MiccLam的個人專頁

呢晚同個朋友經過沙田呢邊，當要諗食咩果陣我就諗起有呢間台灣野食，雖然我已經食過，但都決定帶個朋友黎試下，因為覺得沙田呢邊如果要食抵食同好味既台灣菜，一定係食呢間九份•十分。餐廳餐牌:醉糖心蛋 (兩份) ($30):一坐底見到餐牌有就即刻叫左兩份醉糖心蛋，同個朋友一人一份，味道還好，酒味幾重，重點係一份先$15，我覺得價錢真係好吸引。雞絲粉皮 ($58):其實正常食台灣菜就真係好小會見到雞絲粉皮，不過呢晚又真係好想食雞絲粉皮，所以就叫左黎食，麻醬份量岩岩好，個人覺得呢到既雞絲粉皮 還可以。鹽酥雞 ($48):食台灣野唔可以唔叫鹽酥雞，呢到既鹽酥雞粉唔算多，肉都嫩。但呢到食鹽酥雞最正係多粉比你慢慢揀，你可以揀自己想食既粉。忌廉芝士蘑菇雞翼(兩隻) ($28):呢到既忌廉芝士蘑菇雞翼好好味呀，入面既忌廉芝士超級香，食落去勁滿足，真係好好味，如果唔係叫左咁多野食，我都想叫多份，真係好好味。芒果軟殼蟹米紙卷 ($68):凍冬瓜茶 ($22):綜合水果茶 ($52):…查看更多

呢個晚上同朋友去銅鑼灣附近食飯，朋友話想食泰菜，所以就同朋友搵左間呢區比較多好評既泰式餐廳，事關我同朋友趕住去睇戲，所以我地就決定炸炸林食，不過都要食好食既泰國菜！泰式生蝦 ($115)食泰國菜唔可以唔食生蝦呀，我地叫左一份生蝦share食，咁呢間餐廳既生蝦一份就六隻，佢另外會跟個湯，我朋友話覺得個湯都ok，生蝦都夠新鮮，對於耐無食泰式生蝦既我地表示大滿足。泰式燒雞 (半隻) ($90)我地食完生蝦之後黎既係泰式燒雞，我地只係叫左半隻，我地覺得半隻既份量就已經夠，兩個人share既話半隻都真係好夠，呢到既燒雞好好味，外脆內軟，雞肉超級嫩滑，極度推介食燒雞，我覺得如果多人先叫全隻，如果唔係叫半隻都夠架啦！菠蘿海鮮炒飯 ($95)我同朋友覺得食泰菜一定要點個菠蘿海鮮炒飯，呢到既菠蘿海鮮炒飯都幾好味，海鮮款都多，味道都幾唔錯，同埋真係好多粒粒菠蘿，都幾推介大家試。泰式奶茶 ($28)我朋友話唔飲野，我自己就叫左杯泰式奶茶，我覺得都幾好飲，杯奶茶真係好泰式，佢好正宗呀，係泰式(甜度好高)既奶茶，同我係泰國飲既問題係一樣。…查看更多

呢晚因為朋友生日同佢食生日飯，咁佢就住樂富同黃大仙之間，問開佢想食咩，佢就話佢想食日本野，咁就帶左佢黎和氣呢間日式餐廳。餐廳餐牌:其實餐廳餐牌呢個部分我之前食和氣既時候都post過，而和氣既餐牌基本上都無乜特別既變動，主打同食材應該都以前都係差唔多，水準都算係keep住既，性價比幾高。電擊雞翼配炸薯條 $68 (組合價): 先黎到既係電擊雞翼配炸薯條，竟然同之前一樣仲有推廣價，$68有一份電擊雞翼配炸薯條再加一個甜品，成件事真係好抵食。電擊雞翼係凍凍地的，呢款雞翼係凍食，甜甜酸酸咁，薯條則佈滿芝士粉，係好食既小食！火炙宮崎和牛壽司 $39火炙宮崎和牛壽司我朋友食左，佢話一啖入口即融，和牛超薄超香，燒得岩岩好，有炙燒味，食得出係高質和牛。鵝肝壽司 $45鵝肝壽司就係我點既，我都係一啖食左，感覺應該同朋友食既和牛壽司差唔多，因為都係入口即融，一啲腥味都無，超級好味，食完係會想encore！鹽味燒牛舌 $42鹽味燒牛舌味道一般，朋友覺得有小小salty，但我覺得加返d 檸檬汁係好好多，個人覺我呢款串燒都唔錯。海膽三色丼 $128呢個海膽三色丼 $128，賣相已經好掂，比起出面果d平幾倍先啦，有帶子有蝦有海膽有玉子，全部都好鮮甜好抵食，呢個真心性價比好高，我覺得絕對係一定要叫既刺身飯。櫻花蝦鯛魚湯泡飯 $118呢個泡飯朋友覺得好好食，重點係魚湯味好鮮味，蝦肉都好味，菜好特別，值得推介一家人黎食，幾健康。宇治抹茶芭菲 $68 (組合價):和氣既甜品真係一定要食，抹茶味雪糕超級好味，仲有好多配料，真係好抵食，重點係組合價，真係要襯仲有推廣價返去食多次。…查看更多

