chg011137的個人專頁

平時一星期同阿媽都會至少去酒樓飲一次茶，但就未試過食點心放題，所以一直都想同阿媽去食。星期六返工問啲為食同事有無酒樓好介紹，佢地話上環無限極廣場有間酒樓唔錯，所以我約左阿媽放工去食點心放題。去到見到無限極廣場三樓同一層已經有兩間酒樓做緊點心放題，但對住電梯果間門口一個人都無，佢對面果間就有十個人左右企係門口等緊位，望入去大堂都座無虛席，價錢又平過另一間，每位$148，仲送每位原隻鮑魚酥同花膠灌湯餃，好抵，所以我地揀左食利寶閣。可能佢地方大，所以我地等左十五分鐘左右就已經有位。一入到去就即刻有侍應問我地飲咩茶，好有效率。放題時間係入座開始計兩小時，所以我地都即刻睇唔同款既點心紙落單。酒樓送既鮑魚酥出奇地好好味，新鮮出爐，酥皮好薄好鬆化，有入口即溶既感覺，味道亦都調得好好，隻鮑魚都大隻。如果唔係揀食點心放題，衣個鮑魚酥係必食推介👍🏻 ! 個花膠灌湯餃都夠好大隻，亦每碗都一定有隻花膠，個花膠湯花膠味好濃，好味道，所以我將成碗花腸花飲晒，連醋都唔駛落。隻湯餃都好脹卜卜幾大隻，裡面係滿滿既豬肉同香菇，味道都唔錯。點心放題既點心選擇都好多，仲有啲懷舊既點心，好似鵪鶉蛋燒賣、懷舊大包同好多地方都食唔到既芝麻卷。酒樓好細心，不同點心都會以一位計、一碗計、一條計、一隻計或者一件計，方便我地衣啲一至兩位客人可以每樣試少少，食多幾款。所以每次落單都要睇清楚你要既點心數量喇。我地試左好多款點心，我覺得一定要食既係百花燒賣皇、蝦餃、鵪鶉蛋燒賣醬皇蒸鳳爪同上素粉果等等。衣幾款點心夠熱辣辣，又有肉汁，味道都調得好好，值得去食。而蘿蔔糕雖然係多粉少蘿蔔絲，但味道都唔錯，可以試下。鮮蝦水晶餃都皮薄餡靚，青綠色既菜苗配爽口既蝦粒，賣相吸引，蝦粒夠爽口，都唔錯。鮮茄雲耳浸菜苗都好食，食得太多肉都要食返啲菜平衡返。菜苗係新鮮既學斗仔，夠晒青綠同鮮甜爽口，配埋雲耳同新鮮蕃茄粒，感覺好清新健康亦好味。食物、環境同服務態度都唔錯，下次可以再食過😋。…查看更多

