eatfirstla的個人專頁

主食可以單點或者加$30轉做定食，有關東煮、味噌湯同飯，關東煮有竹輪、年糕福袋同埋蘿蔔，味噌湯入面仲有兩隻蜆，各樣食物加加埋埋成個餐即刻變到豐富得多！再加$10可以將白飯轉做貓飯、茶漬飯或者烏冬，貓飯即係加多咗柴魚片、紫菜、牛油同醬油去撈飯，是但一樣去撈飯已經會好食，加晒四樣就更加邪惡🍚主食嘅西京燒比目魚幾大塊，比目魚好滑，醃料好入味，旁邊仲有椰菜絲、玉子燒同埋漬物，食到中途可以食依啲解下膩🥗另外叫咗串燒鰻魚，可以揀白燒或者汁燒，白燒更能食到原來嘅油香…查看更多

青雪商店喺網上嘅討論度頗高，講起拉麵店嘅時候都會見人提起佢，所以一直都好想嚟試一試，店內有大約20個座位，座位之間距離足夠，以拉麵店嚟講坐得舒服👌雞白湯拉麵可以話係近來比較受歡迎嘅拉麵款式，好多拉麵店都有推出雞白湯，除此之外依度仲有蠔白湯、熟成醬油清湯等選擇，仲要可以免費加拉麵🍜今次試咗雞白湯拉麵，面頭打咗泡沫，湯底口感濃稠帶點漿口，湯色偏黃色，本身包一隻蛋同埋三款肉，有豬叉燒、雞胸、雞卷，食到少少煙燻味，至於麵條保留咗啲麥粒，口感彈牙！除咗拉麵，亦試咗醬油漬鮑魚同埋蠔，鮑魚係用咗六頭鮮鮑，所以幾大隻，肉質彈牙，蠔都好creamy🦪…查看更多

便當嘅選擇超多，有啲係豬肉、魚或者雞，有啲配刺身、卷物或者蛋糕，真係多到要慢慢比較一下！鹿屋便當有鹽燒鯖花魚、棒棒雞同三款刺身，鯖魚原條上，刺身有三文魚、帶子、有頭甜蝦，非常豐富🍱便當入面嘅咖哩飯比想像中好，揀咗少飯同埋汁另上，無諗過個咖哩入面竟然有好多蘿蔔粒薯仔粒，而唔係就咁得啲汁🍛套餐亦可以優惠價加配小食飲品，貫徹餐廳選擇豐富嘅作風，三文魚味噌湯係另外加嘅蟹棒蟹籽栗米沙律份量十足🥗7吋珍寶赤海蝦刺身幾大隻🦐依晚一路食一路見到有外賣員嚟攞外賣，所以應該頗受附近街坊嘅支持，係外賣平台上嘅好選擇～…查看更多

餐廳嘅舖面唔太大，只有大概12個位，每次廚師煮意粉嘅時候都會傳來陣陣香味，睇住餐牌都已經流曬口水，間中都會有人入嚟買外賣，所以喺街坊嘅口碑應該都唔錯👍牛油蒜蓉番茜煙肉意粉真係香到不得了，忌廉汁中有好多番茜同埋洋蔥粒， 煙肉嘅份量都足夠🍝醉雞翼有4隻，肉質比較實不過夠入味甜品似乎係依度嘅主打之一，見到餐牌介紹可以訂製蛋糕，今次就試左蘋果批，蘋果批嘅批皮好薄，充滿肉桂香嘅蘋果一片片咁鋪喺面，加錢可以配雪糕🍨晚市仲有幾款廚師精選套餐，包餐湯、沙律、主菜、甜品、飲品，望落都幾抵食～…查看更多

套餐D有3個漢堡，原味、三重芝士汁同埋微辛蕃茄汁各一，個漢堡係用北海道十勝和牛去整，加咗少量洋蔥、香草同其他調味料，味道唔錯，望住廚師喺席前一路燒，真係會食指大動🔥三款入面最鍾意蕃茄汁，蕃茄嘅酸味同輕微嘅辣度減輕咗漢堡嘅油膩感，至於芝士汁都落得好足，廚師仲會即場刨啲芝士喺面，味道相當濃郁，仲做到拉絲效果🧀套餐仲包括泡菜、日本生蛋、麵豉湯同埋白飯，麵豉湯入面有海帶同菇，唔夠飯可以添加🍚除咗漢堡套餐，仲有啲小食叫，今次叫咗炒野菜同埋明太子雞翼～…查看更多

