yaunfcheung的個人專頁

係佢係Google Map, 食飯網評價唔錯，所以我lunch試一試。為公平起見，我當然order佢最有名氣嘅“招牌手打和牛漢墜蘭王蛋飯”。一上臺就發現佢賣相唔錯，肯定相機先食。但一入口就發現有以下兩大問題：1) 汁唔夠熱，只可以用“暖”來形容2) 飯係珍珠米，做到珍珠米嘅軟糯口感，但飯味欠奉，而且唔夠熱。 (自問對飯有要求，經常試唔同品種嘅東北/日本/台灣/柬埔寨/泰國米，而且要用IH & 壓力電飯煲煮，提升飯嘅質素)漢堡扒方面，肉汁鎖係裡頭，厚實而鬆軟，但我expect嘅肉味和油脂香欠奉。整體感覺，佢賣呢個價錢，我當然有一定嘅expectation，但佢跟東京嘅“挽肉屋神德”、香港嘅“挽肉と米”有一段距離。…查看更多

從網上得知佢嘅炸雞出名，所以我一家三口特意來試炸雞應該採用三黃雞，所以皮下脂肪較多 (食得炸雞就唔好計較咁多)。而且用類似炸子雞嘅做法，所以雞皮比較薄，唔會有好厚嘅炸粉。一絲撕開雞髀發現雞內好多肉汁，連雞胸都嫩滑。我每次試一間新茶餐廳一定試佢嘅奶茶。世一嘅奶茶做到茶味奶味平衡，飲落口夠滑有一定厚度，係一杯好奶茶。我跟老婆都分別點了蠔仔肉碎湯飯、蕃茄牛肉湯飯。飯和湯都係分開上值得一讚。蠔仔肉碎湯飯有少少胡椒闢腥，而且蠔仔都多。番茄牛肉湯飯正常發揮，但世一比牛肉絕不吝嗇，牛肉量都多。最後一提，整體服務質素幾好，特別係靚靚老闆娘 (當時餐廳全場爆滿，只剩門口位，雖然比較熱但係我哋都接受。用餐期間老闆娘特意提議可以幫我哋轉餐廳內嘅空位。)其實我想講，只要餐廳做好食物、環境、服務，我作為顧客一定會經常幫襯，唔會嘥時間精力北上。…查看更多

特意帶同事去試我心目中嘅世一豉油雞。前菜有溏心蛋、雲耳雪耳、椰菜，幾有誠意。估計佢地用三黃雞，所以雞比較肥但香。雞肉好嫩滑 (雞隻應該慢慢浸熟)，雞皮上食好 (估計用高焦糖色素嘅草菇老抽)，而且豉油有一浸玫瑰露香味。所以一啖雞肉咬入口，有雞油香、豉油香、雞肉嫩滑感，正啊！！睇得出烹調過程絕不馬虎。所以減肥嘅我破戒連雞皮食埋，否則會對唔住師傅嘅誠意。至於其他產品，e.g. 黃酒雞、尖椒皮蛋，就正常發揮。唯一挑剔係有一位女員工比較唔耐煩，影響整個用餐體驗。…查看更多

九龍灣重口味米線首選。今次點了麻辣小鍋米線 (微辣、蘿蔔、豬軟骨)。豬軟骨炆得夠時間，所以軟骨都變成啫哩狀而且夠淋滑。唯一挑剔係肉比較散。蘿蔔就清甜冇渣，係夏天都算難得。遠看廚房發現廚師逐碗煮，用猛火爆香辣椒、肉碎、酸菜等，所以湯底肯定再香d。唔似大集團咁只用電爐加熱預制湯底。我估計佢嘅湯底係偏酸，所以我點了麻辣小鍋米線但麻辣味唔夠。米線份量足夠好大碗，男士一定食得飽。最後一提，食肥仔米線記得留意佢嘅社交平台，因為佢每星期休息一日。…查看更多