呢晚同朋友去開黃大仙果邊，朋友推介我有間越南餐廳d二人餐好好食又唔貴，咁我地行過去食，咁間野距離地鐵站就大概十分鍾左右既路程。餐廳餐牌:餐廳餐牌主要分為單點同套餐，朋友極度推介食套餐，所以我地一去到兒家直接叫套餐食，套餐真係好抵，我地叫既B餐，成個套餐先$198，但包超多野，CP值好高，$198包每人一碗面同飲野，跟住仲有一個小食，一個菜同牛油雞翼，好抵呀！生牛肉河/扎肉雞絲河:本身我同朋友都想食金邊粉，但今晚無哂，好彩我地都覺得其實河粉都無乜所謂，所以就叫左河粉。河粉上面有好多金不換，令到成碗河好香，生牛肉超嫩，肉質正，扎肉好厚，雞絲好味。牛油雞翼:越一既牛油雞翼真係超好味，首先係蒜味超香，外脆內軟，雞翼整得好熱，真係好好味，極度推介呢個比大家！上湯生菜香茅豬頸肉米紙卷:同朋友share就每人兩件，其中一件係超多菜，個人覺得如果菜既份量可以小d就更好，豬頸肉真係好好味，好軟好香！…查看更多

呢個晚上終於去食一間約左好耐既中環高質日本餐廳，呢間日本餐廳係朋友介紹，好似話係搬左位置，不過都仲係中環入面，而呢間日本餐廳鮨佐瀬主要係食廚師發板的，位置大概離地鐵站6分鍾左右，行過黎都還好。餐廳門口都幾靚，幾日本風，同埋感覺到呢晚要食既餐廳係間高質野。餐廳餐牌:餐廳餐牌主要係呢張，咁就比客人揀返食葵set定係櫻set，咁櫻set就係$1380，主要包括前菜、湯、甜品同15件壽司，至於葵set則係完完全全既Omakase，咁我地難得黎到都唔爭在叫埋葵set，同埋價錢真係唔差得遠，情願比多小小食好d，葵set既價錢就$1680。首先黎既係前菜，有三小碟上，左邊係昆布菜，中間係宮魚，右邊係希靈魚子，前菜功用主要用黎開胃，味道幾特別幾開胃，個人覺得三小碟之中希靈魚子較為特別，平時係其他日式餐廳比較小見真材實料既希靈魚子，通常係都加工過的，但係呢到既希靈魚子係食到鮮味，唔算腥，但口感同味道都特別。另一個前菜小食係炸鰻魚魚面，幾條脆卜卜咁，好似食緊細細包果d零食咁，不過你會食到小小新鮮油炸既味道，唔知點解食果陣令我諗起平時係中式酒樓會食到既脆魚花生果d小食，但不論味道定係感覺，呢到真係高質好多。下一款黎既已經係刺身，呢一款係左口魚刺身，上面放左小小青蔥同小小spicy既蘿蔔蓉，配上小小酸汁，我個人覺得呢個酸酸辣辣既味道幾特別，同埋覺得真係好開胃，味道好新鮮。呢一小碗係北海道蟹肉 蟹膏加小小lime sauce，味道好清，蟹肉同蟹膏食得出係好fresh，睇住廚師即場現開一隻鮮蟹，雖然份量唔多，但真的好滿足！之後再黎既係煙燻鮫魚，呢款煙燻鮫魚點左sauce之後更好味，主要食到既係煙燻既味道，肉質好特別，味道還好。呢款鰹魚刺身同上面一樣，都係配上sauce之後味道更佳，外脆內軟，魚肉鮮味完全鎖住肉裡面，外層既脆特顯層次感。之後呢款係我個人覺得幾特別同幾好食，呢小碟上既係魷魚卵同安康魚肝，我先食左安康魚肝，魚肝入口即融，突如其來既柚子味配上秒速融化既魚肝，應該係我人生中暫時食過最好食既魚肝。魷魚卵刺身我都係第一次食，但味道其實同熟既好相似，鮮味得黎味道好好，可能係因為配上左鰻魚燒汁既關係，呢一小碟係好好味既配搭。之後仲有最後一款刺身係超級拖羅，入口即融，味道新鮮好味，我地都覺得呢款新鮮既超級拖羅真係食完都仲想再食，不過廚師發板就係太多材料，所以只好繼續等下款。之後廚師比左一碗食物，如果我無聽錯既話係叫「飛龍騰」，佢係一碗蒸物，侍應有提醒我地連湯都可以飲，肉係用蝦肉整，湯好清好鮮甜既味道，另外蝦肉係真材實料，味道好！