imwingy的個人專頁

難得同嬤嬤一家人咁食餐飯，就落黎荃灣搵間酒樓食下。當晚係平日黎，直接入都有位。環境正正常常，唔係特別乾淨，亦唔算污糟。我地人唔多，嗌左碟雞、蟹、炒飯炒麵，諗住夠食，點知啲野黎到就一肚氣！炒飯炒麵　－　水準同一般小食店茶餐廳差唔多，算啦，酒樓期望唔到啲乜。雞　－　骨「慘慘」，無乜肉，但六十幾蚊係酒樓食到雞就算了。但最後先黎既蟹，就最激氣！上個陣見個殼大大個，百五蚊好似唔錯。點知一開個蟹殼，入面零蟹膏蟹肉都算，啲蟹腳仲幼過我手指尾，得個幾條。我好似形容得好少？因為碟野真係得咁少阿！！叫個經理黎傾傾，又話正常，就算換比你係咁…咁差仲攞出黎賣，兒甥仔都話無眼睇，唉！但嬤嬤見到班細覺得開心，又話出街食係咁嫁啦，算啦。我地呢班做細既都唔講咁多，嬲住靜靜地咁埋單算，計埋茶位成三四百蚊，換得班細路食得飽，唯有送嬤嬤返屋企之後再咬個麥記醫肚，同以後唔再幫襯呢間野！…查看更多

久久未寫食評，最近搵返啲相就補寫下啦 幫襯呢間應該都上年既事，但一試難忘。妹個陣有會員卡，係佢介紹下就黎試下呢間西餐，粉粉杏杏既環境，佈置得好舒適。當時佢地做緊期間限定－櫻花，個櫻花特飲真係好正，淡淡花香，味道唔會好甜，好岩入口。主餐係卡邦尼煙肉意粉同三文魚忌廉意粉，味道好適中，宜家係香港呢個格位做到咁好難得，因為平時我經常食到都好鹹／好淡，呢個真係好正我地係食下午茶，價錢$5X~6X左右，食到呢個水準都幾開心～可惜之後都忙，少去個邊，就無再食過了，好想再食阿 >"<…查看更多

同阿妹去荃灣行街，見咁耐無食過味千就入去打個躉。下午茶依舊好抵食，四十蚊一個拉麵連野飲，係市區算係咁。一般品牌餐廳向來都乾淨企理，呢樣都係我樂於幫襯大企業既主因。等餐時間都還好，唔知點解點同樣既叉燒拉麵，阿妹個個黎得快過我，但湯色同材料就明顯淡及放涼左，可能係咁岩撞換湯底／廚房交更時間？我飲食習慣係留最好味既，係最後先食，遲黎通常有個好處，啲野熱啲新鮮啲，今次仲厚啲。食咁多次味千，都係呢個料比得最重，真係物超所值拉麵食過咁多間，味千真係平得黎又幾好食。埋單都唔洗一百蚊，用埋coupon同信用卡仲送左個餃子同打九折，值得再黎 :)…查看更多