ichibanfoodhk的個人專頁

週末約朋友食飯，想搵間坐得舒服而又適合小朋友嘅餐廳，上網見到呢間餐廳環境唔錯，仲有免費兒童餐，一於黎試下。Portobello Truffle Tagliatelle :上枱時已經聞到好濃黑松露香味，入口好creamy，闊條麵火候啱啱好，口感彈牙，沾滿醬汁好好味，值得一讚嘅係Parmesan芝士會於上菜時店員隨你喜好落，鍾意食幾多就落幾多。Luigi's Beef Sliders :賣相相當精緻嘅迷你漢堡包，微烘過嘅麵包，加牛肉漢堡、焦糖洋蔥、車打芝士及蕃茄，食落肉汁四溢，非常juicy。Kids Chicken Fingers :餐廳做緊Promotion，凡惠顧主菜，就會免費提供兒童餐俾8歲以下小朋友，仲有好多款揀，啱晒一家大細嘅家庭。雖則係兒童餐，但份量都相當多，有兩件雞柳及大量薯條，小朋友都好滿足。Skillet Brownie :即叫即焗，所以等候需時。Brownie濃厚嘅朱古力味，配上幼滑嘅雲呢拿雪糕，甜而不膩，作為甜品一流。Virgin Colada :椰奶加上新鮮菠蘿及菠蘿汁，酸酸甜甜相當開胃。Fruit Punch :水果味濃郁，朋友嘅小朋友最喜愛。…查看更多

又打風了，食完飯就早d返屋企，經過「石磨樂豆Jollibean」見到糖水及豆乳相當吸引，一於就買返屋企打風時慢慢嘆。流心花生醬面煎糕 :雖則啱啱食飽飯，但見到呢個面煎糕串好吸引，即時買返串試下，食落口感似雞蛋仔，而內裡有大量花生醬，味道好滿足，一啖一粒話咁快就食晒。9°微甜濃豆乳 + 火龍果豆乳 :面煎糕串加8蚊就有9°微甜濃豆乳，豆味濃郁又唔會太甜，食完面煎糕串飲真係份外解渴。火龍果豆乳好足料，飲落滿滿果香味，火龍果令豆乳更鮮甜，無添加糖感覺更清新健康。香芒仙草凍 :炎炎夏日梗係要試盛夏香芒系列，有好多芒果，食落鮮甜清爽，仙草口感滑溜，食落份外消暑。9°微甜濃豆腐花 :既然餐廳主打豆品，又點可以唔食豆腐花？豆腐花入口幼滑，原味更能突出豆香味。三色芋圓西米露 :三色芋圓色彩繽紛，口感煙煙韌韌，配上滿滿嘅西米，味道唔太甜，真係再大碗都食得晒。…查看更多

是日到黃金商場買嘢，離開時經過呢間古早味蛋糕店，櫥窗擺放住一件件唔同口味嘅蛋糕，望落相當吸引。餐廳做緊正價蛋糕一件減15蚊，店員話除咗呢個優惠，仲有買兩份半件就減20蚊，既然咁抵就梗係要買多幾款口味試啦。原味古早味蛋糕 :個人食古早味蛋糕一定要試原味，因為最能突顯到蛋糕嘅蛋香，蛋糕相當鬆軟，味道唔會太甜，蛋味尤其香濃。黑森林流心朱古力味 :四件中呢款味道最濃，朱古力蛋糕面頭鋪滿朱古力碎，中間再夾有流心朱古力醬，可以話係三重朱古力享受，用微波爐輕輕加熱更加好味。脆皮咖啡軟心味 :呢款又係另一種風味，一咬落口已經傳出陣陣咖啡香味，味到甜中帶甘，頂層嘅脆皮令口感更豐富。海苔肉鬆蛋糕 :除咗甜嘅，都揀咗一款鹹味蛋糕，蛋糕面鋪滿肉鬆及海苔，入口鹹香味十足，鹹味同甜味互相襯托下，味道都幾特別。…查看更多

