edithcty的個人專頁

點左牛舌、牛柳粒串燒同一碗船麵。上菜速度快。船麵金邊粉煙韌，牛骨湯濃味。但係服務非常一般，侍應比較黑口黑面。而且牛舌係涷嘅⋯⋯牛柳粒好韌同燒得over左。下次應該會考慮去其他餐廳。…查看更多

今天中午路過荃灣，剛好看到這間在天橋底新開的水餃店。雖然店舖比較小，但是不論店面或者廚房都十分整潔乾淨。食物選擇以水餃為主，亦有小菜和免費的辣菜脯作伴菜。我點了三鮮韭菜盒子。近來吃得比較健康的我本來有點擔心油會太多或者煎過頭，但是當餃子端上來的一刻我便知道是我多慮了。餃子是即叫即煎的，十隻餃子每隻表皮都呈金黃色而且餡料鮮甜有湯汁，並不油膩。背街小巷的小店總是能帶來意想不到的驚喜和最原始的味道呀⋯⋯…查看更多

今次應該已經係第3次嚟呢度食雞蛋仔。今次嚟撞正lunch time，所以有好多人排隊。佢地係即叫即整嘅，所以等候時間會比較長，但係買到嘅雞蛋仔都會比較好食同新鮮。我同朋友嗌咗一個原味雞蛋仔。喺我哋前面應該企咗6/7嗰人道，我地大約等咗10-15分鐘就有得拎。我欣賞佢哋用有窿嘅紙袋去裝住啲雞蛋仔，令雞蛋仔維持外脆內軟嘅質感。雞蛋仔有啲入面空心有啲係滿嘅，食得出無落咩香精，有蛋味，而且甜度適中。有時去地區小店食嘅唔單止係食物，同時係食老闆同老闆娘嗰一份心機同心意。有機會我會不時番黎幫襯，希望大家都可以支持下地區小店啦!…查看更多

已經好耐無食過牛雜，咁啱經過呢間見好多人食咁就嗌左碗試下。呢間店設有企位，大約容納到5/6人左右。店舖衛生，而且店員都幾快手同有耐性。佢嗰牛雜幾新鮮同好足料，每一個部位都有幾件大大嚿。無羶味而且唔咸，牛肺爽口，但如果可以再入味啲就好喇。白蘿蔔就非常入味，大約有三四嚿左右，都幾抵食。如果想要柚皮可以落單嘅時候講埋。細食嘅可能要2個人share先食得晒。另外，佢地都有賣生菜魚肉同埋麵等等，都幾多選擇㗎。…查看更多

今日去開isquare就諗住試下呢間夢見屋。之前經過見佢地門面都幾靚，好似會坐得幾舒服適合傾計咁就諗住試下。我嗌咗嗰蜆肉烏冬，而我朋友就嗌咗嗰牛扒餐。雖然平均一個人一百蚊樓下可以食到嗰晚餐，但係啲食物真係麻麻地。我朋友嘅牛扒煮太耐好韌，而我既蜆肉烏冬就太多忌廉，完全食唔到咩蜆味，而且烏冬比較淋身。另外，服務唔太好，我哋等咗好耐都未上餐。即使我哋反覆提醒店員，佢哋都冇處理到我哋嘅問題。最後我朋友嘅餐飲等咗差唔多半個鐘先有。所以下次應該唔會再黎喇。…查看更多

有朋友介紹話呢度嘅咖啡豆係老闆自己炒嘅，所以見有時間就同朋友嚟咗呢度試一試佢哋嘅早餐同埋咖啡。地點都算幾容易搵，地鐵出口行幾分鐘就到。 而環境亦都算唔錯，室內設計有啲復古feel。有2層，樓上亦設座位。 但係室內冇窗所以會比較暗，如果多人客又嘈嘅話就可能唔太方便傾計。佢地採用自助形式點餐: 先出去點餐付款，店員會再遞餐去你張枱度。我朋友嗌咗Egg Benedit同Hazelnut Latte，而我就嗌左牛角包餐同Latte。 上餐速度快，但份量就比較少，女仔食還可以，但係如果大食少少嘅話可能要再嗌多啲嘢。價錢中等，店員服務都唔錯。我哋一路食嘅時候咁啱撞正佢哋炒緊豆，幾有趣。牛角包算不過不失，但我朋友嘅Egg Benedict就唔係太好食喇。特別欣賞佢地嘅咖啡，拉花好有心機，飲落幾滑但有啲淡口。 雖然係有啲美中不足，但我覺得好飲過好多連鎖咖啡店。如果大家黎開石屋都可以去試一試呢間特色咖啡店，支持下社企。…查看更多

