agnes_cat的個人專頁

曾經食過呢間既牛肉麵覺得味道唔錯所以再黎。見到餐牌有蔥油雞肉飯，就諗起好好味既台灣雞肉飯，於是試下。黎到既時候有少少驚喜，無諗過有三小食同埋湯。不過碗飯既賣相麻麻，食落去雞肉既口感完全唔係記憶中既台灣雞肉飯，味道好淡，上面既蔥油又係無味，又好dry。唯一有味既係三個小食，因為佢地本身就有味既食物。而個湯就係落左好多胡椒粉既湯，得幾粒好細粒既冬瓜最慘係食到一半要人轉位讓俾新食客坐，之後發生左不愉快事件，因為係新食客好有問題，唔關食評事唔寫了。…查看更多

最後放工經過發現左呢間新開既上海野食，餐廳裝修好新潮好靚，以為會好貴，點知見到個價錢跌晒眼鏡，咁平？！（下午茶）於是就入左去試，一試難忘，已經食左4次喇！第一次食酸菜魚菜飯，相之前post左唔重覆喇。酸菜魚有好多塊，有薯粉係底，不過就超級辣，就咁食魚幾正，食晒啲飯都仲有魚繼續食，可惜我食唔到咁辣，薯粉就放棄了，同埋酸菜唔多。第二次係食呢個鎮江小排骨 配 蘇式拉麵，呢個真係一試難忘，食完再繼續食。個蘇式拉麵雖然只係普通淨麵，但係好好味，雞粉味湯底，麵軟硬適中，仲有買少見少既菜，食到停唔到口，而個小排骨都好正，唔會太甜，味道剛剛好又有咬口，不過就因為有咬口所以老人家就可能未必食到。今次就叫左嫩雞煨麵，比想像中大碗，不過雞肉同菜就比想像中少，但係其實食晒之後係好飽。由於係煨麵，所以都等左一陣，出黎既時候超級熱，聞到好香但係食唔到，要放涼一陣間，食落去又係好正，個湯比起上次個淨麵湯濃好多，好creamy，愈食愈好食，食下食下又食晒成碗。剛好坐到風口位，食完好暖身。最後一定要介紹個餐飲 桂圓紅棗茶。第一眼見到覺得好癲，點可能咁多料，慢慢食下紅棗杞子桂圓，成件事好健康！另外就係想話唔知點解飲左呢杯野嗰晚特別好訓🧐餐廳啲位好闊落，完全唔迫，坐得舒服。有時見啲街坊同員工有講有笑，好親切。另外就係有次個疑似老闆問我覺得味道點，即刻加分。呢個時世開咁大間餐廳，仲要價錢親民，仲要有heart，值得讚！我以後一定成日黎…查看更多

每次行過呢間都好似好迫好多人食，見招牌既野食好似好正氣，就試下佢啦。位係要等，好彩早黎，好快有位。格局係舊式粉麵鋪，唔好期望坐得舒服，位係有啲迫，但野食先係重點！叫左個招牌黄酒清遠鷄飯，送紫菜湯。大大碗黃酒雞，份量足，料都好足，雞好入味，送飯一流！紫菜湯都唔差。另外同事叫左個牛腩飯都相當足料，最讚係問可唔可以加飯，職員話當然可以，好樂意幫你加飯，唔計較，有人情味！當然唔係叫你狂加！唔知點解唔係好多好評，但我真心覺得好食，會再去，而且感覺都係養生正氣。呢啲舊式粉麵鋪，預咗係坐得唔太舒服同埋食完就讓個位俾人，但野食就真係無得輸！…查看更多

