ritterfung的個人專頁

本身聽人介紹先走嚟試下，點知試到人生一大伏。。。講真由細到大食咗咁多碗牛肉飯，由普通家庭式街舖，到吉乜乜連鎖店、加乜乜連鎖店，都食過哂，都從未食過一碗咁難食嘅牛肉飯。首先啲飯煮到好爛，又畀得少牛肉汁，碗嘢爛得嚟又冇味，真係好辛苦先哽得哂成碗飯。加上個阿姐啲服務態度又差，企喺度諗一諗食乜都催三催四，都唔知係咪前世得罪佢，心諗成個西九food court又唔係得你一間舖頭，周邊明明仲有咁多競爭，都唔諗下點改善，呢間嘢再唔改善下，真係等執啦！…查看更多

叫咗碗招牌艇仔河同魚蛋河，湯底味道不錯，魚蛋魚片彈牙滑口，其他配餸不太特別，但同湯底幾夾。主要針對男店員態度，可能你會話茶記伙計態度係咁上下，不過好明顯係欺善怕惡。見你個樣生得後生就呼呼喝喝，年輕就是罪咁樣，眼神凌厲啤住你，對佢客客氣氣講唔該，輕聲說話都無補於事，仲嫌你講得唔夠大聲。但當佢見到啲老街坊就客客氣氣，反差明顯。隔離檯都有人忍唔住，開始粗聲粗氣命令佢，佢啲態度又會好返啲，明顯係唔鬧唔話下，就唔識改下啲臭脾氣，真係唔想食個粉都咁勞氣。…查看更多

屯門紅橋多良心小店就應該人人皆知，最近見朋友推薦呢間小店，就走去試下！心太軟配一球雪糕街坊價40蚊，又平又好食！除咗心太軟，仲有窩夫、梳乎里、燉蛋，再有機會一定要試哂佢。呢間小店有基督教背景，好樂意回饋社會，其實所有嘢都係自由定價，希望一啲有困難嘅人都可以食到好食嘅甜品，真係好有人情味！老闆仲介紹我入會，只要喺佢WhatsApp登記電話同姓名就可以喇，佢會同會員講幾時唔開，仲有隱藏Menu，大家去食嘅時候記住入埋會，睇隱藏Menu呀！…查看更多