oh leung的個人專頁

冇嚟两年有多, 好懷念, 今晚要去紅磡鞠躬, 一早就 plan 定要去食炸醬撈麵同淨雲吞。炸醬撈麵保持水準, 炸醬豬油味香, 又唔太油。 不算甜, 微微辣, 如果能再減甜加辣就更好(純粹個人口味)。麵似乎比一般大路貨好, 淥得亦唔錯, 爽口, 冇乜規水味。雲吞水準亦保持, 肥瘦豬肉同蝦嘅比例適中, 相信大概係2:4:4, 而且撈咗啲大地魚粉(傳統造法), 有陣獨特嘅焦香味。個湯濃味咗啲, 而且可能係少咗蝦籽, 少咗啲層次同餘韻, 不過街坊小店, 不能荷求。 唯獨係隻雲吞嘅 size 好似比以前大隻咗啲, 條金魚尾冇以前咁長, 亦冇咁 bite size。 都係鍾意以前嘅長尾小金魚多啲。 拜托千期唔好再大, 最怕啲蝦餃咁大隻, 要分两啖嘅雲吞。油菜略嫌細碟同淥得太淋, 甖任食酸籮蔔青瓜就照舊very good.現在雖然仍有好幾間保持老風味嘅雲吞麵店, 但係大部份都貴得好過份, 大光燈算係難得嘅一間, 要好好珍惜。 …查看更多

鍾意佢嘅牛肉麵, 因為個湯加咗籮蔔, 比較清甜, 牛肉雖然略嫌薄身(比大婆薄一半咁滯), 麵質亦只屬ok級數, 但整體都算唔錯, 唔會太油膩太臊, 感覺「輕」啲, 頗啱我胃口。個海南雞就真係唔掂, 個套餐收成六十蚊, 除咗碟菜其他冇樣野得, 碟雞竟然只得四五件, 比一般燒臘店嘅切雞飯仲少好多, 砌埋唔夠三寸長, 雞種本身雖然唔錯, 都算有啲雞味, 但係浸雞技巧太差, 啲胸肉霉晒(通常係因為浸雞中途番水至滾)。:( 啲油飯又乾又硬又唔香, 除咗唔油冧冧外, 一無可取。:( 碗湯仲沮喪, 啲色白白地好似好濃咁, 但竟然一啲味都冇 :( …. 咁都夠胆收六十蚊…. :(下次都係食牛肉麵算把啦……查看更多

為一間己結業嘅食店寫食評, 我都覺得自己無聊...以前一個月起碼嚟四, 五次食麵, 數年前搬屋後因為唔就腳, 就疏咗好多.極度鍾意佢嘅冬菇, 好厚身, 好滑, 好香, 好入味; 菜胆通常都好得, 除非非常唔當造, 食入口就知, 老的有渣的會部都摘晒, 一定都唔會孤寒.更懷念嘅係一肥一瘦阿姐, 好友善, 雖然唔多野講, 但係有時耐唔去, 佢地會好有心咁問候近況 (唔係"行"果隻), 好似屋企人咁, 好鬼窩心.慚愧今次竟然要上openrice 先知佢結咗業.... 唔知兩阿姐近況點呢....十幾年嚟, 金祥嘅所有鋪都去過, 包括西環兩間同埋早已結業嘅屯門, 而家只淨番西環一間, 睇嚟要快啲食多幾次... 但係始終懷念錦屏街呢間...…查看更多

Buddha Hut 是我其中一間飯堂, 無他 -- 好食, 健康, 近屋企.見冇乜人介紹香椿芙蓉包飯, 忍唔住推介下. 雖然近來啲腐皮包比以前啲包得冇咁實, 質感差咗, 不過靈魂係個香椿汁, 好香好特別, 其他地方好少食得到, 香椿係一種香草, 聽講仲有助忘憂, 抗氧化, 抗癌等, 食個碟頭飯都咁多食療功效, 冇投訴啦.唔一定要食芙蓉包, 食豆腐扒 (好似叫做黃金扒之類) 都可以跟香椿汁, 不防一試.其他該推介的好多老友都有提到, 不贅. p.s. 小心bar枱尾的两盎辣椒油, 其中一盎寫住勁辣的, 有時(可能啱啱整起)真係辣到飛起.…查看更多

喜歡來新興棧有三大原因:多: 每次來都是食魚粥, 近來己固定了食魚尾加卜, 粥端上來, 魚尾的份量多到連碗都裝唔晒, 一條條尾鰭好似盆栽咁撐晒出嚟, 粥就一定係滿到瀉, 薑絲葱絲生菜絲仲任攞, 鮮: 一食就知, 無論味道和肉質, 魚嘅鮮度無可挑剔. 我什至懷疑是在"後台"即劏的, 未入過雪柜. 因為曾經試過好晏嚟食, 魚腩係煮粥姐姐叫"後台"攞出嚟的, 仍然一樣咁鮮.味: 粥好味唔使多講, 仲有份"人"味. 好多人會唔鍾意班姐姐大大聲嗌來嗌去, 互相呼呼喝喝, 有陣時人客催多兩次都會比佢地鬧, 但係如果抱住輕鬆嘅心情嚟睇, 不難感受到佢地其實好真好可愛, 好有"人"味, 總好過嗰啲機械人式嘅 "歡迎光臨" 同 "多謝下次再嚟"…查看更多

公司在大角咀, 夜咗放工通常嚟呢間, 嚟親都係食湯飯.魚湯鮮甜冇味精, 餸菜份量足, 而且都okay 新鮮, 仲有好多選擇. 自己唔多食肉, 通常都係叫魚骨/腩, 豆腐, 番茄同菜. $33 四款餸大大碗, 熱辣辣, 加碗白飯, 仲有乜要求？伙記服務態度都算okay, 唔會飛刀叉掟碟. 座位窄咗小小, 茶餐廳, 環境不能荷求.冇試過其他食品, 不過通常見隔籬枱叫啲小菜 (如菜胆雞, 炒通菜, 蒸肉餅, 炒蜆之類) 都幾企理. 幫襯咗咁多次水準都保持到, 証明有誠意, 忍唔住要幫佢寫篇食評介紹不.…查看更多