sisi_room2004的個人專頁

嘩！係真唔係呀！ 48蚊食到大大塊花膠？！元朗多好野食不嬲都知，但呢間小店最近成為元朗區既新寵！睇黎一定係有佢既特別之處～今日黎到元朗，就一於試下佢既真偽！晏晝4點半黎到，店入面客人只係半成滿，好彩唔洗排隊～因為得一個人既關係，所以只係叫左花膠蠔汁撈麵！拿拿拿！ 實物與餐牌竟然係相符嫁😍😍😍完全唔係果句「圖片只供參考」😂花菇有4大舊，仲要厚過我手指兩倍呀！絕無欺場！到主角花膠啦，有4大塊😍相信大家最想知個味道！本人覺得花膠有一半炆得唔太夠，有一半就好林好好味！（不過人人口味唔同，有人鍾意爽d，有人鍾意林d) 仲有滿滿既膠質🤤 花菇都好入味!唔好睇佢好似細細碟咁，其實食哂係好飽！我仲好欣賞店家既餐具🍴好有質感！完全係襯哂花膠～聽聞遲下會研究海蔘做既菜式，大家可以期待下😋😋😋…查看更多

平日既下午，訓到點幾鐘落樓下食個late lunch，係OpenRice 意外發現呢間新開既餐廳，專門食burger🍔🍔🍔 二話不說一於去試下！去到正值午餐時間，餐廳已經坐滿哂人，好彩仲有兩個位，但要同人搭枱。我地坐近廚房出菜位，好多次都俾出菜既叮叮聲🛎嚇親，睇黎廚師有d燥底，勁大力拍個鐘仔🛎，認為需要改善🙁 始終出菜位果邊都有兩枱客，實在影響心情。講返入面餐廳環境，睇得出老闆有花過心思設計。一排長既bar枱位，就算一個人黎食飯都唔尷尬，最岩慢慢飲下野或者同朋友傾下計。牆上掛有一幅世界地圖🗺️，學下英文都唔錯😂 有塊黑板仔寫左有咩食物推介，仲有磁石板貼下員工既相。餐廳待應全部都係後生仔女，做野快手醒目！途中問個待應拎紙巾都即刻俾到我，仲要雙手奉上👍🏻餐飲選了抺茶鮮奶，外型拎分，但味道扣哂分。一飲淡到呢⋯⋯唔知自己飲緊咩，完全冇抺茶味，奶味都不足，好似俾人溝到淡哂咁。仲要杯野已經唔多冰，如果d冰溶哂會係咩味👎🏻👎🏻👎🏻荔枝玫瑰花茶確實有d失望，本以為係自家配方沖配，但原來只係用上馬來西亞品牌BOH既茶包，每杯仲要加8蚊。味道是正常茶包味，沒什麼好說🤷🏻‍♀️菜單選擇其實不多，主打都係🍔所以叫左個煙薰醬烤牛肉漢堡加薯條沙津 $84上枱熱辣辣，特別鍾意入面既牛肉漢堡，牛味濃又夠惹味好juicy👍🏻 煙肉係厚切！厚切！厚切呀！絕對唔係薄得黎仲要烤到又硬又乾果種！沙津菜已經用沙津醋混好左，食落酸酸甜甜好開胃。薯條新鮮即炸yummy! 特別喜歡自家制，每一口都係誠意分所在 💯忌廉青醬鮮蝦天使麵 $58相比之下，呢碟天使麵就失色不小......蝦食到有雪味，幸好夠爽口。天使麵太林，一夾就爛，煮過了火喉。完全食唔出青醬汁既味，反而橄欖油多到好似油浸天使麵咁🙁食左幾啖已經唔想食埋單158兩個人，價錢小貴。建議大家可以只試🍔系列👍🏻…查看更多

過江龍The Cheesecake Factory 聞名以久，排隊起碼排一兩個鐘先有得食。今日趁著係平日4、5點左右，下午茶時間應該冇咩人就走去試下，反正我目標只係cheese cake。一黎到果然唔需要排隊，直接就坐。眼見在場起碼8成枱都冇人，如果大家想試又唔想排隊，可以搵呢d鐘數過黎。兩個人坐4人卡位，坐位寬敞舒適乾淨。原創芝士蛋糕好重芝士味，愛食芝士既你一定會鍾意。旁邊既奶油忌廉可以減低油膩感，食多幾啖都冇問題！30週年紀念朱古力芝士蛋糕，滿口都係芝士同朱古力味，係唔同既味蕾享受，濃郁細膩。一層層咁食就可以品嘗芝士或者朱古力既獨特風味😋士多啤梨鮮果沙冰，由士多啤梨、橙、菠蘿汁、椰子汁、香蕉混合而成。味道清新不甜膩，配合蛋糕一齊食簡直係一種享受☺️蛋糕份量係外國size，建議兩人可share一件。我地兩人一人一件，食到中途已經開始頂唔順，始終係cheese cake，甜同埋易膩。我地唔想浪費頂硬上，始終消滅哂😂洗手間亦都好整潔衛生，廁格空間感十足，用了香薰辟味。捨棄抺手紙，改用乾手機，夠環保！👍🏻下次會想再黎試下主菜，見隔離枱都有叫，而且份量好大碟！…查看更多

