買咗九點幾場，諗住早啲喺附近商場食埋飯。唔想食西餐，見到「鏞鏞」唔使等位就即刻入咗去。我哋同侍應講要趕住睇戲，佢好好人，話可以幫我哋落單快啲。我哋快快手叫咗幾樣嘢。先嚟個脆皮燒腩仔，個皮燒到卜卜脆，半肥瘦好香口，用嚟開胃一流。主菜我哋叫咗個咕嚕肉，酸甜度啱啱好，啲豬肉炸得外脆內軟，送飯食真係無得彈。再加多個欖菜肉鬆四季豆，鑊氣十足，四季豆炒得好爽脆，好惹味。最後叫個瑤柱蛋白炒飯，炒得夠乾身，好足料，兩個人 share 食啱啱好。由坐低到食完埋單，大概一個鐘多少少，整體上菜速度好快，完全唔怕趕唔切入場。食完仲有時間慢慢行過去戲院。如果想喺 K11 搵間有質素、坐得舒服、上菜又有效率嘅中菜館，呢度絕對係睇戲前醫肚嘅好選擇。…查看更多
以上食評乃用戶個人意見 , 並不代表OpenRice之觀點。
讚好
用餐途徑
堂食
