Anthony9045的個人專頁

幾年前，有個客係上水河上鄉，入去前或後lunch time 都會黎呢度食lunch，後尾要個個星期上廣州，搭火車停上水再上羅湖會平D，但係要停一個鐘先"嘟"到平，中間就因利成便，黎呢度食野。好多年無去，今日上深圳，又停上水，幫襯下咁耐無食gei 茶餐。境況依然，lunch 時間好多人，搵位坐低就照舊茶餐！同以前一樣，等幾耐下，先黎牛肉通粉，個湯底幾好，牛肉用新鮮牛肉，好好味！係市區同D 急凍牛比「正」好多！另有一個蛋治，普通得黎仲熱熱地。人多有個好處，一定係即做，因為根本無時間煮定；蛋加三文治，有D 蛋汁滲落麵飽，又幾好食，好過市區D pack 定gei sandwich。價錢二十二，凍飲加兩蚊，抵食。午餐唔想食咁多野，個茶餐就剛剛好！…查看更多

同老婆食晏，落樓下食ME.N.U.，可以叫Menu，其實係Me and You 咁解。老婆要左個蟹柳中華冷麵加杯鮮榨西瓜汁，我試石鍋飯，要魚柳墨魚汁飯。外面雖然熱熱地，個石鍋飯都熱辣辣，好好味！魚柳就雪藏野，墨汁飯原來都好好食，值得再食！蟹柳中華冷麵就天頭慶，易入口，老婆都話唔錯；個鮮榨西瓜汁我試過，清新、夠凍，讚！家陣免費升級，可以再試！總體黎講，簡單、好食，價錢總共$90幾蚊，係貴左少少，不過都OK 喇。…查看更多

六點三去到金滿庭，即刻有位；晏D 就爆曬，待應話八點半交枱，無問題，我地兩公婆齊人，D 菜上得快自然會走得快。Citibank credit card 可以$10 一籠小籠包，要喇！另外1/4 個砂鍋雲吞雞、清炒蝦仁，一客三個生煎飽。清炒蝦仁好好味，唔知係咪味精效果，小籠飽一般水準，並不特別。個砂鍋雲吞雞就1/4俾雞髀位，雲吞我唔好，啖湯又係好好味！最精彩隻雞，好滑，老婆話可能唔係煲湯隻，因為煲gei 話，熬咁耐好難咁滑。無所謂喇，煲湯隻雞老左唔好食，呢隻咪OK law。食就十分滿意，杯人參烏龍又甘香，真係無唔滿意gei 地方。:)埋單$310，算物有所值！…查看更多

同老婆去到雅蘭，係阿詩碼容易搵位，見到食品名稱都OK，就入去。兩個人，叫左糖醋魚塊、一個窩貼、生菜包，另加一個唔知係乜gei 一家三口！糖醋魚塊無乜特別，唔算出色，窩貼厚皮夾煎唔，都未見過窩貼底唔，白雪雪！老婆即搵伙記叫廚房再煎，番黎黑左D，但係唔脆！生菜包係我夏天最愛，唔想食太多飯，又有菜，包埋好Balance，呢度算OK，有足夠生菜包曬D 肉，算係最好一碟。最後開估一家三口，即係三個菜肉飽，得過名。連小食、茶錢，$258，太貴啦！無下次。…查看更多

今日中午時份，接近兩點，見開始無乜的人，就入去試下。一位唔難，即有位。D Wasabi 一包包，幾衛生，望住轉緊D 壽司，有D 未見過，唔同元氣，有相，可以知食乜，唔通真係焗你俾8 蚊先知？是旦喇，見有趣D 小食真係估唔到係乜，8 蚊就8 蚊喇；一試，原來係細細塊鰻魚，幾好，一口鰻魚，OK!又見到大D 碟gei 鰻魚片，唔知有乜唔同，食左至知原來係小鰻魚飯，加埋海膽飽肚架！其餘D 緊係食貴D 喇，海膽、花之戀，OK架，8 蚊，算係咁！最得意有碟閃閃下gei 碟，原來係希望顧客將壽司個蓋放上去，唔好放係有壽司D 碟上面，讚！埋單8 碟，加一，70蚊，滅左零頭0.4 (原底應該64 + 6.4 = 70.4)，好OK!最衰真係好多人排隊，又限時50 分鐘，唔知幾時有第次？不過見板X 真係俾佢搶好多客，良性競爭，睇下往後Ricky san 點應付喇！…查看更多

個仔終於得閒陪父母，一家三口，走上鵝頸橋街市食飯。呢度乜野椒鹽都好食，今次要魷魚鬚，味道唔錯。話晒大牌檔，試下炒蜆，嘩！不得了，原本真係炒得好入味！我影幅相已經無左半碟。又係炸，必食炸大腸；唔係特別正，不過，叫乾淨，內臟呢樣野，都係D試過無事店舖穩陣D。老婆唔食牛，呢度有粉絲駝鳥肉，同牛肉一樣咁有沙爹味，加個魚唇鴨掌，又有菜墊底，全家都食得。大牌檔風味就係有鑊氣，我咁多碟都無小炒，但係都好掂。證明大牌檔煎炒煮炸皆宜。埋單連一枝汽水、一枝啤酒、三個飯，加埋$260，幾抵食！…查看更多

