Foodcaptain.hk的個人專頁

每星期都會過黎食lunch，最近唔知係換左廚師定點，食幾次都好失望，好多次既意粉都係冇鹹味，最後要自行加鹽😂。以同一樣野為例。12月食既冬蔭公Risotoo，食落濃味，顏色望落橙黃色，食落有冬蔭公少少辛辣感，好食既。2月食既冬蔭公Risotto，睇相都見到，色潤完全係兩回事，廚師自己煮出黎咁都過到自己個關？😂上枱諗住算啦，食左幾啖，真心完全冇冬蔭公味，最後都係忍唔住搵左侍應，幸好侍應反應快應對得好好，最後都有再整返。…查看更多

尖沙咀鴨肉專門店尖沙咀喱間新開既小店，主打鴨肉、牛三寶，主食可以揀飯/鴨葱油撈粗，試過佢既65度左右慢煮鴨片飯（$68）同65度左右慢煮鴨片撈粗（$72），鴨肉好多幾乎鋪滿表面，食落嫩滑好香，幾出色既，飯既話食落比較淡味，因為佢啲辣醬比得好姑寒😂(建議堂食可以比多少少囉)，想食濃啲既就可以揀撈粗，整體香濃好多。牛三寶就包括牛腩、金錢肚、牛丸，滷得幾入味，有種食車仔麵既feel！有一點唔get既係，夜晚去到有兩張四人枱都各坐左兩個人，店員就叫我地要等，等左十五分鐘後都冇人要走，喱個時候店員先執位比我地入座，最後就坐埋係四人枱到搭枱，咁就好搞笑啦，我地到底等個十五分鐘for what呢？☺️…查看更多

🍚出色街坊小菜🍚-對比西餐，司令一向喜歡食中餐🤣，最喜歡周圍發崛好食既小菜，今次介紹喱間，位於深水埗同石硤尾交界，好多手工野都做得好食，而且價錢超抵，絕對值得一試！前菜必試佢地既三層豆腐($45)，外表炸到好似臭豆腐咁脆，咬入去係玉子豆腐質感，底層仲有菠菜增加口感，滿意！玫瑰頭抽雞($128/半隻)個人覺得都係必食，出奇地肥美，做得好入味但同時keep到雞肉嫩滑，再配少少佢既汁拌飯完美。陳皮雞蛋焗魚腸($98)而家好少餐廳做，喱到魚腸完全唔會腥，而且魚腥比得多，配少少胡椒粉已經好好食。另外點既二人套餐($328)，有清蒸筍殼、蘇梅欖角骨、魚肚浸時蔬，有三道餸超抵食！睇餐廳名就知一定要食魚，蒸筍殼肉質嫩滑，蒸既時間把握得好好，加埋蒸魚豉油已經好好食啦。欖角骨口味酸甜，口感微微焦脆，都好唔錯。…查看更多

🥟觀塘即叫即製巨型點心🥟-呢間觀塘嘅點心店，係朋友介紹嘅，估唔到夜晚嘅時候都爆場。點心呢樣嘢其實味道上大同小異，其實好唔好食最主要就係睇蒸炸嘅火候、足唔足料、款式多唔多。呢度嘅點心，其實個人覺得幾驚喜，因為佢真係超級巨型，淨係蝦餃同燒賣為例，都係平時飲茶嘅1.5-2倍大😨。平時食點心有個問題，就係食一粒唔夠喉，食多一粒又唔夠分，呢度就完全冇呢個問題，因為你淨係食一粒都覺得好滿足😂，我諗如果女仔嚟食真係食幾份就會好飽。最好食嘅反而係呢度嘅包點同煎炸嘢，例如墨西哥叉燒包，煎蘿蔔糕、鹹水角、同埋蒜蓉芝士鮮蝦長春卷。鹹水角入面係有鵝肝，食落特別香，外皮煙韌但唔會好油，出色！價錢唔算好平，小點$25，中點$27，頂點$33，特點$37，不過以佢嗰份量來講都絕對可以接受啦。…查看更多

