玉嘅餡，煙煙靭靭，好有層次，真係好好食，呢個綿綿冰令我對綿綿冰完全改觀！“Our food is icy BUT our heart can warm you” 呢句說話真係好有意思！今日天氣好凍，但係呢個綿綿冰就算再凍都一定要食！ 因為食得出店長對食物嘅要求同熱誠！佢啲綿綿冰係用日本進口嘅水整，部機亦喺日本買返黎，所以同喺日本食嘅質素一樣咁高質，非常好食！…查看更多

今日約咗班好姊妹食飯，想搵間比較舒服嘅地方坐低傾計食飯，一諗就諗到樂天皇朝，因為早嚟到，唔駛等位就即刻可以有枱!呢度枱同枱之間好闊，加上每張枱有兩個大盒可以俾你放手袋入去，咁女士們就唔駛拎著個手袋食嘢，真係好貼心👍🏻👍🏻嚟到呢間餐廳當然唔可以唔食佢最出名嘅八色小籠包啦！食呢個八式小籠包我覺得就好似人生咁，人生有好多隻味道，並唔係每一隻味道都係你鍾意嘅，總有一啲味道你未試過就好想試，但係試咗之後其實原來最原始嘅味道就係最好！ 呢個芝麻醬油麥菜，真係好清新，我好鍾意！醉雞同四季豆就不過不失啦，呢兩款通常都唔會衰嘅！要特別介紹呢個甜品《心太軟》，真係好特別! 其實係年糕釀入紅棗，甜甜地又有咬口，好煙韌，好好味！…查看更多

有朋自遠方來，指定要去利東街食飯，咁唯有上網搵吓利東街有咩嘢食，見呢間韓國嘢好似幾好，一於試吓！頭盤每人都有一碟三式小食，同一般韓式餐廳有啲唔同，似西式嘅小食多啲。叫咗個手工海鮮泡菜煎餅，外脆內軟，好好食！仲有叫咗碟煎牛肉餅配年糕，呢個都幾特別，味道唔錯！可惜份量有啲少食韓國野當然唔少得石頭鍋飯啦，但係佢個賣相好似冇咁靚! 味道就不過不失啦！呢度地方都幾大，仲有2樓，如果一大班朋友夜晚嚟食，仲可以喺2樓包間房添。…查看更多

其實有幾好食呢？點解個個女仔聽到Lady M都雙眼發光？今日放假專登去IFC見識吓! 平日下午四點幾，點解仲有咁多人排隊？呢度座位其實好少，仲要排隊條龍要等兩輪先可以到我，我等咗幾不多四十五分鐘先有位坐。呢間餐廳所謂坐嘅位置並唔係一間鋪頭入面，佢只係喺商場啲行人空間中有幾張枱俾你坐，所以當你食緊野嘅時候，喺商場路過嘅行人都會係你身邊經過。食物賣相真係好靚，但味道好一般。一件蛋糕要成七十蚊，加埋杯嘢飲要過百蚊，貴過一餐飯，係咪真係值呢？呢度嘅環境令我覺得唔值囉…查看更多

週末好想搵個地方輕鬆吓，喺淺水灣想搵間比較平又好味嘅餐廳，呢間餐廳一定係不二之選。淺水灣沙灘真係好靚，坐喺個餐廳望出去，真係令人好放鬆:)放假當然食我嘅至愛早餐egg benedict，賣相雖然普通啲，但味道都幾好食㗎！我個女性朋友最鍾意食佢個沙律，可以揀small portion，啱晒減緊肥嘅朋友! 呢度仲有個自家製lemonade, 糖漿可以自己另外落，咁就唔會怕佢太甜！可以坐喺度慢慢食個早餐真係好寫意！…查看更多

曾經聽朋友講火炭有間蒸氣火鍋好好食，今晚咁凍，即係上網搵吓邊度有得食呢！呢度地點都算幾偏僻, 唔揸車都唔知點樣嚟到。叫咗個海鮮二人餐，頭盤有一口和牛，味道都幾好，入口即溶我見食海鮮就當然叫白酒飲吓啦，老板介紹咗隻法國嘅白酒，味道都幾甜，同海鮮好夾!個二人餐送一隻波士頓龍蝦，都幾大隻喎！個扇貝、魷魚同蝦都好新鮮！最後當然係最期待嘅粥底，個粥底吸收晒所有海鮮嘅精華，超級甜！好好味！買單八百幾蚊，以咁嘅質素來講都算幾抵食！…查看更多

爸爸生日又適逢新年，搵間特別啲嘅中菜餐廳一家三代同堂去食飯。有米芝蓮嘅莆田係喺新加坡好出名嘅福建菜，其實福建菜係食啲咩㗎呢？一於去試吓。去到門口先見到財神，小朋友已經好開心，不斷要同佢影相過年無得散叫小菜是常識吧，咁叫咗個六人餐。好快就上第一道菜《撈起、撈起》，雖然唔係第一次食，但第一次餐廳職員會一邊幫你將配料倒入碟，一邊不斷講新年祝賀說話，好好服務！其他食物都好好食，最特別係炸豬手，內軟外脆，非常好食，連我阿媽話食咗五十幾年豬手都未食過咁好食嘅豬手，希望大家食完就身體健康，橫財就手 ！…查看更多

我每星期都一定會去灣仔合和大廈食飯，喺合和食咗咁多間餐廳都唔知道呢度有間越南餐廳，今晚元宵節一於去試吓。去到餐廳見到冇咩人，都知道有啲唔對路，但心諗越南野食，差極應該有個譜㗎，所以點都要試吓。我叫咗Dinner set嘅海鮮雞扒喇沙金邊粉，另外加個粉包。喇沙個湯底好普通，只有蝦係海鮮，粉包入面好少餸。我朋友叫咗泰式蛋包金邊粉，毫無驚喜，味道一般。其實呢間餐廳點解算係越南餐廳呢? 好似只係一間普通亞洲菜，加上普通味道的普通食物…查看更多

上年去夏威夷食過poke bowl之後，一路都希望可以喺香港食到，見到銅鑼灣有間夏威夷餐廳，一於試吓夏威夷嘅poke bowl魚生飯先! 呢間餐廳係先到櫃檯俾錢之後會送餐嚟到你個位，但佢冇任何號碼牌或者任何記認，咁送餐同收錢又並唔係同一個人，所以當我見到好多遲過我點餐嘅人都已經有魚生飯到，但係我嘅餐遲遲都未到，咁我已經估到應該係送錯咗去隔離枱。 追問下，終於有魚生飯送到我面前喇，但係見到個飯並唔係我畫嘅魚生加配料，真係非常混亂！其實點解唔可以好似快餐店咁有個號碼牌咁咪唔會搞錯囉！個魚生飯味道一般，同夏威夷食到嘅實在爭太遠，最好味竟然係杯菠蘿特飲，夠大杯！…查看更多