山區麵包王的个人专页

有親戚回港，並安排今日再一齊返廣州探國內親友，搭高鐵返去超方便。但怕晌高鐵站嗰邊食早餐可能又貴、又多人，所以，晌美孚食完先落西九龍站。圖個方便，就揀咗離屯馬線近啲嘅「銀龍」，茶記選擇多，一定啱到大家。餐廳格局都喺如一般茶記，以2人、4人卡位為主，我哋都揀到張挨窗嘅卡位，此外，仲有少少細圓枱，勉強坐到6人。呢度無枱下櫃桶嘅「機關」，餐具、簡單調味料放晒晌枱面。早餐選擇多多，真喺眼花繚亂，有啲更唔喺茶記見慣見熟嘅選項，如歐陸早餐、潮式粉麵、特色芝麻包餐……等等，平貴都有，豐儉由人。A5 沙嗲牛肉麵配香滑炒蛋及法國牛角酥 $42屋企人揀潮式粉麵，唔方影相就唔寫喇，小弟就例牌揀個沙嗲牛麵，仲配埋炒滑蛋，特別在於唔喺普通牛油餐包，而喺牛角酥，賣$42，都抵啦。份炒滑蛋算OK，唔算話好嫩滑，但就幾有蛋香，而牛角酥烘得金黃，咬落好鬆脆，幾夠牛油香。公仔麵煮得啱啱好，唔過腍就收貨喇，牛肉幾腍滑，不過份量唔多，沙嗲都俾得少，唔夠惹味。熱奶茶熱奶茶喺小弟嚟茶記嘅首選，睇落杯奶茶嘅色澤都OK，不過，雖然茶底芳香，但個人嫌奶味重咗少少，口感順滑度就一般般。星期六朝，客人唔多，食完啲侍應都唔會催埋單，不過，今餐都喺求方便，食完就走，趕高鐵嘛。…查看更多

法國菜向來俾人感覺都喺高檔嘢，所以，喺咁多歐洲菜系裡邊，小弟都算喺比較少食法國菜。不過，法國菜中有啲喺以Bristo（法式小館）形式經營，感覺比較親民、平易近人，無高級法國餐廳咁拘緊，但做菜水準就不下於啲大餐廳，就好似今夜到訪嘅「Bistro Bon Bon」，絕對喺禾旱冚珍珠，性價比甚高嘅小店。門面墨綠襯寶蓋，再踏入餐廳，以灰為主調，配以燈效，好有一份優雅感。雖然地方真喺唔大，但因為樓底高，又唔會覺得好侷促:)。事後同啲侍應傾開，原來牆上大部份裝飾、畫作都喺出自本地藝術家，話佢哋老細好支援本土藝術，怪不得初頭入到去都感覺到一份藝術氣息。雖然有一份簡單嘅散點餐牌，但計起嚟點都唔及叫套餐划算。4道菜晚市套餐包括有頭盤、湯、主菜、甜品及餐飲，定價$378。溫馨提示，有部分菜式需要額外加錢，但值得加錢一試。此外，不得不讚吓啲服務，非常熨貼有禮，每道菜亦會介紹其用料、特色，上菜速度不急不緩，讓人輕鬆用餐，感覺舒服。布拉塔芝士配小蕃茄漬 +$38第一道頭盤已好有驚喜，以火箭菜做沙律菜底，配以煮過嘅意大利黑醋、柚子汁，已可以講好好食，再加上大大件布拉塔芝士，軟身得嚟帶柔韌口感，有啲似水牛芝士，但芝士味再濃啲，而小蕃茄漬喺最大亮點，咬落多汁，味道鹹酸，清新鮮活，食完令人更開胃。慢煮雞胸沙律配牛油果醬簡單嘅雜沙律菜配沙醋汁墊底，慢煮雞胸唔喺三幾片咁少，而喺晌上面鋪得滿滿，切得厚薄均一，入口超嫩滑，做到慢煮效果，而牛油果醬亦搓得軟滑，件牛油果都好靚。呢個沙律可以講好低卡，好啱講求健康嘅朋友品嚐。是日餐湯侍應介紹今晚嘅餐湯喺薯仔洋蔥湯，色澤甚有法式洋蔥湯嘅影子，洋蔥都喺爆炒過先嚟做湯，洋蔥味十分突出，而質感厚身而滑溜，再加啲羽衣甘藍襯託吓，最得我心喺個湯夠熱焫，較唔鍾意喺啲溫溫哋嘅湯。澳洲草飼M4牛側腹肉 ＋$118我哋都喺食肉獸，所以，兩道主菜都揀咗肉類，先分享牛側腹肉。一大條牛側腹肉烤得非常靚仔，仲好足份量，切好晒一片片，火喉拿捏好，透出紅潤嘅鮮肉色，卻唔會有半滴血水。入口外層有少少焦脆，肉質軟腍，好夠肉味，而且，亦好富肉汁，慢煮亦記上一功；最有趣喺配搭東南亞風嘅沙嗲汁，有別慣常嘅洋蔥或黑椒汁，沙嗲牛一向都喺天作之合啦，伴菜仲有烤甘筍仔同薯仔，同樣做得好食。澳洲羊頸柳配腐乳羊肉汁 ＋$98老友都喺羊痴，所以，第二主菜揀羊頸柳，而且，呢個部位亦未試過。賣相一樣好有睇頭，羊頸柳同樣好大條，燒得焦香，色澤粉嫩，咬落更腍滑，陣陣羊肉獨有羶香，但算溫和；另一驚喜位喺配腐乳羊肉汁，剛入秋，仲未食羊腩煲，但呢道菜算喺一個前奏，有食羊腩煲嘅風味。伴菜喺脆炸羽衣甘藍，入口確喺超爽脆。是日甜品侍應介紹今晚嘅甜品喺自家製Espresso Mousse Cake，咖啡嘢啱晒我啦，咪睇佢好似簡簡單單，但絕對喺細心之作，首先，餅身嘅咖啡慕絲做得軟滑，並滲出濃濃咖啡香，而裡面混入好多杏仁碎，增加咗口感之餘，令食味豐富咗，此外，餅底唔喺普通消化餅餅底，喺加入咗咖啡同榛子元素，咬落更加好食。伯爵茶、朱古力風味紅茶今早飲咖啡超額，所以，餐飲改以朱古力風味紅茶一試，先喺一般紅茶嘅味道，頭幾啖都覺得無話好有咩特別，但之後，隨着茶泡浸一會，慢慢滲出朱古力香氣，感覺幾有趣。上文都提及過招呼好，所以，臨尾侍應都會問我哋對菜式嘅意見，更介紹點解佢哋店名叫「Bon Bon」，原來真喺有意思架，一個「Bon」喺指Bon Appétit，意為「用餐愉快」；另一個「Bon」喺指Bon Voyage，意為「美好旅程」，今餐又確實喺一趟愉快嘅美食之旅。Bon Courage！…查看更多

