ws1701的個人專頁

天氣熱就想食D開胃野, 一諗就諗到食泰菜.睇openrice呢間泰國菜都好多正評, 出開葵芳一於試試.泰國野最鍾意食咖哩, 唔想要豬牛雞咁飽, 所以要個黃金咖哩大蝦, 隻隻都又粗又大. 蝦夠新鮮彈牙, 就算有咖哩味都蓋唔住大蝦既鮮甜味. 而且呢個咖哩唔太辣, 撈飯應該唔錯.想再開胃D叫左個青木瓜絲沙律, 涼伴野好清新, 青木瓜絲好爽口, 食完解晒油膩感.最後要多個泰式濕炒海鮮金邊粉, 海鮮配料都幾多, 濕炒夠汁掛住響每條金邊粉上面, 入晒味, 酸酸甜甜好開胃.…查看更多

天寒地凍最啱就係食火鍋，呢度既豬骨煲最真材實料，又有香港地道特色。呢個豬骨煲用左特選既豬骨（有豬湯骨，豬軟骨，豬筒骨，豬手骨），真係所有豬骨既精華都齊全。仲配埋鮮帶子，蝦乾吊片，粟米蘿蔔，所以一飲個湯底，真係特別鮮甜，特別濃厚既豬骨味，剩係飲晒個湯都值回票價，以往香港地道風味既回憶即刻返晒黎。仲有呢度自家製火鍋配料，特別係韭菜餃，個皮又夠薄，隻隻都包到漲卜卜，餡料多到滿瀉，食左好有滿足感。另外蟹籽手打墨魚滑都好出名，因為手打特別彈牙爽口，墨魚味道又夠鮮。…查看更多

三餸飯而家大行其道, 一來方便, 二來又多款式選擇, 三來又唔會好貴.做完野經過土瓜灣, 呢間餐廳既餸好多款式, 響櫥窗外面睇定有咩啱食.蜜糖黑椒雞中翼, 隻隻都夠大隻, 外面煎到少少脆香, 蜜糖甜甜地帶黑椒既辣, 掛響每隻雞翼上面, 特別惹味開胃.椒鹽豬扒又係好大份, 舊舊都肉多過骨, 椒鹽唔太重, 所以唔會太咸, 肉質食落唔會好乾.咖哩雞球, 雞肉嫩滑, 薯仔炆到夠晒淋又入味, 咖哩唔辣但有香味, 撈飯最好食.…查看更多

太耐無同朋友食飯, 見疫情稍為好轉就即刻搵食. 呢間燒肉新開張無耐, 睇食評期間比部sake機吸引左, 因為朋友好杯中物, 一於同佢黎試下.除左sake想飲之外, 呢度既和牛亦好吸睛, 要左個牛肉盛合, 個排場好震撼, 包括左七款唔同牛既部位.三角小排脂肪比較豐富, 入口即溶. 牛背峰脂肪少D, 所以肉味比較濃.和牛腩肉質比較肥美, 但感覺唔會好膩, 質感夠嫩.牛舌同牛心都好爽口, 牛心真係好少食, 無腥味或奇怪味, 燒完好香口.因為驚無飯會好快餓, 所以要左份海膽和牛丼, 細細份每人食少少就剛剛好.先將和牛燒一燒, 之後再放上飯面, 加海膽, 再落埋個燒汁.先試一啖海膽, 超級好味…. 非常鮮甜滑溜, 一D都無腥味, 如果可以我會另叫一板就咁食, 所以呢個飯要同朋友爭食.見到好多人都叫鵪鶉, 所以都要左隻黎試下, 呢款由廚師燒好先上枱.鵪鶉肉質好嫩好滑, 雖然細細隻, 但肉質好豐富, 上網睇先知原來鵪鶉好有益.仲要多個炭火雞, 都係由廚師燒好上枱, 雖然外觀唔討好, 但食落帶少少炭火香, 唔燶, 肉質仲好滑, 好好味.海鮮要左燒鰻魚, 鰻魚夠肥美, 燒至金黃, 外脆內嫩, 唔多骨.食得太多肉就要份蕃茄蒜子沙律, 蕃茄新鮮, 食落好甜, 帶少少蒜香, 清一清燒肉既肥膩感.…查看更多