牛肉壽喜燒好抵食，大大鍋都只係$100，牛肉有差唔多10塊，豆腐、冬菇、洋蔥、菜等等都好多，足夠兩個人食🍲餐廳有部份食物做緊Facebook優惠，有壽司、炸物、燒物等等，大頭蝦同鮑魚都係有減，每隻大概$20！我地仲叫咗幾款燒海鮮，雖然無做優惠但係價錢都好相宜，蠔同埋扇貝都可以自己揀味道，生蠔好大隻，辣蒜蓉超級惹味，另外燒三文魚水撥同埋三文魚頭都幾好食🌶脆脆鰻魚串係有意外驚喜，雖然本身以為係蒲燒鰻魚，但係原來係依款咁厚肉肥美嘅鰻魚，而魚皮都的確燒得脆脆，相當唔錯🔥甲羅燒伴燒鱈魚干都值得一試，鱈魚干燒到好似薯片咁脆，配埋有蟹柳蟹膏嘅甲羅燒就更加有海鮮味🌊…查看更多

依排期間限定嘅湯底有木瓜椰皇嫩雞鍋，入面有好多木瓜同埋椰子肉令到個湯好清甜，依兩樣湯料就咁食都得，如果係常設湯底下次嚟都可以再食，另一邊係雪白御鮮豆腐鍋，個湯滾起後自己落三文魚同豆腐🍲牛大人食過幾次質素有保證，野食嚟得快，而且唔同分店嘅環境衛生望落都唔錯，今次都係揀咗日本黑毛和牛A4套餐，和牛同伊比利亞黑毛豬梅肉都同之前一樣咁好食，和牛油脂豐富，豬肉嫩滑有肉味🥩有幾款小食係新加嘅，酒糟嫩牛舌最好食，牛舌厚身而且好易咬，酒味都好突出，黃金椰絲蝦丸真係見到有蝦肉喺入面，口感彈牙，鮑魚有幾款口味，口感柔軟，依幾款都唔錯🥢…查看更多

燒烤堂嘅串燒種類好豐富，既有常見嘅食材，又有啲自家創作嘅串燒，單係燒鳥就差不多可以食勻晒全隻雞，由燒雞冠去到雞心、雞肝、雞腿肉、雞腳根都有，當中鹽燒原塊雞皮可以講係必食，成塊雞皮燒到脆卜卜，非常香口又唔油膩，送啤酒一流，三黃雞氣管都串得好靚，口感爽！海鮮類食咗燒生蠔、紅蔥油蒜蓉粉絲元貝同埋燒日本北寄貝，生蠔同埋元貝都好大隻，肉質亦都唔錯，配埋蒜蓉相當惹味🧄蟹肉芝士最中餅嘅中間係滿滿嘅蟹肉，非常足料，而和牛棒係會配一口飯，侍應會即場刨超多芝士喺面，食嘅時候將飯拌埋蛋黃同埋松露醬汁，真係又香又惹味😋其他串燒包括牛舌拖羅、牛舌芯、鴨舌同埋明太子飯團都ok🍙生啤做緊買一送一，$48兩杯幾抵🍻…查看更多

同朋友諗住快快地食個飯，揀咗依間餃掂快線，之前食過其他餃掂分店係有人serve嘅，依間快線就係自助形式自己攞餐，店內全部都係高枱高凳，枱上依然必備酸蘿蔔、菜脯、辣椒油等等🌶我地叫咗3款餃子，松茸豬肉餃煎得好香，底同面都有煎得香脆，湯餃叫咗雙拼嘅粟米豬肉同埋芫茜豬肉餃，依幾款餃子都係皮薄餡靚，芫茜足料非常香，粟米就清新爽口一啲，豬肉亦唔會好肥，感覺相對健康，會配埋狀元九鼎湯🥣除咗餃子，我地上湯時蔬同埋龍鳳蛋，溏心蛋配黑白松露醬好夠香🥚飲品要咗杯山楂雪梨水同埋蜜檸薏米水，兩杯飲落都唔會好甜，薏米水仲真係有好多薏米喺底，夠晒足料🥤…查看更多

主菜叫咗法式寶雲蘇焗羊架羊架揀咗七成熟，羊架厚肉多汁，塗上芥末再沾上麵包糠去焗，所以食落有少許芥末嘅辛辣，配菜有焗薯仔、翠肉瓜、番茄同埋茄子🍴晚餐本身會包熱檸茶或者柚子茶，今次轉咗飲桂花鮮奶咖啡，咖啡面頭灑上桂花作點綴，雖然咖啡味依然係主導，但係飲落都會有桂花嘅陣陣清香，而且仲有桂花喺入面，幾特別，值得一試☕️餐湯同埋沙律菜係要另外加錢嘅，今日餐湯係番茄湯，味道非常濃郁，真係𢳂到有番茄蓉，而且跟湯嘅餐包都意外地好好食，外層微脆而裡面非常鬆軟～自家製嘅日本芝士餅做緊優惠🧀…查看更多

