肥笨笨's Profile

太耐冇出街，完全唔知應該去邊度食飯。沿途嘅餐廳唔係收咗，就淨係做外賣😔。行下行下就行到去世界嘅盡頭 (海運大廈)。唔係講笑，我真心覺得嗰度係尖沙咀最遠嘅地方😵講返間餐廳，見到佢有個 Brunch set，仲可以加 $99 free flow 紅白啤酒 sparkling🤩覺得都幾吸引，老婆話之前試過 dinner 都唔錯，咁咪諗住入去試下。點知原來 full booking，要排 walk in，好彩黎得早排第一個，等咗大概三四個字就可以入得。奉勸各位下次想去，記得先訂位。餐廳裝修基本上冇得輸， 樓底高，大落地玻璃，陽光充足，夜晚仲可以望到維港夜景，仲可以坐室外(當然要預先訂)，打卡一流。可能因為二人一枱嘅關係，啲枱都係坐得比較密。侍應人手亦都明顯唔足夠。不過呢啲都唔係餐廳可以控制。員工嘅態度已經算好好，做到xx都冇黑面。講番食物，都算對得住個價錢，個set本身已經有曬頭盤、主菜、甜品。頭盤分別有 mixed seafood platter 同 cold cut。Tartare 好新鮮， 凍蝦就一般，個八爪魚好正👍🏻因為一入門口見到佢個 pizza 爐好正，所以Main course 叫咗 Pizza Edi，另一個就加錢要咗個西冷。個 pizza 冇令我哋失望，果然個爐係好重要。個西冷亦都煎得好好，係值得試嘅。甜品有 Panna Cotta and Tiramisu，果然係招牌甜品，甜度掌握得非常好，作為一個下午嘅結尾簡直係 perfect。另外都叫咗紅、白、sparking 各一杯，冇深究係咩酒，普通 house wine 易入口，同食物都夾嘅。總括嚟講好味、靚景、有酒飲，喺呢個時勢咁嘅價錢，算好好😋😋…Read More

而家將軍澳海旁開咗好多新餐廳，所以搵日放假就去試下。睇咗幾間都係西餐，唔係 pizza pasta 就係牛扒。見到呢間個裝修幾似法國小 bistro 嘅感覺，選擇亦都好似多啲，就揀呢間試下。老婆話想食生蠔同埋牛骨髓，所以叫咗兩樣做前菜。生蠔夠 creamy，平時食都係落兩滴檸檬汁，今次手痕試咗幾滴 mignonette sauce。出乎意料地咁夾。鴨肉不嬲都係我嘅至愛，但係坊間好少餐廳做得好食。呢度嘅 duck breast 非常有驚喜，皮脆肉嫩，佢嘅煮法比一般嘅生，所以如果怕生嘅就未必啱食。呢間一定係會經常幫襯嘅餐廳之一…Read More

朋友生日，就話想食日本菜，所以搵左間居酒屋，可以傾得盡情啲。間餐廳地方唔算好大，但都唔會坐到好逼。去到發現原來仲有個半室外位，如果天氣涼啲，坐出去應該仲爽。人齊之後開始叫嘢食，由於個餐牌都好多選擇，同埋好多手寫當日嘅推介，所以索性叫老闆埋黎介紹。點知老闆一嚟到，佢非常熱情，我問佢介紹有咩Sake好飲，有咩刺身當造。佢都好詳細 咁解釋。最後叫咗一條伊佐木刺身，半板海膽，壽司同埋一啲串燒加支細嘅鳥海山。嘢食質素都算中規中矩，建議最好都係問下佢有咩拿手推介會好啲。雖然啲員工好似唔太熟手，但係老闆非常熱情落力，仲會送到你出門口講拜拜，食 omakase 都唔會咁。…Read More

一碗 Pho，加幾件小食，仲有凍飲。做午餐真係一流。 啲牛肉唔會熟曬，個湯底 清清地唔會太濃味，小食每樣一件啱啱好，有齊我想食嘅炸雞翼、蒸粉包、同埋越式春捲。絕對係會再去。…Read More