之後黎既開始到壽司了，第一款係鯛魚壽司，味道好特別，味鮮肉質好挺身，但咬落口係軟糯既感覺，配上指定既醬油真係好好味。下一款係日本貴族魚Kinki fish，味道特別，鮮味入口即嘗到，但唔重味，肉質軟既程度有小小似蟹肉，但味道幾好，個人幾鍾意呢款魚。經典三文魚壽司應該係最多人食過既壽司，但呢到既三文魚壽司特別好味，可能因為新鮮既關係，油味唔重但香，味道好！春子鯛壽司皮爽肉嫩，鮮味同鯛魚非常相似，味道都係好好。池魚 吞拿魚壽司都係屬於比較普遍既日本壽司，呢到既都同平時食到既差唔多，但絕對係更新鮮更好味！之後黎左一小碗飯，呢個Mini Don係我認為全晚最吸引既食物，食材有海膽同三文魚子，兩個都係我極為喜愛既日本食材，完全唔腥，味道又香又好味！炙燒拖羅係我地認為最好食既壽司之一，本身食拖羅都唔係平，但呢到炙燒既程度真係岩岩好，入口感覺好特別，先有輕量既煙燻味，之後肉質好快就半融狀態，真的是人間美食！海鰻壽司都係入口即融，本身唔鍾意食鰻魚既我都完全唔驚，真係完全食唔到有骨，反而鰻魚醬既味道真係好好味((燒汁完全蓋唔住海鰻既鮮味，正！)，另外本身極度喜愛玉子既我都真係好小見到呢類玉子，口感外型都好似蛋糕咁，甜甜地好好味！最後既係甜品，可選水果雪糕是但一種，我揀左水果，決定清清地完左呢個OMAKASE。…查看更多

呢晚我約左同爸爸慶祝生日，但呢期流感高峰期，唔知係咪我都比人傳染左，但又知道爸爸鍾意打邊爐，所以就openrice搵左呢間叫 One More Hotpot 來一鍋，因為Openrice睇comment好似話呢間係食藥膳火鍋，咁見到之後就決定唔理了 去馬！餐廳餐牌:呢到既晚市火鍋套餐係包任食2.5小時，我地就揀左一款無海鮮既任食，鍋底就揀左花膠螺頭雞鍋，跟住仲會有一堆手工餃同手工丸，之後靚肉再揀一款，最後配料配菜任食。我覺得One more pot既配料不得不講係真係幾吸引，幾多款係出面如果食絕對係要加錢的。餐廳飲品:餐廳任食套餐，咁任食部分講完就簡單講下任飲，出面會有野飲比你隨便拎，另外仲包埋紅酒白酒，病左既我無飲到酒，但話哂爸爸生日，照叫哂兩杯比佢飲，哈哈哈哈。我覺得飲品都唔錯，爸爸都有話d酒taste ok。花膠螺頭雞鍋:係枱面拎完醬料之後，個鍋好快就黎左了。呢個花膠螺頭雞鍋真係好足料，首先個鍋係用木桶，呢個食法係最正宗既藥膳鍋，重點係木桶中間有位令湯keep住循環，有噴泉既效果，就咁望落去已經見到有半隻雞，一堆藥材同埋超級大塊既靚花膠。當見到湯滾果陣，一定要斟一碗湯飲，因為真係好正甜！呢個木桶設計太特別既關係，呢個湯真係好少油係面，飲既湯係真心補身，有益又好飲。手切安格斯牛頸脊肥牛片:呢份手切安格斯牛頸脊肥牛片好食到不得了，雖然只係限定一份，但一份既份量都夠兩個人食，有更多當然最好，不過呢d靚牛真係高質，肉質好嫩，切得又夠薄，兒家諗起都想食哈哈。手工餃  手工丸:呢間火鍋有樣好值得讚既野係佢地係有手工餃同手工丸，本身個任食套餐包左一人四隻手工餃同五粒手工丸，全部都幾特別(詳情可以睇返menu)，個人覺得安格斯芝心牛丸同西班牙豚肉黑松露丸最好食，味道同食材都特別。其他配料:其他配料係無限追加，個人覺得當中最抵食一定係花膠同蟹柳，呢兩樣係一定要叫，雖然呢個鍋本身個湯底已經有花膠，但係花膠呢d貴食材，仲要對身體好，當然要食多d，呢到既花膠都算幾大塊，味道亦唔錯。另外呢到既蟹柳真係好難得地竟然係比珍寶蟹柳，平時任食火鍋好小見到呢款蟹柳架！係有15cm長果隻日本長蟹柳，味道正，又唔易散，一定要叫多d呀！…查看更多