今日突然想食海南雞，平時食開間餐廳full左，去左隔離街想食返之前勁好食嗰間海南雞先知佢執左，唯有食瓊媽媽。點解用唯有呢，係因為幾年前食過一次，覺得佢啲雞肉肉質好差，之後都無再食，但係得一個鐘食飯執唔到搵第二間喇，唯有俾多次機會瓊媽媽啦。懶人唔想食骨所以都係叫左無骨海南雞，揀左菜飯好似好健康。賣相唔差架，份量都好足，可惜既係佢既雞肉肉質好差，完全唔滑，又鞋又難咬，同幾偉前一鬼樣，個雞肉痴牙，仲搞到流牙血！以後唔會再食！不過呢，講味道，雞味都還好，個菜飯其實唔錯，又健康，另外個湯更加想讚，好甜好好味，飲完無口乾！為左個湯同菜飯，應該下次再試下其他餸。海南雞就不了！…查看更多

最近發現呢間新開既韓國小店，睇到都吸引，昨日試左佢個吞拿魚泡菜kimbap 相當唔錯，今日又再黎試其他味。牛烤肉kimbap 配啤梨汁？！賣相好靚，細細盒但其實份量都唔細，做lunch 剛剛好。啲配料排得好整齊，一啖一件係大舊左小小，但超滿足！！另外啤梨汁甜甜地有少少啤梨肉？！唔錯！一路食一路食，聽住店員之間用韓文，客人入黎講英文，成件事好似去左轉韓國咁，鋪位細細，只係坐到幾個人，所以都好多外賣客。一落食就望住個menu，見住人地叫啲咩又心思思下次再食。結果，我放工又黎左！！因為念念不忘嗰粒walnut cake 好似好吸引！就係呢個櫃，好多細細粒叫walnut cake既野，唔知咩黎但係好似好吸引好想試，最後買左3粒 $25。有3隻味：紅豆、蕃薯、黑芝麻。誤打誤撞我買左一粒紅豆兩粒蕃薯，有個細紙袋裝住，店員雙手俾我，好似韓劇咁！拎左去海邊慢慢嘆！拎到咁遠以為會淋左唔好食，但係一咬落去就超正！入面有粒好脆既核桃，超滿既紅豆蓉同蕃薯蓉，外皮仲有少少口感，第一次食呢樣野，真係好得一定要再食！已經返唔到轉頭個人中意紅豆蓉既walnut cake 呢間韓國野我以後都會成日黎難得有好野食！…查看更多

現在灣仔返工，公司十分刻薄，食飯時間只有一小時，遲到早走要記名。寫字樓等𨋢搭𨋢層層停咁又無左10分鐘，所以食lunch既地方不能遠。只能去同公司一條馬路之隔既廈門街食，最近見到呢間The Bottle & Steak新開，上openrice search過佢西環既分店好似唔錯，於是膽粗粗試下啦。一落𨋢就衝過黎門口望望餐牌，見同分店一樣，於是就入去啦。我係第一個客，呢度先點餐揀野飲俾錢之後會安排入座。野飲可以加錢轉湯或者自己去雪櫃揀梳打水。野食我叫左個慢煮雞，本身叫薯條但佢可能聽錯最後變左薯蓉。點完餐就上左二樓等食。第一個客先見到既整齊吉位，我食完既時候係full house。由於每日lunch都好趕，的確做好最壞打算幾點未食得就唔食都要走，不過當然無咁既事啦。感覺上少少耐，不過就係等左15分鐘囉！由於我係第一個客，整先黎先要15分鐘，都係可以接受既。不過人多又唔係第一個客就可能未必食呢間，係有擔心食唔切。講返食物落單既時候拎左檸檬梳打等左15分鐘到了！慢煮雞！隻碟有啲頹，即棄既，可能新開無人洗碗。而味道就好好👍🏻香草包算係我最中意既包之一，好難得食到呢個味既包，好開心🥳雞肉就係期望中既味道，就係慢煮雞胸味，雞下面有薯蓉，本身係叫薯條但最後黎左薯蓉先發現佢個薯蓉唔錯bo。至於啲菜，就正常味，令成個餐好似好balance咁。食完覺得無咩罪惡感，因為整體感覺個餐斬算健康既。呢間係值得再黎食既，不過要夠早，出餐需要少少時間。…查看更多