記得以前香港都有一間巴西燒烤，佢執咗之後都冇再食過。直到今次，老婆話想食，我先知原來香港仲有巴西燒，仲可能係唯一一間。間餐廳係蘭桂坊斜路上面，經過蘭桂坊嘅時候不禁有啲傷感。Anyway，嗰晚去嘅時候，基本上冇咩人，既然一場嚟到，點都試下啦。嚟得呢度嘅都係食 Buffet，先講下個 salad bar，都算好多選擇，基本上喺自助餐食到嘅佢都有。有 3 款芝士同埋 parma ham，青口同埋 tuna tiradito 都係正嘅。呢度仲有個傳統菜式 Feijoada，用嚟撈飯出奇地咁好食。如果係食肉獸嘅話，呢度就啱曬。可能因為唔係好多人，啲燒肉出得好快，未食完一樣已經上緊第二樣，連相都影唔切。店員話每晚都有18樣唔同cut，每次拎埋嚟都會介紹下係咩肉。如果你見到個menu有咩想食嘅，都可以直接同佢講。如果想食燒蝦或者燒菠蘿，就要落order。所有嘅燒肉都幾好食，食左 picanha、西冷、羊架、羊腿、排骨、雞槌、雞髀肉、腸仔、蝦同菠蘿。通常店員都會切個邊俾你，如果想食生啲，可以叫佢切另外一邊。佢仲有個牌仔，如果店員見到 "I am still hungry"佢就會不斷拎啲燒肉過嚟。甜品就唔算好多，有檸檬撻同朱古力撻，仲有一款特別嘅地道甜品 Quindim。整體嚟講呢間係一間非常值得推介嘅餐廳，如果一班人嚟食就仲正。…Read More

之前去食仲係四人一台，所以坐得好闊落。環境非常舒適，望海景。一路望住海，一路飲茶係幾正嘅。食物質素亦都相當高，龍蝦餃同埋其他點心都相當精緻，碟炸雞仲有驚喜。可以經常去嘅選擇。…Read More

好耐都冇入過愉景灣。 呢度好多間都係西餐， 唔係 Pizza 意粉就係 steak，除咗呢間特別少少，係墨西哥菜。可惜去嗰日係公眾假期，如果唔係佢啲set都幾吸引。檯面已經有三支唔同款嘅辣椒醬可以試，另外牆上面仲有好多款唔同嘅辣椒醬。我見有幾支開咗，就拎嚟試下，都真係幾辣。佢仲有得坐室外，如果天氣唔係太熱，食下辣飲下嘢都幾爽。…Read More

無聊行沙田，點知行到大圍。見到開飯幾多😋，咪試下囉。點知結論係：如果係平價西餐，我可能冇咩好投訴。但係如果成千蚊一餐，可以有其他更好選擇。先講下好嘅先：原來佢哋已經冇做龍蝦湯，咁咪試下個蘑菇湯，夠濃味，食到有粒粒磨菇碎，係 OK 嘅。另外個炸海鮮拼盤有水準，有炸龍蝦尾，送酒一流，當主菜食都得。份燒豬雖然唔夠皮脆肉嫩，但係大大份，一定夠飽。好喇，唔知係唔係我叫錯嘢，定係啲人呢度通常都係食扒同生蠔。除咗以上幾樣之外，其他嘅嘢，可以令到我唔再幫襯。首先係杯 Draught 1664 ，第一啖已經啲味怪怪地。同 waiter 講返，佢收返之後，無同我講點跟進。應該換過另外一隻牌子，定係會俾過個杯新嘅我，完全冇交帶過。另外同場個 waitress 仲奇怪，好似得罪咗佢咁，個態度感覺唔係太友善。入座嘅時候餐廳已經唔係好多人，但係食完一道菜，隔好耐先上另一道(起碼10分鐘)。嘢食方面，個香辣蝦意粉，用嘅係玻璃蝦，除咗個辣字，基本上係冇味。到個 Lemon Tart，味道係還可以，但係我就未食過咁流心嘅 custard，跟本未雪夠時間。…Read More

