lamray的個人專頁

自從荃灣出現豆腐花減價戰之後，真係好耐無係荃灣以外地方食豆腐花（除左之前南丫島行山順手食左碗阿婆豆腐花之外），日前同女友行街，係準備睇戯之前，女友忽然口痕，就"dick"左我去渣甸街既<人和荳品廠>食豆腐花~~<人和荳品廠>係銅鑼灣扎根多年，好多人都係由細食到大~~店鋪地方細細，好多時都幾乎滿座~~~同其他甜品店鋪一樣，<人和荳品廠>除左原味豆腐花之外，亦提供其他口味，例如薑汁、朱古力、紅豆沙等~~當然啦，尼度唔係荃灣，兩溝是要加錢的~~但我始終都係中意食傳統豆腐花~~~原味豆腐花 $12- 豆腐花質感幾嫩滑，豆味不俗，但食落感覺比以前食既好似稀左d~~魚肉煎豆腐 $16 - 即叫即煎，上台時熱辣辣，豆腐及魚肉外層被煎得香脆而不會過分油膩，同時不失豆腐内裏既軟滑同魚肉既彈牙，算係保持水準~~~…查看更多

天丼自從落戶青衣城之後，每次經過都見到一大條人龍，直至前排有日中午，終於見到人龍變短~~~好啦，就等我黎會一會你~~天丼位於青衣城一期G/F，同層最近新開仲有一芳同茶木~~~餐廳外墻設有廣告牌，比排緊隊既我地可以及早睇定想食咩~~就好似其他日本餐廳一樣，天丼門口同樣有擺設食物模型~~~等左30分鐘，終於排到門口，拿住面前既餐牌，心情真係好滾動~~因爲一來肚餓，二來其實餐廳對正青衣城G/F出口，市民出入頻密，所以道門基本上都係長期開住，加上個幾日氣溫急降，青衣城對出又對住個海，所以其實真係抵住寒風肚餓去排尼間餐廳~~~望住餐牌，餐廳基本上只會提供天婦羅定食，同天婦羅飯（無得話散叫天婦羅）~~~終於到我入坐啦，其實餐廳裏面坐位算多，但店員其實係座位安排上可以更有彈性，因爲現場所見，有部分2人坐其實係比一個人霸住，而店員未有善用搭臺尼一招~~巨星天丼加前菜  $87 - 先講前菜（本菇、牛蒡及蘿蔔），本菇同牛蒡幾爽口，加上材料被腌過，十分開胃~~~食完前菜，到主角上場~~~巨星天丼包括既天婦羅包括黑虎蝦、本菇、魷魚、帆立貝、蟹柳、四季豆同紫菜~~~天婦羅炸得金黃，乾身，粉漿唔厚，所以更能食出食材本身既味道，而虎蝦、蝦柳等厚肉而彈牙~~較爲驚喜既天婦羅紫菜，真係原塊紫菜蘸醬落去炸，食落好鬆脆~~~由於餐廳采用青森米，所以飯粒柔軟而帶微甜~~雖然天婦羅飯整體而言水準不俗，但如之前所講，由於餐廳位於青衣城出口當風位，所以就算位於室内，食物仍然較快變凍，由於天丼一上臺都唔係話好熱，所以其實食到一半天婦羅已經變凍~~~另一方面，天丼既醬汁較預期少，所以食到最後會有口乾既感覺~~埋單大約$100，論食物質素其實不俗，但又未至於值得排成個鐘頭去食~~~另一方面，建議餐廳因應店鋪身處位置，適量調整食物上菜溫度，甘樣會更加分~~…查看更多

同女友慶祝完聖誕節，點都要同屋企人慶祝返次補數既~~~難得兩老肯去遠d既地方揾食，甘我今次就帶佢地去到位於北角既<Soul 9+>，順便試下新野~~~<Soul 9+>位於書局街附近，餐廳位置比較偏僻，當晚都要揾左一陣先去到~~原本想叫好多人都推薦既溫泉蛋杯同玉子燒，但餐廳當日入唔切蛋同魚，結果所有有關蛋同魚既菜色我地都唔叫得...........首先上場既沙律，醬汁既酸甜比例配搭不俗，十分開胃~~~燒美國豬鞍扒伴薯角及沙律 $178 - 豬扒幾厚兼且唔肥，但味道實在太淡（長輩甚至話味道近乎似白煮豬扒）~~~日本鷄胸XO醬鮮茄扁意粉 $128 - 意粉屬於比較硬身既類型，配合鮮甜既番茄汁其實味道唔錯，但説好的XO醬好似食唔出........香煎雞軟骨餃子伴燒餅汁 $58 - 餃子裏面包住係一粒粒經搞碎後既雞軟骨，餃子皮煎得幾香，整體少油而不膩~~~ 黑松露忌廉蘑菇湯 - 黑松露令原本甜味濃郁既蘑菇湯增加左一層香味，但如果可以上臺時既溫度再熱返少少會好d~~~埋單人均約150蚊，價錢係同區算係合理水平，但質素上暫時未有令我有想返桌既衝動~~~…查看更多