今晚老婆有聚會無飯開，一支公又要落灣仔換嘢，索性就晌附近食埋晚飯先返歸。正要過馬路之際見對面有間米線小店「銅米線」，從門外望入去都見幾多客人，喺信心嘅指標，加上門面貼上餐牌，睇過都啱食，就即管試吓佢。走進店內，裝修簡約，勝在棲底高，而且，乾淨企理，尤其做食肆，衛生好重要。枱上除咗放有筷子及紙巾之外，最特別晌木盒內有好多圈圈，初時我真喺唔知有咩用，直至見到隔離枱位長髮女生用嚟紮頭髮先知，店家又幾細心喎，值得一讚！至於清水、牙簽、醬油及辣椒油，就放晒晌出面嘅櫃枱上，自由取用，最有趣喺啲玻璃水杯，喺舊式印有紅雙喜花紋，對我哋啲中佬夠情懷。有啲咩食？餐牌底面兩面睇晒，一版喺米線選項，有多款招牌米線及特色湯底，例如花膠雞濃湯、老壇酸菜湯、重慶麻辣湯……等。另一版喺小食同飲品，簡單易明，餐牌採二維碼落單，相信大家都已經駕輕就熟。鴨屎香檸檬茶 $10雖然無咩加配優惠，但口渴都想嗌番罐嘢飲，就檸茶啦，都好少飲，酸酸爽爽襯濃味嘅米線亦喺良配。雞皮餃子 $28原本都無打算嗌小食，不過，睇見隔離枱讚好，而且，又幾特別，勾起試試嘅心。餃子以雞皮作外皮，炸得金黃，咬落咯咯聲，脆而不膩，肉餡軟滑多汁，淨食都好唔錯，再沾上甜酸醬，更有風味。招牌花膠滑雞絲米線 $62大大碗米線真喺交足功課，先飲啖湯，果然不愧招牌，湯頭濃郁香甜，飲落啖啖精華咁，所以，臨尾都差唔多飲晒，而花膠口感柔滑，膠質豐富，雞肉亦同樣嫩滑可口，且份量唔少，再加上每碗米線本身已附有酸菜、海帶絲、炸枝竹、木耳、芽菜……等等，食材豐富。米線爽線彈牙，雖然餐牌寫明惠顧一碗米線可免費加底一次，但本身碗米線就好多，食晒都飽到上心口，呢個優惠恐怕甚少人享受得着。米線鋪晌香港周圍都喺，要突圍真喺唔容易，但只要同心協力做好出品，做好招呼，不愁無生意。…查看更多

又喺一年一度細妹嘅生日飯，今次就唔食中菜喇，改為食豉油西餐。呢一間「愛群餐廳」可以講喺深水埗早年嘅豉油西餐廳，亦都喺我哋細個嘅童年回憶，大大話話都十幾廿年未嚟過，而張餐墊紙都寫住始創1976，開咗近半個世紀。始終都經歷過改朝換代，所以，內部裝修就唔會有咩懷舊感，都喺比較摩登啲嘅西餐廳，但亦都唔會話喺好潮嗰一種，帶微微工業風，中間一排卡位我覺得喺最好坐嘅位置，闊落夠大張。雖然喺西餐廳，但都喺帶有港式飲食文化，所以餐牌嘅選擇非常之多，可以講喺高級茶記；而佢哋嘅晚餐都有啲名氣，目測所見，嚟嘅客都大部分都會叫鐵板餐。餐包最叫人懷念就喺呢一款餐包，以及裝餐包嘅藤籃，望上去真喺有份親切感，依家賣少見少。包身好軟熟，而且，仲喺暖烘烘，搽上牛油，食嘅喺一份懷舊感。羅宋湯例牌嘅紅湯、白湯，小弟就較喜歡紅湯嘅羅宋湯喇，因為酸咪咪，飲落好醒神，而且，多蔬菜，夠健康。確實個湯幾唔錯，夠香濃酸活，口感清爽。迷迭香雞扒、司華力腸配黑椒汁 $148細妹揀雞扒，細佬揀豬扒，同樣搭司華力腸配黑椒汁。食鐵板扒餐最過癮喺侍應當你面淋汁，吱吱聲響喺幾有霸氣，佢哋嘅鐵板喺好夠份量，雖知都喺雪藏貨，但出嚟嘅效果唔錯，唔會有雪味，雞扒好軟滑，而司華力腸超厚身，仲好彈牙，食得出唔喺平價溝粉嘢，揀黑椒汁當然喺想惹味啦。美國豬扒、司華力腸配黑椒汁 $148細佬嘅豬扒又點樣？同樣份量十足，而且煎得焦香，肉質亦夠鬆化，質素確喺唔錯。此外，伴有大量薯菜，有烤薯仔、椰菜花同豆角，雖然後兩者只喺白烚，但沾上啲黑椒汁變得好好味，食完成份鐵板真喺勁飽肚。迷迭香雞扒、大蝦王配洋蔥汁 $176老婆就揀雞扒配大蝦王，由於雞扒以迷迭香醃過，自然有陣陣香草氣味，而大蝦王雖然得一隻，但真喺堅大隻，鎅開咗蝦背，方便拆肉出嚟食，蝦味鮮甜，好爽彈，洋蔥汁就啱老婆口味，因為佢都好鍾意食洋蔥。芝士爆茄焗牛脷飯 $78老婆揀咗鐵板扒餐，預佢都食唔晒，所以，我就簡單揀碟焗牛脷飯。芝士、爆茄本身撈飯已經好好食，最緊要飯粒爽身啱啱好，最怕喺煮爛咗仲要用嚟焗飯或做湯飯；而牛脷大大片，柔韌軟滑，帶有獨特牛味，又喺大大碟絕對食飽人。紅豆冰 +$12、凍檸茶、凍奶茶 +$4老婆本身唔好凍飲，不過，呢晚食鐵板餐，餐飲方面，我同老婆就嗌咗杯紅豆冰「些牙」。杯底睇得到有唔少紅豆，而且，煮得夠綿，襯埋奶水，都好難唔好飲。甜品甜品可以揀雪糕或者啫喱，我哋不約而同都揀晒雪糕，原本就話有朱古力味同士多啤梨口味，不過，朱古力味啱啱買晒，退而求其次只好選士多啤梨味。雖然唔知咩品牌，食落又唔會話好低檔次嗰種，叫做OK，過過口癮。今餐生日飯唔喺咩貴嘢或好特別菜式，質素中等高少少咁啦，招呼亦OK，但最緊要喺大家食得開心，且喺食緊一份情懷舊:)。…查看更多