深水埗一向多好嘢食，西九龍中心都係其中一個地標，food court夠晒多選擇，除咗八樓之外，近期亦新開咗六樓嘅food court，今日來食台灣嘢。脆皮豬手肉燥飯 :豬手肉質鮮嫩多汁，鹹香味十足，外皮卜卜脆；肉燥飯味道微甜，有好香嘅香菇味，配飯嘅酸菜令整體更加開胃。香酥蚵仔煎 :超級大份，仲長過隻筷子，仲要好足料，有好多蠔仔，炸得好鬆化，令人一口一口咁食過不停。椒鹽魷魚鬚 :外皮炸漿夠薄，魷魚鬚入口彈牙，椒鹽味夠晒香口。…查看更多

邊爐癮又起，總想搵d有特色嘅邊爐，「馬祖」主打藥膳火鍋，打住邊爐都可以養生。定量火鍋有好多選擇，最後揀咗B餐，有牛又有豬，再加配料區及雪糕任食，飲品任飲，非常超值。湯底揀咗藥膳椰子清雞湯，一上枱已經聞到濃濃嘅椰子香味，湯底好足料，有黨參、桂圓及紅棗等等。Prime牛肩胛肉肉質柔軟，淥一陣就食得。而豬肉片爽滑，食落有肉汁。自助配料區有好多選擇，各款丸、菜、午餐肉、芝士腸應有盡有，當中最喜歡沙茶牛肉同雞脾肉，沙茶牛肉醃得好入味，而雞脾肉鮮嫩啖啖肉。飲品方面，除咗可以自行到飲品櫃揀之外，亦可以order台式飲品，試咗柑桔檸檬特飲，夠晒清甜涼快。最後甜品有任食雪糕，連Movenpick都有，真係食雪糕都抵。…查看更多

通菜街一向都有好多小店，今日就來到呢間人氣拉麵店「一生懸麵」。餐廳面積唔大，未到午飯peak hour已經有唔少人，到咗食完離開嘅時候已經需要等位。塩味雞湯拉麵 :湯底清澈而味道濃郁，完全唔覺得油膩，附有雞及豚叉燒各一塊，我額外加多三塊豚叉燒， 叉燒好軟嫩，加咗黑椒調味更惹味，加埋原隻溏心蛋、竹筍及碎洋蔥，感覺好滿足。唐揚炸雞 :一碟有四件，即叫即炸，外皮炸得脆卜卜，內裡雞肉仍然保有肉汁，唔會炸到好乾，落幾滴檸檬汁更加開胃。…查看更多

菲律賓過江龍「T.Co」近期越嚟越受歡迎，分店越開越多，每次經過都會聞到陣陣烤肉香味，今日經過尖沙咀分店，終於有機會試了。既然餐廳著名係烤卷，咁就梗係要試晒牛肉同雞肉兩款啦。每個烤卷都係即叫即做，可以見到店員嘅製作過程。牛肉烤卷 :牛肉粒濃郁入味，口感鬆軟配埋烤餅剛剛好，配菜有洋蔥、蕃茄及青瓜等，再加上三款特製醬汁，味道好有層次。雞肉烤卷 :雞肉好嫩滑，同牛肉有唔同調味，兩款烤卷各有各風味。香嫩雞肉飯 :雞肉份量好多，飯唔係一般白飯底，而係薑黃飯，鬆軟之餘仲傳出淡淡薑香味，配上青瓜、蕃茄及秘製醬汁，食落真係回味無窮。凍拿鐵咖啡 :奶味香濃，入口好幼滑，天時暑熱飲真係份外清涼。熱泡沫咖啡 :咖啡味更香醇，泡沫綿密，飲完精神為之一振。…查看更多

提到生煎包，「劉興記」可以話係近期嘅新貴，今日黎到元朗就趁機試下。由於時間尚早，餐廳未算太多人，但隨住午飯時間臨近，埋單嘅時候餐廳已經坐滿。招牌生煎包 :一場黎到又點可以唔食佢地嘅生煎包呢？外皮煎得金黃香口，輕輕咬穿外皮已經感覺到熱氣湧出，爆汁之下真係要小心d食唔好淥親，餡料亦夠豐富鮮味，四隻真係話咁快就食晒。上海排骨湯麵 :麵湯清清地夠鮮甜，麵質幼滑，排骨炸得酥脆，外層唔會太厚，食落有好多肉汁。食滿60蚊仲有無限添飲豆漿，冰凍豆漿飲落份外醒神。…查看更多