呢晚同屋企人放工之後係太子呢邊求其食，行過始創果邊見到有呢間野，叫聚好冰室，本身第一眼以後係會食冰室果d餐，常餐呀特餐呀果d，但係係門口睇餐牌先知呢間食既野係好似茶餐廳咁。餐廳餐牌:呢間冰室都算幾多選擇，佢茶餐廳大排檔叫到既小菜呢到都有，咁食晚餐就一定係最抵，不過叫下小菜或者食下包類(如果係下午茶的話)其實都唔錯。咁呢個晚上我同屋企人兩丁友，決定決兩個小菜加飯加野飲就算。黃金蝦 ($77):第一個小菜係我想叫的，叫到冰室竟然有得叫黃金蝦，即刻忍唔住叫，一黎到上枱果陣，好大陣咸蛋黃味，真係炒得超級香，聞到都覺得正，幾十蚊食到好味既黃金蝦真係好正，蝦既份量真係超級多，我同屋企人淨係食呢個都已經超級飽，有小小估唔到份量多到咁哈哈。菠蘿咕嚕肉 ($77):呢個菠蘿咕嚕肉超級好味，屋企人話想食，咁我又無所謂就叫左，份量還可以(正正常常)，但個汁同d肉都係高質，首先呢個咕嚕肉外層唔多粉，肉質超嫩，好好味！…查看更多

