aihposkiu的個人專頁

下午茶米紙卷 $32 包熱飲係呀得一嚿咋😂味道係合格既 如果$32 我應該會想食MOS BURGER 一個多啲 哈哈值唔值大家自己判斷：）如果想幫襯下午茶餐牌建議點番其他了如果唔係以為自己係中環食緊小食take away 價錢～…查看更多

喺呢度食飯返嚟，真係食到一肚氣👹絕對唔會有第二次！.話說我哋七點半鬆啲到左，坐低就叫野食，野食都算幾快上台，食物嘅質素都okay! 個椰汁海鮮焗飯就需時最耐最耐，但真係好食嘅，我甚至講咗句「值得等」!.但個椰汁飯食到一半嘅時候（大概15分鐘），泰籍員工不斷催促我地叫甜品，我真係心諗主餐都未食完使唔使咁快催人走？！但我哋冇為意淨係同佢講咗句「暫時唔需要住」。5分鐘之後，有第二個不禮貌嘅泰籍嘅員工，再問我地叫甜品，再拎住張單叫我地埋單，仲要企係度扁哂嘴咁-,- 我地都不囉嗦，好快埋咗張單，但其實椰汁飯係仲未食完嘅！然後都快手分埋剩返半客椰汁飯，需時都係五分鐘以內....岩岩食完飲咗啖水，然後有第三個態度極惡劣既泰籍員工同我地講：你地要走架啦，好多人等緊，夠鐘㗎啦。.我同在坐既朋友都極之無奈，朋友都問左句「下佢根本冇講過要計時」，「依家我哋只係食咗一個鐘！」.老實說，我地都真心火咗。個飯頭尾都係食咗20 分鐘，成餐飯都係食咗60 分鐘，就四個人輪住催我地走。走既時候只得一枱四人等緊。.生意唔係咁做既，亦唔需要凶神惡煞，更加唔需要講大話，因為從來都無人俾過用餐限時我地。我發誓無論如何都不會再食，因為呢個經驗實在太差！…查看更多

好耐無食拉麵，睇完KOOZA 住船去海港城搵食，經過麵屋 一燈竟然無咩人排隊，實在同之前排 3-4 行差別好大。雖然價錢唔平，但我都幾Like 拉麵，所以就試下佢啦! 我地一人一碗，一碗沾麵一碗拉麵埋單 $3XX 連加一 (真係貴)，值唔值呢? 我就覺得……味玉 濃厚魚介沾麵 ($158) (推介!!!)上菜時，Staff 好仔細地教左我地點想食係最正宗 (佢台台都會講)，Staff 話最好係15分鐘食完，咁試身一啖湯先… 嘩嘩我覺得真係好好味，算係我暫時係香港食過以黎最岩我胃口既，湯係幾鹹下，但唔會有嗆喉既感覺，亦有好濃厚既鮮味，一啖接一啖之後終於試下個麵，粗身涷冰冰，放落湯2-3秒就要拎返起，麵質係介乎彈牙同軟身中間，恰到好處。而有幾塊肉類就無咩味，但配湯食就okay，個蛋Texture 不錯，惟鹹味不夠，撈湯食又會無晒蛋香味… 食完晒之後，可以用一壺熱湯撈埋本身既湯飲，個熱湯好清好清，同本身沾麵湯好夾。兩者無論係單飲還是一齊飲都唔會有油膩感。我理解佢點解要咁貴，不過我建議如果有得免費加麵我先會再黎 encore，如果唔係，一般食量既女仔只會岩岩好夠。味玉 秘製醬油拉麵麵 ($148)好老實，真係好一般，個人覺得唔使試，因為麵既份量比沾麵還要小呢~ 亦係無得免費加底。不過佢既湯底能夠保持到既鮮又清唔肥膩，幾塊肉類就依舊無咩味…味玉亦係同上述既一樣。呢碗拉麵比起沾麵無咁鹹，更清新，若有小朋友同行，我會點呢個俾佢。最後我覺得係值得試一次，如果有多餘錢既都不妨一試再試，但我只係會點沾麵。見到佢由好多人排到而家得番幾個人排，我相信唔係會既食物質素問題，應該係性價比太低，難以列入飯堂名單之中了~ps 啲水幾有心思，keep 到涷！--------------------------小評分（ 10分滿分）食物 7 環境 8 (足夠空間感)味道 8衛生 8態度 7地理位置 8款式 7Overall 7 (價錢不可愛扣了點分)-------------------------…查看更多

