babycherie的個人專頁

椒鹽九肚魚嗰槳唔脆，舊魚又得細細嚿；黑醋骨完全不知所謂，舊骨都唔知炸咗幾耐，肉質又有少少霉，就咁撈埋啲汁就上，個炸粉已經冧晒一pat pat，仲差過兩餸飯，碟菜心正常，黑椒薯仔牛柳粒同福建炒飯，味道普通，但價錢貴，份量少，全餐完全物非所值，冇下次。以前深水埗好好食，真係冇諗過會咁差，唔知啲好評點解有咁多，全餐就係伏伏伏，如果收得呢個價錢，應該大把更加好嘅選擇。唔怪得知星期日晚7:00去食仲有咁多位。…查看更多

朋友生日，話入去科學園食飯，一行18人，去到楠天門口，心諗生日唔係食茶記呀嘛？原來朋友一早同老闆預訂咗私房菜，入咗去餐廳之後，原來已經用屏風間開咗咗一個位，總共有兩圍，私密程度都算OK，同出邊酒樓食飯冇分別。真係冇諗過一間茶餐廳，可以做出咁出色嘅私房菜，每道菜都係老闆同大廚落足心機咁去煮，加上員工殷勤嘅服務，每位價錢只係$400/人，性價比真係非常之高，雖然路程就有少少遠，不過食過之後，覺得響沙田搭多程小巴入嚟食都真係值得。個叉燒，除咗擺盤靚仲有拔絲響面之外，仲有焦糖脆皮，真係酒店都未必做到咁嘅擺盤，完全見到小店嘅用心。仲有隻黑松露乳豬芝士焗飯，隻乳豬皮脆卜卜，炒飯有好濃烈嘅黑松露味，推介之選。個菠蘿咕嚕肉，竟然可以食到底仲係脆；同老闆傾開計，原來佢哋每日私房菜嘅魚，都係同香港漁民向海度攞返嚟，全部都係野生海魚，唔係出邊食肆俾你嘅養魚，呢個又真係冇得呃人，食入口就知有超濃嘅魚味，出邊食一條海魚個價錢真係可能係天價，呢度$400一個人，有咁多個餸之餘，仲可以食到海魚，真係超值。最後，個甜品係生磨合桃露，一嚟到嘅時候個個都話點解咁香？老闆話係大廚，先將啲合桃烚完之後再炸香，之後再磨再煮，完全係食心機同手工，只係一個飯後甜品，難得小店都咁用心去做，響依家嘅食店真係買少見少。全部D餸個份量係多到食唔晒，最後要打包十幾盒返屋企，咁嘅價錢，食到咁嘅食物質素，仲要超大份量，完全係物超所值，性價比超高。不過有一點就係老闆真係要做多少少宣傳，同埋再加多啲唔同款嘅菜式選擇，如果唔係朋友帶路，根本唔識得入嚟搵呢啲隱世美食，期待下一次再同朋友嚟幫襯。…查看更多