呢晚自製早收工，因為早排聽朋友講香港有間叫黑門水產，食物係高質日本食材，可以話係香港版既黑門市場，聽到之後我都真係好想去試下，咁呢晚就同朋友六點半左右已經到尖沙咀，決定一試究竟。餐廳環境:餐廳門面已經好搶眼，好有日本餐廳既感覺，有d燈籠好有日本氣息，餐廳內裡都好多日本significant既裝飾，呢個咁有氣氛既環境都幾岩同朋友飲下日本啤酒，食下燒烤咁。同埋本身有諗過水產餐廳會唔會好大陣腥味，不過黑門水產呢到好好，完全無任何怪味，主要係有好香既食物味。餐廳餐牌黑醋蟹肉蟹籽薯仔沙律 $78:首先上枱既係一個前菜，我地叫左個黑醋蟹肉蟹籽薯仔沙律，一開始無太為意沙律有咩餸係入面，一黎果陣只係見到有一個薯泥球同聞到黑醋味。之後食食下發現原來沙律菜之間夾雜左好多蟹肉同蟹籽，係真蟹肉，超級正！呢個沙律幾開胃，味道正！牛油燒帆立貝/海膽燒帆立貝:同甲羅燒一樣，我地叫完兩款帆立貝之後，店員有拎比我地睇下順便影下相咁，d帆立貝既size實在太大隻，呢間黑門水產既份量都唔錯，幾抵食，帆立貝方面我地就叫一款牛油燒一款海膽燒，朋友話牛油燒好香，我都試左一啖，牛油味係幾重，味道幾好，都真係好香。我叫果款海膽燒帆立貝海膽味已經融入左帆立貝咁，味道唔算太濃，價錢我都係覺得可以接受。相比之下甲羅燒性價比更高，不過鍾意食帆立貝既人都要叫呢個試下，肉質都鮮嫩。黑門令蟹味增甲羅燒/海膽蟹味增甲羅燒:一見到餐牌之後我就覺得呢個甲羅燒係呢間黑門水產既必食之選，燒之前店員有拎過黎比我地睇下，一見到果陣都已經流哂口水，會清楚見到蟹膏蟹籽蛋等等，燒過之後味道更香，兒家諗返起都仲想返去食哈哈，燒過之後可以配餅上，佢仲有d粒粒比你一齊撈黎食。我有試哂黑門令蟹味增甲羅燒同海膽蟹味增甲羅燒，黑門令蟹味增應該係招牌，kind of招牌既味道，我食得出有小小spicy，不過我個人更喜歡海膽蟹味增甲羅燒既味道哈哈，可能係因為自己都鍾意海膽既關係，所以會更鍾意海膽味，價錢方面都可以接受。磯燒大虎海老 $136:食得水產點可以唔食蝦(海老)，我見到餐牌果陣發現一隻海老都唔平，諗住叫兩隻黎試下，朋友都話想知道呢個價錢有幾大隻，點知黎到果陣 (生蝦)真係好大隻，長度有小小嚇親我，比平時見到果d大虎蝦再大多小小，我地影相果陣都呆左。燒完之後味道真係唔洗講，首先有好香既膏味，另外肉質真係滿分，超級好食既蝦(海老)！我個人覺得呢個價錢未必個個都會食，不過如果你本身對蝦係有興趣，就真係一定要試試！黑門三文魚加州反卷 $88:呢個黑門三文魚加州反卷好fresh，除左有超肥美既三文魚之外，仲有三文魚子同玉子蟹柳，味道配搭起上黎都唔錯，價錢都幾抵。鰻魚玉子燒 $78:有睇開我食評既人都知，如果間餐廳有玉子燒我係一定會叫，即使我個人本身唔係好食鰻魚，但我都堅持要叫鰻魚玉子燒，呢到個既鰻魚份量算幾多，係六件玉子燒上面有兩片長鰻魚，另外每件玉子內裡都有鰻魚，再加上一堆紫菜絲，鰻魚味幾重，重點係一條骨都無(我成個人放心哂咁進食)，係真係連幼骨都好小，可以食得好放心，另外玉子燒既質感都ok，唔會話好厚但又唔會覺得好薄，感覺上係下次黎到都會再叫既食物，正！曲奇谷咕 $68:我就叫左杯曲奇谷咕，呢杯好好飲呀，鍾意飲朱古力既人一定會鍾意，呢杯野飲最正既位係佢本身朱古力已經好好飲，杯頂仲要加球曲奇雪糕，簡直係同時combine左兩種滿足，正！夢幻星球 $58:朋友叫左杯夢幻星球，一黎到果陣覺得真係好靚，個底係紫色同藍色既配搭，陣味好特別，有d似有氣既花茶，甜甜地咁，好特別。…查看更多

呢晚自己一個人食，去到灣仔呢頭，記得朋友有介紹過有間日式正宗醬油拉麵，咁就去試下。餐廳環境:去到間餐廳之後先發現原來呢間係一間小店，環境幾有日本拉麵小店既感覺，可以話係隱世拉麵店，但衛生同環境都好ok的。餐廳餐牌:餐廳可以選擇既食物唔多，主要分為拉麵、飯同小食等等。我本身好鍾意食醬油拉麵，咁所以呢晚都叫返個醬油拉麵黎食下。呢間餐廳佢有張order紙比你自己揀返，咁你揀完自己想食既主食之後，可以加配料同埋可以加配小食。炙醬油拉麵 ($91):呢款炙醬油拉麵一黎到果陣，陣香味係真係有驚喜，係好香既醬油味 (仲有名顯燒過既味)，除左拉麵同基本既芽菜(唔記得左走)、荀同蔥等等之外，仲有一大片叉燒同幾粒肉粒，而糖心蛋係我自己加的，食拉麵無理由唔加埋蛋(就算加錢都要加哈哈)。拉麵既麵質唔錯，口感幾好，肉質鮮嫩，其實食拉麵大部分都大同小異，但呢到既拉麵主要醬油真係好出色，好香好好味，同埋重點係佢炙過之後既味道好特別，係其他地方未試過，呢個價錢食呢種質素，值呀！自家製炸雞 ($55):因為擔心一個拉麵會唔夠飽，所以我都叫多份自家製炸雞，味道都正正常常，不過不失，食炸雞最重要係個醬正，咁呢間係唔錯的，重點係呢個價錢，真的非常唔錯！…查看更多