是日放假補眠，起身時發覺天氣凍咗好多，即時邊爐癮起，近近地又來到了「一鍋堂」。由於過咗午飯時間，餐廳唔算太多人，見到午市2點半後入座，即享88折，咁抵就梗係揀個靚d嘅餐啦。入座時要揀埋湯底，今日想試較為特別嘅檳城喇沙湯，湯底上枱時已經聞到陣陣椰香味，味道香濃微辣，相當有特色。等火鍋料時，梗係要出去睇下熟食區有咩好野食，有各式各樣沙律菜及炸物，仲有咖哩魚蛋同泡椒豬手，都幾多選擇。Lv4 真手切牛肉、松葉蟹腳、鮑魚、海鮮放題 :返到位時已經見到海鮮拼盤已經到咗，每樣都好新鮮，桶蠔及海蝦更可以不停追加，加入海鮮後令湯底更加鮮甜。手切牛肉薄薄地淥十秒就食得，入口好軟熟，牛味香濃，一盤話咁快就食晒；日本黑毛和牛油花好靚，入口滿口油脂香味，同手切牛肉各有高下。除咗牛之外，雞、羊、豬都有得揀，亦有多款自家製餃子、手打丸及魚滑，款式多到想食齊晒都有難度。自助區亦有各款丸、菜及粉麵，每樣菜都好新鮮。有好野食點可以無飲品？呢度除咗一般罐裝飲品外，仲有自家製茶飲，尤其喜歡洛神花茶，酸酸甜甜份外醒神。最後到甜品時間，有軟雪糕及杯裝雪糕，好滿足。臨走前再睇埋其他優惠，原來晚市9點入座即減 $20，另增加 30 分鐘添，下次同朋友宵夜就識揀喇。…查看更多

是日早收工出咗元朗行街，懶得煮飯下買d外賣等太太收工一齊食，來到了人氣外賣店「尋味」。招牌米粉 :可以選擇辣度，即叫即炒鑊氣十足，配料有魷魚、午餐肉、豬肉片等等，米粉炒得乾身唔油膩，小辣下相當惹味。鹹魚雞粒炒飯 :份量十足，一打開盒蓋即刻傳來強烈鹹魚香氣，炒飯呈金黃色，粒粒分明，軟硬適中，入口滿口鹹香味。跟餐加七蚊有明火靚湯，老闆娘話每日都新鮮煲，天天唔同款，無落味精下飲得出火喉十足。手打牛肉餅 :一碗大約有十多塊，肉質爽口彈牙，牛味香濃，配埋清甜嘅湯，好好味。自製豬軟骨 :炆得好淋好入味，味道甜甜地送飯一流；另外仲有d薯仔粒，吸收晒湯汁後份外惹味。…查看更多

落咗幾日雨終於都好天，又係時候出去搵食，見到呢間新開嘅餃子舖，餃子有好多選擇，一於入黎試下。餃子可以雙拼，湯底亦有兩款揀，每枱都有自製菜脯，鍾意食幾多就幾多。野生菌雞肉餃 + 玉米豬肉餃 :餃子皮夠薄，內裡餡料充足。雞肉餃子唔係好常見，軟熟嘅雞肉配上爽口嘅野生菌，比起豬肉餃子較清新；而玉米餃除咗粟米同豬肉外，仲有紅蘿蔔，味道鮮甜；兩者各有特色。野生菌螺肉雞湯好足料，味道非常清甜，無論配餃子或就咁飲都一流。口水雞 :可以揀辣度，份量都幾多，入口雞肉嫩滑，小辣唔會太辣相當惹味，配埋花生粒，真係食到停唔到口。新張期內送豆漿，豆味香濃，味道唔太甜，都幾好味。…查看更多