放工約左個舊同事去銅鑼灣行街同食飯，佢話想食韓國炸雞，佢話附近有間韓式餐廳係希慎樓上都幾好食，所以我地去左食Pizza Maru。我地六點半去到，唔駛排隊攞飛就入得，咁岩有枱窗口位既客人離座，我地好幸運有得坐窗口位添。坐窗口位有個好處，就係可以擺袋、擺餐具籃、擺野飲，又可以望到利舞臺同time square。衣餐我地叫左9"肉食主義pizza、軟殼蟹南瓜忌廉意大利飯、蜂蜜牛油秘製炸雞、蜜糖柚子Ade 同荔枝冰樂Ade。先黎兩杯Ade，我揀左荔枝冰樂，杯入面仲有片檸檬同薄荷葉，攪混梳打之後，飲落唔會好甜仲好清新👍🏻。我都飲左一啖同事果杯蜜糖柚子Ade，好似平時飲開既柚子茶咁，味道都唔錯。再黎係軟殼蟹南瓜忌廉意大利飯，個賣相都好吸引。隻軟殼蟹都幾大隻，仲要即叫即炸，夠脆又夠熱，好味。意大利飯煮既時間控制得唔錯，軟硬度岩岩好，再配埋濃濃既南瓜忌廉汁，衣碟意大利飯好好味，必食推介。然後到蜂蜜牛油秘製炸雞，一碟六件炸雞，有雞下脾、雞翼同雞胸，面頭舖左好多芝士粉，食落塊皮好脆又甜甜地。餐廳好細心，餐具藍裡面有獨立包裝即棄手套，方便客人食炸雞時用，唔駛整污糟雙手，好抵讚👍🏻。一入到餐廳眼見枱枱都有叫pizza，所以我地都叫左個9"肉食主義pizza，仲加錢轉埋金芝邊。佢其實有三款批邊比我地揀，有金芝邊、摩卡邊同雙芝邊。但我見雙芝邊幅相都幾似必X客啲批，夜晚又唔太敢飲咖啡驚訓唔著，所以揀左未見過既金芝邊。個批一上枱已經好吸引，批邊好金黃色，中間又舖滿好多配料，有牛肉、雞肉、火腿、車厘茄、西蘭花同洋蔥，加埋小小千島醬同沙律醬係面，賣相非常吸引。因為所有pizza 都係即叫即整，所以我地食晒軟殼蟹南瓜忌廉意大利飯同食左幾舊炸雞先到pizza 上枱，食落去個批底好鬆軟，批入面係帶少少辣既蕃茄醬好開胃，食落一啲都唔膩，仲要啖啖都係牛肉同雞肉，果然名符其實係肉食主義🥩。食落個批邊味道好特別，有兩款濃濃既芝士味，底層係甜甜地既甜薯蓉，第一次食pizza 配甜薯，我覺得好夾好特別👍🏻，值得一試 …查看更多

星期六左放工同男友去食完牛角包後再行埋電腦廣場，又開始覺得肚餓，上網search 見到灣仔原來都有Espuma，仲要最近做緊secret beach afternoon tea set，賣相好吸引，同埋我之前食過夜晚都覺得好食，我想帶男友黎食好耐架喇，但平時夜晚勁full 要早半個月book位先食到晚餐，所以今次行開附近可以睇下有無位，順便帶佢黎e 間食佢個tea set。今次一去到就有位好好彩，仲可以坐卡位，望出去係合和中心同山景，餐廳環境夠靜，同朋友黎嘆個下午茶傾下計真係一流。餐廳裝修都好有心思，bar枱用烏絲燈泡營造復古氣氛，隔離仲有幅牆好似舊時學校既黑板寫上好多formula，打卡一流。一坐低，侍應好細心提供兩杯暖水比我地飲同慢慢揀食咩。最後我地叫左二人套餐Secret beach afternoon tea包兩杯飲品 ($258)，我地揀左試下佢杯Novell咖啡。先黎杯Novell咖啡，杯上印有餐廳名，一個用橙色杯，一個用粉紅色杯，好colorful，我都幾鍾意杯咖啡，飲落杯咖啡好有果香味，帶微酸岩晒我。再黎係一碟兩件小鬆餅配蜜糖同忌廉，鬆餅味道都唔錯，加埋蜜糖一齊食味道都幾夾，如果配埋果醬會更加好。之後侍應搬左一個木箱過黎，個木箱都幾大個，侍應一打開，原來啲食物就係放晒係木箱裡面，比起平時食開既三層英式甜品架，今次餐廳用木箱裝住啲食物會特別好多，用黎打卡一流。個木箱入面仲會播放海浪聲，店員話如果我地唔鍾意海浪聲可以熄左佢。木箱入面一共有八款點心及甜點，每款兩件，份量都幾多。我比較鍾意先食咸點再食甜點，先講個牛油果蝦多士卷，新鮮製造，食果陣仲熱，用麵包包住炸蝦同牛油果再攞去焗，外脆內軟，衣個幾特別幾好食。再食釀蟹蓋，裡面有洋蒽粒同甘荀粒，好香口，味道調得唔錯👍🏻，連我男友唔鍾意食洋蒽既人都食晒成個，可想而知幾好味😋。再食巴馬火腿撻，巴馬火腿下面係蜜瓜球，配埋火腿一齊食最夾，但個撻係紅菜頭汁製造，我唔太喜歡紅菜頭既味道，所以無食到個撻。之後再食牛肉芝士漢堡，成個包都幾大個，塊牛肉好厚身，但如果可以加埋洋蒽粒落牛肉度一齊煎會更加完美。再試埋個菠菜忌廉伴烤雞柳，衣個出奇地好好食，菠菜蓉加埋忌廉一齊食好滑，加埋粒雞柳一齊食超夾，淡淡既菠菜味好突顯到烤雞柳既味道👍🏻。好味道 ! 仲有個柚子吉士撻，除左賣相都好吸引，食落個撻夠脆身，柚子粒都新鮮，撻入面係甜甜地既吉士醬，好味，略嫌佢太細件，好食到唔多夠喉。再食個車厘子帽子蛋糕，車厘子好甜好多汁，蛋糕都夠鬆軟，食落有蛋味又唔會太甜。再食個香橙果凍，個樣好得意，我估餐廳將橙肉攞出黎做橙汁再加啫喱粉放返入橙皮度做啫喱😊 啲啫喱好似橙汁先生味咁，好味。個紅莓慕絲甜筒，慕絲好滑，紅莓味都唔錯，唔係藥水味，但太遲食個甜筒，令到個甜筒淋左喇，下次要一上枱就食左先。仲有個鮮果布甸，都算多生果，有好耐無食過既龍珠果，有士多啤梨，哈密瓜，同奇異果，全部生果都好新鮮，布甸裡面有少少蘭香子，食落好清新，唔會好甜。兩個人食晒咁多件點心夠晒飽，好滿足。下次行開附近可以再encore😋。…查看更多

