cindysaaa的個人專頁

11:00 左右係openrice order定咖哩豬排飯外賣自取，set咗13:15 自取。準時抵達，同行嘅人啲食物全部都準備好，得我嘅食物未準備好，職員仲要話咖哩係要等，又話多單係要等，三催四請之下先幫忙跟進，最後13:35左右先攞到食物。Lunch時間分秒必爭，preorder就係為咗慳時間，如果提早2個鐘接單都做唔切嘅話，咁不如檢討下間餐廳嘅營運係咪有咩問題？另外啲食物都幾唔好食，豬扒皮肉分離，非常麻麻，伏！唔推介！…查看更多

特登嚟呢度幫朋友慶祝生日，結果敗興而歸！門口帶位女職員超冇禮貌，呢間餐廳唔歡迎豁免QR CODE嘅客人！根據現時政策，去餐廳堂食需要掃描安心出行同埋針卡QR CODE，而未打針人士有豁免QR CODE都係可以入餐廳堂食，而一直去其他餐廳食飯都係冇問題。但呢度門口帶位嘅女職員，當嘟完QR CODE就不停問「You are unvaccinated，do you have any proof? 」但明明呢個QR CODE就係最大嘅proof，不斷同佢解釋佢都唔明白，仲要不停用啲好似審犯嘅語氣問你質疑你，真係好冇禮貌。跟住佢就比咗份聲明要我填同簽名，份聲明仲要留低個人資料（名同電話等等），我問佢點解我要填呢份嘢，佢答係policy。我問佢，邊度嘅policy要咁做？點解得你一間餐廳要填呢份嘢？最後係另外一位男職員嚟解釋係佢哋office policy問題，會反映返，而今次就唔洗我填。如果佢地對policy有誤解，大家係可以心平氣和咁討論，但帶位嗰個女職員係唔需要咁大聲同不斷重複逼問要proof，後來仲要搞到其他人都望哂過嚟，真係好唔尊重同好冇禮貌。本來好想走唔想係度食，但因為朋友生日，為免佢失望，我哋最後都係度食晚飯。講真，間餐廳裝修係幾靚，但啲嘢食真係好普通，千祈唔好叫炸雞乾身到爆。呢個價錢呢種食物質素呢種服務態度，真係冇必要再幫襯。…查看更多

難得嚟荔枝角，朋友帶我嚟呢間幾出名嘅甜記餃子！椰菜冬菇雲耳豬肉餃（10隻）煎得超香口，好足料，好好食😋粟米芝士雞肉餃（5隻）+台灣麵 特登叫麵餐就係為咗加辣菜脯食，台灣麵都係我鍾意嘅麵質～餃子勁足料，入面包住超級多粟米，好香口！ 洋蔥牛肉餃（5隻）+台灣麵 洋蔥牛肉餃係今次試嘅3隻餃子入面嘅最愛，好似食緊漢堡包咁，好好好好足料，牛肉味都重，大推！口水雞 唔會好辣，肉質都爽口，略嫌啲骨有啲多，但份量都算多，3個人分都夠食！整體黎講，真係好抵食，餃子煎得好香口，野食份量都幾多，仲要一啲都唔貴，個辣菜脯仲要幾惹味，食麵點都加返一兩匙～ …查看更多

見愉景新城新開韓國菜，特登黎試吓～士多啤梨雪糕煎糖餅 $68 第一次食韓式煎糖餅，口感幾得意，外面略厚實，硬硬地脆脆地，咬落甜甜地，配埋雪糕同埋士多啤梨勁夾，大推！泡菜煎餅 $68 煎得幾香脆，幾薄身，略嫌泡菜味唔夠，比較淡味，但都好食嘅～ 韓式牛肉炒粉絲 $68炒粉絲粉得乾爽唔油膩，略嫌牛肉有啲啲老，味道略淡～ 芝士辣炒章魚 $188芝士超多，辣炒章魚但唔係太辣，但啲章魚幾爽口嘅，都ok～ 人蔘雞湯 $88完全冇人蔘味，雞肉有啲老有啲鞋，平時人蔘雞湯會有啲糯米，呢度得勁少，唔推薦🙅🏻‍♀️半半炸雞（蜂蜜柚子/甜辣）$168 啲炸雞都幾多骨，炸得都算脆，但肉質麻麻，有啲鞋口，同埋兩隻味都唔係好出，有啲淡，蜂蜜柚子淨係食到甜味冇柚子味，甜辣味都係得個甜冇辣，唔推薦🙅🏻‍♀️整體黎講，對韓國野食嘅印象係比較濃味，但呢度啲野食口味偏淡，不過韓國菜黎講價錢都算相宜，不過不失咁～ …查看更多

