pamchan67的個人專頁

星期五同老公出旺角買嘢，見橫掂返屋企都買唔到餸，就喺旺角食埋晚飯啦～順便支持下佔領區嘅同學同附近d小店；行到彌敦道見到食開嘅樓上店冇咗，開咗間新嘅部隊鍋，之前去韓國跟團都冇機會食部隊鍋，心諗不如試下啦；去到都仲早，剛剛7點，有位唔洗等，一坐低即刻睇下有咩好食，見部隊湯底都幾吸引，有芝士同豬肉豆，都幾得意，就叫咗部隊湯底，火鍋料選擇都係按價錢俾唔同級數嘅牛肉，我哋就叫咗$178特級牛肉，牛肉任點，自助吧火鍋配料任食，落咗單之後好快就上湯底，d侍應都ok，起碼一叫就應，又會主動同我哋加湯，比起其它餐廳嗰種叫天不應叫做好好啦，值得一提係個湯底加咗幾次湯之後都唔會變到好淡，ok喎，飲品有汽水機、幾種特式茶同水任斟，食物方面，牛肉真係唔錯有驚喜，唔會肥多過瘦，見隔離枱叫咗兩隻大蝦都幾大隻，我哋又叫咗兩隻，$138，都好彈牙喎，自助配料雖然唔算好多但都有特式嘢食，好似豬皮同豬腸咁，初初唔敢攞咁多，驚會靭，點知一d都唔靭，豬皮好有咬口，豬腸又吸收到湯汁，好味！韓式年榚又幾特別，當日侍應又推介新加嘅蕃薯年榚，年榚入面有蕃薯芯，幾得意，鍾意食甜嘢嘅人啱晒 :) ，其它配料好似韓式魚蛋、黑色嘅墨魚丸都係其它餐廳少見嘅，選料都叫幾有心思，值得一讚係自助吧真係keep得好企理，我哋食咗個半鐘，走嘅時候行過都見到張吧檯d嘢整整齊齊，都算難得，老公係要有飯落肚至飽，但又唔見有白飯叫，行去吧枱睇下竟然有泡菜牛肉炒飯，老公急不及待食咗兩碗，佢話味道ok，我唔食飯，食咗乳酪雪榚，朱古力醬同toppings任加，酸酸甜甜咁，食完火鍋比個口refresh下，最後都食咗兩杯 ，總括嚟講食物質素都算唔錯，唯一唔係幾滿意係泡菜種類少d，希望店主加多幾個選擇，不過都值得再嚟食，見前面嗰枱點咗蕃茄湯底幾香幾濃咁，下次嚟食叫多幾個人，試唔同湯底至得。…查看更多

今日剛啱喺新蒲崗，聽姨娚女講話呢間日本餐廳都幾好食，咪一行四人去食晏囉。去到唔使等位，有個人指下一張枱咁咪自己埋去坐啦~咁中途見到有一張梳化位啱啱埋單，我哋想坐得舒服d就直接去咗嗰張枱，點知坐咗10-15分鐘都無人執枱，叫又無人應，唯有轉去第二張枱啦~呢個時候終於有人埋嚟，但係淨係問我哋落咗單未，落咗單就唔好轉咁話，我哋坐咗10幾分鐘都無人理，何來有落單呀？到坐低，先來一個沙律，味道都可以嘅，唔太特別，跟住點餐，個餐係包一個湯同飲品嘅，但係個侍應完全無提，亦無問我哋飲咩，我哋叫咗4個餐，等咗15-20分鐘，先嚟個豬軟骨拉麵，個份量細到呢，一個大男人真係唔夠飽，味道都係普普通通，跟住5-10分鐘就輪到我叫嘅什錦魚生飯定食，個侍應只係拍一聲放低碗嘢，又唔講係咩嚟，又唔同我哋確認，真係莫名其妙，至於碗飯就真係麻麻，飯唔好食、魚生唔新鮮，第三個嚟嘅係吉列豬扒定食，飯都係麻麻、豬扒都算係熱，但係就無跟沙律醬，又係叫咗幾次先至有人送嚟，喺呢個時候我哋先至醒覺係有湯送，就叫個侍應攞啦，佢竟然問返我哋要幾多碗，跟住到最後一個炸蝦拉麵嚟到，基本上我哋其他三個人都已經食完咁滯，真係耐到無朋友，碗麵d蝦唔新鮮不在話下，粉又唔知係林定點咁，唔識形容咁差，但係直到呢個時候d湯都未到，叫d侍應又個個扮聽緊walkie talkie，終於有個侍應應我哋，佢問完返嚟話原來要等，我即刻講，你如果要我等你都要講聲我聽囉，到d湯嚟到，真係好醎，真係無一樣嘢得。總括今次經驗，我自己真係唔會再嚟，亦唔會推介其他人嚟。…查看更多

有d喺未裝修前有嘅食物而家冇咗，d肉丸差咗，又乾又鞋，以前d肉丸圓碌碌，好juice，重開後食過兩次都係咁，有d失望，希望可以改善返。好在熱狗都維持到品質，加上可以添飲，都對佢哋有返d信心。…查看更多

嗰晚7點幾去買外賣，除咗我之外仲有2個女士想落order，當時個柜抬有個waiter喺度做緊嘢，我哋話想叫外賣，但係佢淨係叫我哋等等，跟住就無理我哋，個貌似經理嘅人又唔係好理咁，直至有另一個waitress行埋嚟先至同我哋落order (呢個waitress幾有禮貌，同其他人截然不同)，落完order，位waitress叫我哋4個字後返去攞，咁我哋都行咗超過25分鐘先至返轉頭，但係d嘢都仲未出晒，不過有時d嘢需要時間做，我哋等多陣都ok，最嬲嘅係，你未出齊都可以講聲唔好意思、請等一下咁呀！佢哋乜都無講，淨係自己幾個人喺度問"咩未齊喎"又或者行咗入廚房，個經理就淨係企喺度，到d嘢齊咗又唔理三七廿一隊個pizza俾我哋，我哋根本都無叫pizza，又拿拿林入晒d野就塞俾我哋，返屋企途中我哋先知佢俾漏咗個餐罐汽水，到開餐又發覺連餐具都無俾，真係火都嚟埋，雖然d嘢食無問題，但係佢哋d服務認真麻麻。(註：曾經光顧德福店，但服務都算好好)…查看更多