曾經在北角搭車見過呢間「那個」，由於個名有點兒那個，所以灣仔見到就認到。覺得開得分店應該都唔錯，見佢話試業就試下啦。結果我係錯既，有分店都可以係唔好食。首先係價錢，唔平架，$70-$80 一個麵仲要無野飲跟餐。今次食左花枝麵同埋嘉義雞肉拌麵。花枝麵都有5粒花枝，但係其實只係平時既普通花枝，無特別，個湯既古古怪怪，只能夠講唔岩我口味，可能係台南味啦，我未去過台南我唔識。至於呢個嘉義雞肉拌麵，我就有資格講喇，因為我真係去過嘉義食過佢地既雞肉飯。呢隻雞肉味最多只可以叫雞肉拌麵，叫嘉義雞肉拌麵就實在太過份，嘉義雞肉都唔係呢個口感，無嘉義都可以有7分，但講明係嘉義雞肉只有0分。嘉義雞肉絕對唔會係咁既！最後要俾差評既就係野飲，未飲過咁難飲既奶茶。整體來講，員工態度唔錯，價錢偏貴，食物好一般，野飲係難飲。不過就見佢仲係試業，比個中評佢啦，有好大進步空間。不過我本人就會永久blacklist佢，就當係口味唔岩。…查看更多

之前在尖沙咀返工諗過去食lunch，但係超勁多人一直無去試，依家發現灣仔有分店，依家灣仔放工就一於去試下。一入門口就係韓國人招呼，但唔洗驚，因為係電話落單，同埋入面有員工係香港人黎。入去坐低就會獲得泡菜一小碟，個人覺得個泡菜幾好味，又唔會好辣，岩岩好。由於晏晝超多人，所以都對佢抱有期望。期望愈大失望愈大，因為餐廳名係自家制韓國刀削麵，所以覺得麵一定係正野。叫左個花蛤刀削麵，無期望既咁好食，味道唔差，但又唔係話超好味。個麵條既質地有少少似辛辣麵再煙韌少少，粗過辛辣麵咁，都唔錯既，個湯有紫菜蛋絲都幾好，個花蛤就無menu咁多，好細粒，無咩特別。另外叫左個雙拼餃子，個人覺得係必食！超大粒，最正係咬落去啖啖肉又juicy豬肉餃同泡菜餃，個人比較中意豬肉餃，食過會想再食。而泡菜餃就覺得個辣油可以重手左少少。最後仲叫左個五花肉泡菜煎餅，見到泡菜煎餅真係忍唔到口，煎得脆脆口，又唔算熱氣，真心推介，會想繼續食呀。總結：麵就無咩特別，餃子好好味，煎餅都好好味，下次再黎食過。…查看更多

星期日既太古城想食野只有等位同埋等位，經過見到呢間唔洗等，價錢還可接受，就入去try try。 點知無諗過真係try，講緊既係原來佢新開試業緊入到去裝修幾靚，好多色彩，有個講英文既靚仔黎帶位。坐低見到餐牌先知試業中，岩晒啦，我中意挑戰新餐廳本來係門口係見有lunch set先入黎，點知入到去坐低無lunch set menu，原來星期一至五先有set，sosad。落單後，好快有一籃蝦片無諗過會有蝦片食，仲要都唔少，唔知係咪試業先有，有就食啦，幾脆幾好食泰式鮮蝦豆腐炒金邊粉 $88循例都係叫左我中意食既炒金邊粉，好欣賞佢加左豆腐，好好味個粉就正常既炒金邊粉味啦，唔係特別驚喜，略嫌覺得個粉可以煮耐少少，淋多少少就perfect。另外有啲花生同辣椒粉係旁邊，值得一提係個辣椒粉超勁辣，唔食得辣就唔好撈咁多喇。整體份量我覺得可以多多少少。泰式雞肉豉油炒河 $78另外叫左餐牌最平既炒河，個味道唔錯，個豉油味無諗過可以咁好味，雞肉都好入味，如果有下次再黎，我會想食呢個炒粉但美中不足係個菜，唔夠淋，可以煮耐少少會好啲。份量黎講都係偏少。無set所以野飲係散叫，我飲凍檸茶，唔錯bo，茶香加埋唔苦既檸檬另外佢仲好有心有個顧客意見表，會想做好既餐廳，俾心機呀總結，整體來講味道唔錯既，野食可以煮耐少少，覺得少少偏生。份量多少少會更好，不過我見隔離食飯係好大碟既，希望粉類多返少少。蝦片係欣賞既座位舒適，夠空間感可以有機會retry既餐廳以下係餐牌：…查看更多

