牛牛婷的個人專頁

由以前仲有樓上間舖時已經經常去lunch，但今次同屋企人去食完都覺得不論食物質素定服務變哂，好失望！首先一坐低個阿姐已經係咁chur落單，話想睇一陣先但轉個頭已經又出現問你食咩，食緊嘅時候又不斷行埋嚟搵嘢收，其實張檯已經唔係大張，啲嘢擺到啱啱好，我哋食緊個飯時佢都要夾硬伸隻手埋嚟收走個湯，感覺真係好差！仲有個黑毛豬以前係有2大塊，今次嚟係得2塊好似豬柳漢堡size咁，仲要勁柴，超韌，少啲牙力都食唔到，個羊脾仲衰，又係好韌，仲要有陣怪味（唔係羊so味），同屋企人食幾啖已經完全唔想再食，話哂幫襯咗咁多年，一直覺得係有質素嘅西餐廳，由以前五十幾蚊一個lunch食到而家要七八十蚊都仲有定期嚟，但今次之後真係唔想再嚟！唯一keep到嘅係多年嚟杯熱奶茶都係唔好飲，同埋轉凍檸樂唔使加錢…查看更多

食過元朗嗰間幾次，覺得幾好食，今次喺天水圍特登嚟試一次，點知好失望，碗米線聞落好香但其實除咗麻同辣之外係咩味都無，唯獨甜酸菜係最有味，同埋米線太腍，一夾就斷哂，唯一欣賞嘅係啲配料樣樣有啲，菇同菜份量都唔少，而且南乳雞件真係好惹味，$45包飲品又唔算貴，啲姐姐都好好招呼…查看更多

食厭咗光輝圍，行到嚟屏麗徑搵好嘢食，原來由光輝圍行過嚟都幾近。店員係泰國人，好親切，招呼好好。間店雖然唔大，有唔少小擺設同埋裝飾，坐落都好舒服叫咗一個特色遊船河，一個冬蔭功豬頸肉金邊粉，同埋一杯珍多冰，都只係$108，抵食！最重要係湯底唔hea，食得出係落足心機同材料煮。下次都會再特登過嚟食嘢！…查看更多

星期日帶小朋友過嚟同貓貓玩，環境比想像中乾淨舒服，場內都有唔少貓貓，隻隻都超級可愛，任摸唔嬲每人包一杯飲品，飲品選擇都唔小，而且味道唔錯。可惜食咗飯先嚟，見到同場點嘅嘢食賣相唔錯，下次可以嚟食埋嘢…查看更多

病到五顏六色, 醫生送我2日病假, 嘻嘻 男朋友好好, 怕我悶親, 又唔怕我病病到好呆, 叫左我出街拍拖, 諗緊食咩做晚餐的時候, 男朋友就話不如食烏冬喇, 清淡d, 原來佢前排行過經過見到呢間野所以想帶我黎試下好啦就食呢間啦!!入到去岩岩有位, 好開心唔使等位~~ yeah望住餐牌的時候覺得好似去左x丸咁, 唔知有無人同我一樣有咁既諗法呢 點左:(1) 滑蛋吉列豬扒撈烏冬($36): 男朋友點的, 有唔少蛋, 洋蔥, 豬扒, 不過食落味道好似淡左少少(2) 燒汁雞扒湯烏冬($28): 我點的, 感覺普普通通, 如果唔係因為係手打烏冬呢碗野其實真係唔特別~(3) 大冷烏冬($17): 因為怕唔夠飽所以點的, 份量都幾大喎, 冷烏冬似乎比湯烏冬好味, 呢度d烏冬切得比x丸幼身, 味道差唔多, 都算係幾有口感既, 可以一試 服務都幾好丫, 食飽飽我要食藥, 我先後2次想要熱水佢都好快就俾到我! 不過其實位與位之間都幾窄架, 我男朋友試過俾離開去埋單既人撞到.. 相信如果好多野拎o個陣要行出行入應該都幾狼狽…查看更多