好耐無食過一粥麵，行過見到佢做緊套餐免費升級凍柚子紅茶優惠，所以試試佢。見到堂食都好多人叫炒河，所以我都揀左豉椒排骨炒河配凍柚子紅茶($42)。因為即叫即炒，所以要比啲耐性等下，我都等左十分鐘左右就有。岩岩炒起既河粉，熱辣辣好香豉椒味，賣相唔錯，排骨都算多，味道適中，唔會過咸，都幾好食。杯凍柚子紅茶，裡面有一粒粒既柚子肉，但飲之前要用匙攪一攪底部既糖漿，唔係既話會上半部好淡下半部好甜，攪匀之後就甜度岩岩好，味道唔錯。…查看更多

晏晝同阿媽去左東大街食下午茶，帶佢食一間電視雜誌都成日提起既小食店-呂仔記。我地叫晒佢最出名既金牌碗仔翅、馳名兩溝、自製鮮魚肉燒賣同鮮榨椰子汁。碗仔翅好大碗，又夠肉味，肉絲又唔鞋口，又夠足料，好味 ! 必食 ! 大推介 ! 加埋魚肉都好好味，魚肉好新鮮同彈牙，一啲都唔鯹。👍🏻再食埋佢自家製既魚肉燒賣，咬落夠彈牙，又濃魚味，同出面其他小食檔既魚肉燒賣味道完全唔同，食完見到牆身貼住既雜誌介紹，先知原來啲燒賣係用黃鱔肉黎整，咁特別，一定要試下。阿媽飲完杯椰子汁話椰子味好濃，又有少少椰子渣係底，好有懷舊feel 。…查看更多