今次真係想講講呢間野真係唔OK，可以話係失望。每星期一個廣告post既一間「人氣」店，講食物既味道之前好想講下佢既老細 (係後生仔黎) 既態度真係好差下。我同朋友一行4個人都已經等左 40 分鐘左右，到我地既時候佢問我地可唔可以 2 個 2 個分台坐，我朋友話唔得，佢就話4個人要一齊坐要等耐D，而家得2人座有人埋單。但係朋友明明見到有一台 4 人埋緊單…… 最後真係5分鐘就入得去…… 都算啦，我地揀好有咩食，個老細又黎落單，但係佢唔肯行埋黎，係一張台既距離大叫，我地嗌足三次佢都收唔晒，仲問我地可唔可以講清楚 D，咩料 -,- 佢係根本無用心聽我地講野，我覺得呢種態度比客人既觀感真係好差，我都係年輕人，年輕不是罪，但係咁輕佻既態度真係不可行。最後到食物，平心而論，一般。見到隔離台有叫 $9x 既龍蝦泡飯，但係聽到對話都係話個蝦無肉。我既朋友叫既都係點配料加飯，湯既優點係不算肥，飯會主動分開上呢件事亦係好既，缺點就係配料應該多返D。鮮雞鮑片雜菌龍蝦湯泡飯 ($58)你會估到佢係咩味，湯底有種鮮味，飯有點硬但係可以接受。總括而言，唔會再幫襯，亦係我第一次想咁樣負評一間店，希望佢可以改善下，係咁出廣告都無用，睇留言都知幾多人中過伏。--------------------------小評分（ 10分滿分）食物 5環境 4 (勁迫)味道 3衛生 4 (等位時舖頭已有陣嘔吐味）態度 1地理位置 7款式 6 Overall 4--------------------------…查看更多

睇完戲已經 9 點，不想食太heavy 既野，經過呢間 16 座車仔麵裝修幾靚就入去try try。對於懷舊既風氣對於我黎講就真係有點點厭，但係車仔麵既配菜就當然無問題啦!! 由於encore 多左一次(都係點差不多既料)，就等我post 晒相再講分開寫食評吧!^ 2/F 雅座^枱面一角**紅菜頭麵 ($12@)：好味，個texture 岩岩好，不會太軟同時又唔會過份彈牙，份量一個麵餅正常女仔會夠食，但我第二次加底，亦唔會覺得太大負擔，所以都建議加底的^_^菠菜麵 ($12@)： 點過一次下次唔會再點，份量少得幾離譜，味道不太突出，可不考慮。**限量金沙青 ($11@)：真係好對唔住我唔知佢係咩部位，但係呢好食! 都係爽口，有點點特別既味道，好難形容，如果食開內臟既朋友都會接受到的。**懷舊牛腩 ($11@)：好食! 真係好味! 不會覺得好肥，換黎既係好入味，肉質唔會難咬，會食唔停口，大推大推~*牛爽/ 牛舌芯 ($11@)：好食，好爽口，細細塊不會咬到攰，同時同個湯底都好配合。*滷水豬大腸 ($11@)：唔臭，幾乾淨，有驚喜，我會encore的，因為滷水夠入味又唔會蓋左豬大腸既味道，正!米糖滷雞翼 ($11@)：正正常常滷水雞翼，淋身夠入味，不錯!菜肉燕餃 ($11@)：細細舊但係好食，不會好油既感覺，食落好順口，如果平D就會更開心。五香蝴蝶腩 ($11@)：呢個係豬肉黎嫁，煮得好淋身，都幾入味，不錯，但會推薦上面既懷舊牛腩多一點。不過如果唔食牛既朋友可以try下呢個，都唔會後悔既。**豬紅 ($9@)：呢個一定要寫，因為我係好喜歡食豬紅，都食過唔少外邊既豬紅，呢間同埋MOKO 樓梯下花園街卓悅對面個間明記都大推!! 係切薄身不會好死實，有個腥味但恰到好處，要encore!!!*蘿蔔 ($9@)：淋身夠入味，蘿蔔味都會係番到，同個湯底好match，推薦!墨魚丸 ($9@)：正常沒什麼特別，但是彈牙類的呢。湯底 - 牛腩汁 ：讚讚~ 濃而不膩，不會見到一層肥油，會想一口接一口咁飲 湯底 –滷水汁：比起牛腩汁無咁濃，但係有秘製醬汁，如果兩個fd 食一人叫一款湯就最好! 小辣的話，如果食開譚仔十小辣都會應付到的。Overall 黎講我都幾滿意呢到既食物質素，推薦坐上層會comfort D，裝修都可以影下，幾靚嫁。價錢中等啦，唔係平，但因為好味所以都會keep 住去。美中不足既就係一定要叫 3 個配菜，有時真係未必會人人揀到咁多野食呢~PS. 名字旁有 ** 就係一定會encore，* 就係次等想encore 既。--------------------------小評分（ 10分滿分）食物 7.5環境 7.5 味道 7.5衛生 7.5態度 5.5地理位置 6款式 6Overall 7.5--------------------------…查看更多

