ryuryu1122的個人專頁

因為外賣平台做緊優惠所以叫咗韓式炒年糕同韓式炒粉絲試下。香港啲韓國菜好多都好貴但味道又唔係特別好食，但Exodust真係有驚喜。首先份量係好大份，大份到我係分咗2餐食。之前叫過某間連鎖韓國餐廳，同樣嘅價錢韓式炒年糕竟然得個10舊都唔知有冇，但exodust嘅韓式炒年糕份量多，而且個韓式辣醬唔係一味得個辣字，係食到真係韓國個種甜辣嘅味道。加上我就算翻熱再食，個醬依然係好濃稠，唔係水稀稀個種。韓式炒粉絲都係份量好多，2個人食都夠食。欣賞呢間新開日韓式餐廳，價錢合理份量多，希望繼續保持到水準。…查看更多

朋友生日想食海鮮就簡咗呢間喺尖沙咀H8嘅海鮮主打餐廳。 熟食SHAKE SHKAE海鮮選擇有3個SET,我地簡咗A set可以簡3款海鮮，先簡海鮮，再簡醬汁，海鮮都有列明每款海鮮數量，醬汁有3款可以簡。另外我地再叫咗主菜同小食，有軟殼蟹蛋麵同蟹餅。 軟殼蟹蛋麵份量唔多，麵嘅口感唔喺特別彈牙，味道普普通通，另外軟殼蟹都唔係特別爽脆。蟹餅係見到有人推薦所以叫，佢係一個咁上，味道都係冇咩特別，普普通通。 海鮮就係有一個膠袋連托盤裝住，食之前店員會幫你shake下佢，再開袋。海鮮都新鮮，肉質都鮮嫩，成餐最驚喜就係個醬汁，我地叫咗檸檬牛油汁，同我地簡嘅海鮮味道好夾，特別同蝦最夾。 整體而言不過不失，海鮮係值得食，但個蛋麵同蟹餅就麻麻。 鍾意食海鮮嘅朋友可以一試，可以淨叫海鮮食 叫多啲。…查看更多

有時番工辛苦過後，都想食下甜嘢嚟慰勞自己。難得請咗半日假，可以喺出面食完飯先番工司，特登嚟咗又一城食。 因為係日本過江龍嘅鋪頭，所以鋪頭都好多人排，記得初開個陣，同朋友嚟排，差唔多等咗成個鐘先有位。今次雖然係平日，但人流都唔算少，不過一個人食嘅關係，即刻就有位坐。 見到menu有special menu, melty chocolate,無論係相定描述都非常吸引，望到已經流哂口水，而且pancake咁出名，無理由唔試，所以滿心歡喜叫咗。 製作都需時，大概等咗成20分鐘先上，等咗咁耐當然好期待，但好可惜上到嚟侍應幫手倒朱古力醬，朱古力醬竟然喺凝固咗，與其話係倒不如話係「等」啲朱古力醬出嚟，啲朱古力醬係一pat pat咁撻喺個pancake上面。當然知道實物唔會同圖片相符，但係描述係寫熱朱古力醬，冇諗到啲朱古力醬竟然未融，完全同佢所講嘅朱古力熔岩效果扯唔上關係，更失望喺個pancake係痴底，同之前食嘅比完全失色。 今次嘅經驗真係令人失望，希望只係個別經驗，如果唔係都好難再令人支持。…查看更多

每次去親荔枝角長沙灣附近，食完飯如果想食甜品結束每次嘅聚會，都會選擇嚟甜一刻食甜品。 今次2個人嚟，夜晚個餐特登食得比較少，留番個肚嚟食甜品。 2個人叫咗一份芒果吐司，份量當然大份，但我地2女仔都可以食完一份。 夏天嘅關係，芒果啱啱好當造，所以啲芒果肉都好甜，唔會酸，亦且吐司嘅鬆軟程度啱啱好，唔會太淋又唔會太硬，好好食，亦且擺盤又好靚，最底仲有用芒果醬整嘅花紋去襯托成個吐司，個樣睇得又食得，CP值非常高。 甜一刻真係非常值得幫襯，甜品種類選擇多，而且價錢合理，味道當然唔洗講係好食，最緊要係連擺盤都有心機，色香味俱全。荔枝角附近有好多餐廳仲有戲睇，如果同朋友喺附近食完飯，步行行過去甜一刻都唔遠，仲可以消化下先，空番少少肚出嚟食甜品。…查看更多