山長水遠特登入赤柱黎呢間呢排勁hit嘅cafe～星期六下午黎，排隊排咗成個鐘，真係超熱超曬，不過staff有提供遮，又有提供凍水同切咗啲牛角包比門口排隊嘅客人邊試食邊等，呢樣野有加分～但真係要排好耐，要諗吓值唔值得😹Lemonade $45 熱到飛起嘅時候，呢杯凍嘅Lemonade簡直救我一命，好涼爽但真係好酸，飲一啖會酸到瞇埋眼嗰種😹😹😹Prosciutto Pizza $68個pizza底係幾好食幾鬆軟，夾埋火箭菜都好fresh，略嫌啲火腿太咸，但overall都好食嘅～ Focaccia Pugliese $58 有啲似pizza但又有啲似麵包，咬落都鬆軟，啲蕃茄幾juicy，成件事好match好香幾好食😋 Crispy Roll Pistachio Apricot $42 出面嗰層好酥脆，內裡好厚實，甜得黎唔滯，個人幾鍾意❤️大推！（同行朋友表示覺得太甜）Double Mascarpone Cheesecake $68個cheesecake佈滿餅碎，成個蛋糕分2層，1層類似係cream好軟滑，另1層係cheesecake，芝士味都濃但唔會話好膩～推！整體黎講，間cafe裝修真係好靚，好有歐陸風情，而且粉紅色好岩打卡💕啲野食都幾好食，說不上抵食，但呢啲cafe食環境所以貴啲～Staff講英文但好nice好helpful，service係幾好嘅！…查看更多

黎到葵廣食lunch唔知食咩，個frd帶黎食呢間上海野～ 試咗酸辣湯面 $3X 加 $3 仲有凍豆漿～ 都幾大碗，麵嘅份量都幾多，而且都好多料～唔會好辣但個湯又幾好飲～豆漿都唔會好甜，咁熱飲返杯解渴岩哂～仲叫咗小籠包～ 小籠包完全睇得出真係自己包，佢同出面啲小籠包唔同，唔會話好多湯係入面，個餡啲肉都多，都ok～ 整體黎講 CP值幾高～唔會話驚為天人，但呢個價錢食到呢個quality仲要份量咁多係幾抵食！…查看更多

好想食辣野，見到呢頭新開咗間賣涼拌嘅鋪，於是買外賣返屋企食～涼拌牛栢葉 $38 份量都幾多，牛栢葉超級爽口，底下鋪滿芽菜索哂啲辣汁，勁入味，大推！涼拌粉皮+木耳+豆腐乾+蝦球 $46 份量真係好足，木耳爽口，豆腐乾索哂啲辣汁好好味，蝦球彈牙，粉皮口感煙韌，個汁超正，有啲花生醬味，揀咗中辣，好辣但又好正，本身附有芽菜、芹菜、甘筍、芫茜，撈埋啲汁真係好出色！整體黎講，鋪頭細細間，堂食位置得2個左右，但價錢唔貴而且份量幾多幾好味，啲野食即叫即整，所以要預等一陣～都幾抵食，值得encore～ …查看更多

黎石門探朋友，朋友帶我黎食澳門丸記清湯腩王，係京瑞廣場1期地下，交通都幾方便～海南雞飯 $53份量好足，飯帶油香唔會好乾，雞都幾滑，略顯有少少太油，但整體配搭埋醬汁，好食！咖哩牛腩 $55就算只係叫左細份，但都好大兜，正！牛腩切件大細適宜，而且好淋好入味，好易入口！咖哩汁偏油，建議撈勻黎食！大推！！！香茅豬扒 $45份量都係十分足，豬扒外脆內軟，而且仲有少少甜味，食慾大增，大推！整體黎講，野食份量好足料而且幾好食，價錢都公道，CP值幾高！舖頭雖然比較細，但都坐得舒服，員工服務態度都良好～推！原來店內娘惹咖哩曾獲法國領使頒發法國藍帶美食勳章同埋獲得過第十五屆清湯腩王至尊大獎🤩…查看更多