疫情稍微減少, 趁機相約朋友見面食飯. 半年無見有排傾, 所以揀左呢間中菜館.天氣開始凍凍地, 要個藥膳醉雞鍋, 里面有淮山杞子紅棗等等配料, 配上紹興酒, 黑糯米酒, 玫瑰露一齊煲, 一路滾陣陣酒香撲鼻. 雞件差不多有成隻, 肉質肥美滑溜, 食完好保身, 暖粒粒.椒鹽九肚魚係中菜館必食小菜, 椒鹽唔會太咸, 剛剛好掛響個脆皮上面, 炸到脆卜卜, 但九肚魚好嫩滑, 強烈對比感.生炒骨基本上係小菜必食, 人人都會食, 但又唔係間間炒得好味. 呢度既炸粉唔會太厚, 外脆內軟. 個醬唔會太酸, 好啱送飯食. 肉選擇得好, 唔會剩係得骨無肉, 而且唔會太肥.…查看更多

荃灣廣場對面條食街早排開左間西日式餐廳, 之前行過見到好多人排隊, 去一田大減價前順便黎食左先.六點先開始晚餐時段, 早左少少可以坐入去睇住menu先, 夠鐘先叫.食物主要分四大類, 石燒肉, 蛋包飯, 丼飯同意大利麵.石燒肉一早係我心目中必選項, 祗係睇下食邊款肉, 五款牛肉類都可以揀200克或者300克肉, 唔食牛仲有一款豬鞍.最後揀左頂級牛板腱300克, 上枱既時候有張牛油紙蓋住, 侍應提示塊石板好熱, 小心彈到. 隔了好一下先揭起牛油紙, 但仍感到一鼓熱氣湧出黎, 友人幫忙快手切開, 以免入面既肉唔夠熟.牛板腱夠厚身, 但肉質仍好嫩, 入口唔韌, 保持肉汁. 如果覺得味道唔夠, 仲有一碟燒汁提供. 而且石燒肉跟飯一碗.友人鍾意蛋包飯, 佢要左香煎奈良手打芝士牛肉餅咖哩蛋包飯, 旋風蛋包飯, 賣相唔錯. 咖哩汁夠多, 味道帶甜少少辣, 好易入口.牛肉餅又係好厚, 唔韌, 軟腍腍, 肉味香濃, 加埋片芝士, 非常罪惡感.其中一SET升級左做套餐, 可以四選三要湯, 串燒, 沙律同飲品.呢個咁吸睛既彩虹棉花糖特濃朱古力, 係女仔都鍾意. 上面係一層濃濃既cream, 就咁食幾甜, 跟朱古力一齊飲就剛剛好.串燒似雞肉, 味道正常. 湯係忌廉湯, 細細碗剛好.…查看更多

新office響附近, 同事經常推介呢間泰國菜, 最近都準時放工, 所以走黎試下.夜晚開著門前既燈, 對比附近既鋪頭, 張秀玲特別顯眼, 好易搵到. 門面已經比人一種輕鬆感, 牆既一邊係梳化位, 坐得好舒服, 無壓迫感, 夜晚一邊食一邊傾好relax.泰國野最鍾意食蝦餅, 祗叫一款又嫌單調, 所以要個小食拼盤最啱, 有2件蝦餅, 2件春卷, 4件泰式雞棗.蝦餅炸得好香口, 唔油膩, 蝦肉好爽彈. 春卷個皮都夠脆, 入面以椰菜, 紅蘿蔔絲餡料蔬菜為主, 所以食落無咁飽濟, 無咁肥膩. 雞棗其實唔知係咩, 食落似雞肉既卷, 都唔錯.仲有泰國菜不能少既烤薄餅, 每件都烤到微微燶, 夠香口, 唔會太扁太油. 配埋黃咖哩牛腩, 點下D咖哩汁更加惹味.呢個黃咖哩唔覺辣, 有少少椰香味. 牛腩唔韌, 炆得夠腍, 而且份量都幾多.泰國椰菜苗, 好大棵, 起初驚好硬, 但食落原來好爽口,  蒜茸炒清清地但夠惹味.雖然呢邊唔近大商場, 但可能口碑唔錯, 未夠7點已經坐滿人.…查看更多