今晚同朋友食慶功飯，因為朋友完左一單大Project，佢就問我有無邊間餐廳之前食過覺得好正可以再介紹比佢，我諗左一諗，然後就同佢講左呢間位於海港城海運果邊既餐廳 羲和雅苑。羲和雅苑呢間北京菜餐廳算係我腦海中一直有佔據一個位置，因為對於鍾意食北京鴨既人黎講，呢到真係一間唔錯既餐廳。餐廳環境:呢間餐廳其實位置唔錯，雖然行入去真係有小小遠，不過係你食飯既過程中會望到海架，有海景睇之餘仲有咁多美食，其實係幾chill。餐廳內既環境好唔錯，都算坐得舒服，枱與枱之間亦唔會覺得逼。餐廳餐牌巴蜀口水雞(半隻) $168雖然我本身麻麻哋食辣野，但係因為朋友好鍾意食辣，所以都決定叫一個冷盤，佢就話想食口水雞，呢度嘅口水雞都算幾辣，不過都啖啖肉，朋友話覺得肉質幾好，不過都真係有啲辣。呢度嘅口水雞價錢其實唔算平，我覺得性價比一般。栗米魚肚羹 $88我同呢個朋友都好鍾意飲湯，跟住我哋決定叫粟米魚肚羹share，一人份量嘅粟米魚肚羹其實真係大概一碗左右，不過我同朋友都叫咗好多嘢食，所以其實份量係OK。呢度嘅粟米魚肚羹算係幾真材實料，我記得我上次嚟都有飲，粟米蓉加上超級多嘅魚肚，味道好正，魚肚又有咬口，正！花蜜汁黑椒雞翼 $88花蜜汁黑椒雞翼係我覺得全晚必叫嘅餸之一，呢到既雞翼真係好好食，性價比好高，黑椒嘅味道唔重唔淡，配上已經凝固咗嘅蜜糖，一咬落去外脆內軟，外層嘅蜜糖真係超級好味，內裏嘅雞肉肉質超級鮮嫩，呢度嘅雞翼真係唔可以唔試。青梅一字骨 $138青梅一字骨係我同朋友都覺得想試嘅餸，佢嘅醬係幾多，好開胃，我同朋友都覺得佢嘅醋味幾特別，份量都幾多，呢個價錢叫到咁既質素都算唔錯。牛油芝士焗大蝦 $188牛油芝士焗大蝦一上到枱，陣芝士味已經好勁，話明焗大蝦啲蝦真係好大隻，配上勁濃芝士，真係好好味。除咗芝士焗大蝦之外，個蝦底仲有一啲米餅，食完蝦之後再食米餅，極尚享受。金沙鮮魷魚 $168金沙鮮魷魚係我話一定要食嘅餸，本身我對鹹蛋味嘅食物真係難以拒絕，呢度嘅魷魚仲要整得唔錯，肉質幾嫩，起碼識落唔會好似擦膠咁，配上新鮮炒嘅鹹蛋，成件事真係好完美，可能係因為我同朋友叫得太多餸嘅關係，最後我哋都打包左啲返屋企食，拎到返屋企媽媽都話好好味。馳名烤鴨 (半隻) $328黎到羲和雅苑，真係唔可以唔要呢度最出名嘅招牌烤鴨，我哋因為得兩個人嘅關係，最後只係叫咗半隻，不過份量絕對已經係非常足夠，呢度嘅烤鴨係會分為三盤，第一份係只有鴨皮，第二份係有鴨皮加肉，第三份係只有鴨肉。每一份所配既醬都唔同，餐廳侍應會再慢慢講解，三盤個底會有熱氣哄住唔怕凍。呢個烤鴨真係超級好味，一定要叫呀！…查看更多

呢晚同朋友去開九龍灣，咁諗食咩果陣朋友就話淘大係有間食釜飯既專門店，原來就係戲院隔離，一直都知道有間咁既餐廳係到，但係一直都無為意到底呢間餐廳係食咩野既。呢晚我先真正發現原來係食釜飯既，咁我同朋友都話咁去試試佢！餐廳餐牌:由於呢間係一間食釜飯既專門店，所以餐牌主要都係釜飯既選擇，不過仲有d飲品同小食咁，我同朋友每人揀左個釜飯之後大家都無選擇跟餐，我地覺得單點都係OK的。不得不講既係呢間餐廳既小食幾多都幾特別同埋價錢唔貴，咁難得第一次食，我地決定叫多兩款小食試下，睇落味道似係幾特別既小食。五花豚肉釜 $78呢個係我指定話要叫既釜飯，五花豚肉肉質唔錯，配埋d汁係幾好食，個人覺得飯既份量有點兒多，不過味道真係好唔錯，肉既份量都OK，咁多飯黎講都算夠食，個飯既質感其實都比起平時食既特別。鰻魚(金魂)極 $98朋友就揀左個貴野，佢叫左個極既鰻魚飯，朋友話個鰻魚醬好好味，鰻魚無乜骨，而飯既比例同質感都同我講既差唔多，價錢都算合理。朋友覺得佢叫既呢個鰻魚飯吸引過我叫果個好多，不過我覺得呢個價錢，其實兩個都幾抵食，仲要味道係幾ok。黑松露玉子燒 $18又到左一定要叫玉子既時候，基本上每次餐廳有我都會叫，仲要第一次見到有黑松露玉子燒，個人覺得黑松露味道唔出，但係玉子燒黎講都算OK，甜甜地咁，真係平時食既玉子燒味。榛子醬燒年糕 $18朋友就揀左個榛子醬燒年糕，其實個榛子醬就係平時食既Nutella味，不過呢到又幾特別咁配上年糕，味道甜甜地咁，都算好食，呢款年糕應該係屋企可以試下挑戰整哈哈。…查看更多

