可愛加菲貓's Profile

今日想食京滬菜，就決定試下蘇浙匯啦！因為都想試好耐，一直未有機會，今次就等我試試啦！《薄片牛展》切得好薄，好入味，配埋個醬汁甜甜地，係全晚最好食第二位，值得推薦比大家《紹興醉雞》聞落有些少酒味，但食落就完全冇酒味，所以都係麻麻地好食，肉質都OK既，但想食到醉雞味道就失望左D嘞！《葱油開洋拌麵》葱油蝦米醬油拌麵，唔識形容，都幾得意既，鍾意食撈麵既人可以嘗試一下。《蘇浙湯包》熱辣辣，咬落好有肉汁，唔小心燙親條脷，但凍左又唔好食喎！所以大家食既時候要小心喔！《特色生煎包》勁好食啊！我最鍾意食生煎包就係個包底脆卜卜既，又多肉汁，全晚最好食既一道菜，我差D想叫多一碟食呀！但千祈唔好擺凍食，否則包底就會唔脆，就食唔到煎包既美味，大家一定要叫黎食。《蘿蔔絲酥餅》這道小食又係我至鍾意既食物，外形好吸引，可惜當我咬了一啖之後，完全缺乏口感，我已經即時失望，再研究下佢點解會咁樣，原來佢既蘿蔔絲切得太幼了，又加入其它配料，所以唔係傳統既蘿蔔絲酥，呢方面我有些好失望呀！《特色印尼蝦餅》這道小食看圖片真係唔知係乜野味道，詢問服務員好唔好食，佢地話好食喎！於是乎我就叫黎試下，一試之下，唉呀！原來係煎麵粉團既簡單野，上面放了幾隻蝦仔而已。我家裡經常煎麵粉餅，所以我覺得普通食物，但如果大家少食麵粉餅，就會覺得幾好，因為我朋友少食麵粉餅，所以佢就覺得幾得意，煙煙韌韌咁囉！《本幫熏魚》諗住京滬菜既餐館，熏魚應該點都唔會煮得太差啦！色相好吸引，可惜熏魚切得太厚，唔太入味，朋友唔覺得係熏，覺得係炸既煮法多D喎！總之我地每人只食了一塊，其餘既打包回府比屋企人食啦！…Read More

一直以來都好想試呢間酒店既自助餐，可能真係其他食評家影既相片靚，所以吸引到我想去囉！但當我試過之後既感想，好彩係半價既優惠去食，否則我就覺得唔值了。呢次半自助餐，我冇特別影相，因為提唔起勁去影，款式太少和食物質素麻麻。食物有：海鮮類...皇帝蟹、長腳蟹、凍蝦、青口、青螺。刺身有...三文魚、吞拿魚、甜蝦、八爪魚、X魚。壽司有...三文魚、有兩，三款忘記了，仲有兩款卷物。淥麵區...有白魚旦、豬肉丸、魚皮絞、麵類、蔬菜。熱盤...白切雞、鹵水鵝、辣青螺、肉醬芝士麵、芝士焗椰菜花、蝦丸、薯角.....仲有幾款，忘記了，因為我冇食。有cold cut、沙律區、芝士區、煙三文魚。甜品區....小型甜品(細過麻雀size)，但全部蛋糕的質感都似慕士，淋pat pat，我生平最憎食慕士蛋糕既野，但冇得簡，都試下啦！有一款甜品係好食既，我都唔想晒野，但真係食唔落，試了一口就停了。仲有豆腐花、中式糖水。餐湯類....得兩款，中式湯和忌廉磨菇湯，我飲左磨菇湯，我平時在街外餐廳飲好好飲，但估唔到酒店既磨菇湯不及小餐廳，好彩我盛了1/3碗份量，我只飲了幾啖就放棄了。雪糕....有H字頭，有雲尼拿、士多啤梨、香蕉味道。最令我滿意的只有乳酪雪糕，自己整在雪糕筒食，我食左兩支，酸酸地，好開胃。冇飲品供應，只有餐茶一杯。大致上係咁樣，如有遺留，敬請酒店原諒！主菜簡選了鱸魚和大蝦，鱸魚好好好好食，大家可以選這個主菜，大蝦一般，都彈牙的，但冇驚喜。好彩有5折優惠，如果冇，真係唔值得黎食，款式太少了，而且食物味道真係麻麻。…Read More