鋪頭喺一個比較角落嘅位置，附近係街市，所以通常嘅客人都係住喺附近居多。鋪頭店面比較細，店內都係2人枱，除咗室內，亦可以坐喺室外。鋪頭內所有擺設都係同狼有關，真係好似入咗狼穴咁。可能因為平日關係，人唔算多，上次周末嚟就需要等一陣先有位。 餐點選擇方面，除咗menu上嘅固定餐點，每日晏就都會有2至3款當日午餐。之前同朋友嚟有食過當日午餐，今日自己一個人嚟所以試下menu上嘅餐點。 本來係想試下all day breakfast, 因唔算太餓，但想食多唔同種類嘅嘢，但係決定個下見到另一個都係寫住all day breakfast，但係叫all day breakfast box,出於好奇下就嗌咗。本以為係用一個個兜仔裝住，但上到嚟真係好驚喜，係用酥皮包住all day breakfast每種食材，十分精緻，擺盤靚又好食，不過可能對大食嘅朋友未必夠食，但對我食開正常份量嘅女仔嚟講都好夠食。最鍾意係小蕃茄餡，因為其他都係咸嘅，突然食到個甜甜嘅,覺得好refresh。 因為我唔飲咖啡，所以冇嗌到飲品。但上次同朋友嚟，佢表示值得一試，鍾意飲咖啡朋友都可以試下。 鋪頭亦有賣甜點，望落都好吸引，有機會都想試下。…查看更多

同同事星期六打完波就嚟到附近康橋廳飲茶。康橋廳飲菜都幾出名下，之前都有幾次打完波嚟嚟飲過茶。今次4個人嚟飲嗌咗7樣嘢食到，有飯,上湯菜,蝦餃,燒賣,鳳爪,牛肉球,叉燒酥,腸粉。燒賣同出邊嘅茶樓比真係好食好多，個樣望落都精緻啲，用料豐富，而且唔會太乾。蝦餃都係保持到水準，鳳爪就普普通通冇咩特別，個人最鍾意係叉燒酥，一上個陣仲好熱酥皮咬落好鬆化，擺咗陣食都仲係熱，個酥皮鬆化度都係一樣，真係即叫即整。牛肉球我食就冇咩特別，但有同事唔鍾意食芫荽，佢就話個芫荽味唔重食落都唔錯，所以如果唔鍾意芫荽味但想食牛肉球嘅人都可以嗌嚟食。整體環境都坐舒服，食物水準保持得唔錯，但唔知係咪太少侍應，好多時想搵人幫手都冇人，連埋單舉咗好耐手都冇人理。…查看更多

3個人食晚飯唔知食咩好，又唔想煮，所以就上外賣網睇下有咩。見到一豚可以送到過嚟，咁啱又有3人餐啱啱好。送到嚟後先發現3人餐原來有原隻豬手，仲有一大盒雞，再加豆腐同鴨胸，仲有3盒白飯，份量到多到真係團年飯嘅份量，3個人真係食唔哂，最後分咗2餐，第2日晏就再食。味道而言，雞就係普通燒味店買到啲雞肉，不過不失冇咩特別。豬手就係黑椒豬手，都係普普通通冇咩特別。反而豆腐同鴨胸略勝一籌，2樣都特別適合送飯，鴨肉滑肉質軟嫩，豆腐嘅調味唔會太咸個汁又啱送飯。如果大食嘅朋友叫3人餐一定夠食有餘。…查看更多

甜記餃子幫襯過好多次，基本收工食飯諗唔到食咩會都幫襯甜記，因為價廉物美，皮薄餡靚，餃子款式多，可以簡煎餃或者湯餃，單拼又得雙拼，淨餃子又得，配麵餐又得，咁多得簡好難會食得厭。湯餃嘅話覺得最好食係椰菜雲耳冬菇豬肉餃，煎餃最常嗌嚟食就係粟米芝士雞肉餃。而家最正係有自家製菜脯，用嚟送麵送餃一流。雖然唔係好食得辣但都忍唔住會食，鍾意食辣嘅朋友一定要試下。鋪面唔算大，所以人多時都要等下，同埋位置比較窄啲，如果個袋大啲就坐得辛苦啲。鍾意食餃子一定要試甜記。…查看更多

同朋友2個人食，朋友想食小籠包，於是就簡咗小籠包出名嘅樂天皇朝食。兩個人食嘅關係冇叫好多食，叫咗麵同埋6個小籠包，仲叫咗個甜品。小籠包簡咗蟹粉小籠包，好易夾得起又唔會穿低，一咬落去好多汁，皮係食到蟹粉味，但反而餡食唔出有蟹粉，略為失望。不過都會想下次試下其他味。三樣入面最鍾意係豆沙餅，唔會太甜，而且皮脆得嚟，又唔會覺得油膩，送茶食好正。麵就冇咩特別，中規中矩，都清淡唔會太重口。下次會想再試下其他味道小籠包，同埋其他點心類。…查看更多

同同事一直好想飲茶，但公司附近冇咩酒樓，發現可以叫外賣，於是簡咗呢間點心專門店。點心選擇多，而且都係我地想食，特別被炸鮮奶吸引到。送到嚟所有點心都仲係熱，真係好驚喜。菜苗餃蝦餃啲餡都好足，食落去啖啖肉。炸嘢食都唔錯，特別炸鮮奶真係好好食，好少酒樓有，食到真係好驚喜。仲有樣好驚喜嘅點心係黑糖蜂巢糕，唔會太甜，口感鬆軟，又係好少酒樓或者點心鋪會見到，本來仲驚會好怪，點知同事都對蜂巢糕讚不絕口。而價錢質素嚟講，真係抵食，值得再試。…查看更多