深水埗味皇的個人專頁

睇完無線（區區開伙）介紹呢間餐廳後，第二日即刻訂枱試下，雖然位置唔多就腳，但揸車嘅我附近比較多咪錶位，所以無乜問題。去到門口大約一点鐘，慣常食飯時間，門口比較多人，要等位，見到鋪內座位不多，大約等左10分鐘就可入座。一家四口，點左四款午餐，焗鮮茄磨菇豬扒飯，西芹雞柳，椰菜回鍋肉同瑞士汁乾炒牛河。焗鮮磨菇豬扒飯………………上枱時令我震驚，份量之大我諗兩個人食都夠，只係50蚊，抵到震。鮮茄入口融化，焗到透晒，正！豬扒質感軟硬恰到好處，有咬口，兼且好貼心地上枱時已經幫我將豬扒斬件，加分，最重要係夠熱辣辣，真係feel到响焗爐剛剛出爐，飯面有少少焦燶現象。西芹雞柳……………………西芹有少少淋，可能煮過籠，但雞柳味道一流，肉味非常足夠，有埋白飯同凍飲只係42蚊，咁平究竟有無錢賺架？真心覺得生意難做！椰菜回鍋肉同樣係42蚊，椰菜夠爽甜，回鍋肉夠乾身，但略嫌有D肥，keep fit嘅我唔係咁夠膽食，但呀仔話送飯一流。瑞士汁乾炒牛河就品評唔到，因為呀囡突然收到call要返公司，只好打包比佢拎走。總括而言，確實响深水埗區有呢D質素嘅茶記真係罕有，值得比like…查看更多