端午節正日，夜晚梗係要同阿媽做節，我地揀左間係屋企附近既平民酒樓食小菜。個侍應推介我地叫隻龍蝦仔($148)，用蒜蓉開邊蒸，話隻龍蝦仔好多肉，仲話包我地話好味添。之後再加多個蒜子火腩大膳煲($128)加碗白飯($12)。先黎個蒜蓉開邊蒸龍蝦仔，果然個侍應無介紹錯，堅好食，連等緊位啲人都問我地衣碟龍蝦幾錢添，隻龍蝦仔都算大隻，又多肉，咬落又彈牙好新鮮😋，仲有粉絲墊底，索晒啲龍蝦同蒜蓉味好正。再黎個火腩大鱔煲，好多鱔，仲要塊塊都又大件又厚肉又彈牙，好新鮮，反而火腩得幾舊比較少，但肥瘦均勻唔會好咸。整體味道唔錯，又夠大煲👍🏻。…查看更多

星期六返完半晝工，出面又熱辣辣，都係搵啲大型商場行場就算，謝絕戶外活動，所以最後約左男友去將軍澳食好耐無食既薩莉亞，食飽飽再行街。平時間間薩莉亞都排長龍等位，所以今次叫男友早十五分鐘去攞位先，但最後我黎到都仲要等多兩個字，足足等位等左半個鐘先有得入座。我地叫左水牛芝士薄餅、白汁雞肉菠菜、同新出既黑松露野菌忌廉意粉。水牛芝士薄餅，批底夠鬆軟，芝士好厚，仲可以多到玩拉絲添，又夠熱辣辣好新鮮，即叫即做。👍🏻👍🏻白汁雞肉菠菜，菠菜夠嫩夠青綠又夠多，雞肉粒今次比較乾身，有啲咬口，但個白汁好正，撈埋意粉黎食好好味。黑松露野菌忌廉意粉，都算多菇，但黑松露味唔夠，比啲菇味遮蓋晒，仲要無乜忌廉汁又淡又唔夠味，最後我要溝埋雞肉菠菜啲白汁黎食。😪 兩個人食三樣野已經夠晒，飽到上心口。順帶一提，衣間餐廳啲餐具好污糟，堅污糟，勁污糟。強烈建議，各位最好攞杯熱水黎洗下啲刀叉匙，再抹下睇下仲有無黑色先好用。啲碟同杯都一樣要洗過先好用 ! 我未見過一間餐廳可以污糟成咁，所有餐具無一件係乾淨架。👎🏻👎🏻👎🏻…查看更多

是日星期六要番半日工，中午放工落左北角搵好野食。曾經有人推介係和富附近有間拉麵小鋪既雞湯拉麵好岀色，所以小妹一於去會一會佢。地點唔算難搵，認住門面個鶴屏風就得，好易認。可能過左中午時間見到開始有人潮離開，所以小妹一入去就有位。侍應立即好熱情介紹小店有什麼特色食品。餐牌都有幾款拉麵選擇，侍應主推雞白湯拉麵同鰻魚飯，小妹一人衝著雞白湯拉麵，於是叫左極濃雞白湯拉麵同另一推介：燒黑豚肉串。先上燒黑豚肉串，侍應介紹肥肉先係精髓。第一啖咬落口熱辣辣，濃濃既燒烤味，加上少少焦既脆口，非常配合。肉質淋淋地咁，而且少少甜既燒汁，口感同層次感都十分豐富。肥肉真係有如侍應所講無咩油膩感，爽口，燒既時間恰到好處。到主角極濃雞白湯拉麵，侍應介紹有兩塊慢煮雞肉，兩塊叉燒，仲有炸牛蒡，另外仲好貼心俾左碗仔我叫我夾開雞同炸牛蒡，因為浸耐左就唔好食。第一啖先試湯，好濃既雞味，真係無介紹錯，有別於一般既豬骨湯，佢清得黎又有濃濃雞味，唔會好膩。另外雞肉好淋唔會好似平均咬開仲會有一絲絲既雞絲，口感好特別，十分岀色。叉燒夠入味，配合雞湯非常夾，味道好好，而且唔肥膩，非常好。炸牛蒡我都係第一次食，脆卜卜夾住拉麵一齊食又另一種口感。一碗拉麵做到咁好味又咁多層次，好值得推介。…查看更多