黎到旺角，想食雞煲就黎試吓呢間鋪。2個人叫咗半隻重慶麻辣雞煲 $148叫咗小辣，辣度非常易入口，連埋三色椒、洋蔥、芫茜等配料好香好惹味！雞嘅份量都幾多，而且肉質嫩滑，唔會好老同埋都幾入味😋同埋店員會幫我地煮個雞煲，完全唔洗自己動手，唔洗怕痴底/煮到燶咗，好貼心！鴛鴦墨魚油炸鬼 $68油炸鬼釀滿新鮮墨魚滑，油炸鬼炸到脆卜卜，好香脆，個墨魚滑好彈牙，再鋪滿黑松露，真係無得輸！蟹籽味都好好食❤️再沾埋泰式辣醬真係超夾！大推！自家脆響鈴卷 $48每條響鈴真係超級大件，索哂啲湯汁真係勁邪惡，推！秘製芝士墨魚丸（半份）$38 半份即係有2粒芝士墨魚丸，勁大粒，墨魚丸包住大大粒cream cheese，芝士味好濃，但又唔算好膩～ 蟹籽蝦滑 $68 蝦滑好新鮮，肉質好爽口彈牙！入面真係有蝦，真材實料！唐生菜 $28啲菜望落色水都幾靚幾翠綠，而且份量都幾多！潘芳堂雪梨菊花茶 $25/支 帶有淡淡嘅菊花味，唔甜，幾好飲！青檸柚蜜 $48/渣 幾清新，唔會好甜，好解渴～ 整體黎講，鋪頭環境都闊落，坐得舒服，同埋超級衛生（讚）！坐低之後，店員即時提供口罩紙袋、搓手液，跟住仲比咗兜熱水我地清洗餐具，服務真係好周到！而且價錢唔算好貴，人均二百幾蚊，食到好飽，份量又多又好食，CP值幾高！不過都提提大家有收醬料費，每人$15，同埋比咗碟酸青瓜前菜好開胃😹另外呢排好似做緊88折優惠～ …查看更多

早排碌ig見好多人推介呢間野，近近地係永光中心，於是約埋同事lunch一齊黎試吓！Lunch set 包括沙律/芝士意大利雲吞/餐湯 + 餐包 + 主菜+甜品 + 飲品，呢個價錢係銅鑼灣食到日法西餐，仲要幾高質又坐得舒服，啲野食又靚又好服務，CP值極高！餐包 （lunch set)餐包每人有半個牛角包同1個圓形嘅麵包仔，牛角包幾酥脆～圓形個包帶有香濃牛油味，超好食，再配埋cream cheese真係超正！簡直係我食過最好食嘅餐包，圓形戈款餐包直頭想買返屋企食😂*staff仲有問我地洗唔洗refill，但我地驚食唔哂所以無refill，有小小後悔因為真係好好食😋芝士意大利雲吞配法式蕃茄醬（lunch set）黃色嘅蕃茄幾特別，芝士味好濃郁但又唔會好膩，面頭有啲長條形狀嘅野脆脆地，幾好食～個staff好似話個意大利雲吞入面包蘑菇但我就食唔出有蘑菇味🤣但我個人都幾鍾意～ 北海道海膽意大利飯 $158 平時食risotto最驚啲飯硬過你條命，呢度就無呢個問題，軟硬適中，好creamy～有海膽、三文魚籽同埋蘑菇，好好食，大推❤️廚司每日新鮮魚柳 $178同事叫嘅，好似都幾好食～個staff係有講解係咩魚同埋d side dish係咩～但我已經唔記得咗😂甜品（lunch set）咖啡味同朱古力味mousse蛋糕～本身唔知lunch set包甜品所以好surprise，唔會好甜，幾好食～擺盤都幾靚！唔會話好食到驚為天人嗰啲，但lunch set有甜品呢件事係好開心嘅！飲品（lunch set）揀咗熱朱古力同mocha，淨係睇個拉花都滿意到極！🥰本身要加一，經Openrice訂位有85折，即係差唔多打返個和～略嫌人手有少少不足，望落全場似得2個staff，staff介紹menu時講得太快，不過好有禮貌，可以體諒！而且佢地都有好好留意食野嘅速度再安排上菜、野飲等等都好細心，值得一讚！同埋本身有擔心過會唔會份量好少，但其實都夠飽，如果驚唔夠飽一開始可以refill餐包haha！飲完杯咖啡就真係岩岩好！之後應該都會再黎食🤩！…查看更多

