玄武的個人專頁

今日係小弟生日，老婆同我一齊去食一間好耐冇幫襯過嘅食店。喺以前舊地址時候，我都曾經去過一次，但搬咗嚟新地址之後，未曾嘗試幫襯過，因為有啲朋友話味道已經不及以前。但係今次一試，都唔係咁差啫😅今日撞正銅鑼灣有活動，所以人客減少一半，可以有一個清靜環境食下嘢，都未嘗唔係一件好事😁我同太太揀咗7:30入座，比之前5:00嗰場貴$200，因為多咗龍蝦同日本和牛。但係龍蝦唔係太有味，而和牛煎完亦覺得好「油」，反而其他嘢食，又真係幾好食。至於食咗啲乜，不作詳細介紹啦，大家有興趣就去試吓啦，佢仲好似做緊八八折🤗…查看更多

話說有一日，有朋友話不如去試吓呢一間新野，所以一行四人，咪去試吓囉！去到環境佈置都唔錯，可能係夜晚關係，啲服務員比較少，只得兩三個人，但地方唔算大，應該都足夠啦。至於嘢食方面，如果閣下係食辣之人，就有定心理準備，可能會有少少失望。如果閣下只係想食少少辣，咁就一定滿足到閣下所想了。總括嚟講，依一間食店，小弟一定會再來光顧🤗飄香毛血旺-淨係睇個樣，都足以令你唔敢起筷，但係食落去，小小辣，非常之易入口，啲材料亦都入晒味，值得一試。水煮牛肉-其實同之前毛血旺差唔多，只不過換咗係牛肉，不過佢加咗水晶粉底，食完片入面啲牛肉，去食個水晶粉底，簡直一流👍🏻霸王辣子雞- 啲雞斬得比較碎，好似係骨多個肉，每次搵件雞，都好似要瓦礫中尋求生還者一樣，雞肉比較乾，辣味一般啦。大盆花菜-我哋選擇唔辣，免得碟碟餸都係辣味，炒埋一碟嘅菜花，雖然唔係太突出，但總算好味。酸辣魚-我哋已經叫小辣，但係辣嘅程度已經好犀利，嗰種酸辣程度，直頭令你回味再回味，真係必食推介👍🏻👍🏻糖醋排骨-呢碟餸一上枱，我仲以為叫咗咕嚕肉，味道平凡，只屬一般，但總算過得去，只係覺得好似改錯名😅回鍋肉-呢碟餸同糖醋排骨一樣，唔知係咪改錯名呢，叫時菜炒腩肉好過啦，食落口比較油膩，只屬一般，希望日後有所改善啦😅😅…查看更多

上網見到有好多like，亦都有好多好食評，一於今日同老婆去試下啦！去到已經見到有好多人排隊，咁我地都唔執輸，喳喳淋去排隊買啦。上網睇過話要等好耐，30-45分鐘已經係必需的，唯有買完之後才去行街街啦。佢哋有個服務，只要你肯留低電話號碼，輪到你就會call你👍🏻經過慢長的等待之後，雞髀終於到手。搵個地方坐低之後，就準備大吃期待的雞髀。一大口咬落去，D外皮.........淋嘅，仲要係偏咸，可能太多咸蛋漿卦😅，入面D肉，冇乜特別，冇乜味，老婆嗰隻仲有D怪味😅，冇食曬就掉咗。今次真係好矢望，應該都冇下次😔😔😔😔…查看更多

前排，有朋友介紹這間餐廳，雖然餐廳位置比較「cake」，但朋友極力推薦，所以我們一行四人便慕名而去.........在介紹之前，奉勸各位想去的朋友仔，最好預先訂位，因位置有限，除時冇位架。仲有，最好訂早D，因為越夜越多人.......當晚，我地一行四人，因一同放假，可早D去食，所以訂了下午六點。依家餐廳做緊優惠，18:00-22:00任食2小時，$198加一，員工透露，優惠價可能做埋依個月，下個月可能要加小小價，理由明白的。好似我地一行四人咁，真係食唔小嘢架。雖然餐牌食物款式未算好多選擇，但都已經足夠，反而太多可能會影響食物質數。員工為我地介紹那款有限供應，那款好味要必食，服務態度真係要加分👍🏻這間餐廳碟頭就唔算太大，味道係做比較淡味，盡可能每個款式都做到原味，依種做法比較小見，鍾意食濃味嘅朋友，到時唔好投訴呀😁我地合共食咗5個意粉、4款肉類、3個漢堡、2款小食、1碟沙律，實在太嚇人了吧😅四條友食咁多嘢，希望唔會比人入黑名單啦，因為...... I will be back😎…查看更多