現代人對飲食越嚟來越講求健康，尤其都市人，打工一族，因為營營役役，未必多花時間晌飲食之上。最近，就認識到一種蒸麵包，有別中式嘅蒸包，而是一種創新嘅「蒸焙技術」，估唔到喺嚟自大圍嘅一家30年老字號、出名製作立體蛋糕嘅「嘉樂麵包西餅」，真有卧虎藏龍之感。每個蒸麵包定價$20個，由於放入雪櫃可保留食用約2天，放入冰格更可達約1個月，所以，一口氣試咗4款，每個獨立包裝，絕對衛生。開心果口味蒸麵包 $20近期開心果大熱，鹹甜美點都見它蹤影，先試試「開心果口味蒸麵包」，有別港式麵包，拿上手好有墜手感，不會輕飄飄咁，除了面頭有唔少開心果仁碎之外，包心都混有不少，而且，更有些開心果仁醬，食起嚟滲出陣陣開心果香味，而包身嘅質感挺實在，綿密卻很柔韌。黑芝麻麻糬口味蒸麵包 $20另一款「黑芝麻麻糬口味蒸麵包」亦有驚喜，咪睇包面嘅黑芝麻只撒了少許，呢個只喺點綴，實際包心裡面加入大量黑芝麻蓉，搓得軟滑，芝麻味非常濃郁，而且，還加咗唔少煙煙韌韌嘅麻糬，食起喛更多一重煙韌口感，令整體嘅口感變得更為豐富。班蘭口味蒸蛋糕 $20除了蒸麵包，店家以蒸焙技術更製作出一系列蒸蛋糕，一身青綠色嘅「班蘭口味蒸蛋糕」外觀十分搶眼，切開細看，睇起喛無咩特別，但賣點就喺其清新嘅班蘭香味，香味突出而自然，糕身亦十分鬆軟。因為放過入雪櫃，隔天食，解凍即可，口感仲保持得到。香蕉合桃口味蒸蛋糕 $20除以上凍食，還可以溫食，店家教路燒開水關火，隔水蒸焗約30-40秒亦可，不過，小弟就沒有試，仍以凍食之法來一嚐「香蕉合桃口味蒸蛋糕」，同樣咊，糕內有唔少香脆嘅合桃碎，增添風味，而本身嘅香蕉味亦十分香甜，兩者味道好夾，最重要仲喺食得健康。整體而言，呢種結合烘焙與蒸製嘅蒸焙技術，成品確喺有水準，加上少糖少油，又用上羅漢果糖、初榨橄欖油、純天然餡料……等等，零化學，零添加，自然食得更健康，更無負擔。最近，仲知道店家推出團購（2025年11月5-9日），有買5送1優惠，最少訂購2個，訂購方法︰加入WhatsApp 連結https://chat.whatsapp.com/Kfon4xerznDH9RdZe7oAPI?mode=wwt，但唔知之後仲會唔會有其他優惠。…查看更多