🍦大大杯乳酪雪糕($58)🍦好耐好耐冇食過乳酪雪糕🤣，黎到西貢點都要試下。乳酪雪糕揀左杯裝，$58一大杯雪糕配三個topping+一款醬，topping都係大路野，水果、餅、脆脆、朱古力、檸檬類等等，因為佢既雪糕其實好大杯，所以個人覺得揀番啲有口感嘅嘢，食起上嚟會比較配合🤣。味道上係標準乳酪雪糕味道，質地幾幼滑，唔會好冰感，海鹽焦糖脆脆係招牌配料，但個人偏好木槺、Oreo個類多啲，配埋個熱情果醬，食落更refresh!…查看更多

🥜街坊小店超正花生醬糯米糍($6.5)🥜-估唔到望落平平無奇既小店，入面竟然有咁正既糯米糍🤣！糯米糍既皮未算話好薄，但重點在於佢個餡，同平時食開既花生碎、糖餡唔同，佢入面係有花生醬🥜，所以上手比平時既糯米糍重手好多，而且咬落有原粒花生好脆，甜中帶有少少鹹味所以唔膩，又平又好食，絕對係食完想食多粒之選！拿！芒果糯米糍我都買過黎食，不過非常一般😂，首推都係花生醬糯米糍啊！鍾意食煙韌系列野既必試啦！…查看更多

🥢新哥食館🥢-最近新發現既新開正正小菜店！餐牌唔似一般小菜館咁有幾百款餸，主打師傅拿手野，開左冇耐不過次次去都爆滿🤭。環境算係幾新淨，不過預咗比較多人會比較嘈，但係如果成班人嚟聚餐嘅話都好適合。油鹽水浸花甲🧄（$108）花甲大大隻，食落除左海鮮味，有幾重既胡椒味，配埋配料幾惹味。避風塘叉燒炒河🌶️（$98）第一次見到呢個菜式嘅時候，冇叫。第二次再嚟食嘅時候覺得好似幾特別，就決定試試下佢，首先個河粉真係好有鑊氣，每條係分明唔會痴埋一舊，食落有孜然味同辣辣地幾惹味，出色！新鮮葱油雞🐔（$218）望到個賣相都知好食！雞皮好滑而肉又夠滑，重點係表面鋪滿嘅蔥油，有青葱同煮過既洋蔥，超正！金牌咕嚕肉🐷（$108）廚師推薦一定要試佢哋嘅咕嚕肉，平心而論，外皮好輕盈，入面偏肥，口感黎講係做得好好，唔會膩，但係個人覺得調味可以再重手啲，唔夠酸甜。薯仔牛柳粒🥔（$108）喱道菜式就周圍有，不過大多數做到一般，而喱到竟然做到薯仔真心外面超脆入面夠淋，而且再帶有蜜椒味，連牛柳粒都淪為配角啦🤭。…查看更多

🍪菠蘿皮麻糬波波🍪天天烘焙既麻糬波波一向都大粒又煙韌，而家佢地做埋菠蘿皮麻糬波波，雖然味道選擇唔多得兩款:斑蘭菠蘿皮麻糬波波🌱($7)同朱古力菠蘿皮麻糬波波🍫($7)。煙韌既麻糬波加薄薄一層微脆菠蘿皮，必定好食！老實講兩個味道真係各有千秋🤣，斑蘭味好少見，食落好香唔太甜，咬落都有啲朱古力碎係入面，而朱古力味就好經典，比較香甜，當小甜品一流。每日出爐時間係10:30/12:30/2:30/4:30/6:30，想食到最新鮮嘅可以跟呢個時間去買，$7一個又唔洗排隊，性價比非常高，絕對超值。…查看更多