今日同男友慶祝一齊左8個月紀念，行開尖沙咀isquare，諗起之前食過一間好味既西餐廳就係isquare附近，有啲掛住佢塊安格斯肉眼扒，所以我地最後揀左再食呢間去慶祝。我地七點就去到間餐廳，可能都仲早，一去到已經有位，但窗邊三張卡位已經有人坐，睇黎我下次如果要坐窗邊睇街境就要預早打電話卜定枱喇。餐廳環境都算靜，枱枱客人都細細聲傾計，連客人都好有質素，餐廳亦會播好柔和既音樂，有烏絲燈胆做燈飾，燈光柔和，加埋每張枱上面都有盞燭光燈，感覺都唔錯，最岩情侶黎拍下拖撐枱腳慢慢食。我地今次係為塊安格斯肉眼扒先再黎幫襯，當然第一樣叫既就係燒安格斯肉眼扒配野菌紅酒燒汁啦，仲叫左北海道帶子配三文魚子沙律做前菜，同叫左個芝士菠菜意大利雲吞配煙肉南瓜汁。先黎個北海道帶子配三文魚子沙律，佢個玻璃容器好特別，上層玻璃兜裝住一片片帶子刺身同一粒粒脹卜卜既三文魚子，下面個玻璃兜裝住沙律菜同去皮橙肉粒。食落去，帶子夠鮮甜，份量都唔少，加埋三文魚子一齊食咸咸地好夾。沙律菜好青綠好新鮮，食落又清新爽口，分別加埋橙肉同三文魚子一齊食，咸中帶甜感覺好特別。之後黎個芝士菠菜意大利雲吞，黃色既南瓜汁同煙肉舖滿雲吞上面，睇見都覺得好食。啲雲吞都幾大隻，而且份量都幾多。用刀切開隻脹卜卜既雲吞，裡面包滿已經調左味既菠菜蓉，食落夠晒味，皮薄餡靚，咬落去塊皮煙煙un un，加埋個南瓜汁一齊食，味道超夾，好好味。全晚最滿意就係衣碟芝士菠菜意大利雲吞配煙肉南瓜汁，下次再黎會再食過😋。再黎係燒安格斯肉眼扒配野菌紅酒燒汁，上次黎食已經好好食，所以今次為左食佢再encore。我叫左都係要求牛扒五成熟，廚師控制火喉好好，外面係燒到帶少少燒烤味既牛扒香，切落去又好林，牛肉紅紅地滲有少少牛肉汁，岩岩好五成熟。配埋紅酒燒汁個味好夾，紅酒帶出到安格斯牛既鮮味。伴碟附上粗粒黑胡椒同鹽比人點黎食，但我覺得塊牛本身已經夠味，都唔需要加鹽加胡椒。除左安格斯牛扒之外，隨碟仲附有燒蒜頭、燒車厘茄、燒嫰蘆筍同烤焗薯片，初頭以為啲薯片係脆口，但食落去原來係軟身既焗薯片，估佢唔到。但我都係覺得上次用牛油煮薯蓉做配菜配牛扒一齊食會再夾啲，但如果講健康，當然係烤焗薯片會健康過牛油味薯蓉啦。廚師揀左燒車厘茄做配菜，好有心思，酸酸甜甜既車厘茄可以中和返食牛扒既油膩感，而家啲車厘茄粒粒都好甜，好香茄味，唔錯唔錯。連燒蘆筍都好青綠好嫰，食落唔會有乍，仲有啲牛扒香同草青味，衣味燒安格斯肉眼扒無得頂牙😋。可以encore 再encore。餐廳侍應服務態度都好好，不論係帶位、點菜、上菜、問佢攞兩杯暖水同埋單都好有禮貌好斯文。上菜時間又快，我地點完菜後五分鐘就已經為我地開始上前菜。食完晒碟上所有野，又會詢問我地需唔需要清走隻碟，唔會有比人烹走既感覺。食晒所有食物都仲可以慢慢坐住傾計，無用餐時間限制👍🏻，好值得讚。餐廳門口有盞會變色既Shine 燈，走果陣仲可以係𨋢口揀自己鍾意既顏色燈色黎打卡。…查看更多

