fuifuib的個人專頁

由呢間野啱啱開嗰陣開始食撈麵、湯麵、飯基本上都好好食😋而且價錢不算貴，有性價比只係太早收，有時晚飯想食但食唔到🥲以前啱啱開個陣記得開到好夜😂咁今次我外賣自取個雞絲湯濛，返到去先發現佢俾錯咗撈濛🥹雖然我好好好鍾意食撈濛！但咁啱個日有啲腸胃炎，唔可以食咁油膩先叫湯😭於是就打電話去問返，本身諗住落去拎返個湯就算。點知！點知！！個哥哥仔話直接送過黎俾我！好感動‼️♥️真係冇諗過佢會送過黎，超級感動仔🥹咁啱我唔舒服，真係唔好想郁。又做緊嘢，其實唔係好行得開。真係好感動🫶🏻我個到距離有啲遠，又要行上行落，一開始打電話，哥哥仔都已經話唔係好識路，但都幫我送咗過黎，辛苦哥哥仔了🥹🙏🏼仲送咗2個春捲賠返俾我♥️第一次試個春捲，脆卜卜好好食😋我之前遇過個啲俾錯/漏野嘅鋪頭，全部都係叫我自己去拎返，或者下次補翻😕真係冇遇過好似呢間，自發性咁話要送翻黎嘅鋪頭。我其實唔係好介意錯單，做過飲食都知，忙起上嚟真係兼顧唔嚟。但係做錯之後點樣補救係好重要‼️憑住佢送翻過黎咁負責任呢樣嘢，再等於佢打救咗腸胃炎嘅我😂所以雖然間舖離我有少少遠🤏但係我以後會多啲過黎食♥️…查看更多

平常都幾鍾意吃食呢間野嘅早餐外賣自取試過，堂食都試過。本來覺得係附近抵食嘅茶餐廳早餐。此前唯一不解嘅係，我外賣自取叫個菠蘿包，佢都係用個紙袋裝，點解要收多$2外賣盒？唔緊要，此事無妨。雖然聽過呢間係劣食+劣態度出名但係未試過午餐晚餐下午茶，唔想人云亦云，所以想親自試下。果然，聞名不如見面😀大年初二要開工，於是叫個外賣一個炒伊麵加熱菜蜜15:21 openrice外賣下單15:38 到達，未有，ok，好正常15:51 openrice自取嘅半小時已經夠鐘。我問A啊姐，佢話幫我問下。我隨口話等了半小時啦，佢即刻態度轉變黑我面話（大概內容）：「外賣等半小時係需要嘅」喔係呀，等了半小時啦，咁幾時有？😀唔緊要，俾人黑下面啫，唔緊要，廚房慢（我以為），咪等下囉我承認自己語氣都唔係幾好掛🤷🏻‍♀️個場未爆，樓面狂入客。四家外賣機+電話外賣輪流keep住響。但幾個樓面出餐+廚房都慢悠悠。成個餐廳連員工都充斥住悠閒嘅氛圍。一時間都分不清，呢間係cafe定係茶記？佢地到底係唔夠人手，定係太夠人手？唔夠人手就關外賣機啦。夠人手就唔使我等半個鐘頭啦。然後幾分鐘後，我終於真嬲啦。事緣15:56佢拎咗一個外賣出嚟，係一個15:47落嘅電話外賣😀哇呢個咪10分鐘前，我睇住A啊姐接電話，寫個一單外賣？😀原來廚房都幾有效率喎！欣賞！然後又偷望下10分鐘前入去嘅堂食阿叔。哇佢已經食到jap jap聲啦😀😀😀哇！呢啲咪速度！欣賞！然後我問B啊姐，人地已經有餐，我個外賣呢？佢走去問後面hea下hea下嘅幾位後生仔樓面：「個T04廚房整左未呀？」後生仔正係話：「未」然後個對話就完咗了，完咗了！兩位都沒有其他動作。任由廚房繼續漏我單。我再走去問個B啊姐，係咪應該俾返個交代我？我仲要等幾耐？？？佢正係識話：「我咪幫你問咗後面同事囉」？？？？多謝曬呀😀然後時間來到16:05，又一個外賣出嚟。今次係15:35落單嘅袋鼠外賣😀😀😀😀OK fine人哋兩個菠蘿包，點都快過我個炒麵嘅，自我催眠接受事實。呢間餐廳唔跟單做，已經係我等候咗45分鐘觀察到嘅不明文規定。或者規定係要做堂食先，外賣客慢慢等啦。咁今次真係誤會大啦，一早就唔幫襯你啦。然後佢幾分鐘內，即刻出咗幾個外賣。擺到明就係佢完全冇做過外賣機嘅外賣，淨係做堂食同電話外賣（我估電話外賣同堂食單都係入同一部機）俾人催咗之後先發現漏晒單PK啦😀就即刻狂出返。咁我15:51個陣催嘅一次，有咩功用呢😀然後有個肥仔樓面拎住一個外賣出黎叫號。企我隔離等熊貓外賣嘅阿叔走上去，諗住開個電話Number俾佢睇。唔知點解個肥仔同佢講：「網上外賣平台喎」呀叔一邊開手機話係呀！個肥仔又問佢Number呢？呀叔不耐煩了：「我依家咪開緊俾你睇」真的十分不解個樓面個態度🙄我唔知阿叔係外賣員定係外賣自取，反正不解做咩呀叔要俾人咁懷疑對待。16:07 我終於拎到個外賣！漫長嘅等待終於有回報。另外，我替堂食客人新年流流，仲要俾佢收+1服務費感到悲哀。本來落單佢都係用app，出餐都係hea，熱水都係要自己走過去倒，紙巾都唔提供多張，有咩服務可言？仲要佢張服務費海報癡喺counter側邊，啲字鬼死咁細寫係最下面。啲人埋單嘅時候先知要收服務費，O曬嘴。味道不過不失，係份量有點少。不過下午茶呢個份量，呢個地區，呢個價錢都算係咁。不過味道未驚為天人到，值得我用45分鐘時間去等待。都唔覺得我俾錢之後，應該受啲咁嘅服務態度。冇下次。…查看更多