同女友出去旺角慶祝聖誕，總係覺得聖誕唔食西餐好似怪怪地（只好怪我尼個位比較傳統），係上網爬文既時候突然醒起佢 - <Amico 1890>~~<Amico 1890>位於洗衣街，位置大概係麥花臣球場附近。聖誕節當晚其實booking都幾full，好彩我都算早訂台，不過到場後都等左大概20分鐘先可以入座~~~墻上貼滿客人用餐時既合照，刻意營造親切溫暖感覺~~餐廳分成兩層，其中2樓設有電影投射~~香草芝士薄餅 $128 - 原本念住叫三色芝士薄餅，但驚一開始食太膩會食唔落之後既食物，所以就轉爲叫一個芝士味無甘濃既香草芝士薄餅~~薄餅采用Mozzarella cheese，味道比較溫和，但味道酸酸甜甜之餘口感十分幼滑，餅底薄身加上脆脆既批邊，整體層次十分豐富~~南瓜帶子意大利飯 $158 - 微硬既意大利蘸上鮮甜既南瓜汁，令飯粒十分creamy，并且唔膩，值得一讚，同時帶子大粒兼煎得幾甘香，不過同爲配菜既三文魚則較爲普通~~Amico $43 - 由荔枝汁、檸檬汁、橙汁等組成，但飲落荔枝味似乎重得濟，蓋過了檸檬汁同橙汁味，不過都算係開胃飲料~~榛子朱古力 $43 - 口感好幼滑，唔太甜，味道濃郁令人有一口接一口既衝動~~~水牛城鷄翼 $82 - 尼道菜等左都幾耐（應該係漏左單，不過聖誕節繁忙時段屬情有可原）~~~鷄翼整得皮脆肉嫩，可惜塗上既醬汁唔夠辣，食完有種到喉唔到肺既感覺~~~甜品 - 其實係奶酪雪糕加上檸檬tart，雪糕質感綿滑，檸檬tart軟硬適中，兩者微酸既味道剛好中和之前菜式偏濃既味道~~埋單人均$250，舒適既用餐環境，加上不俗既食物質素，就甘樣我地渡過左愉快既聖誕夜~~~…查看更多

食完<安利大牌檔>，係離開東大街之前，點都要食一食我最愛既鷄蛋仔，位於東大街既<低調高手>~~雖然店鋪名叫<低調高手>，但其實一d都唔低調，因爲其實店鋪已經因爲不時有名人幫襯（例如發哥，霆鋒等)，加上上過電視節目<十二道鋒味>而增加左唔少知名度~~~店鋪版上貼左部分老闆同名人既合照~~（題外話，好似最近霆鋒係節目中又帶左林俊傑去食~~~~~~姐係意味著會有更多游客慕名而來同我地爭隊排...........OMG..............）其實店鋪選擇唔會話好似出面其他鷄蛋仔專門店甘多花臣（又紅豆、又花生、又鳳梨酥甘)，大致可分爲原味同黃金（加左咸蛋黃）兩種~~~甘又係，學我女友話齋，好味既一款就夠殺啦~~~現場環境其實唔係十分話乾净（因爲實在太多人排隊，根本無時間話抹乾净），當日老闆心情似乎好靚，仲跳住舞黎比我影相~~~原味鷄蛋仔 $19 - 熱辣辣既鷄蛋仔終於到手~~~一咬落去，第一感覺係非常脆，内裏雖然具有空氣感，但仍然會吃到裏面軟綿綿而充滿蛋味既餡料，真正做到外脆内軟~~~食住一包熱辣辣既鷄蛋仔，我同女友就離開東大街，繼續我地既行程~~~…查看更多

前幾日入去筲箕灣接女友順便食午餐，由於好耐無食魚蛋粉，加上唔太想食濃味野，所以就決定去東大街食<安利>~~<安利>係東大街有兩間，分別係<安利大排檔>同<安利魚蛋粉麵>，據聞係<安利>於兄弟分家之後衍生出黎~~~兩間係日間營業時間都係經常大排長龍~~店鋪售賣既食物其實同一般粉麵店相近，除左魚蛋之外，牛腩亦係好多食客會叫既食物~~~炸魚皮 - 魚皮夠大塊，但當日上台既感覺硬身左少少，唔係好夠脆~~~魚蛋河拼原味炆腩 - 魚蛋幾彈牙，牛腩因爲炆既關係好淋，河粉薄身且幾滑~~~切腩片頭撈米 - 切腩由於我地指明要坑腩，所以食落除左更加有牛味同爽口，米粉亦見彈牙~~~…查看更多