今日同同事去又一城附近上training, lunch建議大家一齊去食EXP!對上一次食已經係上年的事, 一試難忘! 好開心今次有機會可以拉埋同事一齊再黎食~~ 5位女生點了:(1) 尋找咖哩雞(pizza): 好濃味! 正! 隱約食到少少芝士! 最鍾意個皮好脆好香口! 將咖哩雞混入pizza好得意~ (2) 三文魚帶子菠菜麵: 料足(3) 海鮮粉皮併盆: 有5舊, 一舊一啖, 一人試一款! 感覺好似sushi, 但用粉皮代替紫菜, 粉絲代替醋飯! 有魷魚, 三文魚, 大蝦, 魚同埋帶子, 點埋d酸甜汁之後食好好味 (4) 鹽燒牛舌: 三大串, 串串有三粒, 有好濃的牛味, 好有口感, 不過唔似係燒 (5) 多多海鮮蛋白炒飯: 炒得好香, 又唔鹹, 有唔少蝦, 帶子等等材料, 好好味, 但有少少油另外, 平日1:00pm之前點飯/意粉/pizza一款送一杯果汁果汁係幾樣生果mix埋的, 我地試左2杯火龍果1杯西柚, 兩款都唔太甜, 好易入口服務都好好, 舉手好快就有人應, 收碟埋單都好快, 侍應態度幾好而且每人都係$60左右, 以又一城黎講, 唔算太貴, 有溜冰睇, 野食又好味喎, 真係好唔錯呀!!如果多d人可以叫多d野食黎試, 一定會更開心更滿足hehehehehehe~~~…查看更多

聽講稻香打邊爐水準唔錯，尋日係我舊曆生日，就同屋企人夜晚o黎o左呢度打邊爐媽媽事前去訂位，想訂7:00pm，但唔知點解佢話7:00pm唔得，要訂6:30pm...好有趣，可能佢想早o的散哂d客俾下一輪卦一坐低，侍應就推介個火鍋孖寶，一款海鮮搭一個湯底咁，我o地要o左桶蠔+醉雞湯底，都只係$138！醉雞湯底另上半隻雞，勁多，食極都仲有，而且啖啖肉，抵到爆！桶蠔唔係普通貨色，隻隻都超級大隻，爸爸媽媽妹妹食完不斷讚好食好鮮甜火鍋配料點o左肥牛、羊肉、粟米墨魚丸、鮮蝦丸、牛頸脊、鴕鳥肉，仲有一個活魚拼盤，呢個活魚拼盤好抵，幾乎每檯都叫，$38切好哂連魚頭上，好新鮮，o的魚肉仲係鮮粉紅色！仲有不得不讚佢o的肥牛同羊肉，好新鮮，有時o係外面食打邊爐羊肉，會雪硬哂而且變哂色，但呢度o的羊肉係好新鮮，兼且羊味十足！肥羊都好鮮好有牛肉味！至於牛頸脊，我o地都係第一次食，之前睇電視話牛頸脊會有o的韌，原來真係...如果烚得太耐仲會咬好耐都咬唔完，不過都幾好味另外我o地仲點o左一隻大閘蟹，因為$45一隻仲送多碗蟹粉羹，兩樣都唔錯！其實都覺得幾貴，肥牛$48一碟，其他肉類、丸類要$38(丸類可以雙拼)，菜同麵類要$28一碟..不過論款式同質素o既話，去稻香打邊爐肯定抵過上樓上小肥ｘ食任食火鍋！價錢都係差唔多！服務真係幾好，侍應會不斷主動埋o黎換碟、收碟同倒水，而且叫佢俾醬料盤或者收o野都好快會幫你做好，最重要係個個都態度好好！因為唔限時，無人會催我o地走，我o地又坐卡位，所以成晚坐得好舒服，下次想打邊爐一定會再o黎！…查看更多