幾個月前食過一次湘菜（即喺湖南菜），感覺幾唔錯，其實湘菜晌香港嚟講，應該都有啲冷門。最近，意外發現山林道呢邊都有一家賣湘菜嘅小店「吉祥小廚」，所以，趁周五晚大家都懶煮，同老婆過嚟食餐便飯。門面紅噹噹就非常搶眼，入到鋪內，裝修都比較古雅，天花吊燈頗為別緻，而環境乾淨企理:)，牆上嘅顯示屏更打出餐廳嘅招牌菜。一大張紙就喺餐牌，一面印有「三大皇牌」、「八大網紅必點」、「宴客大菜」等系列，而另一面就分門別類印有唔同菜式，例如：「老長沙熱炒」、 經典湖南蒸菜」、「湖南特色小吃」……等等。最窩心喺無茶芥，又無加一服務費。百香果檸檬茶 $48知道湘菜點都有啲辣，所以，嗌定杯百香果檸檬茶，一嚟到超級大杯，飲落確喺冰涼解辣，檸檬茶味清新又無澀味，又有濃郁百香果果香，甜度又啱啱好，好飲！沙棘汁 $28老婆就揀咗杯沙棘汁，小弟才疏就真喺唔知乜嚟，反而佢就知喺乜，橙橙哋色好似啲車厘茄咁，重點喺營養價值高，而味道上酸酸甜甜，易入口，風味都幾獨特，仲要有咁大杯，抵飲。茶油炒土雞 $98呢一道菜喺餐廳嘅三大皇牌之一，所以，點都要試一試。又喺唔試過、唔聽過，都唔知茶油唔喺普通嘢，又喺有好高營養價值，睇「維基」，指出其對降低膽固醇、預防心腦血管疾病以及抗癌都有明顯嘅功效，所以，叫人食得放心。而土雞肉質較實淨，但咬落去都嫩滑，裡面仲有唔少黑木耳、薑片，微微辣，幾唔錯。珍珠藕丸 $78老婆一向喺蓮藕控，炆蓮藕、煎藕餅……都好合佢口味，今回見呢個珍珠藕丸似乎幾有特色。原來喺豬肉加上蓮藕搓成丸，再沾上米粒蒸熟，入口軟糯，有蓮藕嘅粉香，又有微微肉丸嘅彈口感，幾有特色嘅一道菜。香煎翹咀魚 $139翹咀魚唔好話食，聽都喺第一次聽，唔好見佢好似鋪滿辣椒，但食落又唔喺想像中咁辣，相反就幾惹味，而啲魚肉非常嫩滑，不過，小心骨，肉內有好多細軟骨，因為好幼、好軟，哽到都未必有事，當然最好唔好哽到啦，記緊慢慢食。白飯 $10碗 / $30煲土雞、翹咀魚都喺啲濃味嘢，所以，都要叫個白飯襯一襯，飯粒好軟熟，煮得夠分明，又好有飯香。概括而言，環境都挺舒服，服務亦好唔錯，食開上海菜、北京菜、四川菜……，不妨又試吓湖南菜，中國地大物博，各地菜系都有其特色。…查看更多

早排出咗銅鑼灣食廚師發板，今日又再過嚟銅鑼灣食日本嘢，不過，簡簡單單同朋友上居酒屋「究極堂」食個丼飯午餐而已。朋友話炮台山都有分店，至於呢家銅鑼灣分店小弟都喺第一次到訪。整個地方唔算大，但環境裝修都好居酒屋格局，環境昏昏暗暗，天花掛上好多和式燈籠，好有深夜食堂嘅感覺，近門口嘅另一邊更可以間為廂房，適合一班人搞飯局，同店員傾開，原來炮台山分店亦有廂房。基本上是日所見都坐滿人，剛好最入嘅吧枱仍有位，唔使等！午市主要喺賣套餐，慳慳哋嘅有蛋包飯、牛肉丼、烏冬……之類，豪啲嘅有刺身丼、刺身定食、壽司定食……之類，正所謂豐儉由人:)。此外，散點餐牌嘅食物亦會全數供應。帶子他他 $38先試試店家嘅炸物，餐牌圖文並茂，見呢一款帶子他他賣相靚仔，就揀咗佢。外層脆漿唔算厚，最緊要喺做到脆而不膩，啲帶子好鮮甜，襯埋啲他他醬，加上三文魚籽，真喺相得益彰。韓式泡菜章魚玉子燒 $78玉子燒似乎喺店家受歡迎嘅菜式，見有唔少客都有點，玉子燒可揀明太子芝士或泡菜章魚，選後者因為未試過咁嘅組合。首先蛋卷嫩滑而富濃郁蛋香，裡面捲住好多泡菜，頗為惹味，加上極具咬口嘅章魚，增加點點海鮮味道。究極丼 $208朋友話辛苦搵嚟志在食，所以，奢華少少嗌咗個「究極丼」，可惜喺海膽剛無貨，但會用番時令刺身補上。睇見份丼真喺好吸引，有帶子、三文魚籽、炙燒左口魚、油甘魚、三文魚、赤身、拖羅蓉、大赤蝦，仲搭上一隻蛋香十足嘅蘭王蛋，外觀非常吸晴。佢話啲刺身好新鮮，味道鮮甜，每款刺身都超好食，真喺無咩挑剔位，夠晒足料，物超所值。究極炎之丼 $128而小弟嘅炎之丼跟朋友嘅差唔多，當然，用料無佢嗰個咁高檔，但一啲都唔失禮，有左口魚、黑鯥、甜蝦、吞拿魚蓉、油甘同帶子，全部都炙燒過，入口帶點點焦香感，同樣食得出食材新鮮，又能一次過試到多款刺身。此外，所有定食都包埋田園沙律同麵豉湯，以一頓午餐而言，已喺豐富至極。成日都講，只要做出水準，不愁無客，兩個丼都食得出用料不賴，所以，午市基本上都可以講全場滿座！…查看更多

