riversze的個人專頁

豬膶麵好多茶記都有，做得好嘅唔多。今次呢間算是人氣豬膶麵店，就試吓有幾好食。同伙記點餐叫豬膶麵，上菜時，伙記問需唔需要加蔥花。我答「好呀」。發覺蔥蔥切得好碎好香，有點似日本拉麵上的蔥花，我覺得是一個細心驚喜位。未食已加分。即食麵煮得唔錯，剛剛好，唔會太淋，但又可以熟到麵芯。有彈牙口感。湯會有少少豬膶水感覺，但未至於太多血水味。蔥花加啖熱湯，入口好正～到重點，就係招牌厚切豬膶，血水啤得好乾淨，咬落爽，入口唔粉，全熟，唔會有血～口感係唔錯，不過個人覺得，舊豬膶因為幾厚，所以食到第二舊感覺有點寡，尤其食咗啖麵之後，再食舊膶，就覺得豬膶好似無味好淡口。如果豬膶有番啲底味可能會好啲～總括黎講係好食，但未至於食完會念念不忘。價錢有點偏貴，因為飲品係另計，一碗麵加杯熱檸水，埋單$71。聽講西多士都出名，下次有緣再食～…查看更多

每次到享樂烘焙都會有驚喜，包類款式不斷有新款式。本身選擇已經夠多了，還要不時出新款，究竟是如何能做到！一入店，滿眼都是麵包，好療癒🥰麵包量好多，排滿整個櫃，但買的人更多，每個人都像迷失在麵包山中。左顧右盼，選擇困難症發作中。幾經辛苦，挑選了四位佳麗～開心果酥餅拿上手好飲乾巴巴，心想是乾身口感，原來中間好鬆軟，就是牛角包口感，開心果醬好濃口，配杯黑咖啡很讚～提子鬆餅外脆內鬆，好高質香蒜芝士包，蒜蓉芝士好重手，每啖都好惹味，食完成口都是蒜。台式海苔肉鬆比高，咸咸香香，麵包體本身有好香海苔味，入面有肉鬆同cream cheese,口感比一般的比高包鬆軟，放了雪櫃兩晚，焗翻熱仍然鬆軟好吃。強烈要求港島開分店。不過相信總店還是最多款式的，過海光顧也是值得。…查看更多

紅磡新開小店，用餐環境舒適，雖然坐位相隔有點擠迫，但整體氣氛不錯。星期六一點半到餐廳，因為座位少，難免要等位。午餐和同事各點了一客意粉，包餐湯和熱飲。加$12有兩件蒜蓉法包。是日餐湯是甘荀忌廉湯，賣相不錯，味道亦濃淡得宜。剛剛好就是不錯。既然有餐湯，便決定加$12，加一客兩件蒜蓉法包配餐湯。這是屬於脆口乾身的口感，蒜香味不錯，不過個人口味比教喜歡包身軟身一點的。欖油辣椒菠菜煙肉意粉望落清淡，但食入口是惹味的，不過稍為覺得意粉軟身了一點，醬汁和意粉不夠融合。同樣意粉本身口感不夠彈牙，不過茄汁味道調得不錯，混入了意式香草，雖然沒有肉類，但味道很豐富，好吃。早餐和下午茶似乎很多選擇，有緣可再試。多支持香港小店，始終係香港經營小店實在艱難。…查看更多

每朝開工前的早餐好重要，隨了填充肚皮外，更能影響整天工作心情。坐巴士的二十分鐘，腦內總是盤算著到那裡買早餐～紅磡區工作的人也有夠幸福，早餐總類還算多且便宜。無意中發現這間麵包小店，店舖空間真的很少，看看櫥窗，麵包款式多，而且風格年輕。有點東洋風格，最緊要定價合理。進入店舖，左顧右盼，真是包多眼亂，朝早想配黑咖啡，就從甜包入手吧～藍莓卡士達，即包面有吉士醬藍莓醬，甜甜的配黑咖啡剛剛好，大啖咬下去，麵包組織綿密實在，感覺到麵包師傅的誠意和認真。心情都樂上半天。不過有個小建議，吉士醬如可用cream cheese 取代，應該會更滋味😋綠茶紅豆是我的最愛，一袋三個的迷你綠茶紅豆包被我看到，當然唔放過。咬下去實在口感如小餐包，淡淡綠茶香，最愛是用蜜紅豆，不是用豆沙～甜甜的也清爽。還看到有歐包的名牌會注明無蛋，無奶等，適合素食人士，好貼心～…查看更多