次次經過都勁多人排隊，網上見過話好好食。今日經過第一次既時候見到無人排，心諗係咪可以唔排隊試喇終於，點知原來有個牌寫住蛋撻賣晒。。結果我今日第二次經過既時候見到有人龍喇，不過個賣晒牌仲健在，到底仲有冇呢。。？原來有寫出爐時間。由於見條隊只係去到一半，唔好理，排左先啦。排下排，職員突然間話蛋撻得返一盤，後面既人可能無。😱氣氛即刻好緊張，前面個呀姨望住我話希望有啦。排到呢度仲有20個，安全喇！！終於俾我排到喇！最後買左3個。同港式蛋撻唔同，佢呢個皮超厚。咬落去其實蛋係好少，成件以酥皮主打，好脆好脆，第一次食咁脆既酥皮，真心正呀。蛋就甜甜地似葡撻。下次有機會希望再食啦，我對佢其他酥都有興趣🥰不過如果要排好長就未必了。…查看更多

健康工房平時有券得閒就會拎支茶飲好方便，但佢既餐廳就比較少見。呢間開係康怡Aeon 一個靜靜地既位，平時行過拎完茶就走，不過有次發現有人係入面食緊野，望下望下職員就話可以望下餐牌睇下岩唔岩食，於是我一望！！係菇！！就坐低左，自此之後突然好想食菇就會黎呢度！本人係菇控，特別中意冬菇味，呢碗以菇為主角既烏冬，真係可以無限loop。❤️松茸珍菌三絲素煨麵 $60烏冬上面放左一堆菇🤤睇到已經好想食，菇🍄蚊到好淋，亦好入味，佢個汁充滿菇味，食食下成個麵既湯都好菇，中意菇，特別係冬菇既人一定會中意食🤤另外佢有個少少辣既菜脯，放晒落去撈住食，少少辣又有啲咬口，口感脆脆地同個麵一齊食真心正！另一碗係湯，以為會有啲料食下，點知得個湯，有少少失望，下次淨係食麵就夠晒🤤…查看更多

每次路過都會俾呢間餐廳既門面吸引，今次終於要黎try try。一入門口見到好大個空間，有個打卡牆就知間野咩料啦，應該質素有返咁上下先可以留咁大個位唔放多幾張台。幸運地我地被安排左入去最入既魚缸房，其實幾靚既，而且靜靜地，不過就收唔到電話，店員都好貼心提我地可以用佢地既WiFi。由於我個人好鍾意食pizza，而且係lunch set 見pizza有粒星星，就揀左pizza。首先上既係餐湯，大蒜薯仔湯，個湯好滑，有薯仔味，蒜味就唔覺，味道唔錯。之後就中伏了，原來pizza 只係咁？！個樣係好適合打卡，但作為一個lunch set，點解可以咁細塊。。sosad 大約15cm X 15cm 既餅乾，切成四小塊，滿滿芝士既每小塊上面放左一塊黑毛豬火腿，加一小條火箭菜，上面要淋左啲黑醋。味道都唔差既，但係lunch 黎講個分量實在係好失望。我相信佢個份量加多兩小塊成件事會開心好多。眼見其他同事都好大碟意粉，好大份Burger 薯條，而我眼前就係四塊好簿既餅仔。。好傷心😢Anyway，最後黎左杯凍檸茶，好大杯，似乎係知我唔夠飽要我飲茶飽。整體黎講，味道還好，但係唔會想食下次囉。成個set $86 +$3 凍飲，食唔飽，又有限時，性價比極低！…查看更多