又喺為屋企裝修要出嚟長沙灣睇睇啲傢俬，梗喺順便食埋飯先返歸啦。但裝修事宜真喺好煩，所以，都無太多心思搵咩地方食嘢，一出間傢俬鋪行幾步無耐，見到呢間「德記粉麵茶餐廳」，有啲人氣，都真喺嘥時間再搵，隨遇而安就食呢間。鋪位呈長形，好深，而地方細細，簡樸嘅裝修，格局好街坊，嚟幫襯嘅亦喺街坊多同工友多。啲餐枱本身已經唔大，挨牆一邊仲放咗筷子同多款調味料，都整齊企理嘅。餐牌睇得出有歷史嘅痕跡，表面就以為只賣粉麵，但其實有唔少選擇，仲包括湯粉麵、各式各樣嘅碟頭飯。此外，好鍾意呢啲老鋪，尤其啲手寫價錢單，依家咩都電子化，呢類單已比較少見。牛筋米 $33老婆話近日行得多，補補腳筋，所以，揀咗碗牛筋米，其實都喺講笑，但佢確喺幾鍾意食牛筋。果然平靚正，碗米粉有好多牛筋，最正喺炆得好入味，柔韌得嚟又好有咬口感，好食。牛腩粗 $33食親粉麵，小弟對粗麵就情有獨鍾，呢碗牛腩粗亦都喺有好多牛腩，件件牛腩咬落都好鬆化，甚具肉香，而且，帶點點油脂香，個湯頭濃而不濁，好唔錯。腐乳通菜 $20老婆食乜嘢都講健康，所以，點都要嗌多一碟菜，而腐乳通菜就覺得比郊外油菜有啲個性，尤其個腐乳汁，夠晒香濃，仲一啲都無手緊，俾咗好多，啲通菜仲幾爽口添。熱奶茶 +$7加$7有杯熱飲，無理由唔要杯熱奶茶過吓口癮架，雖然感覺有機會唔及啲茶記，但色澤幾對辦，茶底亦喺香濃，喺柔滑度差少少而已，但小弟都已經好收貨。目測所見，嚟「德記」嘅人都喺匆匆食完就走，猶如大家嘅飯堂一般，加上定價確喺幾相宜，絕對深得人心！…查看更多

老婆話約咗朋友食飯，既然是夜無飯開，要食自己，當然「嗱嗱淋」趁機約啲老友出嚟短聚吓，食餐飯，傾吓偈。地點無所謂，茶記就最無負擔架喇，一來平靚正，二來啱我哋啲麻甩佬。踏入餐廳，一室以湖水藍為主調，樓底亦較高，以茶記而言，空間感很好，加上地方企理，夠光猛。話就話香港經濟唔好，但唔喺講笑，接近坐滿，聽到店員跟顧客啲對話，就知街坊多。基本茶記設定，枱面放咗啲調味包，枱側枱桶就放滿餐具，排列整齊。講到食物，茶記勁就勁在乜都有，由鐵板精選，到常餐、蔥油系列、日式蛋包飯、世一金牌炸雞、西式碟頭、秘製馬來咖喱、皇牌焗飯、意國風情、健康蒸選、鮮魚湯泡飯、小食，以及各款飲品。晌門口仲見到有啲二人小菜套餐、二人蒸餸套餐，定價亦好實惠。羅宋湯啲套餐寫明奉送基本熱飲，不過，落單無耐，店員就奉上例湯，真有心，雖然無得揀，喺羅宋湯，但我哋都啱飲，而且，味道夠濃，酸香醒胃，裡面又多料喎，真唔錯。豉汁蒸倉魚 $70老友向來食嘢比較健康，所以，瞄準晌健康蒸選度揀，餐牌都標明蒸魚需時15分鐘，食好嘢當然等吓無所謂。揀豉汁就特別惹味，條倉魚好大條，望落去色澤閃閃爧，食落去真喺蒸得啱啱好，啲肉無黐骨，而且，肉質挺身而嫩滑，又好有魚嘅鮮甜味，當然啲豉汁都好正，撈飯真喺無得輸。梅柚子梳打 +$9老友話想試特別少少，就揀咗呢一杯梳打，有相你睇，真喺落咗好多柚子蜜，所以，佢話入口已好有柚子香，口感清爽，再將粒話梅篤爛去，再入口帶點酸咪咪嘅感覺，多添加一份酸香感，佢更建議食鐵板餐配呢個一流。花膠三黃雞魚湯泡飯 $62肥隔離枱啲鐵板餐咋咋聲，都想試試店家嘅鐵板餐，不過，顧及老友，我都揀咗個幾健康嘅鮮魚湯泡飯。雖然話泡飯，但上菜時喺湯飯分開上，所以，小弟倒大半碗飯落湯，小半碗就撈豉汁食。講番個泡飯，啲雞真喺幾滑，以為份量唔多，卻喺越食越有咁，個人而言，花膠都OK，再炆腍身啲就更好，且有很多菇菌，而魚湯滲入少少雞油，就更加正，伴上飯，真喺好味。紅豆冰 +$9朝早早餐飲咗咖啡，晏晝午飯整咗杯奶茶，夜晚就節制少少，改試紅豆冰，因為見佢加$9都唔喺貴。杯紅豆冰一睇就知有非常多紅豆，而且，煮得又綿，味道好清甜，撈勻啲奶水，好飲又好食。雖然兩個人試嘅嘢唔多，但都食到有質素，招呼又唔錯，地方企理，食茶記好就好在又無加一，所以，真喺值得翻兜。…查看更多