紅磡算是舊區，老店也特別多。不過小妹在這區工作多年，普遍大小食肆都差唔多光顧過了。偶然發現有新開食肆，都會急不及待一試。餐廳名很特別，一進店舖感覺好開揚，樓底好高。用餐氣氛不錯，不是茶餐廳格局，有點清吧的感覺。午餐時間，當然不會點杯酒飲吧～見餐牌有手撕雞飯，竟然有多款口味。似乎是大廚得意之作。愛辣得我點了泰式手撕雞，愛香口的朋友點了炸蝦餅黑豆飯。手撕雞已與調味料混和，中間夾雜了青瓜絲，酸爽辣味道很對胃口，有追吃的衝動，配白飯吃很適合。雞肉用雞髀肉，有連住少許雞皮，肉質好滑👍🏻炸蝦餅黑豆飯，炸蝦餅做得不錯，真材實料，夠彈牙。就是份量少了點，拌碟的雜果沙律好食，剛好平衡了炸蝦餅的熱氣。黑豆飯只是感覺健康，其實沒什麼味道。價錢在舊區來說算是中上，不過以環境舒適度，用餐體驗，食物質素，絕對值得。尤其這區絕少這種環境食物都有格調的餐廳。…查看更多

最近暴食得有點沉淪，體重上升了不少。惟有勤做gym力挽狂瀾，盡量用心志控制食慾，戒甩為食心癮。但世事總是事與願違，當做完gym,正在享受輕盈肚子空空的感覺，竟被幽幽香味迷惑我雙腳，不由自主走入一間傳統格局麵檔。迷迷糊糊坐下，望望餐牌，有少見的豬什，魚扎，墨鬚。不由分說就點了墨鬚米，心中安慰自己，米粉總比河粉低卡路里吧⋯⋯幾分鐘後，一碗熱騰騰的墨鬚米出場，急不及待喝一口清湯，好香蒜蔥味，咬一下墨鬚，鮮味大爆發，米粉伴隨銀芽，跟惹味清湯滑入口中，令我完全墮落於美味漩渦中。加點潮式辣椒油，蒜香辣味兼備，似乎令整碗米粉進入另一層次。減肥？控制飲食？卡路里控制？似乎已被一碗墨鬚米打敗了。雖然有點挫敗感，但如此優質美味卻換來心靈無限滿足。有時候滿足感就是來得這樣隨心。…查看更多

北角新開西餐廳、作為北角原居民嘅我當然要有一試的決心。成日放工經過，見裡面燈光昏暗，好似好有情調咁。決定選Happy Friday 和媽媽共進晚餐。安頓好座位，雖然燈光少少暗，但坐下後氣氛好輕鬆，侍應談吐都很親切。留意到餐牌有石燒牛扒，價錢仲好吸引，$78再加錢轉套餐。另再點意粉再加錢轉套餐。另再點小食白酒忌廉青口。青口一客$78，作為小食很不錯。雖然青口肉真的很細😅但係個忌廉汁好正，正到我將伴牛扒的炸薯條用黎點呢個白酒忌廉汁食，好滋味😋石燒牛扒基本上咩調味都無，自己用熱石煎同加鹽同胡椒。有燒汁，黑椒汁另上。78蚊一份牛扒唔會有太大期望，一般水平啦。黑松露煙三文魚寛條麵好有驚喜，寛條麵軟硬度啱啱好，有煙韌口感。黑松露味好香，煙三文魚足料。跟餐是日甜品係啫喱，可以加錢轉一人份窩夫甜品，作為窩夫控嘅我，點可以唔食😆窩夫即點即做，而且有士多啤梨味，上枱時仲熱辣辣，上面一球凍冰冰士多啤梨雪糕，好正。為咗個咁高水準嘅窩夫 ，我一定會再訪。…查看更多