見到朋友個Instagram 有介紹呢一個港島小店，今日行開灣仔，就決定呢試吓啦。你到嘅時候大概四點鐘左右，一個外國人坐喺門口位附近，感覺好chill 小店位置唔多，好辛苦地都會坐到六個人嘅🙈🙈🙈 掂入邊播住啲韓文歌，唔算太嘈的。朋友本身係介紹煙鴨胸芝士多士，但去到嘅時候因為冇食早餐同午餐，都相當嘅我。所以我同男朋友就叫咗一份手打安格斯芝士漢堡餐同埋英式士多啤梨S'more吐司。等咗大概15分鐘左右就有得食啦!(1) 百香檸檬茶（走甜）(單點$18) 呢個檸檬茶好特別，佢嘅茶味裏便帶有少少百香果嘅味道，不過唔算好濃，如果唔係特別怕肥，都係會建議叫翻帶甜會好啲。美中不足嘅係佢嘅檸檬真係非常少，得薄薄兩片，我呢啲好鍾意督爛晒檸檬好酸嘅人來講，就真係唔係好夠啦。(2) 手打安格斯芝士漢堡 ($58 ; 跟餐 $63)呢一個手打安格斯牛堡真係令我好有驚喜，因為佢嘅牛肉同出邊嘅牛不一樣，有一種鮮味，同其他肉混合埋做漢堡，頗夾！易啲醬汁都非常之鬆手，有超級多芥末醬（呢隻芥末醬係佢自己打造嘅，因為偏辣 ,所以我自己就冇咁喜歡啦。成個包夾埋一齊食又真係幾飽肚嘅，最初要諗下點開始食，但係turn out 都 carry 到👍🏻👍🏻對得住佢既價錢啊～(3) 英式士多啤梨S'more吐司 ($24)我見朋友都有係Instagram介紹呢一款，所以就叫咗來。唔知係咪唔太鍾意食呢款Nutella，雖然夾埋一齊嘅配搭係幾新鮮，但係如果俾我揀，我都寧願食多幾啖安格斯漢堡啦🙈🙈 最後我覺得，作為香港人，應該要多支持下小店。因為多都係連鎖店嘅快餐同cafe，價錢貴， CP值不足。如果九龍區都有多啲呢類cafe就好啦。--------------------------小評分（ 10分滿分）食物 7.5環境 7 (店坐置較窄）味道 7.5衛生 8態度 8地理位置 6.5款式 6.5Overall 7.5--------------------------…查看更多

