taima2007newlife的個人專頁

下午大約4點行咗入厚福街揾好西食，經過呢間肉搏，門口有位同事問幾位？有位喎！之後就入咗去，鋪裡面應該得一個樓面，樓面放低Menu就行開，完全無講過任何嘢想落單開頭以為QR Code 點餐，原來要行出門口揾樓面落，落完單點埋飲品，隔大約5分鐘樓面放低個羅宋湯喺枱，味道一般食物出品比較耐要差不多15分鐘，食物唔差係比較細碟好似食下午茶餐咁，塊鵝肝屬於薄切一塊仔隔硬加落個餐牌做賣點咁，因為得1個鐘食飯時間咁食完就嗱嗱淋埋單走人，無細心去查單夜晚睇清楚張單感覺中咗陷阱咁，嘢食一個收費，餐湯一個收費，飲品又一個收費，加埋服務費差不多人均$200，樓面乜都無講解早知唔要個湯，完全唔知情咁中咗伏（睇到之前食評都有人講瀨過嘢！）另外落單要朋友行出門口嗌人入嚟落，除咗送餐同執枱就無見過有伙計，請問有乜資格收服務費？有服務我唔介意比，零服務談乜嘢服務費？最後服務費10%收$109.6但應該因為下午茶時間折扣10%竟然減$85.6？小弟才疏學淺計唔掂兩個10%條數唔同係點計出嚟？老實講，如果入一間餐廳點餐要刨清楚份Menu 先夠膽點餐，咁多灰色地帶危機四伏，一唔小心就中陷阱嘅餐廳，講真幾好食都無用，比人感覺不老實，總之唔會有下次！…查看更多

例湯有小動物，阿姐竟然講句乜你咁好彩！雲吞麵送條毛都算！今日落單未諗到飲乜，阿姐極力推薦凍鴛鴦，單都未入廚房杯嘢就出，原來比杯沖多咗放到冰都溶咗一大半嘅凍鴛鴦比我，仲要有怪味，飲咗一啖仔同阿姐講呢杯唔係凍鴛鴦，即時黑口黑面話呢杯唔係鴛鴦係乜？大佬！我鬼知你比杯乜嘢我飲咩！死死地氣換個杯，走去廚房同入面大大聲講個客有問題，講真我每星期都落去幫襯兩次，都成日聲到呢個阿姐講事講非，大大聲同D客講嘢，自己衰咗又入D客數，臨尾仲要埋單找錢掉D銀仔落收銀枱度，無問題我有風度，唔需要同你嘈，我以後唔再嚟！我唔知餐廳腦細會唔會睇？如果有睇話聲比個阿姐知！呢個阿姐係全樓面最老果個女人，把口無時停，口水多個浪花，你放假連你D同事都鬧你，多咀程度連你D同事都串你，你腦細鍾意用你嚟倒米係無問題的，睇下你每日得罪幾多個客！間嘢幾平民幾好食都無用，一粒老鼠屎害死間鋪！…查看更多

其實本身都定期幫襯呢間酒樓，嘢食都好食嘅，但感覺越做越差，D伙計質數越嚟越低，之前親眼見伙計同伙計嗌交，攪到叫外賣要勸交。有一次打電話叫外賣問多兩個問題仲比伙計Cut我線……今次初四外賣體驗，我根據酒樓提供外賣紙點餐，以為全程沒有問題，到拎外賣發現每份貴咗$6，詢問之下先講新年價錢會唔同！（咁點解聽電話果陣唔講？）呢個都算，起碼有解釋。咁比完錢企咗埋一邊，有個四眼唔知係咪經理行埋嚟問我等乜？我話拎外賣，佢叫我自己揾？R哂頭……咁我話我見到，但應該有飲品，佢求其塞2罐芬達入袋，我話我想飲可樂，佢一句撻埋嚟，無得揀㗎喇！係得呢樣……（咁點解聽電話果陣唔講？）之後想要包辣椒油，四眼伙計又一句撻埋嚟，我呢度無！咁我問即係點？佢再答我呢度無！完全感受到佢拎都唔想拎比我咁……我再問咁即係點？佢先死死地氣嗌機叫個點心阿姐入比我，其實點心阿姐本身就喺佢附近……（利申：果位四眼伙計本身坐咗喺度，絕對唔係好忙嘅節奏下要求佢幫忙，搭問題九唔搭八，完全問非所答，乜嘢叫我呢度無……唔通你袋喺袋咩！跟本每架點心車都會有……）…查看更多