凌晨冇嘢食先寧願買貴少少幫襯下，結果又難食又少份量。本來都唔係個啲打慣食評嘅人，但食到一半，覺得唔忿氣，先影低幾張相出食評。尋晚凌晨一點半左右叫咗外賣自取，一個叉燒飯，幾個串燒，埋單都$180。15分鐘後落去，佢話未有，要再等20幾分鐘，咁就叫佢ok先打電話俾我地。結果去到2點半都仲未打過黎，於是就落去，佢話仲有個蝦燒緊，好快。等個串燒等差唔多1個鐘，真心已經餓死。一盒飯，串燒就三個大盒裝住。4盒野，仲要分開2個袋，以為好多嘢啦，結果牛得兩粒，加多兩粒蔥；豬頸肉得兩塊；蝦得一條。大佬你一個紙袋都裝得落啲串燒，做咩搞咁大陣仗。味道方面真係一言難盡。首先叉燒飯係好食嘅，之前都食過，所以今次叫返。叉燒肉同汁都正，飯因為有豉油所以都好食，同埋有啲菜同溫泉蛋，不過不失。然後到串燒。之前冇食過，所以中咗伏。牛得2粒，韌到乜咁，咬都咬唔到，不吃了。豬得2塊，冇味，有啲凍。虎蝦得1條，有腥味，燒得唔靚，唔想食。牛油金菇，呢個都好難整得難食，係有啲少份量。芝士蛋大啡菇，呢個價錢嗰舊菇唔算好大，正常嘅。但係一切入去就有好大個蛋黃，蛋黃鞋颯颯一粒粒，破壞口感。菇冇咩味，不過好在佢多汁，唔乾。總結：飯係好食，不過希望多啲配料。一個鐘頭等來嘅串燒真係好失望，好難食，好垃圾。門面同外賣包裝整到幾靚都冇用，金玉其外，敗絮其中。明白凌晨食物性價比唔高係正常，不過好多出面嘅串燒凌晨都又平又好食，唔需要係呢到食。去食隔離7仔或者寧願行遠啲食m記都唔幫襯個串燒。…查看更多

我可以說是是這件店舖的忠實fans，食物真的很不錯的，常常會在工作前外賣自取，拿回去吃。唯一覺得是貴店的紅茶味道有點奇怪，不過黑糖鮮奶和豆奶也挺不錯。不過我今次重點不是要說食物，是要說店舖的方式。我外賣自取的，明白吃飯時候繁忙時間很忙碌，但也請員工保持細心。首先我T22號，到達的時候，T21號的客人已經拿了，覺得很快我便會有。可是再等多一會兒，後面的幾個no.的人25、24、23已經出了，我還未有。當然同時也有即場叫外賣的人，場面很混亂。於是我叫員工跟廚房說不要跳單，但員工跟我說openrice的單no.是隨機的，言下之意就是我排頭也不一定是第一個拿到。但本人也有做餐廳，我的餐廳也有openrice服務，單no.是跟順序的，從來沒有出現過隨機的問題。不知道是不是貴公司的機器有問題還是怎樣？更何況，我看見放在一旁的T25號，黏著的單上寫提取時間是53分，而我是47分。那麼為甚麼22號的47分的我未有，而25號的53分已經有呢？我想到的解釋就是一堆單做出來時，廚房倒後做單，那麼早下單的人不是很不公平嗎？這個情況我不是第一次遇到，之前都試過，我後面的no.都拿了，剛外賣下單的人也拿了，而我和另外一個客人早下單的，卻等了十幾分鐘也未有。於是我只能回去處理工作，半小時後能才回來拿外賣。懇請貴公司正視這個問題，我叫得外賣自取就是沒有那麼多時間等待，所以每次都預留時間叫外賣，但卻被後面的客人搶先，那麼排隊有什麼意義。然後就是員工的疏忽。我前面拿外賣的客人有飲品，但員工不小心給了筷子，而不是飲管，幸好那名客人注意到，於是換回飲管。而我則是沒有注意，飲黑糖珍珠奶茶，員工卻給了幼飲管，導致我現在都飲不了，卻不能出去拿很徬徨，熱飲都已經變凍飲了。然後我也聽到一名男顧客說員工沒有接他的外賣單，但我也不知道實際情況如何，不知道是男顧客還是員工疏忽。但要是真的員工疏忽的話，那麼真的要再好好留意，甚至需要考慮在繁忙時間請多點人。最後，在食評打這些真的有些不好意思，原本是想找官網的留言區，但找了找，發現只有ig和fb，然後就沒有了，所以還是決定打在這裡。因為是貴公司的忠實顧客，因此希望你們可以加以改進，不要令我迫於無奈不能繼續光顧。…查看更多