相信黎依度是食嘅客人大部份都係睇過Facebook某雜誌嘅介紹，見到意粉會係一舊大芝士上炒。但要注意返，個大芝士都係喺吧位，唔專登出去睇，都唔會見到佢炒嘅過程。但any肥，今次嘅每月紀念日，作為芝士控就心動來試試🤗 平日夜晚七點幾，大概等15分鐘就入得座，職員普遍都nice and helpful，叫幫手影合照都無面黑黑，抵讚唷👍野食方面，好老實真係一般，大家請不要抱太大期望，佢餐牌嗰度會有介紹幾隻不同嘅cheese，但係是日精選又有機會唔同，所以都係建議問返職員。今次我哋兩個人，叫咗一飯一意粉，再加左個小食，啱啱好，唔會太飽。1. 鮮魷魚墨魚汁意粉 ($98)係好肚餓嘅情況之下，呢個意粉率先上枱，對於喜歡食墨魚汁嘅人真係好期待！但係食完一啖…真係…都幾失望。冇芝士味呢一個都預咗嘅，因為冇加＄20 加芝士(因見到其他食評話不推薦)，而冇咩墨魚汁嘅味呢層我都唔會怪餐廳，畢竟只係百零蚊嘅意粉，都唔可以要求有幾鮮味～但最令人失望嘅係，連鹹味都無！！！我真係相當驚訝，因 為 整 碟 意 粉 可 以 話 係 無 味🌚🌚🌚 如是者，我問侍應有無鹽供應👇🏻👇🏻呢次係抵讚嘅，因為呢款鹽我好喜歡，芝士粉都係無叫就一齊送黎，亦同個意粉相處得好好，之不過我差唔多每一啖都要加鹽加芝士粉，呢下真係從未試過，重口味人士就要慎入，如果唔係成餐飯都好busy 😐2. 京式烤鴨雙重滋味焗飯 ($98)終於食到芝士嘅既野，算幾好食，因為起碼有鹹味亦有北京填鴨既醬，飯既份量不多，但女仔食晒成盤都係會飽既。至於cheese 就普通正常。但有一樣美中不足嘅嘢係，嗰啲碟耳係傳熱嘅，加上底碟不fit size，所以要特別小心。3. 芝士焗雜菌($52)唔唔，我覺得呢款係全晚我最喜歡嘅， cheese好夠味，亦feel到一啲忌廉白汁嘅味道，菇嘅大細剛剛好，小小肥膩嘅感覺就實會有，但絕對接受到，食完成盤都唔會過滯。佢有好多唔同炸嘅小食，但礙於喉嚨唔係太舒服，所以就叫左呢個。不過炸既小食擺盤都非常唔錯，一試無妨。Drink A) 金柚蘋果凍頂烏龍芝士奶蓋茶 (+$28)但凡喺餐牌入面叫一個主食，都會送一杯基本飲品，如果叫任何特飲就會原價減＄10。其他雪糕甜品亦都會有相應嘅優惠。講番杯飲品，芝士奶蓋，一如以往冇乜期待，因為喜茶一直係我嘅第一位😻😻😻佢嘅奶蓋係有點鹹味，但唔夠結實。而下面嘅飲品相對來講比較甜，飲到尾既部份帶點酸酸地，不過我想講嘅係，真 係 太 細 杯 啦 omg，認真飲的話 2 分鐘之內一定飲完呢。。。總括而言，呢間餐廳如果你好想試一試嘅話，都係可以嘅，不過你問我會唔會想返轉頭食，就真係未必啦！除非真係諗唔到食咩啦。不過都想讚一讚，所有職員都非常認真工作，而且做嘢好快手，亦唔會黑口黑面，要加油👍👍--------------------------小評分（ 10分滿分）食物 6.5環境 7味道 5 (個意粉真心無味)衛生 7態度 7.5地理位置 6.5款式 6.5 (其實食物選擇不算多)Overall 6.5--------------------------附上主食餐牌（仲有好幾款甜品同飲品，但係過咗上載數目了😣)…查看更多