當呢間舖仲未搬到現址的時候，我媽媽已經係雲貴川常客，後來當它搬來四陂坊後，媽媽帶我o黎食過一碗米線之後，好似上o左癮咁，周不時我都會心癢癢想食，仲會介紹埋男朋友同朋友仔o黎食不過，坦白講，近呢排佢米線質素真係變得好唔穩定，媽媽唔再係常客，我自己都少o左o黎食今晚男朋友突然話想食，差唔多六點到，都坐滿哂，開始要等位...好誇張！咁耐以o黎我每次o黎親都會點雞肉+腩肉加酸湯，今日見到有新款式推介，就點埋蘿蔔；男朋友就點炸醬+腩肉+醬爆豬肉丸加酸湯個人喜好，始終最鍾意都係佢加o左酸湯的湯底，好醒胃，而且碗米線會因為咁而變得無咁辣！(有時如果太辣食唔到，你可以叫佢俾碗酸湯你加落去o架！)蘿蔔好好味，好軟，帶甜，都有差唔多成五大舊...雲貴川腩肉一向唔錯，辣辣o地唔太韌！雞肉都幾好，無煮到老哂咬唔落男朋友好鍾意佢的炸醬，佢覺得炸醬的味調得好好，好o岩用o黎送米線食其實都抵食o既，碗米線超大碗，如果唔係好肚餓o黎食一定食唔哂... 不過...每次o黎親都坐得好唔自在，同四五個人搭埋一張圓台之餘，仲會好清楚聽到哂人o地對話，乜o野是非新聞都被迫要聽哂... 如果想靜靜o地食o野傾下偈，雲貴川一定唔係你選擇！…查看更多

特登等到下午茶時間先去食，未到兩點半已經見到有人o係度等，一到兩點半就排o左一條好長o既人龍呀！好誇張！一向最鍾意雞粒昆布烏冬，點知行到埋櫃位見到有新o野，豚肉昆布烏冬？好！就試一試啦！仲加$9要o左個汁燒帶子串；男朋友就要o左雞肉飯餐加鯖魚(加$10)。汁燒帶子串有三粒帶子，細細粒，仲有一小舊檸檬可以榨汁o黎點，點o左檸檬汁o既帶子酸酸o地，而且帶子本身都好鮮味！好好味！至於個豚肉昆布烏冬...烏冬好正！烏冬依舊彈牙，仲有鳴門卷同獅子狗，感覺好豐富！不過，我真係唔欣賞豚肉，食食下我覺得勁似梅菜蒸豬肉，味道勁似！而且所謂o既豚肉同平時食開o既瘦肉其實無分別...另外，我o地每次o黎親吉野家食o野都一定會另加鯖魚，因為點o左檸檬汁o既鯖魚真係好好味！o係APM o黎講，$25一個tea set再加一個小食，當lunch咁食到飽一飽，好抵食呀！…查看更多

第一次寫食評，哈哈！好開心！今次已經係我同我男朋友第二次o黎食芝士火鍋啦！兩次都係睇完戲先食，因為用旺角ＧＨ戲院戲飛去呢間意粉屋可以有88折優惠嘛！88折，平o左少少咁啦...上次食o左黑松露菌芝士火鍋，今次食傳統芝士火鍋，後者比較濃味，係好重好重的芝士味，食完口渴o左好耐...印象中上次食黑松露菌芝士火鍋都唔會咁，個人比較鍾意呢隻味多o的，始終無咁濃味，唔會覺得咁漏。兩次都係點紐西蘭牛肉拼盤，一個拼盤睇落唔多o野，但兩個人食就o岩o岩好！西冷牛肉有4塊，都幾大塊，而且好有牛肉味！好好味！另外最鍾意香辣燒烤腸，雖然食唔到辣味，但係好香好好食！至於其他例如雞肉、豬柳同雜菜就ok啦...墨魚汁天使麵事前用蒜頭炒過，幾香，不過好油！服務好好，周不時都會埋o黎倒水，而且眼見個個侍應都好有禮貌，值得一讚！唯一唔鍾意o既係，佢分開o左好多張4人台俾2個人用，搞到好迫，台與台之間貼得好埋！我坐裡面，雖然離開o既時候都唔算麻煩，但同隔離台貼得咁近始終感覺唔多好...…查看更多