今日約左男友同阿媽飲茶，因為男友未試過榮華衣間飲茶，所以帶左佢黎試下。我記得間酒樓好似要十一點先開，所以約左佢地十一點半酒樓等。一去到就已經有位，唔駛等位。我叫左必食既腐竹白果豬肚湯😍，鵪鶉蛋燒賣，叉燒腸，同陳皮牛肉煲仔蒸飯。先黎個腐竹豬肚湯，今次好足料，勁多豬肚，啲豬肚大大件又夠林，又有白果同腐竹，飲落個湯有少少胡椒味好正。衣個湯好多時未到下午茶已經賣晒，所以有買襯手，手快有手慢無。再黎碟叉燒腸，今日個廚師好孤寒，勁少叉燒，條腸粉咬落都幾軟綿綿，口感尚可。再黎個鵪鶉蛋燒賣，衣款點心唔係間間酒樓有得食，面頭塊皮煙煙un un ，點埋啲蒸出黎既肉汁食，都唔錯，隻鵪鶉蛋都幾大粒，下面舊肉應該係手剁豬肉，所以食到粒粒肉粒，肥豬肉都唔算多。最後係個陳皮牛肉煲仔飯，講真我今次食唔出陳皮味，都幾失望，個飯勝在啲米，食落去粒粒米都分明，唔太軟又唔太硬，水既比例控制得幾好，唔知係咪用油占米呢，食落好有口感又有米香，都係啲飯最好食。…查看更多

星期六同男友去銅鑼灣行街，行完時代廣場，行到腳有啲軟，肚又有啲餓，仲要落緊大雨，所以係時候搵間餐廳食少少野坐下，時代個food court又坐滿晒人，所以上左Openrice 見到時代後街有衣間荳品店，又有咁多好評，所以就試下。初初去到間舖無乜人，仲可以比我地揀位坐，點知坐坐下，愈黎愈多人，最後坐滿晒，我地好好彩竟然唔駛等位。我叫左個煎釀豆腐，佢就叫左個薑汁豆腐花。我個煎釀豆腐即叫即做，上枱時又熱又香，啲豆腐煎到岩岩好，表面金黃色，咬落去外脆內軟，魚肉夠新鮮無腥味又彈牙👍🏻，一碟四件大大件釀豆腐，結果食唔晒，要分啲比男友食。佢果碗豆腐花，佢就話啲豆花又軟又滑好正，薑汁又唔會好辣喎，見佢最後食到一滴汁都無得剩，應該真係好好味，下次我會再去試過佢個豆腐花。…查看更多

今日男友接放工，經過奇華見到有新鮮出爐蛋撻，啲蛋漲卜卜勁吸引，可遇不可求。但個店員話因為岩岩出爐蛋撻太熱，所以唔賣住，要等多十分鐘先開賣，我地為左食新鮮出爐蛋撻，係囍帖街行多陣先再去買。去再買時，個蛋撻都仲熱，但啲蛋已經平伏晒無漲起。食落去酥皮好鬆化，一咬落去就散開。食落啲蛋好滑，但略嫌佢唔夠甜，蛋味唔夠香😔，有少少失望。…查看更多