趁annual leave去試d冇乜機會食到嘅餐廳，結果選了C2 Lab。由於我係2點先去食lunch，所以唔係peak hour，可以慢慢食。我點了選了沙律&豬鞍。沙律一上枱我就surprised，絕對唔係hea嘅普通芝麻沙律醬配沙律菜。佢有提子、車厘茄、蝦，而且個sauce好開胃，絕對係一個有誠意嘅appetizer。豬鞍煮得剛剛熟，唔會overcook，所以食落去肉質嫩滑，而且食落去有油香。簡單一句總結，我下次會帶一家三口去encore。…查看更多

從社交平台得知大角咀有一間越南餐廳，所以weekend一家三口來試下。我地點了兩個越式法包、一個雞飯。法包係即點即焗所以好香脆，內裡有一層肝醬、酸蘿蔔、而且牛肉豬肉夠juicy，好食。雞飯嘅雞有點overcooked，但飯都幾香。相比之下，佢嘅pho比較出色 (其實我早前都有試過佢嘅pho，但我冇出post。)簡單來講，呢間餐廳嘅定位係做街坊生意，定價合理，而且老闆娘態度友善，好過大角咀附近好幾間連鎖越南餐廳。…查看更多

從網上得知享樂係灣仔跟人家合作開設"Buffee"，而且佢有獨家產品，所以特意來一試。我地點了開心果流心酥、朱古力撻、丸久小山園若竹matcha latte。開心果流心酥畀其他撻大，面層係開心果醬，中間係開心果吉士，職員翻熱後呈現半流心狀態，所以要小心食否則會流哂出來。酥皮好香又薄又脆唔會食到一口油。底層有煙韌麻糬。食完真係好滿足，但略嫌甜度稍高。朱古力撻翻熱後面層朱古力醬都係半流心狀態，中間朱古力吉士醬好香好滑。最後matcha latte拉花好靚，抹茶濃度適中 (如果再濃d再好)食物質素好好，環境幾舒服。由於我地係平日3點幾去所以好易搵位，但餐廳內座位設計比較奇怪，所以我估計繁忙時間去嘅話比較難堂食。…查看更多

我心目中嘅全港Top 3沙嗲牛之一 (長洲陳通記、荔枝角好好運、朗屏永順)。我上一次幫親已經係舊鋪時代。最近係朗屏附近返工，特意來永順食沙嗲牛，睇下佢有冇跌Watt。我點了沙爹牛上海麵、炸豬扒、凍檸茶。沙嗲牛上海麵：整個湯底都係沙嗲而且有花生粒，入口少甜微辣，食落口啖啖濃郁沙嗲味。牛肉肉質鮮嫩。炸豬扒：夠juicy嫩滑，層粉漿唔會太厚。凍檸茶：竟然有五大塊厚切檸檬，而且茶底唔苦唔澀，茶色清澈 (唔似得某連鎖餐廳嘅“冷壓檸檬茶")。最後我想講，職員服務好好，等我地全部坐低先遞上餐牌，而且對食客嘅問題都有問必答。整體表現依然一流，希望永順繼續努力。其實香港飲食業只要自強，做好食物服務環境一定有本地客欣賞 (好多有名氣有歷史嘅餐廳都有一副唔憂做嘅心態，所以食物和服務質素都跌Watt)。…查看更多

經開飯網訂了一個7人餐，由於旺角新店開張再送多半隻片皮鴨。鴨皮油光不足，鴨肉有d柴唔夠肥 (好處係比較健康，缺點係食落口唔夠鴨油香)。小籠包皮唔算薄，但湯汁充足。東坡肘子反而有驚喜，炆得剛剛好，皮好腍，肉嫩而唔會柴。上海粗炒份量十足，每條麵條沾滿汁料。松子魚、蜜汁火方就正常發揮。農家醬爆牛肉、鮑魚雞煲其實係有鑊氣，只不過佢地都幾辣，所以好幾位家人都食唔到，建議餐牌標示。瑤柱蛋白炒飯炒得夠乾爽，飯粒粒分明，碟底都冇乜油。甜品腰果露稀咗少少。服務質素都係正常發揮。由於坐係房內，待應唔知道房內情況，所以我地有時都要自己添水。侍應間中到房內收碟。…查看更多