天氣轉涼又係最適合打邊爐嘅時候，經過「牛気」見到火鍋之餘仲有「和洋祭」，一於黎滾一滾。放題有6個level可以選擇，豐儉由人，最後我地揀咗level 4，有澳洲穀飼黑安格斯牛及SRF美國極黑牛，仲有好多款海鮮，加十蚊可以有鴛鴦湯底，啱晒同太太一人一口味，最後揀咗黑蒜豚骨湯及蕃茄濃湯。湯底未到之前，先出去熟食區睇下呢個「和洋祭」，有好多嘢食，當中最吸引一定係關東煮，有魚糕、蘿蔔、冬菇等等，湯汁清甜，每樣都好入味；另外日式蟹棒冷豆腐好香滑，加上蟹棒及木魚絲，食落好清新。返到位湯底同肉已經到齊喇，第一round梗係每款肉都試下。個人最喜歡美國極黑牛，牛味好濃郁；澳洲穀飼黑安格斯牛肉質較柔軟，切得唔會太厚，淥十幾秒就食得；而牛小排及肉眼食落都唔錯。海鮮有大蝦、水魷魚及帆立貝等等，當中大蝦新鮮爽口，帆立貝亦好鮮甜，另外特別推薦極上蝦滑，好多蝦肉夠晒彈牙，啱晒懶得剝殼嘅我地。另外仲有三文魚刺身，厚切鮮甜，忍唔住encore咗幾次。出面自助區亦有多款丸、菇及菜，仲有牛気自家製麻吉燒，淥完後味道外鹹內甜，煙煙韌韌口感好過癮。飲品都有好多種類，有糖無糖嘅都有，亦有咖啡及茶。最後梗係要食埋甜品，除咗自助雪糕外，亦有中式糖水及豆腐花，仲可以自製棉花糖，亦叫咗楊枝金露，細細樽包裝得好可愛。埋單仲送一把遮，又食又拎真開心。…查看更多

喜愛食米線嘅我，經常都會週圍搵邊度有特色而又好味嘅米線，近日發現元朗呢間米線小店有糯米酒湯底，咁近屋企就梗係要黎試下啦。方太家傳糯米酒米線 :上枱時已經聞到陣陣酒香味，先試一啖湯，有糯米酒嘅甘甜味而無苦澀味，配料除咗蟲草花外仲有紅棗及桂圓，好味之餘亦相當滋補。另外亦加咗一份鮮牛肉及惹味炸雞扒，鮮牛肉好嫩滑，食落一d都唔韌；炸雞扒即叫即炸，入口鬆脆，配上五香粉，辣辣地相當惹味。朱古力珍珠Oreo碎碎 :加15蚊有特色飲品，朱古力味道唔太甜，有好多珍珠，咬落口感Q彈，都算幾好飲。…查看更多

食炸雞，個人首選Jollibee，唔經唔覺Jollibee已經係港九新界開咗好多分店，連屋企附近都有，咁就腳就一於黎嘆返件炸雞。炸雞可以揀辣或唔辣，既然一人一個餐，當然兩款都要。炸雞拎上手熱辣辣，外皮夠晒脆卜卜，咬落好juicy，肉質鮮嫩，原味較適合配gravy，值得一讚嘅係gravy都係熱嘅，咁就唔會令到炸雞變凍，而辣雞唔駛沾gravy都夠晒惹味。蘑菇飯有好多原片蘑菇，味道唔會太鹹，蘑菇汁夠晒多，唔會食到尾得返d白飯。…查看更多

是日早收工，經過見到呢間外賣店排晒隊，原來係糖水店，一於買黎試下有咩咁特別。除咗糖水，餐廳亦有粢飯、餃子及炸小食賣，係等外賣時亦見到不斷有客人幫襯，雖然店舖唔大，但等候時間都唔太長。即包粢飯 :粢飯成隻手掌咁大，打開後超足料，差唔多爆餡咁滯，糯米煙煙韌韌，包住肉鬆、榨菜及油炸鬼，榨菜鹹香爽脆，加上微甜嘅肉鬆，整體味道好夾。粟米煎餃 :即叫即煎熱辣辣，外皮煎到脆卜卜，內餡好足料，食落好多肉汁，粟米嘅甜味令人食慾大增，一份有十件，兩個人share剛剛好。多芒楊枝甘露 :天氣熱最適合食芒果，大大粒夠晒鮮甜，配上微酸嘅西柚，消暑一流，芋圓令楊枝甘露更有飽腹感。綜合芋圓燒仙草 :有芋圓、紅豆、仙草、西米及珍珠，配埋椰汁底，完全滿足晒我嘅願望，食落味道唔太甜，芋圓煙韌、珍珠Q彈、加上滑溜嘅仙草，有齊唔同口感，真係大滿足。…查看更多