🍖傳說中既神級叉燒🍖-如果鍾意食叉燒嘅朋友，相信一定有聽過新桂香既叉燒，見好多人對佢既評價好兩極，按奈唔到自己嘅好奇心，特登搵日放假入咗柴灣試😜。為咗食到最靚嘅叉燒，特登有打過電話去問佢哋嘅出爐時間😆，有一輪就4pm出爐，3:50分去到店內基本冇叉燒賣，係門口行嚟行去等多一陣，就見到叉燒一份一份掛上去😆，正！即刻同叔叔講要一份肥叉，叔叔都有好有善咁樣提醒返，佢哋嘅肥叉係真係九成肥個種。即刻要轉軚要半肥瘦燶邊😛，叉燒飯以飯盒黎講算係非常貴，盛惠$50一份，叉燒食落去幾有肉味，唔係醃到得返叉燒醬味個種，外層係好香蜜味，食落幾甜口，因為新鮮出爐嘅關係，而且部位比得非常靚，係真係完美嘅半肥瘦叉燒再加少許燶，所以個人覺得佢係相當唔錯。不過前提係，真係要食到出爐嘅，同埋你自己叫叉燒嘅時候要做返啱部位😆，但係如果你本身偏好食瘦叉燒嘅話，呢度就冇乜太大特別。…查看更多

🧊廣成冰室🧊一入黎感覺好似時光倒流咁，Menu上見證到好多幾十年前冰室獨有既飲品，例如牛肉汁、蓮子茶、鳳凰奶糊、榨檸汁等等，不過有得睇冇得叫既🥲。紅豆冰🫘🧊($27)紅豆冰雖然好多茶餐廳都有，但廣成喱杯紅豆冰既造型，放眼全香港，都係好獨特既😆，大半杯以上既紅豆加埋大大枝碎冰柱，正！飲落超多紅豆，好香甜，奶水反而少，一路食可以一路拮碎啲冰，感覺愈飲愈多🤣！牛肉通+雞蛋三文治+飲品($44)牛肉幾新鮮，湯底冇乜特別，就係舊式冰室個種鹹鹹地湯底🤣，雞蛋三文治幾驚喜因為真係好大份，蛋都係舊式做法，主要食蛋香，而唔係新式加好多奶偏滑蛋個種，麵包偏軟淋。菠蘿油($17)包唔係熱既，皮又唔算好脆，勝在牛油夠，普通質素啦。…查看更多

🧀精品Cafe。全港最愛卷蛋之一🧀第一次去既時候只係路過想坐坐，所以揀左間冇咁出名既上環cafe，貪佢夠靜坐得舒服，去到發現都有唔少熟客黎飲啡，就知佢既啡相當唔錯🤩。甜品就試左三款。Okinawa Milk Pudding🍮($62)食落奶味超濃郁，食落似好creamy既奶凍，淋埋黑糖上去反而多左層次冇咁膩。Sea Salt Cream Cheese Roll Cake🧀($70)係大大大推！外層蛋糕體好濕潤，中間唔係普通cream而係cream cheese，所以食落比一般卷蛋香好多，加埋焦糖脆脆就更正，食左兩啖之後忍唔住:唔該，我想要多份🤭。另外試左seasonal既焙茶味，食落偏清香，唔算好重茶味，幾輕盈，但就冇海鹽cream cheese咁一擊擊中個味蕾既feel😝。…查看更多