朋友帶我黎食個超抵食dinner，真係大件夾抵食！抵到哭～～～～咖喱豬扒飯 $32 超多咖喱汁岩哂送飯，都幾大碗，而且豬扒炸得都幾好食！豬扒蕎麥麵 $35 蕎麥麵份量都好多，配埋冷麵汁，岩哂夏天食！雞扒蕎麥麵 $38 雞扒都好大塊，建議問店員拎埋燒汁點黎食，好夾！加洲卷 $18/4件 口痕見平平地叫埋壽司黎食～不過不失但可解下壽司癮～ 整體黎講，三十幾蚊食個lunch/dinner，加2蚊仲有凍熱野飲，真係大件夾抵食，CP值極高！記得問店員拎燒汁，個燒汁好好味😋無論點雞扒定豬扒都好夾！唔會建議特登跨區黎食，但如果黎開荃灣真係可以黎食，真係超抵食！…查看更多

見佢7月新出魷魚筒飯，專程一大早就黎排隊，都排咗45分鐘左右～ 北海道名物魷魚筒飯 $22 7月新出，必食！好大件，勁足料，大大舊魷魚入面包滿壽司飯，大滿足！北海道産炙燒喜之次 $27好爽口，唔錯！北海道產魷魚拌辣醬軍艦 $12 啲魷魚好爽口，啲辣醬好多，有小小蓋過個味，但都可接受～ 北海道產真烏賊配鱈魚子 $12烏賊同本身鹹鹹地嘅鱈魚子幾夾～濃厚海膽拌麵 $32 雖然外貌有啲樣衰，但撈勻之後真係好好食，海膽味好濃，大推！白桃芭菲 $32 試過哂壽司郎啲甜品，白桃芭菲榮升最愛，最面頭有雪葩好開胃，酸酸甜甜白桃，真係勁fresh嘅甜品！整體黎講，新出嘅魷魚筒飯真係必試！期間限定，真係唔好錯過！但真係好多人，人流源源不絕，絕對要預時間排隊，拎完籌可以行陣街先返～ …查看更多

聽講銅鑼灣最近新開咗間花系cafe，當然要黎朝聖啦！二重奏忌廉煙肉芝士貓耳朵 $118好鍾意個汁，好creamy好香而且芝士味濃郁，啲煙肉、菇都好香口～第一次食貓耳朵，煙煙韌韌，口感幾好，推介！韓式泡菜煙鴨胸炒蝴蝶粉 $124 韓式泡菜炒蝴蝶粉係個幾新鮮嘅配搭，泡菜汁酸酸甜甜咁幾開胃，不過泡菜可以再多啲同辣啲就更好啦🥰蝴蝶粉個texture都好好，軟硬適中～ White Hse Cookie Cup $69 呢個牛奶曲奇杯真係無得輸，打卡一流！成個曲奇杯都食得，曲奇杯內層塗咗一層朱古力，裝咗牛奶之後唔會淋，所以倒落曲奇杯先飲嘅牛奶會帶有淡淡嘅甜味～曲奇杯外層嘅熊仔同花都係朱古力黎，個曲奇有啲似燕麥曲奇，所以連埋朱古力食岩岩好，唔會過甜，大力推介！玫瑰花釀紅茶 $45 帶有玫瑰花香嘅紅茶，唔係嗰啲好假嘅玫瑰花味唔洗驚，都幾清新～個人認為有啲偏甜，如果可以減甜就更好🥰整體黎講，成間餐廳充滿花花，簡直置身花花世界，有紅色同粉紅色花牆可以影相，真係好靚好夢幻，同埋班friend一齊黎打卡岩哂💕而且啲野食都幾特別幾好食😋而且份量都幾足夠，2個人食都好飽！人均消費都係百幾蚊，都算抵食！強烈推介二重奏忌廉煙肉芝士貓耳朵同White Hse Cookie Cup～ 另外間餐廳比較細間，都建議訂咗位先～ …查看更多

去親葵廣都會忍唔住食又一戟，又平又抵食🥰不過人真係幾多，買完請耐心等候！雪糕單球（珍寶） $10見到個size真係嚇親，超級大杯，食完係飽到痴線！$10咁大杯真係抵到喊，揀咗曲奇味，好味😋雪糕雙球（珍寶） $15揀咗曲奇同荔枝味，荔枝味幾清新幾香，真係超大杯，勁飽！…查看更多

有要事要去一轉將軍澳，午餐揀咗去日日食良，個場唔大，行咗一圈決定食個五寶飯，五寶飯有燒鵝、貴妃雞、叉燒、紅腸同咸蛋，份量比我想像中多。燒鵝同叉燒比較瘦同乾身，個人覺得麻麻地，燒鵝同叉燒都係肥啲好食，相較之下，貴妃雞好岀色，好滑好嫩又入味，唔洗點葱油都好食，紅腸同咸蛋正正常常。…查看更多