老表剛去完台北一行，話有啲拌手禮醒俾我，順便約出嚟食餐飯，佢就我，所以，就過到嚟中環呢邊聚一聚，中環食飯一向唔易搵位，故此走上少少嘅「歌賦街」，到訪「知延屋」食餐日式丼飯。雖然門外有少少人等位，但剛好上一輪嘅客陸續離座，我哋好快有得入。裝修簡約，但一室深色木系枱櫈，加上牆上吊燈，有種日式嘅懷舊風:)；枱上嘅玻璃杯，更喺滿滿日式復古風格。餐廳主打喺丼飯定食、鍋物定食，前者款式不少，並分唔同嘅份量，豐儉由人，後者有日式昆布柴魚湯或關東風壽喜燒湯可選，而每款定食都包咗時令沙律菜、日式醃菜、味噌湯同日本白米飯；此外，仲有啲滋味小食供選擇。溫馨一提，高峰時段用餐時限為60分鐘。雖然，所賣嘅都喺較傳統嘅日式丼飯、鍋物，但卻有幾款特調飲品，分為雪奶酩系列同梳打系列，彩繪圖片睇落頗為吸引，不過，我哋就無試。除上述嘅一人前，店家仲提供一款二人餐，包指定丼飯定食黑毛和牛丼套餐L份量、鍋物定食（2揀1）、小食（3揀1）、飲品（3揀2），做緊特價$370，計落真喺幾划算。炙燒牛肉丼定食 $108我哋都唔喺咩大食之人，所以，揀個M份量已經好夠。整份定食嘅外觀都幾靚仔，尤其碗丼飯，啲炙燒牛肉鋪到滿滿，打下成隻日本蘭王生蛋，加上一朵食用花同啲芽蔥，賣相別致。開開胃，先食啲沙律菜，襯上一橙一紅車厘茄，淋上柚子醋，簡簡單單，卻清新開胃。熱焫焫嘅味噌湯除咗麵豉味夠香之外，湯底更有少少昆布，味道幾好，食完個沙律再嚟暖和一下腸胃。日式醃菜方面，有本菇、泡菜同海帶，本菇富麻油香，泡菜酸香微辣，海帶爽脆鹹鮮，用嚟伴飯食真唔錯。而啲炙燒牛肉真喺好正，肉質本身已經好嫩滑，經過炙燒，有少少焦香之餘，逼出更出油份，感覺更富油香，拌勻隻雞蛋，沾滿蛋漿嘅牛肉就更加滑口；此外，將啲蛋漿拌飯食，除有蛋香，令本身帶黏糯嘅日本米味道更豐厚。宮崎黑豚肉、日式昆布柴魚鍋定食 $138老表份鍋物定食睇落都好吸引，宮崎黑豚肉大大鍋，份量真不少，而且，啲豚肉好嫩口，又唔會話好肥，鍋底仲有唔少洋蔥、豆腐皮、野菜……等等，至於個昆布柴魚湯味道清香；加$15可以轉烏冬，老表話食得出烏冬唔喺平價貨，唔會有陣陣酸味，入口滑溜，咬落卻好有韌勁，且有麵粉香。餐廳嘅招呼都好唔錯，雖然有時限，不過，無人在外排隊，店員都唔會催客埋單。聽老表講唔少旅遊趣事，可惜放飯時間有限，不過，大家短聚一下都開心嘅，至少都知大家都別來無恙嘛！…查看更多

近來因為要搞裝修嘢，所以，不時都嚟到荃灣睇睇家具之類嘢，行到咁上下，咁就要搵飯食啦，晌海之戀遇到「湯加」，都好耐未幫襯過，老婆就好鍾意佢哋嘅百秒鱸魚，我就慳慳哋晌下午茶餐度埋手。從門面已睇到成個場嘅環境，都喺好慣常類似茶記嘅格局，少部份喺卡位，大部份喺4人格，枱側抽櫃擺放餐具。而枱角貼有點餐嘅二維碼，同埋列明注意事項，點先為止確認點餐，以往就聽到唔少客向店員投訴好耐都未嚟嘢，不少情況都喺差最後一步作確認送出。此外，仲印埋wifi出嚟，好多餐廳既然要客人掃碼點餐，理應提供埋wifi，因為有少量上年紀嘅，手機真喺只打出打入，無數據架。另一邊，仲有個茶水間，自行斟凍水、熱水，更備有數款醬料，自由取用，既然自己顧自己，餐廳都無收加一。主餐牌好大本吓，加上小弟打算食下午茶餐，就只影低老婆所嗌嘅百秒鱸魚。而午後時光嘅下午茶餐，就底面兩頁，不過，已經有好多選擇，有輕怡嘅，有大份量嘅，有湯飯DIY，抵在包埋餐飲，又有啲加配小食。平常老婆就只會揀熱檸水，但睇到枱角有張「健康天然果汁」做緊推廣，佢一向都講永健康，加配又有少少優惠，當然一試啦:)。百秒海鱸魚配米線 $69一整條海鱸魚喺原鍋咁上，而米線則另上，非常之大碗，所以，都要幫佢包底。魚肉嫩滑富魚鮮味，魚湯底亦好鮮甜，墊底嘅蘿蔔清甜無渣，米線入口滑溜有米香，時隔咁耐再食，水準一啲都無跌。果醋豬軟骨撈公仔麵配潮汕豬肉丸浸紫菜 $43雖然喺嚟食下午茶餐，但當喺正餐，所以，嗌咗款飽肚嘅撈公仔麵，餐飲仲升級埋特飲。先講講個公仔麵，啲麵條煮得啱啱好喎，爽爽哋身，夠彈牙，加上撈埋啲果醋汁，酸酸甜甜好醒胃；啲豬軟骨都炆煮得正，肉質鬆化又入晒味。跟碗潮汕豬肉丸浸紫菜湯，俾足料喎，豬肉丸好彈牙，絕對唔喺溝粉貨色，而紫菜好爽口，湯頭清甜無欺場，成個餐抵食。仙草紅豆冰 +$9老婆好鍾意食紅豆，所以，升級呢杯仙草紅豆冰，杯嘢亦交足貨，仙草紅豆份量有超過1/3，仙草「滑嘟嘟」，紅豆亦算香甜，不過，紅豆就偏少，大部份都喺仙草，至於個奶水底就OK啦。鮮桑葚葡萄汁 +$13老婆點嘅百秒鮮鱸魚喺散點嘢，唔包餐飲，不過，都有加配優惠，幾款天然果汁就相中呢款。其實鮮桑葚真喺唔知乜嘢，上網睇睇先知其實就喺黑桑子，味酸甜，功效多多，如抗氧化、補血、護眼、助消化、延緩衰老……等，而加埋提子，飲落酸香醒胃，確喺舒服好飲。今次再訪，幾樣嘢都好食，老婆嘅鮮鱸魚固然鮮甜，小弟嘅豬軟骨都好唔錯，加埋兩杯嘢飲都好味道。…查看更多