放大假，一個人出街周圍閒遊。正所謂一日之計在於晨，就搵間坐得舒服餐廳一邊食早餐，一邊plan吓行程。之前已留意這間餐廳，假期常常爆滿。睇見食客食到津津有味，好似幾吸引。因為係閒日兼早上關係，只有我一個食客，服務員雖不算得殷勤，但態度是令人舒服的。早晨餐牌有幾款all day breakfast,但我一個人似乎點最basic嘅較穩陣。$68一份all day breakfast,，比坊間的都要平，雖然飲品另計，但係加$12就有杯拉花咖啡，感覺自己賺到了。😆餐具都好靚，經典早餐好大份，好在本人食量都唔細，不浪費地將佢地一網打盡。炒滑蛋好多，我懷疑有三隻蛋，茄汁豆入口暖暖地，有洋蔥，香草味，應該唔係就咁係罐頭倒出黎。楓糖煙肉兩塊，如果可以轉腸仔式火腿就好啦！不過都ok嘅。因為仲有麻醬沙律菜平衡吓口味。牛油香草粟米都好香。小牛角就普普通通。再加杯咁靚嘅咖啡，一百蚊有找，有咁舒適環境，豐富有質素早餐，性價比極高。一個人清靜享受一陣子，都可算叉了電吧！…查看更多

堅尼地城屬於舊社區，雖然已有唔少新樓盤，但仍有濃濃舊社區人情味。有口碑小店，老店不少，每個星期假期總愛到這裡尋味。今次到市政大廈熟食市場，感覺這裡餐廳應該都是街坊老口味。見到有幾枱人都食沙爹牛即食麵，就是這種香噴噴香港味😋，坐低點了沙爹牛通，熱華田，感覺像略到小時候。望望餐牌，有好幾種沙爹菜式，隨了沙爹湯低粉麵，仲有沙爹牛飯，沙爹牛濕炒河。似乎沙爹是此店特色。沙爹牛通賣相同一般茶記有少少唔同，唔係一pat沙爹汁牛肉撻上湯通炒上面，係成碗湯底係濃沙爹沙底，一口飲啖湯，哇～好滾熱辣，飲完一啖忍唔住再飲，佢唔算濃到杰撻撻，飲入口順喉，夠沙爹香，惹味。最怕沙爹甜味重，呢度嘅口味我鍾意。牛肉係有咬口嗰種，有牛味，無俾梳打粉醃到無肉味。有住家感覺。食完同自己講，一定會再黎試埋其他沙爹菜色😋…查看更多

香港人集體回憶美食，點可以無車仔麵。車仔麵可算是香港草根美食，但係依家嘅價錢一啲都唔草根🤣文記車仔麵係深水埗都好多年，十幾年前係附近返工成日經過，至於味道就係食慣車仔麵味道。十幾年前覺得無乜特別，十幾年後就覺得回味無窮。一場黎到，唔知幾時再有下次，食開三個餸嘅我，今次點四個餸。蘿蔔豬紅豬腸係車仔麵靈魂，唔點唔得，辣味魷魚望落吸引，一大盆拌著濃濃醬汁，姐姐夾餸都算重手，餸料分量夠多。蘿蔔夠甜，如果皮再刨深啲會好啲，因為入口有少少渣。豬紅夠入味，豬腸唔痴牙，好食。辣味魷魚好正，細心位係剪得夠細，一啖一條，食得方便。而且好惹味。值得一讚係，點餸方式傳統，可以望住一盆盆餸，睇到邊樣吸引嗌邊樣。最怕圈紙仔，碗麵出到黎先知中伏😆四餸麵$58 係貴咗啲，不過呢種古早味，遲啲會買少見少啦！…查看更多

個人是麵包愛好者，無論港式，日式，歐式酸種，大小通吃不放過，通通送進口中。收到風得知這間小店麵包種類特別，用料講究。既然工作關係要到新蒲崗，就去朝聖。試探一下此店實力。一進店中，麵包控必定心心眼，每款包賣相討好，經過一番掙扎，選了兩款包包。㭑 茶焦糖三角其實係簡單搽茶磅包，未放入口都已經聞到好香抺茶味，加埋焦糖脆面好吸引，配杯咖啡～prefect!芝士法包啲芝士醬滲入包身，面頭仲有粒粒芝士。咸咸香香，芝味濃濃，好回味。有時心情唔好，澱粉質確實可以調理一下心情。麵包要新鮮吃，所以想大量入貨不可能，惟有放假，或有緣路經才可重遇。因為難得到就更令我心癢癢想一再回味。…查看更多