🥢紅磡新忠記🥢-每到晚市就人頭湧湧既打冷店😜，食物選擇超級多，連冬天必食嘅煲仔飯都係即叫即煲，雖然價錢唔算平，但係食物份量都幾大份，適合一大班人黎食。椒鹽鮮魷拼九肚魚（$168）可以話係必叫，識落同一般椒鹽系列嘅做法唔一樣，佢嘅外層喺一層比較偏硬嘅脆皮，而且調味好重手，食落好似食薯片咁🤣。肉類方面試左鹹香雞($248)同鵝片拼鵝肝（$288），雞肉幾紮實而且香口，鵝片滷得入味，唔會太韌，絕對收貨😌。沙茶牛肉芥蘭（$118）食落香口，有出奇地多牛肉，而且啲肉好厚身。日本南瓜排骨煲仔飯($188)本身心諗煲仔飯搞乜要咁貴，上枱發現係巨型煲仔飯😂，夠四個人食計返都ok既。煲仔飯會係餐廳門口即叫即煲，飯粒做得幾乾爽，配埋排骨喱個配搭永遠冇死😆。…查看更多

😍出色傳統小食😍雖然生菜魚肉、碗仔翅呢啲傳統港式小食，有時想食到好食既，其實都唔易🥺，深水埗既明發，見佢主打街邊小食，當然要黎試下！魚肉碗仔翅🐟（$26/大）心大心細唔知食邊樣，一定係黎一個兩溝😆，食碗仔翅個人黎講好驚個種落左超多生粉水，變左漿糊咁既質感😫。喱到既濃稠程度算係剛好，唔會太水，有湯羹既感覺，碗仔翅用新鮮瘦肉做湯，食得出唔係hea交貨，魚肉彈牙真係有鯪魚肉既味！枱面既辣菜甫好辛辣，味道唔算係好香，但係加幾粒嘅話去令到成碗都變辣左😂。煎鴛鴦餃🥟（$41）餃子煎得幾好，冇難，而且外皮焦香，真正嘅金黃色！上枱嘅時候仲係熱辣辣，餃子菜多肉少，食落去係偏清爽既。熱豆腐花◻️($11)最後老闆娘請我地食左碗豆腐花，食落的確出色，可以話係好好食！豆腐花見到佢一層一層，食落口感剛剛好，夠滑又香豆味，加埋黃糖，必定翻兜之選！…查看更多

🌶️佐敦正宗又抵食川菜🌶️-作為一個食辣重度愛好者，香港大部分既川菜都做得太淡口味😛，喱間食落做得惹味而唔會太油膩，幾有驚喜！水煮牛肉🐂($118)個湯汁係好濃厚，牛肉厚薄適中，食落好滑唔會鞋，香辣味十足，裡面仲有既寬粉，好出色！銷魂老壇酸菜魚🐟($238)酸菜魚做到酸辣平衡，微微有少少麻，而且魚肉好滑，同係大陸食到既好接近，一份夠曬四個人食，必叫之選！四川特色烤羊排🐑($198/小)羊味好重，部分帶肥既食落會比較嫩，其他既明顯會比較嚡，食落唔算係好川菜感覺，喱樣唔算太推薦。XO醬爆花菜🥦($88)特別喜歡係川菜館食椰菜花，因為佢哋永遠都係做到嗰種乾爽而辣辣地好惹味嘅感覺😛，食唔停系列！醬肉蒸水蛋🥚($68)滑滑既水蛋，加上惹味既肉醬，撈飯必點！…查看更多

🍚出色超有鑊氣小菜館🍚位於旺角既喱間小菜，大部分食客都係叔叔😆，小菜抵食又有鑊氣，而且開到好夜，適合食宵夜、遲收工去食飯😎。蜜餞鎮江骨($93)黑醋骨係店內招牌菜，一上枱時係超熱熱到咬唔到落去😂。食落外層好酥化，但肉係實在，醬汁偏稀但足夠掛汁，醋味經過烹煮變成香氣，鍾意酸甜口必點。番茄牛肉炒蛋($98)鮮茄味好出，牛肉嫩，不過蛋少左啲，但撈飯一流！香辣炒雞($88)雞肉雖然切得細，但炸過所以保持到外面微焦但入面係嫩，整體好濃味，香辣感十足。酸菜魚($138)魚一般唔洗試🫣，食酸菜魚都係要去返川菜餐廳。…查看更多