正所謂偷得浮生半日閒，平常周六、公眾假都會專登出街食早餐，但大多數一喺茶記，一喺快餐店。老婆話佢出咗少少獎金，今次就要食餐好，一於食番餐全日早餐啦（都好耐無食喇），晌美孚有供應嘅唔多，第一時間諗起「PHI」。平時就算星期六經過都見唔多人，但今次真喺有啲意外，全場近乎坐滿。一室日系淺木色裝修，配以柔和燈光，感覺蠻寫意舒服:)。我哋被安排坐晌較入位置，有種自成一角感。目測所見，好多家庭客，當然唔少喺街坊，撻住拖鞋落嚟。多年前嚟過食午餐，早餐都喺第一次，話晒比較少花成嚿水食一個影早餐。呢度嘅早餐重點，主要都喺全日早餐同梳乎厘班戟早餐，此外，都有啲意粉類、沙律類早餐。全日早餐梳乎厘（兩件）$75梳乎厘可以揀1、2、3件，老婆原本話食一件就夠（因為佢有麩質敏感，都喺間中偷雞食吓。），但見俾多$13就多一件，當然嗌夠兩件啦，一人一件，而基本嘅組合會包埋煙肉同煎蛋，老婆就再額外加咗牛油果同煙三文魚，整份組合就盛惠$105。啲食材質素高，牛油果夠晒熟，口感綿滑，煙肉煎得脆口，又唔肥，唔好以為煎蛋煎過籠，喺老婆唔鍾意食生蛋黃，呢隻人煎到全熟正正合佢心意；至於件梳乎厘班戟絕對保持水準，淋上糖漿，純甜美味，好有蛋香，口感綿密輕盈。香煎雞扒全日早餐 $92小弟就叫番一個較傳統樣嘅全日早餐，有沙律菜、車厘茄、炒蘑菇、煎太陽蛋、多士同雞扒，唔好話睇落普通，一樣喺有心恩晌裡頭。啲車厘茄應該喺焗過，因為咬落暖暖哋，多汁清甜，用上丹麥多士，食落自然更具酥香感，雞扒仲俾到兩大件，煎得香口，肉質夠嫩，絕對交足貨，咁嘅價算得上性價比高。鮮奶咖啡、朱古力咖啡餐飲可選任何一款意式咖啡，冷熱同價，嚟得呢類咖啡店點可以唔嘆杯靚咖啡吖，小弟就鍾情鮮奶咖啡，而老婆就揀杯咖啡味無咁重嘅朱古力咖啡，兩杯嘅拉花都好唔錯，平滑而花紋細緻。前者沖泡手勢好，晌無攪嘅情況下，每口口感、味道都好一致，順滑醇香；後者濃郁嘅朱古力，帶少少咖啡香，啱晒老婆喜好。我哋入座後嘅早段時間，全座近滿，但只得一位後生女侍應，佢真喺堅，傳菜、沖咖啡、收銀一腳踢，忙到不可開交，但依然有禮且面帶笑容，咁嘅服務真喺讚得一讚！之後多一位後生仔返工，自然運作更流暢，佢都喺好有禮貌，所以，服務方面俾夠佢哋滿分。…查看更多

又喺一年嚟一次鑽石山青掃墓，事後就會晌附近搵食，細佬妹對食喺無要求嘅人，茶記就最啱佢哋。雖然，知道附近都有啲好人氣嘅茶記，不過，小弟就唔多喜歡等位，偶然遇到「時代冰室」，就隨遇而安試一試佢。一般茶記格局，無話咩特別唔特別，裝修平實，都喺卡位為主，我哋就揀咗靠窗嘅卡位，一來對住落地大玻璃，光線十足，二來感覺開揚啲。午市時段嘅選擇有特色套餐、全日套餐、超人氣招牌蛋包飯、鐵板熱賣、經典熱賣……等等多個系列。例湯再睇多次餐牌，都只喺話所有套餐只包餐飲，呢碗例湯喺額外免費送，雖然唔值咩錢，亦都只喺普普通通嘅中式例湯，飲落似喺「青紅蘿蔔煲豬骨」好例牌嗰種，但夠老火，亦喺份誠意。日式咖喱雞扒飯 $58日式咖喱向來用上較多蔬果去煮，味道無咁辣之餘，亦有點甜味，細佬嘅雞扒飯就完全反映出日式咖喱嘅精髓，試咗一小口咖喱，確喺唔錯，幾香，而啲雞扒煎得甘香，亦幾軟滑，且份量甚足，睇相都見有唔少件雞扒。咖喱雞脾飯 $61細妹同樣食咖喱，雖然都喺咖喱，但呢個絕對喺港式樣，無論捧出嚟嘅賣相，抑或味道，都好港式，啲咖喱辣度強勁，甚為刺激，而裡面嘅薯仔喺炸咗再煮，所以，唔會又腍又散。至於件雞脾，堅大隻，大隻過隻手掌，試就無試，但細妹就話炸得外皮甘脆，肉滑多汁，唔會炸到「乾爭爭」，正呀喂！招牌和牛漢堡蛋包飯 $63諗住叫得招牌，就一於試試佢，可是，同餐牌嘅賣相就有啲距離，主要喺蛋包飯部份做得有啲hea，「蛋皮」都包唔晒啲飯，好求其煎好片滑蛋冚上去而已，當然，食味方面就唔差，有蛋香又幾滑，至於件漢堡就確唔錯，既有肉香，又有油香，口感鬆化唔死實，同麥記嗰啲喺天與地。熱奶茶細佬妹飲嘅喺凍奶茶，通常掃二維碼落單都會有好多細項可選，估唔到奶茶可以揀濃啲，不過，小弟飲熱奶茶，後而無呢個選項。講番杯熱奶茶，個人嚟通，感覺就淡咗少少，少咗嗰份茶葉嘅幽香味，所以，你見色澤都喺偏淡少少。年年嚟掃墓都順道試吓唔同餐廳，今次嘅「時代」都唔錯，至少喺啱食，啲妹妹招呼好唔錯，依家有禮貌嘅後生女好難得架喇，喺原先坐埋邊啲位有啲污糟，無留意嗰個位喺咪近廁所，有少許異味。…查看更多