Cafe位於工廈入面，比較隱秘。由火車站行過去都有一段距離，所以我地選擇搭的士入去，直接係工廈門口落車，搭𨋢上一樓，沿指示就可以搵到。星期二的下午2點半入座，除了我們就只有另一枱客人，完全是包場的感覺😸我們選擇了靠窗邊的梳化位。睇過之前既食評，呢度必點既係蒲燒鰻魚蛋包飯同埋威寧頓扒。但威寧頓扒已經冇再賣，唯有轉戰紐西蘭肉眼牛扒，要左7成熟配黑椒汁，另外叫左杯焦糖脆脆咖啡冰沙，每份餐都會配餐包同羅宋湯。餐包上枱係凍既，餐湯都唔夠熱，有小小失望。但幸好咬落軟綿綿，配埋足料羅宋湯，挽回一點分數。冰沙上面既焦糖脆脆好正，好似食緊叮叮糖咁，咖啡同冰沙比例岩岩好。但脆脆要趁早食，浸耐左會變林，影響口感。出面比較小見呢款飲品，建議可以一試，相信你會喜歡。先黎既主菜係蒲燒鰻魚蛋包飯，份量十足，相信用左起碼兩三隻蛋。先食一啖蛋，炒得好滑，但食得出有陣油味，相信落左唔小油去炒，確保蛋夠滑唔易乾。輪到鰻魚，呢個價錢都俾到咁大條認真唔錯。鰻魚無骨值得一讚，而醬汁調配都得宜，唔會一味死咸。飯都用左醬汁先炒再上碟，所以每一啖都好滋味，心思位加分💯一啖滑蛋一啖飯一啖鰻魚，連我咁細食都食得哂成碟👅之後上埋個肉眼扒，意粉軟硬適中，個白汁都好creamy好正。塊扒都大塊，但可能叫7成所以有d老，肉味唔夠，中間筋位都比較多，食食下好似食緊擦膠咁😅下次應該唔會再叫扒🙄由於cafe係工廈入面，所以唔好要求洗手間有裝修或者同餐廳內裡格調一樣。要去洗手間就要用返同層既工廈洗手間，介意洗手間清潔程度就忍忍先啦😉總結呢間cafe值得一去再去。繁忙時段過後環境寧靜冇咩客，拍拖或者一班朋友想坐好耐吹水又得，侍應有禮笑容親切，價格親民。…查看更多

細細個已經聽過明星海鮮舫，係香港其中一個有特色既地方，因為佢係城門河旁邊，遠睇就好似一艘船咁，可以係船上一邊用餐，一邊欣賞河畔美景。今日終於得償所願，晨早9點去飲早茶。係大門口望入去，感覺係好舊，畢竟始終都有十幾年既歷史。開頭以為呢度所有食物應該會好貴，但又唔係喎！早市最平11.8就有交易，仲有優惠雙併點心，價格同出面其他茶樓差唔多。可能星期一平日，茶客比較小既關係，只係開左一樓茗茶，二同三樓都冇開。呢度早茶應該都係做開街坊生意，本身諗住咁早應該有窗口位坐，可以望住城門河嘆茶，點知已經坐滿哂客不過唔緊要啦～試下食物水準先一行兩人，等侍應執好左枱我地就坐底，點知一睇⋯d碗碟崩既，再唔係就污糟既⋯仲要真係崩得好離譜⋯唯有叫侍應幫我地換過套⋯但換既只係換套冇咁崩⋯其實崩到咁都真係唔應該仲拎出黎招呼客人，始終危險，有機會𠝹到手，或者用碗食野會𠝹到口，特別係在場有好多公公婆婆飲早茶。而之後叫既點心，當然個碟或者碗都係崩既。希望海鮮舫可以改善下呢點黎到食物方面牛肉球夠大粒彈牙，食落新鮮，加埋喼汁，好味呀！豉汁鳳爪，個蒸籠好大⋯賣相一般⋯一上枱d汁已經飛到成個碟都係⋯味道不過不失，合格。流沙奶黃包，呢個真係幾期待會流心！點知一開⋯說好的流心呢？？只係普通既奶黃包，而且奶黃得好小⋯失望炸兩，男友表示油炸鬼夠脆，幾好食，但唔知點解咁快凍左。上湯鮮竹卷，食落一d油膩感都冇，好清新，個湯好鮮甜好好飲，底下放左兩塊白蘿蔔，鮮甜但有渣。蝦餃，每粒都有起碼兩隻蝦仁，用料足，食落爽口，冇霉味，唔錯唔錯！豬膶併滑牛粥，牛肉係鞋既，有根⋯豬膶唔爽⋯差⋯洗手間環境一般，空間算大，廁格數量足夠。但宜注意清潔打掃，廁格牆身滿滿塵埃，廁板清潔液也是空的，抽氣系統既隔塵網都堆滿哂塵。兩人埋單120蚊左右，食物質素一般，但勝在有河景搭配。…查看更多