上網看見YouTuber來飲，台灣控的我定必要來試看看，當日是星期六下午四時多，有大概20人在排隊，感謝男朋友的耐性，大概排了半個小時左右就可購票，在等候多15至20分鐘就可以取飲品。排隊的時候可看進裏面的製作過程，頗乾淨的，店內有少許座位，但不算舒適。15至20分鐘，足夠我係Muji買了一袋東西了（笑）。回歸正題，今次點了兩杯大杯飲品，價錢比天仁茗茶貴，但我認為味道還是天仁茗茶好喝太多了！1。一芳水果茶 （無糖小冰）清新的水果茶，底部有許多蘋果，百香果，少許香橙片，可能在茶裏泡了一會兒，水果味道剩餘無幾，茶卻帶點酸酸甜甜。因自己不愛喝太甜，無糖對我來說剛剛好。但這個味道的水果茶，不算太突出，不值得排這麼久呢🙈2。粉圓紅茶 (微糖小冰)粉圓即是小珍珠，叫小冰的後果是-->喝了幾分鐘冰便沒有了。(👻以下是負面內容請慎入👻)整杯飲品，我可以用不好喝來形容。奶味太重，查味不夠龍，珍珠沒有咬口，像一團粉，要完整喝完一杯有點辛苦。總括來說，第一次來嘗試水果茶無妨，但有沒有下次就有點難說了～小編會到台灣試試看原版的，希望不要再令人失望👀👀…查看更多

麥文記呢個名真係好細個就開始聽，媽媽話好好食，但每一次嚟到呢度，都忍唔住俾澳牛吸引咗。今次終於的起心肝嚟試下！看到賬單也不知叫了什麼(笑)，跟一般麵家無異，雲吞水餃牛腩牛筋豬手炸醬全部都有。全部都是麵食，沒有粥。因聽說水餃和雲吞是最出名的，所以我和男朋友一人一款。我比較餓，所以選擇了撈麵，而我比較喜歡粗麵，所以就選了一碟水餃撈粗^_^份量不算多，吃完一碟認為還可以再多吃一碗食物質素非常高。先說粗麵，大部份面家的粗麵也有鹼水味，但非常驚喜這碟並沒有，還有一點麵香，忍不住一口接一口。再來說說水餃，一碟會有四個，一咬下去並沒有坊間水餃的油膩感，換來的是爽口蝦和肉的感覺，皮不會厚，好吃！然後就是男朋友叫的雲吞麵，是經典幼麵～我嘗了兩口，相當彈牙，也是沒有鹼水味，不過私心還是比較喜歡粗麵的口感。不得不提雲呑！不 得 了。有一段時間沒有吃到如此喜歡的雲吞，上次吃過銅鑼灣的池記，我會形容為垃圾😂😂，但這個相比是神級。跟水餃一樣，爽口而不油膩，材料很足😍😋必點，一碗也有四五顆！對面的客人吃了些豬手撈麵，有大概四五塊豬手，沒有欺場！老店果然十分利害，我定必再來光顧^_^ps 份量方面真的比較少，我覺得如果我食一碗，這可以過去澳牛食個常餐 呵呵--------------------------小評分（ 10分滿分）食物 7環境 7 (舊式裝修，位置比較窄)味道 8衛生 7態度 6 (點單上菜很快，禮貌正常沒預期)地理位置 6.5款式 6.5 Overall 7--------------------------…查看更多