原來不知不覺間我已經有成年無食過韓燒咁濟，突然諗起所以決定約個朋友去食韓燒，搵搵下見到旺角有呢間叫Running燒 咁我地就諗住去試下，晚餐時段一個人二百幾蚊，都可接受既價錢。位置係旺角同太子之間，旺角地鐵站行過去都近既，5-10分鍾就到。餐廳環境:餐廳環境都算唔錯，一坐底店員就拎左三款前菜過黎，味道正常，不過如果有土豆絲的話必得更好。另外出面有個飲品櫃，選擇都算幾多，我個人覺得桃茶最吸引哈哈，keep住飲；仲有個area係可以比你拎醬，d醬都幾好味。餐廳餐牌:餐牌主要分為四張，其中一張係最後先會比你既一次性食甜品，有韓國雪條。另外三張就包括 (1)牛豬香腸 (2)海鮮雞羊 (3)菜 面 飯 小食 湯，我覺得選擇算係唔多唔少，都可以接受既，咁但係就無出面散叫肉既韓燒咁多款式揀。餐廳食物:Running燒既質素絕對係唔錯，先講肉既部分，烤肥牛同金菇肥牛卷都好唔錯，夠薄又好味，雪花牛仔肉同西施牛肉片就肉汁幾正，夠哂Juicy，薄切西冷都好味，不過要提大家牛類都唔好燒太耐，如果唔係會好硬。五花腩同豬肉腸仔類都唔錯，不過我竟然覺得呢到既牛好食過豬，因為平時會覺得食韓燒一定係食五花腩，Running燒既牛肉好似做得出色過豬。至於海鮮類，我覺得大蝦、龍脷魚片同帶子係必食，大蝦烤完仲有少量膏，烤完之後不論係香味定係味道，佢令我諗起泰國夜市烤虎蝦既感覺，呢到既虎蝦幾新鮮，唔會有腥味，肉質都幾好。帶子同龍脷魚片烤完仲有汁，超好味，入口果個口感又正味道又正。其他類別我覺得就一定要叫個生菜籃，因為你一邊烤一邊伴住d生菜食，如果唔係d烤肉會好油，有d菜先balance返，其次係我地覺得呢到既炸雞好好味，高度推介柚子味炸雞，其實面同粉絲我地都想食，但係無奈真係飽，食唔落，見到隔離枱食果陣我地都流哂口水。…查看更多

呢日同朋友去開觀塘呢邊，朋友話想食龍門冰室，咁我地就去，點知當我地去到果陣發現兒家龍門冰室已經改左名做金龍冰室，不過環境係一樣既。餐廳環境:餐廳環境基本上保留返原本既，同以前一樣，感覺上只係改左名既冰室。餐廳餐牌:餐廳餐牌同之前龍門冰室果陣都係一模一樣，冰室應該有既都會有茶餐、鐵板餐、小食、飲品等等。鐵板至尊海鮮 $90呢個鐵板至尊海鮮餐我一睇餐牌就覺得好吸引，青口、魷魚圈、蝦球、帶子、龍利魚，全部都係吸引既海鮮，真係估唔到冰室都有鐵板餐食。味道係好唔錯的，青口、魷魚圈、蝦球呢三款我都覺得好新鮮，另外炸魚同帶子我有另外叫佢比個沙律醬，我覺得配上左醬之後好好味。茶餐A 瑞士汁雞翼湯公仔面 配 多士 奶油脆豬 $50雖然叫既只係普通既一個茶餐，但係將公仔面既湯底轉左蕃茄湯底，另外多士轉左做奶油脆豬，呢個絕對係識食既食法，奶油脆豬夠脆，奶油份量岩岩好，另外瑞士雞翼超級入味，真係好好味，呢個價錢真心係抵呀！…查看更多