本來前年到東京旅行時，打算將呢間餐廳預算在行程內，但上網爬文發覺很多時要排長龍，因不想浪費旅行時間，所以取消。知道香港有分店，便心思思想一試。天婦羅很多時候都食過，天丼就從沒品嘗過，知道是將剛炸好的天婦羅浸上店家秘製醬汁再放在香飯上。所以除了天婦羅要美味，醬汁是天丼靈魂。餐牌好簡單，主要就是三款天丼，既然一場黎到，當然點了最豐富的江戶前天丼。記得有朋友到過淺草食天丼，覺得天婦羅浸過醬汁已不脆了～令我對天丼有點卻步。不過這次初試，天婦羅夠脆口，一啖入口有濃甜的醬油味，尤其炸紫菜，無諗過咁脆，好味。炸糖心蛋蛋汁加醬油撈飯，我諗應該所有香港人都喜歡。炸穴子好大件，啖啖肉。炸蝦蝦味濃。秘製汁配日本米，無一個飯桶可以抗拒。如此美味嘅結果當然係………發現個碗咁特別，係淺碗黎，好想知道係點做出黎呢～不過食完成碗天丼係好飽嘅～可能因美感問題，要用呢種碗。…查看更多

香港經營多年的小店日漸息微，好多都經不起時代巨輪。現在更一場疫症橫行，更令我要珍惜這些人情味小店。寶城在紅磡廣場地庫，食客多是附近上班族和街坊。位置不就腳，但其生炸雞脾的功力卻極其深厚。典型港式壞舊快餐台格局，餐牌在門口，有廿幾個碟頭飯任君選擇。其實每樣水平比起一般連鎖快餐都要好，如果早一點更有老火例湯。我的絕對心水當然是炸大脾配西汁意粉，平時會堂食，非常時期惟有外賣自取。一個飯盒已滿滿的意粉，炸脾太而且脆卜卜，會另外入紙袋。炸脾沒有上厚粉漿，但雞皮脆度可與乳豬皮媲美。一啖咬下，一滴滴肉汁沾滿咀角。一手叉意粉，一手拿起雞脾往口裡 拉扯，何其痛快！！其實除了西汁，還有幾款醬汁可選，記得是咖哩汁 栗米汁，黑椒汁……不過老餅如我，西汁就是我童年的味道。…查看更多

本身在紅磡返工，同一般打工仔一樣，一放工，身心俱疲，總想為生活加點甜。離開公司途中，要填一填肚子才回家吃晚飯，這算是給自己的小小私人空間。勝利美食這間小店不起眼，賣的以港式小食～ 鹵味為主，也有魚肉燒賣這些地道小食。以往只覺得旺角肥姐的鹵味合口味，本來只抱著有嘢落肚心情去品嘗。一吃之下，雖未至於驚為天人，但絕對是意想不到的美味。值得一讚是鹵味夠凍，食得出新鮮。吃過豬頭肉，大墨魚，生腸，豬心。都新鮮爽口，完全沒有味覺負擔。醬料黃芥末自家調製，爽辣刺激，配搭甜醬磨合，先是一口冰涼鹵味，再來攻鼻刺激，最後鮮味回未味。吃完三串還有點意猶未盡呢！若果有選擇困難的食客不用擔心，小店有提供組合套餐提供。…查看更多

一向是元氣鐵粉,不過有時略嫌選擇不多。如想口味多變化，會到千両一訪。不過 礙於預算問題，到訪次數當然不及元氣。除了優質壽司刺身，我也甚喜愛千両一品料理。每次必點黑鱈魚鮫，較早前嘗過燒黑鱈鮫，真有點驚為天人，後來轉了只有汁煮，別有一番風味。不過現在燒黑鱈鮫再度回歸了。當然急不及待嘗鮮。既然一場到來，當然品嘗元氣沒提供的壽司， 牡丹蝦，大吞拿，鮑魚，遂一送到口中，甚是幸福。我最愛牛油果，怎可遺忘我的最愛？小食，前菜可清新一下味蕾，亦好像一餐中的逗號。和母親兩口子，這一餐也算蠻滿足，場內用餐氣氛令人舒暢。有幸結帳時，還抽中做網上問卷調查，有$80獎賞下次用。🎉🎉…查看更多