每次經過校長燒肉樓下都見好多人排隊, 開業咁耐都未食過, 想著趁而家少人到餐廳食飯就去試下, 點知7點15分時段都係好多人, 所以記得訂位.環境好大, 全部卡位, 坐得舒服. 食物自助BAR好闊落, 所以大家一開始出去取食物都唔會太迫.每枱都送既牛脊肉, 五花腩同生蠔, 牛脊肉幾厚, 入口特別有口感. 生蠔夠漲卜卜, 新鮮無腥味. 刺身有差不多十幾款選擇, 每人每次限選三款, 三文腩夠肥美, 魚脂好豐富, 帶子同蟹棒夠鮮甜軟嫩.其他各類唔同既肉食, 豬腩片, 肥牛, 西冷牛扒, 牛柳粒, 雞腎等, 款式好多, 而且有不同味道, 每款肉食份量十足, 燒完仲保持到肉汁, 有肉鮮味.除左燒肉之外, 呢度仲可以打邊爐, 響自助BAR取爐同湯, 細細鍋淥下蔬菜, 確係唔錯, 一個價錢有兩款食法, 120分鐘無停過.…查看更多

疫情問題好多餐廳都做優惠, 睇到社交平台緣眾鮮鍋做買一送一, 揀左平日夜晚, 比較上無咁多人, 但都有七成坐滿, 環境感覺乾淨安全一些.一入門口就揀埋湯底, 手機QRCODE落單, 其他配料, 熟食之類就響出面自助bar任取. 地方好大, 唔同食物分得夠開, 所以取食物時唔會塞晒人.要左壽喜燒湯底, 附送雞蛋一隻. 湯底味道適中, 唔會越打越咸.每枱送一碟牛肉, 入口彈牙, 有口感.另外仲任點牛肩肉, 呢個都係彈牙軟嫩, 有肉鮮味, ENCORE左幾次.美國肥牛唔算好肥, 食完罪惡感少D.豬梅片唔算好薄, 食落有口感, 唔韌無鞋口.任點仲有沙白, 扇貝, 兩樣都新鮮, 乾淨無沙.壽司bar有幾款唔同刺身, 口感嫩, 無雪藏味. 而且係師傅即點即切, 夠乾淨. 仲有好多款既壽司, 每款都試左少少.打邊爐配料亦有好多款式, 每樣食下已經非常滿足.…查看更多

終於等到大閘蟹季節, 餓了很久, 約齊一班朋友去辣蟹舫, 因為之前都食過唔錯, 新裝修之後今年再黎.睇見本月推介避風塘炒蟹送大閘蟹, 1隻都88蚊, 送的話好抵食, 一於要呢個.避風塘炒蟹用大量蒜容炒到好香, 微辣夠惹味, 蟹蓋有手板般大, 有蟹膏. 蟹肉夠厚實, 夠新鮮.黎到重點既大閘蟹, 侍應放上台之後會淋酒, 再點火, 酒香迅速撲鼻, 熱辣辣. 個殼帶少少咸香, 揭開蟹殼有好多膏, 食落好稔口, 但唔覺漏, 蟹肉亦夠新鮮, 慢慢地逐隻蟹腳食, 多滋味呢!!食完兩款蟹都有D攰, 要食下其他野, 黃金蝦球擺位夠精緻, 一隻蝦一份, 佈滿流沙. 流沙帶蛋黃香, 好脆卜卜, 乾身唔會好油. 蝦球大大隻, 外脆內爽口彈牙.仲有黃湯煮龍躉球, 魚加埋黃湯膠質重, 夠滋補, 秋冬食最啱. 魚肉夠滑溜, 唔多骨, 黃酒提升魚既鮮味.今次食齊魚蝦蟹, 有不同既煮法, 十分滿足.…查看更多

