蕃薯bear的個人專頁

星期四下午1點同個女去幫襯向短髮女店員落單，叫咗個日式野菜白咖哩烏冬加迷你朱古力刨冰轉頭短髮女店員放低張單，我一睇發現出錯單，變咗做大蝦白咖哩烏冬我向短髮女店員話寫錯咗喎，佢話我幫你改返上菜時碗烏冬變咗紅色，原來上錯咗野菜蕃茄湯烏冬，我向店員表達落單係叫白咖哩以免浪費食物，我告訴店員不用更換，但短髮女店員好快手收走個碗，並告知可以叫廚師再煮餐廳連續兩次出錯（第二次應該係廚師出錯）短髮女店員都無講唔好意思全程無表情無尾音，俾人感覺態度不佳到我拎起電話影張單上面 “歡迎分享用餐意見”qr code之後，佢主動提供紙巾、加水、問刨冰上得未同埋撩我個女傾計。之後睇返其他openrice食評，發現我唔係唯一一個有咁嘅感覺。餐廳其他員工無呢個問題，大家去食要有心理準備。好唔好食係其次，用餐體驗真係差到極點，無曬心情。…查看更多

星期六2點半到，要等一陣先有位，因為有下午茶時段好受歡迎。餐廳唔夠木枱，我地3個人要坐自動麻雀枱，枱身好厚好頂腳，不過太滿座無得換枱。茶具餐具都新淨，人手都足夠，但上菜偏慢。食物夠熱，味道不過不失。店員未熟悉枱號，見隔離枱有上錯餸嘅情況。我地一入坐就叫炒麵，點知漏單，問店員情況，佢即刻補單，但其實我地想取消，未問清楚就自把自為，態度欠佳。送腸粉姐姐無豉油提供，佢話人地收咗佢支豉油，我地食咗半碟才補上。問過店員，原來剛開業2個月。叫咗菜苗餃，落單後店員話賣曬，我地話ok無問題，但埋單時照收菜苗餃價錢。大家要記得對單。另外影咗啲午市時段餐牌…查看更多

今日去食下午茶，諗住食少少嘢，廢事食唔落晚飯，但餐廳份量真係少得驚人。叫咗鰻魚玉子壽司塔可（$68）份量少到好似食風咁，幼幼鰻魚條同一條蛋絲飯嘅份量好似兩舊壽司咁上下。天婦羅紫菜脆脆咁其實唔錯嘅但佢收68蚊喎，實在太細舊，有兩份就差唔多。到飲品，加$38要咗香桃富士梳打。係幾好飲嘅，又靚啱打咭囉～不過要預咗半杯係冰。實在太唔夠飽，所以加$48要咗個薯條配料同醬似食緊大阪燒咁不過不失。好彩食完都夠飽喇。…查看更多

星期一同朋友去食semi buffet lunch。坐低有兩杯暖水，一個暖麵包籃連埋牛油同香草醬。職員眼明手快，收碟同加水唔駛出聲就做咗。餐廳地方細細，但全部梳化位都好好坐。 餐湯有3款，同朋友每樣一款試下，仲有一款中湯可以選擇。雞肉忌廉湯重奶味，偏咸。蕃茄湯偏酸，好開胃。 好多沙律同配菜選擇，每樣食一啖都飽。有三文魚同吞拿魚刺身，新鮮肥美，但壽司就麻麻地。生蠔refill得好快。雖然唔係好大隻但係都好新鮮。啲蝦好彈牙好鮮甜，忍唔住食咗好多隻。 主菜好大碟 ，食唔曬。三文魚煎得香脆唔鞋口，薯蓉超幼滑，大推。相比豬扒比較乾身，配菜唔夠味，比較失色。 甜品誠意十足，同樣大大件，擺盤又靚。車厘子撻入面足料，加埋朱古力忌廉十分夾，唔會太甜。椰子芒果芝士蛋糕，唔多食到椰子味，但芒果味唔會太假係加分位，同樣唔會太甜。雖然好飽但都忍唔住要食曬佢。 要咗熱咖啡，呢個好失望，好苦，有燶味。雖然唔識品評咖啡，但飲咗一啖飲唔落去。 總結：食物質素同服務絕對對得住呢個價錢，但咁貴嘅午餐耐唔耐食一次好喇。…查看更多

星期六下午茶時間去，好彩唔駛等位直入。職員有禮貌，俾兩個位置俾我地揀，我地揀咗埋邊靜啲嘅位置。因為兩個人，所以揀咗個二人餐唔駛煩。 茶叫咗T6114 golden swan tea，係我鍾意嘅味，即係有生果after taste嘅茶，飲完唔會有苦澀味。另外朋友叫earl grey，不過不失。 本來有啲期待個龍蝦三文治，點知睇個賣相已經覺得麻麻地。啲深色沙律菜令碟三文治大打折扣。加上入面係大蝦，因為個樣唔似龍蝦肉，食落亦無龍蝦味。整體味道平平。 好彩個scone幾好食，唔太乾又唔太濕。好鍾意食佢附送嘅茶啫喱，可惜香港無得買。 有4粒馬卡龍，咬半粒再飲啖茶好寫意。其他3款不過不失，但要大力推薦抹茶味，超足料好濃郁。…查看更多