話說今日天寒地凍，友人提議去打邊爐，上網搜尋一番之後，找到這間食店，見大家都未去過，一於去試下啦。至於這間食店食物有幾好食，暫不作詳細解說了⋯⋯(想知的話，看看其他食評吧)！其實這間食店的食物，不會有一些「主打」、「特色」、「驚喜」的食物供應，供應的品種都是其他店舖有所供應的。但不能否認，食物品質都係好的，雞夠滑、肥牛不太肥、蔬菜夠新鮮。可能你會話「外面都有這樣質素啦，使乜幫襯佢喎！」佢地贏就贏在個「湯底」，泰式湯底一般好小有食店供應，佢地就有四款湯底比顧客選擇。小弟今次選擇「冬陰功」及「椰鷄湯」做湯底。你試諗下，你淥D食物時，平凡嘅牛肉，變咗冬陰功牛肉，普通嘅蔬菜，變咗椰香蔬菜，你話幾特別呢。如閣下食厭咗普通湯底，不防去試下，可能會有另一番風味呢。可能間店舖仲係算新開卦，仲有好多可以改善嘅地方，例如........木筷子、木碗配鐡湯匙，點解唔配返木湯匙呢？人客想淥嘢之前飲啖湯，咪好容易淥到個口囉🤔可能我地成10點半才去，好多品種都冇係可以理解。但自助BAR上嘅食物及配料冇人去補給囉，既然要做夜場，就要顧及人客需要。由其係原先有紫米露糖水，但手快有手慢冇囉。其實依家大部份食店都只供應杯裝雪糕，難得有糖水供應，但只有得睇囉😔音響太大聲啦，與朋友傾談都有D辛苦，直至叫員工較細聲D才好好多！以上意見亦已向店員反影，希望會有所改善啦。總括嚟講，都係值得再去嘅，順帶一提，D店員都幾有禮貎架😊…查看更多

今日同太太誤打誤撞，去了這間拉麵店。地方不是太大，但都算ok。店舖會分兩個時段營業，15:30之前只做沾麵，17:30之後只做湯麵，15:30-17:30中場休息，如有興趣去的朋友要注意呀！入店被安排坐位後，店員遞上兩張order紙比我地，當我地諗緊咩叫沾麵時(因為我兩係第一次食)，店員主動上前講解點樣點order，點樣食沾麵。聽完講解後，我地各人點了一碗麵，再加點配菜，再加上我係要加麵底，來到枱時發覺，原來碗都幾大碗架😅我點了黑芝麻湯，太太點了番茄海蝦湯，兩碗湯底味道都不錯。湯底會比較濃，若果唔夠濃就做唔到沾麵效果，麵質亦算彈牙，叉燒都好味，唯獨D紫菜比較淋，有D靱，整體嚟講都算唔錯。…查看更多

通常與朋友飯局，一定係大魚大肉，唔係放題，就係火鍋。今晩好友話，不如今晚清清地食素。其實與朋友飯局，食咩又有咩所謂叫，素食咪素食，怕你有牙咩😁這間食府小弟都係第一次來，平時甚小食素的我，又點會特登去食素吖。因為已經訂位，所以一去到已經安排就坐，各自各點了心儀餸菜之後，準備大吃特吃了😋😋麻香素手撕雞⭐️⭐️⭐️個樣就似手撕雞，但做唔到雞味，不過口感唔錯，煙煙靭靭都幾好味。香煎瑟琶豆腐⭐️⭐️⭐️⭐️一上枱，仲以為係肉丸，一啖咬落去，外面小小硬，入面軟淋淋，好味。錦鹵炸雲吞⭐️⭐️一個在香港已經好小食到的餸菜，可能期望太大，上枱時有點失望。個雲吞炸得幾好，唔會太多油，整到油淋淋，個汁都好好，多料兼酸道適中。唯獨美中不足，就係D汁用個好淺嘅碟盛載，做唔到將雲吞浸入去效果。泰式明爐魚⭐️⭐️⭐️⭐️上枱已經成條泰國菜的明爐魚咁，又有火，又有汁，個汁仲要做到好似冬陰公湯底咁，如果條魚可以整埋個魚頭樣，咁就勁啦。沙爹羊肉串燒⭐️⭐️⭐️⭐️一碟外表似羊肉串燒，但完全唔覺有羊味，但可能你問，冇羊味都有4粒⭐️，奇就奇在碟羊肉有另外一種無法形容嘅好味，再加上配搭嘅汁，我都唔知點形容好。東坡醬汁肉方 3.5⭐️唔好比個名呃咗，係東坡醬汁，唔係東坡肉呀，一上枱，個樣黑蚊蚊，已經大打折扣，但都要食架。一口咬落去，成半舊都係肥膏，已經覺得麻麻地，之後食埋個半舊，都仲有小小瘦肉，好彩舊肥豬肉肥得嚟都有六四比例⋯⋯突然想起，乜我唔係食緊素菜咩，咁嗰舊係咩嚟架，想知，自己去試下啦。飄香南瓜盅⭐️⭐️⭐️這個餸冇乜特別，個南瓜算炆得幾淋，可以做到南瓜溶效果。紅草莓香味骨⭐️⭐️⭐️⭐️⭐️這個餸係全晚最好味餸菜，所以放最後。這個餸賣相，同街外咕嚕肉賣相差不多，係個汁由橙色變咗紅色，草莓汁嘛。食落口，個感覺同一舊真正咕嚕肉冇咩分別，不單止做到肉質效果，仲要冇咁油，非常健康。咁究竟係咩呢，貼士就係一種「菇」，去食下咪知係咩「菇」囉。最後，想同大家講，其實除咗「紅草莓香味骨」知道係咩素菜之外，其他因爲好食，已經忘記了去深究，所以介紹餸菜時，冇提及用料，敬請見諒😅😅😅😅…查看更多