平時無飲開，不過昨日行過見到優惠，又有少少口渴，就心思思想試下。一望原來有幾樣野都做緊優惠，最後我揀左原價$42，現在優惠$34既芝士桑莓試下。無咩人買所以好快有得拎。比想像中大杯，一飲落去係雜莓沙冰既味，幾Fresh幾足料，味道唔錯。如果大熱天時拎住係條街度飲應該幾正，不過今日少涼既天氣就有啲啲凍冰冰。個芝士奶蓋就比例上少左啲，支飲管放左入去基本上只係飲到莓冰，芝士就keep住係最頂。試過想用支飲管搞兩吓，但結果啲芝士係個飲管口漏左出黎，可能我應該一開始就打開搞搞先🌝Anyway，最後飲左大半個鐘終於飲到底喇yeah，不過呢芝士就愈來愈少，因為芝士痴住左杯既上半，無流落最底，最後用左最底個少少莓冰搞埋個少少芝士，其實好好味，個芝士味係好正，可惜來得太遲🥲如果夏天又路過我應該都會想再飲。…查看更多

海家小品係好好味但唔容易食到既餐廳，事關佢唔做晚市。今日難得放假有野做，終於試到佢既早餐。早餐其實同茶餐廳既早餐都大同小異，都係沙嗲牛肉麵，火腿通粉呢啲再配個牛油方包煎蛋腸仔咁。今日叫左牛肉麵早餐 配餐肉煎蛋牛油方包$38親民價錢，份量滿足沙嗲牛肉麵係常見既餐，但要好食就唔容易。眼見湯底係奶白色既豬骨湯已經覺得好有誠意，牛肉夠軟唔會好硬，沙嗲汁都ok。另外影左張羅宋湯螺絲粉，好多蔬菜，好有誠意。整體價錢親民，坐得舒服，絕對有下次。…查看更多

其實我未去過韓國，亦唔識韓文，不過都幾中意睇韓劇，所以落單既時候，店員用韓文同你講應該係歡迎光臨？！總之就係韓劇入面會聽到嗰句，呢刻就覺得好似入左韓劇咁。由於係韓國人開，仲同我講韓文，雖然我聽唔明，但點都會加左少少分。呢間餐廳都算幾大間，每張台都好闊落，好適合一班人黎食，不過點餐就要出去點，點餐既時候會問你坐邊張台，咁點完俾晒錢就可以坐低等食。今次叫左泡菜炒飯，因為早兩日睇韓劇個主角煮左泡菜炒飯😂泡菜炒飯 + 凍檸茶 $75+$5個賣相唔錯，不過小食就得一碟仔泡菜，見到其他同事叫左其他餐係有三碟仔既，正常黎講食韓國嘢最少都應該係三小碟，可能泡菜炒飯唔算係正式一個餐🤔Anyway，最後我都係食唔晒，所以無咩關係，食唔晒係因為都幾大碟。味道係唔錯既，少少濕既炒飯，啖啖都係泡菜味，上面放左紫菜同煎蛋，唔算好豐富，不過係好味既。價錢黎講我個人覺得少少偏貴，但係最近係尖沙咀佐敦食多左野，就覺得呢區既餐廳都係偏貴，咁變相呢個韓國餐價錢就。。算啦。以下係餐牌，其實都有好多唔同野食，其他同事都叫左唔同既野，目測係唔錯既，希望下次可以試其他啦。不過美中不足係佢炸雞真係好貴，我想食炸雞但太貴喇，要食既話可能要一班人share比較化算😅…查看更多