長發商場過往一年餐廳更替頻繁，二樓既pizza店調左鋪位之後，原來既鋪位由一間臺灣餐廳<嚐>頂上。 <嚐>位於長發商場2樓，Watsons對面~~~當日見餐廳新開張，同阿媽落去幫襯，餐廳内裏間隔四正，座位幾闊落~~~睇完餐牌，裏面食物選擇與其他臺灣餐廳大致無異，望住餐牌上面寫住<創意台西料理>，不禁心裏面念：創意在哪裏？？？？另外，點菜紙除左號碼之外就無寫其他野，係選餐時下下要望返餐牌match返個號碼，有d麻煩~~~豬軟骨豆腐肉燥飯$49 - 豬軟骨幾淋，同豆腐一樣滷得算入味，肉燥夠多，整體黎講幾好送飯~~~我媽就點左個牛肉麵（唔記得影相) - 湯底較淡，麵條較淋，令人有d失望~~人均賣單約$50，性價比算ok，但食物質素上暫時未有令人有翻桌既衝動~~…查看更多

自從有報道話荃灣出現豆腐花價格戰之後，豆腐花由原本$5碗變到而家$5蚊可以食到兩碗~~~Unbelievable~~~為左"支持"係價格戰中苦苦支撐既店鋪，幾日前我就去排下隊，食碗<阿玉豆腐花>~~~大部分任溝既豆腐花都只係$3，真係好易令人有選擇困難症~~~黃豆豆腐花 - 與鄰店相比，滑度可能有所不及，但豆味更濃~~~黑豆豆腐花拼芝麻糊 - 女朋友話黑豆豆腐花豆味比黃豆豆腐花更濃，但芝麻糊質感較稀，味道唔多夠~~~查實以$3既價錢，食到碗有質素既豆腐花仲可以任溝，大家仲想點呢~~哈哈~~…查看更多

由於屋企人選擇唔係正日做節，我得以同兄弟出黎打下邊爐，今次就黎試下荃灣三坡坊既<616牛肉火鍋專門店>~~當晚由於係冬至正日，選擇打邊爐既人唔算太多~~<616>係裝修方面仿照大排檔風格，餐廳裏面有一部分設有售賣懷舊零食既counter~~餐廳采用電子點餐，餐牌介紹清晰，牛肉部位選擇多而且特別，由點菜到食物上台，整體速度十分快~~值得一讚~~餐廳設有自助醬汁吧，醬汁方面更有餐廳自家調配既牛肉火鍋汁~~我地當晚以花雕醉蜆鍋為湯底 $98 - 蜆既數量算多同厚肉，配合有花雕香味既湯汁十分惹味，但部分蜆因有少少沙而影響口感~~吊龍伴 $68 - 牛味濃而有咬口~~~牛腩心 $68 金花趾 $68  - 味濃而爽口~~蝦滑 $48 - 有蝦滑應有既爽滑，個人認爲比牛滑出色~~~牛坑爪 $68 - 肉質彈牙但不油膩~~牛駝峰 $48 - 油脂較多，牛味濃郁~~安格斯 - 橫隔肌 $48 - 牛味濃而質感嫩滑~~個人最愛之一~~滑尾龍 $48 - 加入蛋汁令牛肉更滑，食完成班人互望：“滑牛！！！！！"黑豚梅花肉 $68 - 另一必食推介~~~牛舌 $48 - 切得好薄，煮完仍然十分嫩滑~~~三花腱 $48 水蓮菜 $28 - 賣相特別，食落"shock shock"聲~~~手打牛滑 $48 - 有牛味，煮完質地似牛肉球但淋身d，如果可以爽少少會更好~~埋單人均$250，可以食到不同部位既牛肉，十分抵食~~~上乘既食物質素，作爲牛迷必須一試~~~…查看更多

周末到旺角行街幫屋企買野，去到好景商場附近，發現一家開左一排但未有機會飲既臺式飲品點<TeaDays>~~<TeaDays>位於好景商場及馬會中間~~睇完餐牌，同鄰近其他臺式飲品點差異不大，價錢亦都差唔多~~飲品店推薦既飲品主要有<黑糖珍珠厚鮮奶>同<烤紫薯鮮奶>~~<黑糖珍珠厚鮮奶> - 一拿上手，感覺到黑糖微暖，珍珠大小適中，夠Q而帶黑糖味，但佢既黑糖味因爲過重，反而有d將奶味蓋過。追求比例平衡既朋友，可能選擇半甜會適合d~~…查看更多