平日下午一點半入座，全間餐廳得三枱客，唔駛等即入。枱與枱之間十分鬆動，而且播住日文歌特別好feel。 叫咗個set lunch，餐牌好似同之前個post唔同。壽司定食包味噌湯、沙律、烏冬或蕎麥麵，有得選擇冷或熱。職員有禮貌，我食咗45分鐘有自動自覺加咗兩次茶，可能唔係高峰期去食會有分別。 要咗個冷烏冬，烏冬彈牙，我要求加蔥同薑蓉職員都幫到手。 麵豉湯唔會得個鹹字有好多紫菜。 壽司新鮮，魚肉同飯偏細舊。落單時可以要求先加wasabi或唔加落壽司度。白生魚偏淡味，中吞拿魚腩有筋，玉子係無飯嘅 ，整體質素中上。一個女仔食十件壽司加烏冬係飽嘅，下次想試埋佢哋嘅串燒。…查看更多

由於打風，服務員多過客人，但都有禮貌同快手，唔會懶懶閒。小朋友想食多啲麵包，我地要求多一袋餐包都可以提供到。食物一貫的好，因為之前食過西環分店。前菜要咗牛油果吞拿魚他他，味道略嫌淡味，但加咗醃洋蔥有加分。肉丸大大粒好足料，勁多芝士，而且蕃茄醬好味到要黎搽麵包。 辣肉貓耳朵好惹味，真正al dente，個汁好味到想舐碟。松露雲吞略嫌普通，可能我係濃味人。記住黑松露要有熱力先會散發香氣。 Tiramisu好香，唔會太甜好好味。 上咗個甜品就問職員有無蠟燭，點知加埋個生日牌，職員唱生日歌，又有即影即有相送 ，仲有coupon送添～去呢度慶祝生日都唔錯。…查看更多

日本蜜瓜及提子下午茶早一個月電話訂位星期六食只有2點半至4點15分同4點半至6點揀其實唔係好似網頁講到咁死如果有位，可以食4點至6點4點15分至4點30分都唔係清曬啲人星期六去食基本上4點半後walk in都會有位食物質素平平，甜品太甜scone 好膩，食一個都好飽服務未夠好，坐窗邊位會自動加熱水入茶壺中間位置要叫人先會加熱水環境好嘈，唔優雅，center piece變毛巾枱為的是方便員工但令酒店降級而且價錢唔平所以性價比超低😮‍💨…查看更多

放假同老公去食下午茶。餐廳木地板加木枱感覺舒服。面對住大玻璃窗夠開揚，樓底又夠高，但音樂聲太大，傾計要大聲啲。侍應有禮貌，會自動自覺加熱水落茶壺。 繽紛果漾幻想曲下午茶（$488/2位）Cappuccino香濃，after taste唔錯，相對茶嘅選擇就大路啲。下層咸點煙三文魚牛角包足料唔油膩軟包雞味濃但青檸超酸，切粒會比較好沙律碗其實係一粒哈密瓜，一粒密瓜同一粒西瓜配超咸火腿，夾埋一齊食啱啱好大蝦脆餅好味，有菠蘿粒同牛油果，好夏日，好清新中層甜點（順時針）紅色荔枝味慕絲。唔死甜，有荔枝肉響入面香蕉拖肥撻，食到香蕉同朱古力，隻味好夾，而且甜度剛剛好奇異果馬卡龍超甜，但零奇異果酸味，名過其實萬麗美式芝士蛋糕。啡色係餅底配超濃芝士，比較油膩但真心好食熱情果朱古力會爆漿，酸酸甜甜比例啱啱好 我覺得甜品多元化而且中上級數。老公就話甜品偏甜，睇你係唔係甜品人喇。 最上層鬆餅乾身，配clotted cream and jam會比較好青檸薄荷雪芭似食牙膏嘅感覺，我麻麻地菠蘿椰香雪糕好食。有菠蘿薄脆，黑朱古力殼容器，仲有脆脆餅。係誠意之作，因為製作需時。 總結係，食過好多間酒店下午茶，呢間環境一般但食物絕對有誠意，多款式又造工精細。份量及味道中上，服務一流，值得再去。…查看更多

由於疫情開係叫多咗外賣，今次試下西餐。 香煎鵝肝配多士伴無花果醬($95)雖然得一件，但鵝肝都算大塊夠厚。鵝肝雖然凍咗，但仍然香口。多士夠脆。無花果醬夠甜可以解膩。附送嘅沙律若嫌唔夠新鮮，啲菜有啲老。 炸洋蔥圈配炸魷魚圈($95)總共有四個洋蔥圈同六個炸魷魚圈。魷魚夠淋唔似擦膠，而且炸漿唔厚啱啱好。相對洋蔥圈炸粉太厚太硬，炸耐咗好深色。 意式肉醬千層麵薯蓉($90)份量算大，底層係薯蓉，再加三層闊麵。有超多肉醬成口都係，變相鹹咗啲。好彩有粒粒蕃茄增加酸味無咁濃味。 切開咗入面係咁樣，超多肉總結係，份量合理，質量平平。…查看更多