今次一早出嚟荃灣就唔喺睇早場，而喺陪老婆搞銀行嘢，幸好都好快搞完，就晌附近搵地方食個早餐。遇到「新生記」，清清哋食碗粥都好喎，老婆就話想食糉，啱啦，粥鋪滿足到大家。地方細細，簡樸嘅裝修，好街坊，嚟幫襯嘅亦喺街坊多，最正喺有部大電視播新聞，邊食邊聽早晨新聞。餐牌黃底黑字，分類藍底白字，非常擔搶眼，而選擇非常之多，唔喺誇張，叫人睇得眼花撩亂，而且，佢哋唔止賣粥，仲有湯飯同粉麵供應，真喺一日3餐過嚟食都唔怕悶。此外，好鍾意呢啲老鋪，尤其啲手寫單同菜式簡稱，好有趣，依家咩都電子化，呢類單已比較少見。魚腩粥 $41老婆就好鍾意食魚喇，所以，雖然餐牌有非常多選擇，但佢一眼就相中魚腩粥，上次晌「靠得住」又喺揀魚腩粥。店家啲粥都好夠份量，而且，有唔少料，魚腩堅喺大大件，老婆就話好鮮甜，粥底又夠綿滑。公司粥 $36公司三文治聽得多，算小弟才疏，公司粥都喺第一次遇上，就當盲盒試試佢。粥到，撈一撈，其實就喺艇仔粥+皮蛋瘦肉粥+魚片粥放埋一齊，非常多料，師傅絕無手緊，啲料好似食極都有，抵食。牛脷酥 $11去到粥鋪，小弟對牛脷酥情有獨鍾，有油炸鬼嘅酥脆，但又有陣甜甜哋嘅味道，最貼心喺幫我剪成細件啲，夾起就食，新鮮炸起即食，更喺特別香脆可口，部份沾粥再食，又另一番風味。五香鹹肉糉 $22而老婆情有獨鍾就喺糉，雖然鹹肉糉就唔似得裹蒸糉咁多料，但正正喺咁先啱佢，因為佢主要想食就喺啲糯米同綠豆，加少少鹹蛋黃，而呢隻都算合格，加上少豬肉肥膏，一夾就丟走，小弟就略嫌鹹蛋比較乾身，無乜油。本來嚟食早餐，但因為搞完銀行嘢都10:00am，食埋餐粥都近11:00am，而啲份量真喺好堅，仲加埋今次食糉，勁飽肚嘢，所以，最後一餐當兩餐，妟晝餐飯都慳番，哈哈！…查看更多

過咗小暑，都未到大暑，但近排啲氣溫已日日高升，加上天雨，又熱又濕，最好莫過於買杯凍飲返屋企慢慢嘆。路過「登打士街」見到「茶茶Go」，好耐之前試過其金鍠楊枝甘露，覺得有料到，再者，佢哋喺嚟自台灣嘅品牌，質素有番咁上下，今次就再試試店家其他嘢飲。飲品選擇十分之多，大類別分為牛乳入茶、4.3牛乳、純茶、一品咖啡、酸奶雪見沙、風味冬瓜茶、鮮果歲月時、台式茶沙冰及梳打。鋪面一角貼咗張「本季至Top銷售榜」，如果無心水嘅，又可以不妨着眼於此。除咗茶飲，仲有啲甜點，例如巴斯克芝士蛋糕、盒子蛋糕。晌牆上見到有一款「虎皮卷」，覺得幾特別，可惜賣晒，所以，退二求其次，選番上次都試過嘅「紫菜肉鬆小貝」。逮丸芋頭2號 $42黑糖鮮奶飲得多，反而芋頭鮮奶印象中好似未試過，加上又喺店家嘅招牌，所以，今次就轉轉試一試芋頭鮮奶。餐牌標明用上4.3牛乳，奶味自然夠香濃，杯底沉咗唔少芋泥，香滑細膩，芋頭味濃，此外，仲有唔少煙韌嘅芋圓，大大一整杯飲完都幾有飽足感。若葉百香玉子 $36老婆最鍾意百香果果茶，所以，呢一款鮮果茶飲喺佢嘅不二之選。以綠茶作為茶底，加入新鮮嘅百香果，味道冰涼清爽、酸酸甜甜，飲落零負擔，加上大量手工愛玉凍，爽爽滑滑，飲吓啜吓，絕對喺消暑奇「冰」！紫菜肉鬆小貝 $38一份有4件，唔好睇佢好似唔大件，其實，拎上手即刻感到好墜手，好有重量。蛋糕嘅口感幾軟滑，又幾有蛋香，裡面捲住啲蛋黃醬，再加上成件蛋糕四面都黐滿紫菜同肉鬆，味道鹹鹹甜甜，又帶點酸香味，難得又夾到喎。只喺飲杯凍飲，食個小貝蛋糕，簡簡單單嘅生活一樣叫人好開心。…查看更多