係中環返工但係我都係慳妹一名，今日試做完 present 老闆讚good job請幾位同事一齊食飯，帶我地新式西餐。星期五中午的確係多人啲，但係早左出門就避開左高峰期。雲石台同埋中間既Open Kitchen令我覺得環境唔錯，無個種文青Café既feel 但係有種係英國街頭餐廳既setting。望下餐牌 (Sorry無影到><) 最平既都要 $129，而意粉選擇都唔多，得兩款，一款係海鮮茄汁意粉 (當然個名好聽好多啦)，之後仲有一款係白汁天使面。老闆話呢度既半隻燒春雞同Fish and Chips都好多人食，見到實物真係同英國既差無幾，相當吸引，但礙於喉嚨痛所以無食了，最後點左下面既東東⋯⋯先來既係set lunch 有既包同湯呢個圖既重點相信都係左邊既濕紙巾😏最後我帶走左黎嚇人，講返個包先，唔太熱但係鬆軟既，個醬非常好味！有點忌廉香草味，每一啖都係脂肪，但會忍唔到口！不過美中不足就係份量太少同埋同個包唔係好夾。如果再encore，呢個醬一定係其中一個因素呢。然後就係呢個跟餐嘅南瓜湯，高質！嗰啲麵包粒就淋左但係仲keep到非常之脆。冇乜南瓜蓉但係整體南瓜味都足夠嘅。配麵包粒感提升咗唔少。揀 All day breakfast其實係好想食佢個薯餅。呢度嘅份量係絕對夠飽嘅，腸，煙肉，茄汁豆同炒蛋都正正常常冇咩特別，另有太陽蛋可以揀。磨菇粒就幾得意，因為用咗牛油炒晒所以香口度up! 番茄片都令我有啲驚喜，係煎既，但有種甜味蓋過酸味，quite fun! 另外我期待嘅薯餅就一般啦。小妺覺得麥當勞嘅早餐更好食，因為佢嘅薯餅炸得比較乾身而且入邊薯仔嘅份量都唔多。食完我唔爭氣既喉嚨有啲痛呢~呢份All day breakfast 最令人回味嘅竟然係個一片平凡的包😲😲所有邊邊都係脆㗎，底面都有小小焦，而味道係牛油帶點甜味。五粒星⭐️⭐️⭐️⭐️⭐️！！另外試食左同事既薯條，偏幼身，但略乾，但醬汁好味補救番。跟餐都有杯嘢飲嘅，但因為冇乜特別所以唔多提啦。總括來講我覺得性價比其實係偏低，環境雖然好好，但午餐時分完全上唔切餐😥要三催四請先上到老闆份 Burger，主管仲要堅持冇漏單，搞到我地都有啲尷尬呢⋯⋯-----------------------------小評分（10分滿分)味道 7價錢 4環境 8態度 5 款式 5 (lunch set真係無咩選擇)地理位置 6Overall 6-----------------------------…查看更多

一直以為super sandwiches 既食物貴夾唔抵，但有一日覺得真係想食fresh點既食物，所以就同男朋友首試其食物~ 點了兩款share食，其實食完唔覺得好飽，不過確係好食的。真正既食物全名就真係唔太記得，出相補返數吧^_^牛肉焗薯連芝士碎蛋牛角包with super set ($7x)佢分兩款set，一款只連飲品，另一款連湯同飲品，兩者價錢差9蚊左右，呢一個我揀左大set既。牛肉焗薯入面既芝士一上碟個時多到我有點驚，但食落原來發現係要有咁多先可以每一啖都有薯有cheese，佢既芝士算係偏濃，比好多有芝士既菜色更濃，好夾個薯仔!! 薯仔方面就遜色了，其實完全不夠熱，因為不夠熱的話芝士會凝住係到，浪費左好味既芝士。到牛角包，都係麻麻，因為太軟淋晒，芝士碎蛋中等啦，多點沙津醬就更好。至於個湯，真係唔錯唔錯，係偏稠身既texture，都幾好味，奇怪既係話佢係好重粟米味又唔係，只係個湯係creamy加鮮味… 鍾意飲湯既朋友一定要try try了!重係最令我驚喜既係 – 熱!檸!茶! 我係好鍾意唔加糖飲熱OT既人，super sandwiches 既熱OT係好得我歡心!! 之後個次encore tea 我都係因為好掛住佢既熱OT。唔知係咩茶包，飲落去好舒服，雖然佢個檸檬唔係 slices，係一舊舊要zi 既，但夾埋佢個tea，呢隻甘甘地既紅茶，VERY NICE!!!!!海鮮闊意粉 ($6X)好味! 我又係覺得太多醬了，但係我男朋友勁鍾意多醬，so its fine~ 個闊意粉煮得岩岩好，仲keep到有咬口，good! 個醬係creamy地偏鮮味，唔salty，海鮮都係雪藏個D，無咩特別。不過都係鍾意成件事咁評價，都係good~下次我會再食既，真係比想像中好食，雖然都唔係平價貨都唔太飽，但係小清新之選！~~~~~~~~~~~~~~~~~~~~~~小評分(十分滿分)味道 7價錢 6.5環境 8態度 7款式 6地理位置 7Overall 7~~~~~~~~~~~~~~~~~~~~~~…查看更多