這間雪糕店同太太想去好耐，今天終於有機會去試下。因時間還早，只係等咗5分鐘就可入坐，坐位亦算ok啦，未至於太逼。餐牌有好多雪糕款式選擇，其實來來去去都係得抺茶、奶茶、牛奶三款配搭。其中有一款「三色雪糕巴夫」，就可以一次過試晒三款味，所以我兩公婆就要這個吧。終於可以試到這間雪糕店的雪糕了，但雪糕一上枱，太太已經問我，點解D雪糕咁溶咁嘅🤔。「筆」落去，又真係幾溶喎，但味道ok嘅，抺茶同奶茶味都幾濃，牛奶味就甜咗D，整體嚟講，都值得一試。價錢唔係太貴，大家不防去試下…查看更多

在網上有朋友推介這間餐廳，所以咪去試試，點知如要訂位坐室內(因太太怕熱)，要訂兩星期咁耐，真誇張。晚飯係有時間限制，每段2小時，我選擇了早段，由18:30-20:30，心諗兩小時一定夠時間食啦。我地二人大概18:40去到，因訂了位，所以不用等。餐廳內面積很細，枱亦很小，大概只可坐20人左右，唔怪得在店外要開多幾枱啦！我訂位時，已經order埋36隻生蠔(堂食只需$10一隻，仲要冇限數量)，同埋一份30oz牛扒，坐低冇耐，已經先上18隻生蠔，食完之後再上另外18隻。食生蠔前，員工已開始為我地準備牛扒，因太太比較怕食生牛肉，所以選擇食7、8成，但員工極力推薦靚牛扒食4、5成便夠了，最後都令太太嘗試，那個員真利害！食完生蠔之後，再點了兩款小食，食完之後，牛扒上枱了，30oz牛扒，雖然係大，但未至於我想像咁大，可能我大食啦😁，至於牛扒味道都Ok架。原先諗住食下佢唯一甜品，但因時間關係所以冇試，留返下一次啦，原來兩個小時真係啱啱夠😅…查看更多

今晚同外母做冬，一行四人，一於試下銅鑼灣分店，之前去過尖沙嘴分店，啲嘢好好食，所以今次去另一分店試下。去到之後，已經坐滿客人，心想好彩有訂位。坐低之後，點菜了，來食北京菜，烤鴨必然首選啦。當我叫個侍應來點菜，話要一隻烤鴨，個侍應竟然回答「如果冇預訂，最多只可叫半隻」。吓😳咁都得，咁我打電話訂位你又唔問，算了！總共點咗9個菜，上菜了.......(蒜泥白肉) - 冇蒜泥，仲係用麻醬，我重未食過用麻醬撈嘅蒜泥白肉😔(雞絲粉皮) - 用麻醬撈係正常嘅，咁同之前碟蒜泥白肉有咩分別呢，仲有，兩碟都係暖嘅😔(松鼠桂魚) - 變咗汁浸魚，條魚淋曬，魚入面仲要係凍凍地😔(紅燒元蹄) - 隻元蹄都炆到幾淋，不過咸咗D，上菜仲暖暖地，好似整完淋D汁上去咁囉😔(北京烤鴨) - D粉皮就真係熱辣辣，但D鴨就麻麻地，皮脆肉凍，咁先高難度😔(蒜蓉菠菜) - 這款冇得凍食卦，但D菜炒到老曬囉，食到成口渣囉😔(北京炒拉麵) - 又係成碟微暖，好似炒完擺咗好耐先上枱咁😔(大蔥羊肉煎餃) - 仆你個街，前餃都可以凍嘅，仲要油淋淋，真係唔爆粗都唔得😔(小籠包) - 籠包上枱熱辣辣，仲叫外母小心辣親，點知一咬，入面冇咩汁，又係微暖😔搞咩呀，一間好地地嘅食府，竟然有D咁嘅質數，真係好失望，不過唔緊要了，都唔會有下次，要去都去尖沙咀嗰間😡😡…查看更多