睇完演唱會第二日，女友話想行下氹仔先走，中午行到累，就去試下網上都幾多好評既西班牙餐廳 - <唐吉訶德>~~~<唐吉訶德>位於地堡街（姐係官也街附近)，地點相當易揾~~由於當日去到其實已經2點近3點，過左中午時間，因此餐廳裏面食客唔多~~餐廳座位闊落，室内裝修刻意營造歐陸古舊餐廳特色~~餐牌方面，餐廳分別用一本餐牌專門列出菜名同價錢，並將菜式分門別類，另外一本就擺滿相關食物圖片，並附注菜名~~清晰既圖片可以令到食客更加容易做出選擇~~餐前麵包 - 熱辣辣既麵包外面脆裏面鬆軟，但如果配搭既蒜香牛油蒜味可以再濃d會更加好~~~蟹肉牛油果 $40 - 微酸既牛油果，配以新鮮番茄既甜味，本身已經好開胃，再加上裏面少少微辣既配料調味，頓時令到整個味道更加豐富~~口水分泌更旺~~用作底盤既麵包偏硬但鬆脆~~多重味道及口感令佢成爲一道出色既前菜~~~蒜蓉汁炒花螺 $98 - 蒜蓉汁如果齋飲就偏咸，但尼個咸度用黎蘸花螺就剛剛好~~~花螺偏細但都叫夠肉兼且無咩沙~~~甘樣既配搭令我係女友一輪嘴係度講野既時候只係挂住撩花螺~~~西班牙海鮮炒飯 $180 - 材料新鮮而多種類，米飯係吸收左醬汁之後變得十分juicy，入口有種醬汁要噴出黎既感覺，青口同蝦大隻煮得幾香，唯一扣分係蜆有幾隻比較多沙，影響左口感~~~埋單人均$180，菜式賣相未必十分精美，但平實而細緻既味覺體驗使我地愉快甘完成尼次氹仔之旅~~…查看更多

睇完演唱會，同女友行返入去舊城區食宵夜~~~係<華泰>同<肥仔文>中間念左一陣，最後決定食<肥仔文>，一來排隊既人龍令我地產生好奇，二來當晚唔係甘想食點心~~肥仔文舖仔細細，出名水蟹粥、蝦子撈麵及各式小炒，係氹仔有名食宵夜既餐廳~~當晚由於演唱會完結好多人都黎尼度食宵夜，結果我地總共等左3x分鐘先可以攝入去~~~女朋友之前係外地食得太多蟹，所以當晚我地唔叫水蟹粥，改爲叫左碗生滾牛肉粥加走地雞件~~生滾牛肉粥（加雞件$35) $80- 粥底有牛肉及雞件熬煮，幾入味~~但係牛肉未夠嫩滑，雞件食左幾舊只有一舊係嫩，其餘都係"un"，睇黎係煮得過了火候~~蝦子雲吞撈麵 $72 - 蝦子撈麵方面比其他知名品牌麵條稍微唔夠乾身同淋左少少，差左少少爽口感，雲吞雖然大小適中，但裏面蝦仁咬落亦不夠彈牙爽口，個人認爲就甘叫蝦子撈麵仲抵食~~~尼個小炒係其他食物上場後，等左接近30分鐘先出現既椒鹽玉米(應該係等埋其他order一次過整) $85 - 雖然用椒鹽炒令菜式偏辣，但玉米既甜幫忙中和之餘，亦令到味道更有層次，更加惹味，同時厨師控制火候得宜，使到玉米食落唔會覺得油膩（同埋個量其實幾多下）~~~但你話佢值唔唔得你為佢等成個鐘再要成$85，甘真係見人見智~~食完已經近凌晨3點，帶著少少失望既心情離開餐廳，返酒店休息，以繼續聼日既行程~~~…查看更多