落開深水埗，都係買下電子嘢同埋搵下friend。幾次經過都因為太多人排隊，所以冇試到。可能今日早左，唔算多人排。叫咗雞翼、蘿蔔、花膠、豬腸、油麵多蔥。係個雞翼同豬腸幾好味，其他都係一般。…Read More

本身 book 咗半島酒店 staycation，因為 check in 嗰日趕唔切食佢個 lunch 就係搵下附近有冇其他嘢食。近近哋喺 isquare 搵到有鰻魚飯，見咁耐冇食，就衝去試下。去到都已經四點幾，完全唔使等位，基本上包場。見到個 menu 上面有碗鰻魚飯，多蔥又有溫泉蛋，唔使諗即刻 order。可能因為冇人，好快就上菜。碗飯整體味道上都過得去(基本上多蔥我都好少話唔好食)。另外仲叫咗份鰻魚柳川鍋。呢份就強差人意完全唔好食。…Read More

近年去開機場都會去上海姥姥食野，皆因D熱豆漿真係好得，又香又濃，仲會有層E係面，正！D面又係即時拉，大大碗，幾乎食唔晒。D炸排骨又外層鬆脆，厚身得黎又唔會硬。不過小竉包就普通，唔係太突出。…Read More

時間: 4月7日21:30人數: 2 咁岩個日經過見到都幾多人推介既華姐清湯腩，就諗住入去試下。可能去個時都已經比較夜，店裡面冇咩人，亦都即刻有位。我同老婆叫左碗腩河同腩麵。食完真係"嘩"一聲，都真係忍唔住係呢度開番個ACC寫食評。講下呢間傳聞中"咁有水準"既"清"湯腩。先講兩碗粉麵，湯出奇地清，味道簡直同滾水加少量味精冇分別。牛腩份量"精緻"，5%肥肉，逆紋切，一咬就散，但又越食越黏牙。河粉都算OK，很滑。另一碗D牛腩就肥少少，D麵都係一般貨仔。食到咁上下唔係好夠飽，就叫多碗雲吞同豆漿，亦都係成餐最精彩既部份。先來杯豆漿，同其他舖頭既冇咩分別，甜甜地冇咩豆味。去到呢個時間我都係覺得因為自已夜去先食唔到好野，而且幾十蚊就算啦。最最最離晒罩係碗雲吞，十幾分鐘都未到。問一下係咪漏左既答覆係"D雲吞係生煮，要耐D"。FINE...都欣賞你唔係整定晒。等多陣見阿姐住碗野"料下料下"咁行過黎，放係面係我見過最恐怖既雲吞。D雲吞好似生中左毒咁一撻撻啡色，問佢做咩咁既樣，阿姐竟然答"可能係煮"火農"左"，OK我都聞到，咁唔知可唔可以換過呢?尤其有兩隻特別作嘔。我俾番個兩隻佢地換，已經聽到廚房D人話"煮左喇喎，冇得換","呢D係葡國雲吞~哈哈哈"既說話。跟著過一分鐘呀姐就行過黎話冇得換，仲話"係煮既時侯黐底，係D雲吞皮問題，再煮都係咁"。咁既理由都講得出，頓時火都黎埋，叫佢番D雲吞黎影底作俾各位睇。當我影緊相個時，佢地仲一D悔意都冇，仲大大聲話"唔使再煮喇，佢地影左擺上網喎，咁又點呀".......O晒嘴大致上食物質素只屬一般，加上做飲食既態度就連街邊大排檔都不如。之前既食評都睇過，絕對認同出前一青，蜜柑寶寶既意見，絕對唔值咁多個SMILEY FACE。個人認為唔值得推介，好評亦有誇張之嫌。其實附近都有好多好野食，有幾間做得都唔錯。我覺得冇需要去受D咁既氣，俾我一定唔會再去！…Read More