今次已經係第二次嚟呢度食high tea。會嚟多次係因為我覺得呢度嘅high tea除咗抵食，環境舒服外，同時非常欣賞呢個high tea細緻用心嘅設計。我兩次黎都係預早2/3日上網book位，係備註有特別寫到我想坐窗口位，而每一次佢哋都有安排到畀我。唯一有少少唔好嘅就係佢哋嘅侍應數目比較少，所以可能要等一段時間先會有人serve你。不過除此之外我覺得服務同埋環境都非常好，係一個傾偈聚舊嘅好地方。我特別欣賞佢哋hightea嘅小食每一樣都係非常細緻而且配搭新鮮。 佢哋嘅high tea set包括一個小食架 (最底層係鹹點，中間係scone而最上面係甜品) ，每人一個餐茶以及一杯Häagen-Dazs雪糕。我幾欣賞佢地嘅蝦多士。外貌好似一個波板糖咁，細細個食落去唔會有咩罪惡感。上面嘅sauce帶少少泡菜嘅味道。另外我都好鍾意佢哋嘅甜品，好精緻而且每一件都有好多層次。例如覆盆子甜品最上面係香脆嘅曲奇，跟住係馬卡龍， 香滑嘅mousse同軟糯嘅杏仁蛋糕。豐富嘅層次突顯出覆盆子嘅香味。 另外一個我好欣賞嘅甜品就係cheese cake。佢嗰樣似銅鑼燒但其實係濃郁嘅芝士蛋糕，賣相精緻之餘口感很軟滑。我覺得呢個high tea係物超所值，值得一黎再黎!…查看更多

好耐冇食過韓國嘢，所以今日同朋友揀咗呢間喺灣仔嘅醬缸諗住食一個簡單嘅晚飯。 佢哋嘅菜單提供好多選擇，可以簡簡單單食嗰飯，亦都可以要部隊鍋或者打邊爐。老闆娘同員工都幾好客， 我哋一坐低佢哋就斟咗茶同遞咗三碟伴菜畀我哋。但係如果想再添伴菜就要俾5蚊。我哋一共嗌咗一個牛肉炒粉絲同埋海鮮拌飯。 兩碟菜嘅份量都幾大，我覺得如果係女仔食嘅話可能三個人share兩個飯或者兩個麵都已經好夠。炒粉絲嘅用料非常豐富新鮮，包括有洋蔥， 大蔥等等。 我覺得美中不足嘅地方就係啲粉絲有啲淋同太咸。而我朋友點嘅海鮮拌飯好足料，但係嗰賣相同menu上面嘅有啲出入，而且無雞蛋，所以有少少失望。最後特別想讚下佢哋嘅小菜，尤其係三椒炒草菇，非常入味好食。…查看更多

好耐冇去跑馬地食早餐，咁啱今日嚟左，就去呢間試下佢嘅早餐。 今次坐咗喺上層，可能係星期日嘅關係所以比較繁忙，坐低嘅時候枱上面嘅餐具都未收拾好。不過好快就有人嚟收拾同埋幫我地點餐。我嗌咗個B餐($35): 火腿煎蛋通粉同熱鴛鴦，嗰份量都勉強足夠一個人食。 驚唔夠食嘅我亦再嗌咗個油占多($13)。佢杯熱鴛鴦嘅咖啡比例好似比較重，所以飲落去會感覺係似咖啡多啲。但係味道都非常香濃。 而油占多亦都做得唔錯，果醬嘅份量算多，都算係幾足料嘅，不過價錢就有少少貴。…查看更多

今日黎到灣仔，雖然到左食飯時間但又唔太肚餓，所以就黎呢道食嗰輕食午餐。呢間係十字街口嘅茶記係坐得有啲逼，但勝在啲野好食又抵食。我嗌咗兩樣嘢: 豬扒包同油占多。特別欣賞佢嘅豬扒包，豬扒大大件金黃色，煎得好靚好香脆，唔會太油而且肥瘦適中。另外，佢嘅包係有烘過嘅，所以食落會脆脆哋。夾埋沙律醬同生菜一齊食令到成個包食落去冇咁油膩。如果可以再多幾塊生菜就會更好喇!而油占多嘅餡料亦俾得非常大方，鳳城應該係我食過咁多茶餐廳之中畀得最多牛油同果醬嘅一間。烘過嘅多士配合酸甜嘅果醬真係好好食嘅配搭，而且呢個價錢都屬於超級抵食!…查看更多

一直聽講呢道嘅小炒火喉夠勁，所以見今晚黎開呢頭就黎試下。服務同上菜速度都唔錯，侍應好細心同我地介紹菜式有咩材料。我地一共嗌左2個菜: 東江豆腐煲同西芹炒斑球。呢個份量啱啱好夠2-3個人食。東江豆腐煲好清甜唔會太咸。我特別欣賞佢加左陳皮整嘅鯪魚肉，令味道更豐富有層次感。另外西芹炒斑球亦都好新鮮非常有鑊氣。最後老闆仲送左嗰大大份嘅黑芝麻糕俾我地，芝麻味濃而且甜度適中，好軟熟。下次再黎試埋嗰煲仔飯同埋海鮮!…查看更多