晏晝一點同屋企人飲茶，阿媽講開鍾意食煲仔飯啲飯焦，做乖女既即刻打鐵襯熱，打去坤記睇下即晚有無位啦。竟然一點打去都仲book 到位，book 到食夜晚七點半果輪，好幸運。夜晚準時去到，新舖門口已經企滿人，如果walk-in 應該唔駛旨意食到，我同職員報到後都要等左十分鐘先有位。入到去要搭枱坐，啲位都幾迫。一坐底個侍應已經問我地食咩飯，因為煮要時間。我地最後叫左兩煲飯，白鱔排骨飯，臘味滑雞飯，仲要仲粉絲雜菜煲同豉椒炒蜆同一支樽裝可樂。先黎個炒蜆😍，好好味，啲蜆肉大大粒，粒粒蜆都開晒口煮熟晒，粒粒都好新鮮，又乾淨一粒沙都無，啲汁用黎送飯一流。👍🏻👍🏻再黎支樽裝可樂，夠冰凍又夠氣。👍🏻然後到粉絲雜菜煲，熱辣辣又多款式既菜，夠晒味。最後兩煲煲仔飯足足要等左一個鐘先有，但都係預計之內。先講白鱔排骨飯，啲豉椒味道幾好，排骨都新鮮彈牙，白鱔今次唔夠新鮮啲肉好林無口感，啲飯一粒粒有咬口，有飯香味又有飯焦，最緊要係全部飯焦都食得到，唔會濃晒痴住晒個煲👍🏻。最後係個臘味精滑雞飯😍，有臘腸潤腸同臘肉，臘味夠足料又夠香，啲油同雞油落晒啲飯度，粒粒飯都充滿臘味同雞味👍🏻👍🏻👍🏻，衣煲飯真係無得頂，下次要再叫 ! 由於太香太吸引，煲飯一放落枱就比我地食晒，食晒先發覺唔記得影相。食左咁多次，我都係覺得新舖好味過舊舖好多。…查看更多

今日約左男友食早餐同返教會，我帶左佢去間屋邨懷舊茶餐廳度試下，間餐廳起碼有廿幾年歷史，我好細過時食過一次，今次再去，間餐廳都已經裝修過，比起以前，啲燈光猛左好多，枱凳亦都乾淨左。我叫左個火腿絲通粉，跟餐配煎蛋腸仔方包同咖啡。先黎杯熱咖啡，咖啡味好濃烈，好似少奶咁，所以迫住我要落少少砂糖。再黎碗大大碗火腿絲通粉，餐廳都係用滑lu lu舊式通粉，但可能廚房煮耐左，或者屋邨多老人家幫襯，所以啲通粉煮得林左啲，方便老人家進食。碗通粉好大碗，食晒碗粉已經夠飽，所以塊方包我都比左男友食。腸仔煎得幾香又唔會好咸，煎蛋我無特別要求要太陽蛋，所以餐廳比左全熟既煎蛋。三十蚊已經食到好飽👍🏻。…查看更多

星期日終於可以訓到自然醒，訓到十一點幾先起身，換埋衫果啲已經無早茶飲，好彩屋企附近間錦川早餐時段去到十二點。去到餐廳岩岩好11:55am，餐廳坐滿人，所以要搭枱坐，大部分人都食緊早餐，只有少部分人食緊午餐。雖然全間餐廳得三個侍應，仲忙到踼晒腳，但佢地都仲好有效率同禮貌幫我落單👍🏻。我叫左個仿鮑魚絲火腿通粉，跟餐有火腿奄列同方包同咖啡。($33)先黎杯咖啡，咖啡好有茶餐廳風味，夠香濃，又有奶香，唔駛加糖都可以。再黎碗仿鮑魚火腿絲通粉，餐廳用舊式通粉，所以又軟又滑，但又唔會好林👍🏻，火腿絲同仿鮑魚絲份量都算多，好抵食。再黎碟火腿奄列同方包，奄列唔會太乾身，中間仲有少少滑蛋，火腿絲又多，奄列做得唔錯。方包就正正常常無乜特別，但我見搭枱對面加錢將方包變多士，有㶥底又有少少牛油係面，塊多士賣相好吸引，好似好好食咁，下次我會加錢試下。…查看更多