間中都會幫親嘅點心店。雖然點心選擇唔算太多，但定價都算合理，而且唔洗加一。來到一定食佢嘅酥皮叉燒包。坊間都有好多餐廳都有提供酥皮叉燒包，但添好運嘅酥皮叉燒包始終技勝一籌。首先酥皮可以覆蓋整個叉燒包，入口夠熱，而且包內嘅餡鹹甜適中。其他點心就正常發揮，但至少品質控制好過唔少點心店/酒樓。最後值得一提係佢嘅皮蛋瘦肉粥。一上臺發現佢喺老火粥，所有材料已經跟粥底融為一體，所以佢比生滾粥食落口更加濃郁。…查看更多

呢間定價都算親民 (始終係深水埗區開餐廳唔可以定價太高)。點了安格斯牛肉燒汁牛脷burger、蕃茄雞肉risotto、喇沙pasta。Burger漢堡有肉汁，但牛脷可能燒汁嘅問題鹹左d。薯條粗身夠熱。蕃茄雞肉risotto反而唔錯。有蕃茄做sauce，所以食落口唔會太膩。喇沙pasta蝦肉爽口，有椰汁喇沙味。唯一敗北嘅地方豆卜完全唔夾個pasta (始終唔係一個喇沙湯，豆卜好難吸收喇沙sauce)。最後加錢換了開心果巴斯克，口感都滑，但被家後嘅巴斯克比下去。食物質素表現正常，但服務唔錯和價格合理，所以都值得翻兜。…查看更多

一家三口再次出動搵野食。見網上comment話佢嘅上海湯麵唔錯，即管一試。點了豬扒上海麵+墨魚條上海麵+筍雞肉豬扒上海麵。湯底類似日本拉麵嘅湯底，但係飲一啖後發覺一陣大地魚香味，而且去油，所以唔似日本豬骨拉麵湯底咁咁重口味負擔重。上海麵有咬口，唔會煮得過火。炸豬扒質素好高。首先唔會炸到黑蚊蚊 (應該唔係用萬年油)，肉質鬆軟而且有肉汁，醃得唔重手。墨魚條都唔錯，內裏有粟米、蝦肉，十分彈牙。筍雞肉就雞肉嫩滑。整體質素唔錯，性價比幾高。…查看更多

食物質素ok，但服務好差。叫左燒牛肉、蒜蓉包、乾炒豬肉河、飲品。燒牛肉、蒜蓉包、飲品好快就到，但乾炒豬肉河足足等左45分鐘，隔離檯遲來但d炒粉面仲快過我地上檯。見唔對路就問問店員，全店最後生嘅店員check完電腦後就黑面叫我地繼續等。最後有另一個店員幫我地跟進先有得食。用餐後去openrice睇comment，原來d負面comment都係話服務差，甚至話該後生店員黑面/反白眼。其實食野我唔需要好好服務，但唔洗受氣和等好耐啊，冇下次。…查看更多

自問係星馬菜fans，見有新馬拉菜餐廳就同同事一試。今次order左老鼠粉、肉骨茶、咖央多士、檸檬薏米水。咖央多士嘅牛油只係搽一搽算數，並非一塊薄薄嘅牛油。見到咖央多士係茶水吧阿姐整，佢可能唔知道牛油係咖央多士嘅重要性。肉骨茶藥材味唔重又冇乜胡椒味，所以我唔知係新加坡/馬拉派肉骨茶。老鼠粉普通，分量夠大，足夠兩位女士食用。薏米水薏米好少，但味道唔錯。期待老闆調整食物質素，始終希望香港多d星馬菜餐廳。…查看更多

聯和墟出名食豬手/腸粉，但始終會食到悶，所以都要發掘新餐廳。近日就發現有一間新鋪專賣雞湯和魚雲湯，所以趁weekend入去試，分別叫左家鄉雞湯跟飯+醉雞跟米粉。一碗家鄉雞湯大概有八件雞加幾塊冬瓜和木耳，d雞夠嫩滑，有雞味，但估計成本問題應該係冰鮮雞。醉雞夠入味，有酒嘅香味而唔苦，分量都合理。呢間鋪會入我嘅長期飯堂list。…查看更多