jmytai的個人專頁

去得Rosewood食飯，你會有expectation，當你有expectation，就唔會太容易可以比到驚喜你。當然每一樣嘢都有佢該有嘅水準，出品絕對唔會有問題，不過真係好難俾到驚喜。用餐環境當然非常好，個景亦都無懈可擊，服務係酒店應有嘅服務水平，咁當然個價錢亦都係酒店嘅水平。事實上我冇乜嘢好彈，不過亦都諗唔到有咩好去讚。當佢係一間普通高級嘅西餐廳食一個lunch，係絕對冇問題嘅，可以當作係一間高級日常食堂。…查看更多

呢一個食評我擔心有啲唔係好公道，因為我喺香港食過嘅燒肉店其實唔係好多，唔會超過20間。但係298嘅水準係我食過嘅燒肉喺香港嚟講係最好食嘅，而多年來亦都冇令我失望，當然佢嘅價錢唔算好抵食，但係物有所值。除咗佢嘅燒肉，佢嘅海膽和牛卷都係我每次去必叫嘅菜式之一，而其他熟食其實都做得非常出色，不過唔知點解佢嘅水冷麵係長期都冇貨嘅，去幾次幾次都食唔到。而依家我要食燒肉嘅話，我都好少去其他店，因為去過之前有啲貌似好抵食嘅燒肉店，食完覺得太受罪。…查看更多

已集團式嘅火鍋店嚟講，佢嘅水準算唔錯。有別於一般港式火鍋，感覺似返咗大陸食。佢有基本嘅海鮮，好似有港式嘅象拔蚌，龍蝦，鮑魚嗰啲嘅海鮮啦，鮮蝦嗰啲都有嘅。不過特別少少嘅就係，佢哋係冇日本芥辣嘅。肥牛嘅水準都唔錯，另外佢嘅調味醬汁選擇都好多。用餐環境非常唔錯，服務亦都非常好。價錢嚟講亦都相對抵食。值得一提嘅係佢有放題嘅台灣滷肉飯，味道相當有水準。仲有新鮮生果任食，同埋佢嘅芝士波都做得非常出色。如果叫套餐嘅話，其實都非常抵食。…查看更多

響平安夜搵餐飯食，本來都冇乜期望，原來冇乜期望就冇乜失望。路過囍帖街之後去到胡忠大廈，見到呢間餐廳冇乜人，就上咗去試吓，嗌咗個頭盤，一個湯，一個海鮮飯同埋一塊牛扒。個頭盤同埋普通餐廳冇乜分別，價錢一般，當然味道亦都一般般。個湯唔難飲，不過絕對唔係好飲。個海鮮飯比較特別少少，佢用咗海鮮加咗啲生粉煮咗一個芡，潷咗一殼白飯响個醬汁中間，味道其實冇乜嘢，同埋我去茶餐廳食嘅海鮮飯差不多，不過佢收咗我二百幾蚊。到到塊牛扒，話係澳洲和牛，塊扒薄咗少少，煮得熟咗少少，價錢二百幾蚊，以食牛扒嚟計其實佢唔過分，不過咁嘅水準就差啲。連少少嘅伴碟都冇，只係隔離上咗多一份薯條俾你，還好啲薯條都有一般嘅水準，整體嚟計服務其實都尚可，價錢兩個人食食咗$1200到，其實平安夜嚟計都唔算太過分，不過我相信我唔會再去。…查看更多

多年來魚子醬都算幾好食，依家變咗用粟米片，感覺冇以前咁好食。其餘啲菜式近呢兩個月都有少少改變，佢勝在啲食物上得好快，趕飛機唔怕要等得太耐。不過由海關出嚟之後行去都有少少距離，不過都可以接受。入邊VIP區域啲嘢有人招呼，感覺上舒適好多，但係亦都不忘要出去出面攞其他自助餐食，因為自助餐有花膠湯飲。蜂蜜亦都唔錯因為佢係新鮮蜂蜜，連埋蜂巢要嚟點餅乾都幾好。唯獨係佢幾年先至轉一次個餐牌，每次上去都冇乜新鮮感。…查看更多

點咗佢嗰個$1200嘅套餐，冇諗過有咁多嘢食，好彩冇加其他嘢，如果唔係兩個人一定食唔晒。啲魚生真係好新鮮好好食，同埋用韓國食法嘅魚生同埋食一般日料有少少唔同，會嘗試用菜包住夾埋啲辣椒同埋蒜頭一齊食，有另外一種風味。最後上過一個湯，都好鮮味，用咗佢好多唔同魚嘅魚骨魚頭魚尾落去煲，再加埋佢個麵團，出嚟味道都好鮮味。排隊嘅人好多，建議早少少去排隊，老闆同埋部份樓面都係韓國人，招呼都好好，不過鋪面實在太忙，唔係應付到咁多客人。…查看更多

入邊每一道菜都對得住嗰一粒星，全部都有水準。這裡的煎花膠尤為出色，外皮金黃酥脆，內裡則保持了花膠的鮮嫩口感，令人一試成主顧。除了食物，餐廳的招呼服務也讓人感到賓至如歸，服務員不僅友善，也對菜單的推薦十分專業，能夠根據客人的口味提供相應的建議。環境方面，餐廳的設計簡約而不失優雅，座位間距適中，讓人用餐時感到舒適。衛生管理做得非常到位，桌面和餐具都保持著整潔，讓人用餐時無需擔心衛生問題。雖然價錢尚算合理，但整體體驗卻是物有所值。雖然可能不是每道菜都能稱得上抵食，但無論是味道還是服務，絕對對得住這一粒星的評價。總的來說，這家餐廳的每一個細節都顯示出對食客的尊重和用心，讓人每次光臨都有新的驚喜。若你想尋找一個可以安心享用美食的地方，這裡絕對是一個不容錯過的選擇。…查看更多

食物出品麻麻地，舊dry aged 整到同普通牛扒差不多，早知唔加錢食 Dry Aged。絕對唔係難食，不過一定唔稱得上好食。其他starter好似鵝肝，生蠔，龍蝦麵，全部都一般般。最後去到甜品，出品同埋一般餐廳便無兩樣，有些小失望。 招呼差些少就可以到達麻麻地嘅水平，樓面根本唔夠人，經理盡量保持笑容，但係行過路過，都聽到佢喺度唉聲嘆氣，又成日跌嘢。整體嚟講性價比極低，兩個人食咗3000幾，仲要冇飲酒，絕對唔值。…查看更多