呢間添好運一經米芝蓮點評，身價何只十倍？門口排隊等足一個半小時，仲係9點幾等到11點，食呢餐真係辛苦。點心一般十幾蚊，大眾化價錢，但係門口有張special貼左，有松茸蝦餃、鵝肝醬煎粉果、$35-50一籠，估計係方便訂位。因為佢地俾早一日訂位，不過最低消費$1,000。淨食十零蚊一點，食90幾碟先夠數，梗要出D貴價貨喇！我就無諗過豪，點番一般野，平凡中食出不平凡先係名不虛傳呀嗎！蝦餃、粉果、腸粉、鳳爪，好食，不過同我屋企附近D 酒樓差唔多，咁都米芝蓮點評，怪唔得香港點心風行全世界啦！個叉燒波蘿飽就超水準喇，係敢於創新gei 成功例子；其實係廣州蓮香樓食過叉燒綠茶飽都差價唔多，證明點心真係可以創新，唔係燒賣加片鮑魚、蝦餃變龍蝦餃就創新，果D係「掠水」！甜品要左個黑松露奶凍，OK喇，叫做真係有片黑松露，大片到同老婆一人一半分都鬼咁滿足呀。食完真係覺得鬼佬少見識，呢D 水準鬼佬覺得高，香港人就真係叫標淮咋。鬼佬評審，你地仲有好多好野未食過呀！埋單$119，米芝蓮喎，抵到爛啦，不過真係使唔使、值唔值等兩個鐘呀！…查看更多

又端午、又就父親節，做父親gei 我就請個老婆同個仔食餐飯啦，去食棧因為上次試過條荀殼魚幾好，今次諗住番尋味。點知，今次無荀殼魚，唯有試下條油浸沙尖魚。呢度出名燒鵝，叫碟例牌要下庄。果然名不虛傳，皮脆肉嫩，非常滋味，一定要試。要D 香口D 就要椒鹽尤魚，香脆可口；加碟滷水鵝腸，唔太入味，其實幾爽口，白灼咪算law，滷乜鬼水呀！跟著上魚腐魚湯勝瓜，天口熱食瓜就最舒服，啖湯都唔錯，魚腐俾個仔搶晒，應該好野黎卦！出事在於等左好耐個油浸沙尖魚，催單，D 待應永遠唔知忙乜，極唔見有人應，最終到落單個亞姐，一睇就知佢漏單，竟然同我講D 沙尖魚要觔凍耐D，嘩，我三個菜清晒都未解完凍，唔係卦？無野食，仲要個$68 海蜇汾蹄，幾OK！最後，沙尖魚上場，油浸配炸沙尖魚好好食，如果早無漏單就一流。總數350幾蚊，少少貴，父親節，父親俾錢(即係我)，是但喇。係服務真要改善，真係唔明班待麼忙乜鬼！…查看更多

星期日同老婆去旺角整手機，等候時間周圍逛；午飯時間，見到呢間傷心酸辣粉，好似聽講話幾OK，就上去試下。其實老婆唔食得辣，不過見我無食辣好耐，咪俾我試下囉！多謝老婆。原來有套餐，一個小吃、一個粉加埋杯drink，OK 喎，就兩個set，小吃我最愛豬耳，加個蒜泥白肉，我要傷心酸辣粉，老婆要雞絲冷麵。小吃一般水準，唔錯。係個蒜泥白肉，我從未食過煙肉咁長整，都幾特別。老婆碗冷麵小辣，佢都有D 頂唔順，不過都食到。我碗就一個字形容：正!碗粉好夠辣(中辣)，酸得適量，加埋有炸菜花生，中和下個粉，好好味！鐘意食辣會滿意。食下食下，越食越開胃，忍不注滿頭大汗，鼻水慢慢流下，果然「傷心」！好正呀D 辣！兩個set，盛惠$90，OK 價。…查看更多

今日同老婆去奇味小厨食晚飯，之前有去過，幾鐘意個羌蔥魚標煲，不過今次專程黎食羌蔥鯉魚堡！一個餸唔夠，叫多個老婆最愛支竹羊腩煲，細就$70，加$28有爐暖住，同一碟菜。渴渴地，要碗例湯，出乎意料地足料夠火候，欣賞！羊腩煲一路暖住，汁料配生菜，滿意！羊腩在水準吧。最後，專程試的鯉魚煲，可能很久沒食過，覺得美味可口，最主要的魚春與魚麟，食完都意猶未盡。鯉魚煲$130，支竹羊腩煲$70+28(菜)，例湯+白飯，總共$250，算抵！…查看更多