呢晚同朋友想食台灣野，咁係銅鑼灣附近就搵到呢間叫古早味既台式餐廳，距離地鐵站都幾近，3分鍾路程，上到去估唔到原來星期一都要等位，咁等左一陣我地就入座了，呢間係一間環境唔錯既台式餐廳。餐廳餐牌:餐廳餐牌既選擇非常多，基本上平時你想食既台灣野，你都會係古早味呢間餐廳搵到，個人覺得小食同飲品都吸引，好適合一班人黎叫勁多Share。宜蘭蔥餡餅 $28呢個宜蘭蔥餡餅幾質感幾特別，佢有小小似生煎包，但係內裡係超多蔥，個人覺得味道不錯，不過係有小小油，喜歡油炸食物既人一定會鍾意呢個宜蘭蔥餡餅。蚵仔煎 $52呢個蚵仔煎係我覺得成晚最驚喜既小食，其實古早味既蚵仔煎唔係傳統味道既蚵仔煎，佢係有蛋餅既味道，咬落去味道口感都勁似蛋餅，蚵仔既份量都夠，真係幾唔錯。珍珠奶茶 $18珍珠奶茶味道正常，價錢都還可以，珍珠軟硬度適中，平時食親台式餐廳，我覺得一定要飲下珍珠奶茶！古早味牛肉面 $65古早味牛肉面超好味，牛肉有3塊，超入味，紅蘿蔔都好軟口，一咬就分得開。…查看更多

呢晚happy friday 我一早約左朋友去沙田果邊食飯，帶佢去食一間之前已經食過既台灣餐廳，主要係因為我呢個朋友好鍾意食台灣野，咁佢問開我有咩好推介，我就帶左佢去九份十分。我都係帶佢係沙田圍站出，行過去就10分鍾之內，我個人覺得都係幾方便，食完慢慢散步過埋城門河就返到沙田站，成件事係享受得黎又可以幫助消化。餐廳餐牌:九份十分既食物種類其實算好多，我覺得九份十分就真係甜品同野飲最吸引，好多款係你一睇餐牌就會想試下，朋友都係有呢種感覺，好多野佢都想試。除左甜品同野飲吸引之外，我覺得有d小食都係幾吸引，例如下文會講下我地叫陣d咩小食。鹽酥雞 $48鹽酥雞黎得好快呀，一份既份量都唔小，價錢尚算合理，九份十分鹽酥雞既特色係佢會附上埋好多唔同既味粉比你自己配搭，我個人緊係最鍾意梅子粉，原味、芝士呢d我地都覺得唔錯，可以因應返你口味而決定落咩。忌廉芝士磨菇雞翅 $28忌廉芝士磨菇雞翅係我覺得全晚最好食既小食，高度推介大家試下，雞翼入面有香濃cheese味，再配上忌廉同磨菇，真係好好味呀，前半部分係已經起左骨，所以可以大啖大啖咬落去，係得返雞翼尖有d軟骨。醉唐心蛋 $15一份一隻既醉唐心蛋超正，其實味道同size都有D似係台灣便利店買既唐心蛋，不過呢到酒味岩岩好，下面仲有雲耳，好味！皮蛋豆腐 $32呢個係我朋友高度推介既皮蛋豆腐，上面有肉鬆，下面有青瓜，豆腐好滑好清，配上肉鬆同皮蛋真心係好正，個口感同味道都超哂班，重點係呢個價錢呀，邊到識到又平又正既皮蛋豆腐！奶油酥吐司 $32呢個我同朋友一開始當左佢係甜品，但黎到食落先覺得，呢個我地真係要明白佢係吐司哈哈，佢個味道係小小甜甜地，但唔算好甜，一份吐司都真係幾飽，好彩味道係可以的。蚵仔肉碎泡飯 $58呢個蚵仔肉碎泡飯係超級足料，首先佢係一大碗咁上，另外肉碎同埋蠔都有超級多，上枱果陣真係熱辣辣，呢個價錢真係好抵食哈哈。黑武士之劍 $32呢個黑武士之劍係創意之作，兩條3.6牛乳既冰棒配上熱朱古力奶，味道係幾唔錯，我覺得鍾意朱古力既人絕對應該試下。…查看更多