琴日去左間朋友介紹試咗間超有特色嘅越南餐廳，老闆嘅 "阿媽家姐", 每道菜都玩到出神入化，味道層次豐富到食完仲回味緊！款款有亮點👇**1. 炭燒八爪魚沙律** 八爪魚燒到外層微脆，帶住好突出嘅炭燒香，咬落彈牙得嚟又唔韌！沙律汁酸酸甜甜，夾埋d 沙律菜，清新得嚟又開胃，作為前菜簡直無得輸！**2. 越式炒洋蔥蟶子** 蟶子大大隻，炒得剛好唔會老，最正係嗰啲炒洋蔥！洋蔥吸盡咗越式香料同蟶子鮮味，甜得嚟帶少少焦香，原本唔食洋蔥嘅朋友仔，最後都食咗，惹味到想encore多碟！**3. 鹹蛋黃鮑魚** 鮑魚煮到乾身有嚼勁，但一啲都唔韌！表面沾滿金黃鹹蛋黃碎，鹹香濃郁得嚟又唔會蓋過鮑魚本身嘅鮮味，鮑魚肝澀澀哋嘅味原來同鹹蛋黃碎勁夾，送酒一流！**4. 越式圓球肉餅** 外型得意似乒乓波，煎到外皮香脆，一切開入面竟然超級鬆化！圓形肉球去煎仲可以咁鬆化，真係第一次食到！ 完全唔使點像都唔覺得漏 ～**5. 脆漿炸雞翼** 個脆漿真係無得頂！薄得嚟超脆，咬落「咔嚓」聲，入面雞肉依然嫩滑多汁！醃得好入味，唔使點醬已經夠晒正，絕對係邪惡之選！**6. 椰青蟹煲** 湯底用原個椰青水熬製，清甜到不得了！最正係入面嘅蛋花，煮到有少少蟹蓋蒸蛋嘅感覺，令成個湯口感更加綿密。蟹肉鮮甜，飲完成個胃暖笠笠，完美作結！呢間越南菜絕對係高質之選，傳統中帶創意，每道菜都有驚喜。如果鍾意濃味同炭火香，一定要試八爪魚同鹹蛋黃鮑魚；想清淡啲就揀椰青蟹煲！…查看更多
