stupidmui的個人專頁

好耐冇食但馬屋，平時食開葵芳嗰間，今次去咗觀塘食。舖頭細好多逼好多，但都OK啦。星期四放工時間七點就去到，岩岩好唔使等位即刻入到，遲多步都要開始等位喇。一入到去就點咗「美肌鍋」，男朋友點「麻辣鍋」我食過咁多次覺得美肌鍋最鮮甜，鐘意呢度嘅其中一個原因，係有haagen dazs任食，每次未開始打邊爐已經忍唔住食一杯先，同埋呢度勝在有羽衣甘藍同好多菜揀，叫咗最平嘅「澳洲產長期穀飼牛放題套餐」$199 我覺得啲牛同豬已經算唔錯，雖然牛嘅油脂分佈碟碟唔同，但係整體上都算平均，唔會太肥即唔會淨係得肉，食物選擇冇其他任食火鍋咁多，但都乾淨新鮮多菜少加工食品，同埋每個種類有一樣止到口癮，特別推介佢嘅魚柳淥完係好滑嘅，飲品有無糖飲品、亦有汽水，仲有特調飲品可以自己斟。唯一缺點係每次食90分鐘都好趕，食得切火鍋唔太夠時間食雪糕，不過我都會繼續再黎打邊爐，整體都好高質…查看更多

細細個住九龍城已經成日經過大和堂，亦認得佢係《乾柴烈火》嘅拍攝地，事過境遷原本嘅藥店變成西式Cafe，所以終於抽到時間嚟試一試！【咖啡】冇特別研究開咖啡，叫咗個凍嘅【 Caffe Rose Latte】$54 ，玫瑰味唔算太香，咖啡味較重，亦唔會太甜啦。　【班尼迪蛋+煙三文魚】$78+$20班尼迪蛋一隻流心一隻過熟，但整體都幾好味，下面有一塊麥包喺底，份量細細但都夠飽。【希臘式乳酪燕麥片配鮮果】$78新鮮食材簡單做法，上面有少許蜜糖作調味，想健康又飽肚可以叫呢個。整體都係食環境多，閒日可以黎坐一坐，食物不過不失，算係城市中一個寧靜既休息好去處，欣賞佢保留返當時既掛牌同少少裝潢，但若果可以粉飾得再少啲保留多啲原舖嘅裝修會更好，因為歷史痕跡由時間浸出黎，重新粉飾過就失去咗時光嘅味道。…查看更多

見呢度有自助沙律扒，可以滿足朋友想食肉、我想食菜嘅願望，揀咗喺度食Dinner。一入去發現冇乜人，星期日竟然唔使等位都覺得奇怪。去之前喺openrice睇每個主食都係$200-400左右，同普通唔係好高級嘅西餐廳差唔多啦，叫咗主食就可以沙律任食，所以決定一試，叫咗以下食物：照燒特級厚切牛小排 $268 ||原來即係原條牛仔骨，不過我都幾鐘意食牛仔骨嘅，但望清潔原來兩嚿都好肥！其中一嚿肥到直頭冇肉食唔到，仲要俾你揀幾多成熟，我揀咗五成最後肥肉難分8oz入面超過一半都係肥膏都要成 $268！？？？離晒譜！食咗一半就放棄，油到個胃都好唔舒服。野菌燒汁肉眼牛扒 $288 ||呢個冇得揀熟度，但黎到起碼唔似牛小排咁肥叫做似返嚿牛肉！不過都唔係好食…肉質奇怪冇牛味，有幾粒菇做汁，算叫做好少少。炭燒厚切蘋果木煙豬腩 $228 ||一條豬腩肉，好食過上面兩個牛，味道唔錯，Waiter話係佢哋廚房特製嘅，切落都好厚豬，有一小層肥肉，但都均勻唔難咬，質感爽脆，呢個可以俾 7/10自助沙律Bar ||以為佢係因為沙律任食所以喺主食收得咁貴平衡返啦，原來沙律bar比起Mr.steak少好多嘢，所有菜都冇調味，但有6款以上沙律汁自己落，只有幾款菜：羽衣甘藍、芝士栗米、羅馬生菜、雜菜、焗蕃茄等等有火腿同芝士粒、提子乾、芝士碎俾大家自己配搭，菜算新鮮，但種類唔多。.熱食有薯條及炸雞，係充滿油既炸物，即係一食落口淨係食到油味同吸得太多油而硬咗嗰隻，未食過炸物都可以咁！難！食！厲害厲害。不過值得一讚個蘑菇湯係好好飲嘅，比起之前Simply life飲過更好飲，菇份量夠但唔會太多好夠味，同水既比例剛剛好，飲落少少creamy但唔會太「結」，所以飲咗兩三碗，但飲極都飲唔夠牛扒個價啦我冇食過塊牛咁濟，真係飲湯飽。整體黎講即係我唔會再黎，食物太差，唔知係我揀錯款定點喇。希望佢收得呢個價就用心少少做好，講真都唔算係好平，其他餐廳同佢差唔多價啲質素可以好佢好多，食完終於明白點解星期日呢間舖唔使等位啦。…查看更多

喺日本食過一次釜飯，有啲掛住，醒起之前經過登龍街有一間，一直好想食，所以嗰晚就入咗去食啦！.前菜 || 一場嚟到當然食釜飯，但佢亦有冷熱喬麥麵揀，留返下次再試首先嚟咗前菜，一盆有五款小菜！最好食係茶碗蒸，好滑好好味，唔會好水。仲有少蟹子、黑松露、蟹飲蝦肉做配料，另外豆腐亦好好味，但其他配料較特別，唔太岩我口味，但都相當有日本風味。.釜飯 || 男朋友揀咗【月見和牛釜飯】$198 價錢略貴，但配料同飯都算多，可以接受！和牛牛味不算重但好香，肉質唔會韌，同埋食極都仲有飯同肉，一個男人要飽都冇難度。而我就揀咗【明太子赤雞釜飯】$188比想象中更好食，好香雞油味，明太子撈勻於飯內更顯鮮味，最值得一讚係佢哋嘅鮮味都係來自食材，唔會有太多額外嘅化學調味味。.環境 || 店舖唔大坐得較逼，廁所需要到外面小巷，但食物好味，冬天嚟食個暖笠笠飯就更加正喇。…查看更多

喺Instagram見到朋友Tag呢間嘅打邊爐，望落幾正，所以去咗荃灣呢間試一試！.火鍋湯底 || 【花雕醉甲鍋】 $98好鮮甜！兩個人食，食極都仲有花甲，多到淨係食花甲都飽！酒味夠香，帶到花甲嘅鮮味～少少辣，完全啱晒我口味！.牛肉 || 好多選擇，老實講唔係好識揀，都係靠店員介紹，平均價錢都係 $48 左右價錢合理，份量適中！唔算多亦唔算少，兩個人食啱啱好有叫【安格斯橫隔肌】、【滑尾龍】等等。肉質各有不同，但整體都好滑唔難咬，牛味不錯。.其他食物 || 有【羽衣甘藍】！非常新鮮！亦唔係間間火鍋店都有，超有營養！用醉甲湯淥吸晒鮮味簡直一流！亦叫咗【雙拼牛肉餃】，麻辣味好特別，店員話係佢哋自製嘅，冇味精好好食。.整體 || 裝修以屋邨作藍本，好有特色，啱晒打卡。亦有祕製牛肉汁可取代豉油，更突顯到牛肉鮮味。呢一間有機會人再Encore…查看更多