難得7點放工，走過繁忙的路德圍，見到一間餐廳外面一排法式落地玻璃，十足歐洲街頭Cafe，已經好想入去試下。不過望到入面得1台客，又有點驚唔好食。再望一望餐牌，主要是焗意粉之類，價錢唔算太貴，決定入去一試。裡面唔算太大，廚房吧台冇左三分一地方，只有十張台左右，裝飾以簡約為主，木紋配上吧台仿紅磚牆紙，加上聖誕裝飾同外面落地玻璃，都算幾有歐洲Feel。睇返餐牌，原來除左一般焗意粉焗飯，仲有一份聖誕扒餐Menu，不過價錢就係普通焗意粉一倍左右。最後都係決定對自己好Ｄ，叫左個安格斯牛小扒拼帆立貝意粉。另外朋友叫左個香草羊柳拼大蝦意粉。先上蒜蓉包同餐湯，時日餐湯係忌廉湯。不過對個呢個餐湯同餐包真係好失望，蒜蓉包係傳統法式長包切片，個包由頭到尾得個硬字，外面唔夠脆，裡面唔夠軟。忌廉湯完全冇餡，飲落去好似生粉芡咁。心諗今次死啦，個餐湯都咁，主菜實唔得啦，點知又唔完全係喎。主菜先上香草羊柳拼大蝦意粉，羊柳味道ok，有少少羊味。ORDER前有問要幾成熟,不過都係有點老。跟餐得4種汁選，冇最襯羊肉既薄荷醬有點失望。個大蝦唔得，蝦唔夠新鮮，黐殼，估計係冰鮮蝦。格斯牛小扒拼帆立貝意粉跟住上，牛小扒係薄切，我叫左5成熟見少少血，不過落單時唔知係薄切，所以都係老左Ｄ。牛小扒整體煎得幾好，外面煎香後有落少少鹽，食落都有牛味。帆立貝都煎得幾好，唔會太老。兩份主菜冇太多蔬菜，意粉一般。意粉有落蒜蓉，所以好香，不過意粉有黐身，唔夠爽口，可能煮完放得時間有點長。小弟唔好甜品，所以冇叫，最後飲左杯好香既即磨咖啡（其實成餐飯最滿意杯咖啡）走人，埋單兩個人206，可以接受。…查看更多