周末上午留係澳門執下屋先走，順便食下位於屋企樓下既<南屏雅叙>~~<南屏雅叙>係澳門第一間設有冷氣既茶餐廳，位於十月初五街，隔幾個鋪位有同樣出名既雞湯米，同另一知名食店<牛記>~~門口設有一個小窗口，售賣各樣麵包，每日朝早路過買早餐返工既街坊唔少（包括小弟）~~由於餐廳已經植根十月初五街多年，已經成爲好多老一輩街坊日常食住茶餐睇報紙，及同街坊吹水既聚脚地~~所以黎尼度，首先應該有一個覺悟，就係今時今日既<南屏雅叙>係食氛圍、食歷史，味道反而係其次~~黎到<南屏雅叙>，好多人都會試佢地既叉蛋治。。。由於小弟早餐加埋午餐一齊食，所以順路搭多個咸餐~~~咸餐包括一份腿蛋方包、火腿通粉同一杯飲品~~~先講腿蛋方包，以當日質素黎講，煎蛋用油稍微重手左D，火腿如果稍微再加熱會好少少，而火腿通粉則同其他一般茶餐廳無異，反而凍奶茶因爲茶同奶既比例幾好，飲落下甜度剛好之余仲OK滑~~至於另外叫既叉蛋治就真心推介，即叫即炒熱辣辣既蛋奄列包裹住微熱既蜜汁叉燒，叉燒偏瘦但帶少少肥肉，兩者加起上黎食落去感覺豐盈，既有蛋汁亦有叉燒既甜味~~~少少肥肉更增加左口感~~本來都念過食埋沙翁，但小弟一向無一早食甜點既習慣，加上已經食到好飽，唯有下次再食~~~…查看更多

夜晚放工，唔想食普通粉麵飯，係新馬路行下行下，黎到勝利茶餐室門口~~~雖然話之前食過勝利茶餐室幾次，但發覺原來自己都無咩試過他們既豬扒包同其他小食，既然如此，就擇日不如撞日啦~~~當晚夜晚食客唔多，可以比我靜靜甘睇下食咩好，但因爲太夜既關係，豬仔包已經賣曬，所以唯有改叫豬扒三明治加件西多士再配一杯奶茶~~~先講首先上台既奶茶，係屬於茶味較濃既口味，同奶撞起上黎飲落去質感偏滑~~~西多士炸完夠鬆軟同香，但唯一可惜既係麵包裏面無花生醬做餡料（無法~~自細喜好無得改變），如果唔係會更加分~~~上面兩款個人認爲係一間有番甘上下知名度既茶餐廳既應有水準，但真心想讚下他們既豬扒三明治~~由於係新鮮炸，加上麵包有稍微焊過，所以一拿上手已經係熱辣辣~~冬天食就對了~~豬扒雖然係炸過但唔油膩，仲要夠大塊有肉汁，之前有聽過其他朋友講過話餐廳既豬仔包偏乾同硬，如果係甘，個人建議可以轉為食豬扒三明治，麵包會相對軟身少少同無甘乾~~~…查看更多

近日天氣轉冷，同女友行街越行越凍，就氾起了食火鍋既念頭。係網上搜尋左一陣，見到<湯米>尼排都幾多人Like，我地又好耐無食一人鍋~~~於是就走去幫襯下~~~睇下<湯米>會否從此落入我既美食清單裏面~~<湯米>位於豉油街，姐係新寳戲院過幾個鋪位~~~由於餐廳撥了一部分作爲飲品吧（專門調製特飲），所以導致現場座位比較狹窄，臺面比較細，基本上每人叫一個鍋再share一個小食已經差唔多霸曬成個臺面，不過無計，尤其係旺角，鋪位真係寸寸都係錢~~~~餐牌方面，<湯米>都算幾多元化，飲品方面大致同外面臺式飲品店類似；一人火鍋方面，除左臺式，仲有比較偏向韓式、日式、川式等不同口味，可以照顧到唔同口味既食客~~~小食方面，除左一般預期會見到既臺式小食，<湯米>亦提供標榜川味既串燒~~好~~望完餐牌，每人叫一個火鍋再share一個小食~~沙茶牛肉鍋 - 肥牛紋理同脂肪比例平均，每塊既大細厚度依火鍋價錢黎講算不俗，其他材料同配菜分量算幾足料（尤其係豆腐同玉米真係幾甜），但係一開始個湯底真係太淡，我後來要向店員落多幾羹沙茶醬先勉强夠味~~~韓國泡菜鍋 - 個人覺得比沙茶牛肉鍋更濃味，但其實仍然比其他韓國餐廳例如部隊鍋既味道稍淡，裏面肉類亦都比較大塊同多，由於本身已經有個麵餅，如果跟餐再加個米粉，對女仔黎講可能太多~厚燒牛舌 - 牛舌本身算厚肉同嫩，但如果作為川味燒黎講，則同樣地調味唔夠濃~~~埋單每人約$150，餐廳食材算新鮮，但個人認爲口味太照顧大眾口味，反而失去了每個鍋應有既味道~~~…查看更多