本人自問對食物入口要求不算高，但呢間食店真係我暫時幫襯過最求其嗱西的一間，不得不起OpenRice 呢個平台寫出我生平第一次的食評！首先，兩位女店員兼廚師服務態度極之惡劣，差到無輪！一入去第一件事就同個客講無呢樣無果樣，客人坐都未坐低！語氣又差，多次強調無乜無乜！客人點餐到上到柯打，需時大約二十分鐘！呢個唔係重點，重點係我同太太點咗兩個麻醬撈麵！你用二十分鐘的時間上咗一個幼稚園學生的作品俾我食！一粒丸加湯，兩片連皮都未刨乾淨有根的白蘿白加兩款醬的所謂混醬撈麵，d麵又烚過龍糊口的。再加上果Pat杰撻撻的麻醬，入口的感覺簡直一絕，絕對難食！份量又小，咁㗎質素夠膽死收人55蚊一份，15蚊我都嫌俾多你。開頭諗住佢用二十分鐘整一個冷盤撈的麵食，一定係誠意之作。結果用咗法蘭西餐出品的時間，做咗個幼稚園水平的垃圾餐！真係驚喜。無餐飲跟另外買，餐飲叫做正常羅，一人消費八十幾，得啖氣！越食就越氣，雖然八十幾蚊唔算什麼錢，但你咁的水平就唔好出嚟攞檔啦！PS:果兩位女店員仲要起到用粗口對話幫你送飯之餘，仲大大力將客人點完餐個餐牌扔在枱面上，我同太太當時真係驚咗一驚，起呢度幫襯絕對帶俾你驚喜！如果各位想感受一下驚喜的，不妨到呢間店試下！絕對有驚喜的感覺！
…查看更多
…查看更多
