養猪場主的個人專頁

晚上一家三口第一次嚟呢度試食。崩沙腩唔係出邊食開崩沙腩，皮有一大塊連小量腩肉，非常伏（見圖）！沙茶湯底就味道不俗！小朋友唔食得辣，就嗌咗個番茄湯底嘅紅燒牛腩面。番茄湯底有好多蕃茄，味道亦唔錯，不過牛腩始終比較「鞋」，唔係好靚嘅部位！總括嚟講，呢間鋪頭湯底不俗，但啲牛肉真係唔係好得！…查看更多

我地一家三口星期日中午12:30去到，當時全間餐廳得一、兩台客，冷氣又開到好大，想換張冇咁凍嘅枱坐，好彩侍應話冇問題！叫個二人set，因為想食個肉醬千層麵，點知話賣哂，要1:30先有，其他野又唔想食，唯有等，好彩1:15就上！食食下唔小心整瀉左杯凍咖啡，侍應都幇手清理，我地不停講唔好意思，點知轉頭上多一杯凍咖啡俾我地！💕呢下服務值得一讚！食物方面，個洋蔥湯不俗; 牛油果烤鷄pizza正常; 肉醬千層麵唔夠芝士，大部分都係茄蓉; 甜品兩舊Tiramisu，每舊size得兩節尾指咁大，細舊左d; 飲品叫左杯熱奶茶，唔夠熱，要換！食物整體一般！…查看更多

見佢平時200幾文嘅午市套餐做七五折，老婆大人特登訂枱安排成家人一齊去！13:45入座，兩大一細，叫咗兩個和牛火鍋套餐，小朋友叫咗個平日嘅火鍋午餐。結果等咗差唔多一粒鐘先有得食，唔係冇俾火鍋爐，就係冇上蔬菜盤; 期間個火鍋爐好多時都係燒左一陣就冇gas，要叫個侍應同我換爐，差唔多要換咗成七、八次，真係火都嚟！食完已經差唔多四點半。前菜有西瓜、哈密瓜、麻辣海帶、滷肉飯，味道不錯，但refill速度較慢！主菜嘅和牛超肥，基本上同肥牛差唔多。環境不錯，侍應有禮貌，但可惜人手及溝通嚴重不足，希望管理層能改善。總結：試一次，短期內唔會再去！…查看更多

前幾日同同事去觀塘餃子堂食午餐，叫咗個特別啲嘅芝士粟米湯餃，真係麻麻地！因為啲餃子同烏冬明顯係長時間係水度浸，食客order就即刻畢上枱，外層餃皮已經浸到有少少爛，食唔出有芝士味，淨係食到粟米同肉餡，烏冬亦唔爽口！其實餃子同烏冬煮完後，一定要過冷河！食嘅時候再放落熱水煮一陣，先畀客會好食d，期望店家大大改進！反而另一同事叫嘅韭菜豬肉煎餃，明顯係新鮮煎出嚟，個餃皮係脆嘅，而且等待時間會比較耐一啲！記住食品新鮮度係好緊要架！…查看更多

咁啱黎左呢度食lunch，叫左個漢堡包連薯角！食物ok，但已經見有幾個人投訴價錢不合理！事緣應該有人叫外賣，但餐廳轉左規則，要12:30前拿先有外賣價，估計之前係冇時間限制嘅，而餐廳同客講最快12:40-45攞，個客咪投訴做乜轉左規則唔同人講，好似特登講到12:30後先有得攞咁。個女人(應該係老闆娘)竟然話個客：「你又唔問?」其實你轉左規則，有責任同個客講㗎噃，唔可以因為個客唔問你就唔講囉！只要大家講清楚就ok啦！不過今時今日咁嘅服務態度，我唯有祝你生意興隆啦！…查看更多