每年除夕或元旦都想吃韓國燒烤，今年(2008)除夕便到了梨花苑。選了五花腩及牛肉燒烤，多加一客秋刀魚。燒烤包湯與飯，另不可缺的是韓國特有的八小碟。八小碟水準不錯，主要以菜為主，只有一碟小魚，這種前菜正好平衡燒烤的"熱氣"。由生到熟的燒烤要看材料是否有好的質素，這裡質素不錯，唯一的是若要生菜及大蒜，要另付$70，這個可為美中不足之處，一般韓國菜是已包在餐裡。秋刀魚一客有兩條，從中斬開兩截，冬天真是吃秋刀魚的好日子，非常肥美！埋單$363，價錢合理，最主要是頗為跟從韓國菜的傳統，能達到我嘗正宗韓國菜的心願！…查看更多

裝修後的匠沒有甚麼特別，今晚Boxing Day，去試下，睇下水準有無改變。頭盤選左蟹子沙律，味道清新料足，掂！當然唔少得必食ge 匠卷，塊三文魚越黎越薄，但總算材料足，收貨！個仔叫個匠海鮮拉面，好足料，大隻蝦，又有扇貝，加七味粉，一流！我叫左個秋刀魚加八蚊，有面豉湯同飯，條秋刀魚非常肥大，非常好食。另外，要多個北海道拉面俾老婆，多春魚天婦羅，埋單$275，比想像中便宜！匠係淘大十幾年，第D食肆摺左唔少，佢仲依然存在，證明足料好食係一定有人欣賞！…查看更多

每年都會過來品嘗蛇王海的蛇羹套餐，今年第一次，發覺加價了。蛇羹套餐包括一碗蛇羹、一碗蛇湯、一碗單腸糯米飯、單腸另上，有幾條菜墊底。用料依然，多蛇肉，夠味，伴埋薄脆、檸檬葉，一流！糯米飯一般，但潤腸好惹味，食得好飽！套餐今年$52一個，老板話無辦法，來料貴左，加小小價。老婆其實唔食蛇，次次都要食第D野，今次食羊腩飯；因飯另上，可以要少D，適合OL，我老婆真係要左小半碗咋！羊腩好滑，仲好大碟，老婆話今年食3次，連酒樓羊腩煲都唔夠呢度二十幾蚊羊腩件數多！因今次想影張全套餐相，所以一齊上，食到最後碗蛇湯唔熱，差少少！其實一般呢度套餐先上蛇羹，食完用番隻碗裝番蛇湯，熱辣辣，去食記得講"蛇湯後上"。仲有碟油菜，好關照，問清多定少定走油，蠔油又可以另碟上，服務親切又殷勤。埋單原價$97，今次減$5，收$92，雖然套餐加價，但係都仲係覺得物有所值！…查看更多

今日同事唔舒服，應該食清淡D，佢又帶個朋友一齊食飯，睇完Openrice，見食評話呢度幾清幾淡，就來這裡一試。同事個朋友黎過，話真係幾淡...D 白醬汁，所以要大蝦拿破侖汁Angel Hair。我地分開買，但結果食同樣野，可想而知選擇唔多，濃味更少！食落味道幾好bor！係D 蝦普通D，好耐無食Angel Hair，份量對我尼講係食得飽，所以同事個朋友(係女仔)就有餘。呢度最好係易搵位又清淨，同新相識朋友傾下食下，加多杯即磨Coffee，好快又夠鐘返工。埋單我個份$42，OK 價！望著同事個朋友臨走前個可愛笑容:)，相信都幾滿意！同事呢？佢要清淡，叫個沙律，一般喇。…查看更多

泰笠碰真係好細間舖，加埋坐唔夠八個人，所以都係外賣好D。有時夜晚行過，因為泰笠碰門口係小巴站，成日見到有人邊等車，邊買隻$10 雞脾醫肚，串燒都有，應該幾多熟客。今日去食午飯，叫蝦醬炒飯加酸辣豬肉湯；個湯底同冬蔭公一樣，係一個加蝦、一個加豬肉。飲啖湯，好正！夠味，酸辣平均，飲完真係會出身汗，好過飲去濕茶！蝦醬炒飯係我至愛，呢度因為即炒，所以熱辣辣！蝦醬味唔太濃，不過好足料，有臘腸、有細蝦米、有蛋、有辣椒仔、仲有泰菜有辣時必配的兩片青瓜。炒飯最重要乾身，佢做得到！唔覺唔覺成盒食晒，好滿足。水準以上的一湯一飯收費$33，抵!以前我仲試過無骨海南雞飯，又係一流水準。係呢度食要有耐性，因為家庭式作業，真係等好耐，要食好野，無法喇，等緊個陣咪整串串燒先囉！…查看更多