同老公去拍拖嘆世界，去試下呢間酒店下午茶。睇返之前留言，酒店已經改善不少。接待位提供口罩袋及餐牌提供多幾款熱茶選擇。請注意，價錢都提高咗。 餐廳樓底高，地毯加梳化加開揚景觀已經令進餐環境加分不少。服務細心，收拾碗碟及加水勤快。三層下午茶靚仔，有6款咸點，6款甜點同2款鬆餅，不少人影相影足十幾分鐘先開始食。職員都有幫手影相。Welcome drink冰凍清新，TWG 茶維持一貫水準。餐具我都幾注重，如果有埋果醬刀就更顯酒店高級感覺。另外果醬匙羹係膠匙又扣咗少少分。鬆餅偏乾，如果奶油再重啲味就更好。蝦春卷趁佢微暖就要食，大大隻蝦誠意之作。鮑魚撻夠曬特別，但龍蝦沙律就少咗啲鮮味。 蕃茄超甜，肝醬，黑毛豬火腿充滿咸香。甜品好少變化，比較突出係煙韌嘅馬卡龍同朱古力味濃嘅貝殼蛋糕。另外有4件甜品都係有朱古力薄殼，入面有mousse，再入面有微酸果醬。其實仲有好多款式可以代替令整體加分，例如tiramisu，cheese cake，fruit tart。 總結係，咸點一流，甜點有待改進。環境服務一流，值得再次光顧。…查看更多

平日晚上6點落單，唔多人，好快拎得。某啲6折，其他8折。包裝精美，攞到返屋企都仲見得人。最緊要係用上新鮮wasabi，唔係牙膏裝或者包裝果啲貨色。 （左上）特上壽司御饍（6折＄125）份量夠，一定夠飽。用料唔馬虎，夠新鮮。海膽鮮甜多肉，成條穴子卷住舊飯。（右上）特上刺身御饍（6折＄131）跟個熱白飯，單人享受都唔錯。有吞拿魚腩，海膽，帶子等，全部質素中上，俾多少少錢唔好食樓下jusco劣質壽司喇。 （下）火灸壽司盛合（8折＄188）7件壽司，普遍太咸，一大pat醬，失去魚本身鮮味。豚肉湯烏冬（6折＄53）湯底超咸，豚肉同烏冬質素不過不失。 總結係，某啲菜式6折堅抵食，只要揀啱就外賣都可以食好西。…查看更多

果日涼涼地，同老公坐室外。纜車大概每10至15分鐘一班，坐室外與纜車更親近，更貼近去呢間餐廳嘅目的。 卡邦尼煙肉燴意粉配炸蝦（＄74）足料大大碟，咸度適中，炸蝦係平價雪藏貨色。芝士牛肉漢堡包配薯條（＄70）漢堡唔算太乾，加埋醬汁好味好多。薯條都係平價雪藏貨色。 另外叫咗兩杯飲品。熱抹茶牛奶（＄40）奶香咖啡（＄38）。雖然用紙杯裝，但都有拉花，可見心思。味道中規中矩。 總結係，對食物就唔駛太大期望，但呢個體驗全香港，甚至全世界係得呢到感受到。日落後招牌著燈更迷人。…查看更多

餐廳佈置好有埃及風味，未食都感受到不一樣嘅用餐體驗，好似好正宗咁。 青豆燉羊肉($145)。酸酸味味加少少辣。羊肉唔多但超冧。大半碟都係燉冧咗嘅青豆。就咁食會比較咸，配包或者飯就會好啲。 比特包($20)。熱辣辣，甜甜地好柔軟。配燉羊啱啱好。 中東羊肉包($148)。即係wrap。足料熱辣辣。可以揀配薯條或者蕃薯條，我揀咗蕃薯條，甜甜咸咸好味道。 總結係，餐廳菜式特別，裝修有異國風情，香港難得搵到，值得一試。…查看更多

好耐無同老公出去食下午茶。一入到餐廳見到全白色裝修好似去咗旅行咁。餐廳播住純音樂，望住落地玻璃伴著開揚景觀，都幾嘆。The classic afternoon tea served daily from 3pm to 5pm ($348 兩位)咖啡不過不失。茶係俾熱水加茶包。4款咸點火腿芝士多士，夠熱，加分牛角包，凍咗比較油膩煙三文魚卷，大大塊好足料薄餅係酥皮，唔多料9款甜點核桃撻，唔甜，有好香核桃味香蕉muffin，偏乾，我比較鍾意濕濕地嘅口感雜莓奶凍，足料好味Tiramisu，咖啡味好香Panna cotta，檸檬味好酸，做甜品間場最適合Mango square cake，甜酸比例啱啱好Puff，唔ok，有藥水味朱古力波，內餡太甜Blueberry macroon，夾心有果肉，有誠意總結係，咁嘅價錢咁嘅質素加咁嘅環境，性價比超高，值得一試。…查看更多