鳥海山鐵板燒餐最為吸引嘅就係活龍蝦，兩人埋單計埋加一大概$1300，以鐵板燒嚟講算係幾抵，因為好多時鐵板燒餐廳嘅晚市係人均$1000，依個餐包括兩隻鮑魚同埋原隻龍蝦，食材嘅陣容都好華麗，整體而言係好滿足嘅🥢一開始係沙律同埋刺身，刺身有4款，平目調製咗個酸汁，而油甘魚上面有柚子胡椒，質素唔錯跟住就係牛油鮑魚，一嚟就聞到牛油味香噴噴，鮑魚肉質彈牙，至於龍蝦都真係幾大隻，啖啖肉，肉質仲要幾鮮甜，醬汁更加係超級惹味，龍蝦頭可以起到啲肉出嚟，兩樣海鮮都好好🦞之後有鵝肝多士同埋牛肉薄燒，鵝肝同埋多士都煎得好脆好香👌再之後就係炒椰菜同埋櫻花蝦炒飯，仲有麵豉湯同埋雪米糍🥣…查看更多

最近發現元朗有間特色嘅cafe小店，各方面都令人感到驚喜，餐牌上比較特別嘅地方係竟然有手作餃子～今次叫咗繁花精品手作餃子套餐就有齊晒6款口味（黑松露三重芝士、三鮮豬肉、白菜、粟米、香菇木耳、韮菜），餃子望落皮薄餡靚，一咬落去係感覺到肉汁，但係又唔會好多肥豬肉，而且食得出係邊款口味，好足料🥟套餐會跟沙律同埋貝殼蛋糕🥗飲品嘅水平十分高，我地叫咗hazelnut latte同埋matcha latte，首先最吸引眼球嘅就超靚嘅拉花，線條細緻，造型突出，基本功紮實，味道也不錯，而且唔止有拉花， 每杯飲品仲有張畫咗圖畫嘅卡仔，非常可愛，感覺好溫馨又有人情味☕️甜品試咗matcha mochi madeleine， 抹茶味好香濃，好食！…查看更多

想搵地方同friend邊食邊傾計，好多任食火鍋店都會限時90或者120分鐘，依度就係無限時放題～聽到隔離枱講如果唔食雞煲嘅話，可以免費直接揀火鍋湯底，如果又食雞煲又想轉火鍋湯嘅話，就要加$20，和風雞煲味道偏甜，唔食得辣嘅人都應該無問題，雞件係有得添嘅🐓打卡會送竹籠蒸海鮮，海鮮包括蝦、扇貝、生蠔、鮑魚，依幾樣海鮮估唔到咁新鮮，樣樣都有鮮味又彈牙，配埋蒜蓉食就更惹味🧄再之後就可以開始打邊爐，揀咗中間價位嘅套餐，有澳洲和牛、牛肩胛、豬肉等6款肉，整體質素都唔錯👌除咗送海鮮，仲有二人同行、學生同埋小童優惠，所以整體嚟講幾抵食！…查看更多

依度最出名就係生煎包，叫得越多就越平，我地叫晒兩款招牌同埋蟹黃生煎包，生煎包非常爆汁，一定記得要要開少少個頂再食，唔係嘅話就會噴到周圍都係，皮薄而底下煎得脆，而且講明唔熱可以換🥢蟹黃生煎包嘅價錢差不多係普通生煎包嘅double，一隻就要$20，不過食完覺得的確對得住個價錢，因為蟹味好明顯，見到有蟹黃同埋蟹肉🦀另外叫咗擔擔麵同埋上海排骨菜飯，價錢非常親民，大部分飯麵都只係四十幾蚊，份量一啲都唔少，一定飽肚，叫套餐或者食滿$60仲會送豆漿，侍應仲會主動添豆漿～…查看更多

依度打邊爐係一人一鍋，任食90分鐘，可以揀返自己鍾意嘅湯底，我地揀咗昆布鰹魚清湯同埋壽喜燒湯，壽喜燒湯會包一隻生雞蛋，雖然生雞蛋無得任食，但係溫泉蛋可以任叫🥚火鍋有6個級別，由$178-528，我地揀咗$288 level 4嘅特級牛小排，有得食埋埋阿古豚梅肉。其他火鍋料有牛舌、蟹籽墨魚滑、鴨血、海蝦、青口、魷魚圈等等，海蝦幾好，實肉有蝦味，食咗幾隻都係咁實淨，蟹籽墨魚滑亦見有一粒粒墨魚🥢除咗芝士牛肉貢丸，其他丸類例如蟹籽丸、牛丸、貢丸都係喺自助區攞。小食方面腐皮蝦寶幾特別，雞皮餃子咬落爆曬汁，兩樣都唔錯👌…查看更多