在中上環上班真是很接近許多有名食店，這次Lunch 就去了蘭芳園，環境服務就一般舊式香港食店，不要預計在中環地段的會十分十分清潔。朋友到先大概等了 15 分鐘，店裏面大部分是遊客。點了最出名的「撈丁」(店家說自己是首創的)，上次食過雞扒覺得正常偏鹹，今次再試 (1) 豬泵兜撈丁 (2) 豬扒撈丁，兩個都是繼續偏鹹，不太建議把所有薑蓉都加進去~ 出前一丁的本人煮得算剛剛好，不會太軟，有一點彈性在，但因為沒有下平常的調味料所以我覺得用不用出前一丁分別也不會很大。豬泵兜我覺得是豬頸肉，是軟的可是也要多咬幾下，跟整個麵是蠻配的。豬扒本人普普通通，就是平常會食到的味道。友人點了馳名奶茶，試了幾口，真的不錯!! 茶味很出，又不會蓋過奶味，兩者非常的融洽呢，推薦熱奶茶風味更佳!!總括來說，食物的CP值一般，看名字就會知道是什麼味道的感覺，名氣把其吹捧得太高了，反而奶茶(熱!的!) 卻是值得一再回味的。照片放送~~豬泵兜撈丁 ($51)豬扒撈丁 ($51)~~~~~~~~~~~~~~~~~~~~~~~~~~~~~小評分(十分滿分)味道 6價錢 6環境 5態度 5.5款式 6地理位置 6Overall 6~~~~~~~~~~~~~~~~~~~~~~~~~~~~~…查看更多

第一次寫食評，平時儲埋咁多相，朋友都問我用黎做咩，我都唔知點答，諗諗下不如用黎寫下食評。就揀呢間對我黎講好有紀念性既餐廳啦~第二次黎呢到食，同同一個人黎，但關係就唔同咗，感覺好特別。環境唔錯既餐廳，價位屬中價，一人大概$250 (至少)，set dinner 佢有兩款餐牌，應該都會定期更新。一款有包沙律吧，另一款無，但就會有特別既頭盤可以揀。價錢相約，後者食物會多元化啲，我就揀咗款意大利飯。男朋友就揀咗T骨牛扒。由於我本身餐無包沙律吧但佢個沙律吧相當吸引（sorry 無相，但有啲螺絲粉沙律，薯仔沙律，芝麻八爪魚，鴨胸沙律， 重點係有青口同螺加上不同款的芝士）所以就好想食，但係如果餐唔包嘅話就要加＄168先可以食沙律吧然後仲有野飲同甜品（無錯係會同個餐double 左）。男朋友個餐有沙律吧但佢又話唔可以分食（well 其實我都有偷食小小，但waiter 會好盡責佢會望住所以其實都幾難share）。芝士包口感有趣，唔軟唔硬咁樣。我個餐嘅頭盤芝士酥皮田螺，田螺得四隻左右，本身佢冇乜味但加芝士同酥皮成件事夾埋幾OK沙律吧嘅食物全部都係揀咗三律師，唔好意思影得有啲樣衰，因為好想快啲食！味道一流~我嘅主菜，唔記得真名但係件食物係：豬扒茄汁意大利飯。好消息同執嘅大利飯感覺好新穎！個汁酸酸地味道不錯，個豬扒一定要大贊，好淋好軟，咬咗落去好正啖啖肉。男朋友點既主菜， T骨牛扒。本身係order 5成熟，但我哋枱同隔離枱到一樣，無論叫給成熟出到嚟都會係七成。味道很好，個汁唔會蓋過牛味，而且唔會覺得好漏。想飲品同時會上甜品，有沙律吧嘅人就可以係沙律吧度攞甜品，餐冇包冇沙律吧嘅人就可以食當日精選。呢個牛奶布丁一般啦，因為牛奶味不夠重，布丁又偏硬，所以冇乜特別。小評分(十分滿分)味道 7價錢 6.5環境 8態度 6款式 6地理位置 8Overall 7…查看更多