媽媽生日將至, 正在頭痛訂咩蛋糕, 坊間餅店既款式嫌太普通, 卡通公仔蛋糕又唔係好啱, 無意間發現老行家有燕窩蛋糕, 呢D夠貴氣又啱老人家食.睇catalogue主要係幾款唔同既海綿蛋糕, 再響里面加官燕, 官燕份量唔同價格不同, 任君選擇.最後訂左官燕草莓海綿蛋糕, 因為係每日限量手工製造, 所以預訂最少4個工作天前.到左拎蛋糕果日, 店員先比我望望, 個蛋糕整得好靚, 好精緻, 面層加上好多官燕.呢個蛋糕用北海渡3.6牛乳打成忌廉黎鋪外層, 夠cream但唔會好甜, 好香, 口感好滑溜.面層既燕窩當然好味, 有口感又清香. 新鮮草莓粒粒都紅卜卜, 夠新鮮又夠甜, 令人齒頰留香.里面係海綿蛋糕, 好鬆軟, 而且一整層夾住燕窩, 十分滿足.媽媽今次好開心, 下次會訂其他口味.…查看更多

而家興養生, 就算年紀輕輕既我都開始注意, 所以就由里面入手, 飲D湯水滋潤下, 皮膚都靚D.呢度既鍋底最正係可以先當湯飲, 飲到咁上下就用黎做邊爐湯底.我地要個花膠冬瓜雞湯, 一聽到有花膠就知係正野. 個湯底好重料, 隻雞好大隻, 夠肥美多肉. 雖然隻雞咁肥美, 但滾起左D湯又唔會好肥膩或好多油, 濃濃既雞味, 飲落好清甜. 雞肉食落亦唔會好鞋, D肉幾滑. 另外個底有冬瓜, 夏天食冬瓜就最解暑, 感覺無咁飽濟, 又解渴, 而且吸收晒湯既精華.飲到咁上下就打邊爐, 呢度最正當然係手切牛, 脂肪同肉既分怖好似花紋一樣平均, 入口特別軟嫩彈牙, 牛味濃郁, 齒頰留香.…查看更多

年尾到, 每日工作忙, 日常生活更忙, 所以每餐都係以簡單快捷為主.車仔麵既好處就係可以自由揀咩餸, 揀幾多款, 多少隨意.呢間一心既車仔麵餸較新穎, 有肥牛豬手魚腐豬仔, 蕃茄湯配河粉, 將我鍾意食既野全部集合晒.肥牛既脂肪同肉分怖都幾平均, 唔會剩得肥. 豬手炆得夠腍, 好入味, 而且個皮好有彈性.魚腐夠彈牙, 腸仔就係正常野, 份量足.要蕃茄湯因為有多兩舊薯仔, 又係炆到入晒味, 蕃茄清甜.…查看更多

節日氣氛正濃, 最好就係跟家人食飯慶祝一下,但人多資金有限, 上網睇左一輪搵到呢間響屋企附近既酒店自助餐. 地方唔算好大, 但都坐得好舒服.我地食平時日子, 價錢較平, 就算係聖誕除夕都唔係好貴.下午茶時間仲有10蚊生蠔, 但晚市自助餐生蠔就無限供應, 所以要排隊, 但5分鐘左右就拎到.除左生蠔之外, 仲有熟食焗蠔, 唔伯太細隻, 蠔味濃, 夠新鮮.聖誕節仲有火雞, 大大隻好肥美, 肉質唔鞋, 夠嫩.糯米飯又係冬天佳品, 呢個荷葉生炒糯米飯, 荷葉味夠香, 炒到D飯一粒粒, 唔會好黏, 唔濕, 好好味.仲有其他熟食, 魚呀, 肉呀, 蔬菜, 每樣試下其他都好易飽.飲品有汽水咖啡茶, 都係自助任飲, 唔似出面既自助餐祗包一杯.簡簡單單價錢唔貴, 大家都食得好開心.…查看更多

買野前搵餐廳食午餐, 呢間西餐次次見都好多人, 今日終於有機會試下.午餐由50幾蚊起, 包埋湯同飲品.要個香草煎大蝦配飯, 雖然得一隻蝦, 不過好大隻, 成隻手咁長.煎得好香口, 香草汁清新唔咸, 剛好入味. 大蝦肉質爽口彈牙, 而且蝦頭多膏又鮮甜.而朋友要左香脆乳豬飯, 我要左D黎試下, 個皮好脆口, 好香, 一D都唔油, 咸味適中. 肉質都好夠嫩, 而且啖啖肉, 唔多骨.佢D配菜亦好新鮮, D蔬菜唔會炒到林晒.整體呢間午餐價錢同質素成正比, 下次再試下其他款式先.…查看更多