在太古想搵一間高級一些的食肆慶祝生日，睇到呢間食肆既食物相片幾吸引，於是就去試菜。法式洋蔥湯好咸，我已算是食濃味的人，我都覺得偏咸了，而且洋蔥味不足，不是很好飲。蕃茄薯仔湯，朋友飲的，他形容味道不過不失。沙律醬汁算幾惹味，這個可以合格。龍蝦汁太稀了，根本食唔到係龍蝦味，扁意粉煮得剛剛好，有口感。慢煮豬扒，應該唔會過火，但我食到肉質鞋鞋地，又唔係話成塊都鞋既，有些部位鞋囉！薯角煎得幾香口、唔錯。朱古力心太軟，切開朱古力冇流出來，差少少，大致上味道都合格。我食既係set dinner，但因為唔食牛既關係，同店員商量了，可否轉豬扒，達成後補多$10，值得一讚店員懂得隨時應變去滿足客人需求這才是優秀的服務。雖然食物味道不算很好，但這餐飯我亦滿心歡喜了。這間食肆識得睇客人進食程度黎上菜，我覺得好貼心，上菜是十分正規，麵包、餐湯、沙津、主菜、甜品，次序完全冇錯，所以我都比佢「高級」兩個字。我去一些高級食肆，唔平的，佢地煮好乜，就上乜比客人食，沙律可以上完主菜後先至黎，將全部既野堆埋一齊黎，攪到成張枱都係食物，亦都凍晒，簡直就係不知所謂，除非係食物特別好食，否則呢D食肆我都唔會有回頭。…Read More

係油麻地返學，除左食茶餐廳，真係好想食下其它野，無意之中睇到食評對呢間車仔麵店讚不絕口，於是今晚經過就黎試下。三個餸就$37，但我點左蝦條要加多一蚊，又點左豬大腸又加多一蚊，所以埋單要$39囉！其實我仲想食好多餸，每加一個餸就七蚊，但今次我想試試佢係咪真材實料咁好食先，如果“正”下次先至加餸。果然好味呀！我最鍾意豬大腸，真係非常之入味！呢一蚊比得非常值得，我誠意推介大家一定要點豬大腸黎食，湯底都好好味，服務員仲好細心問我要唔要辣，我就話要小小辣，蝦條都好食，牛栢葉正常，仲有兩條生菜比你，我諗我下次去食，會叫一些需要煮得入味既餸食，因為佢地真係做得好好，我會再繼續幫襯架！…Read More

原本係諗住去和田日本料理食放題，點知結業了!勁失望，天寒地凍又唔想再周圍搵野食，於是就索性就決定食呢間! 不過......我諗我自己一次性幫襯，應該唔會再回頭嘞!《窩貼大明蝦1碟6件》4個餸之中，我和男朋友都話呢碟係最好，在我角度黎講，比起鳳城既更好，不過價錢偏貴，睇大家捨唔捨得食，質素和價錢成正比既，我誠意推介。《鮑汁北菰鵝掌煲》其實我係想比3粒半星，不過冇得簡，$158只得4雙鵝掌，仲要唔係全隻完整，4隻冬菇和一些生菜煎底，鵝掌係淋既，冬菇大隻爽口，都比佢過關啦！我都係有果句講果句既人，唔會刻意踩別人。《荔芋油鴨煲》比起出面食既，佢好似比較多汁(希左D)，我自己偏愛杰身一些，芋頭和油鴨都唔差，偏鹹一些，因為我地唔食飯，所以朋友會更覺得鹹了一點，但油鴨就係咁樣鹹香味道，OK la.....《椒鹽鮮魷》$118比起大排檔，價錢貴了好多，而且份量太少，早知唔叫，質素可以，鑊氣當然冇大排檔咁正啦！《黑椒金菰肥牛煲》原先我係點了這個餸先，取消後才改叫《荔芋油鴨煲》，點解要取消呢？話明肥牛，唔知點解D筋仲大塊過牛肉，仲要係韌到咬唔開有相片為證呀！仲要...仲要唔係一件，如果係只有一件我都放過佢，我夾起每一件都係筋大塊過牛肉部份，所以即刻叫...人來 投訴! 我話一係幫我換過佢，一係取消佢，如果我唔出聲，呢筆錢就食到背脊骨落，浪費金錢! 投訴比主管聽時(白色衫)，佢唔係企定定聽完客人投訴，而係攞個煲一唔行一路講，完全冇禮貌可言，我未曾遇過咁既服務員，真係大開眼介! 未描述完個餸，話明黑椒，完全冇黑椒味，只有金菰和牙菜，仲要比D咁既筋肉人肥牛你食，咁呢碟野，佢都真係好好賺囉！所以大家千祈要留神呀! 吉野家既肥牛好食過佢好多囉！我諗香港仲有好多好味既酒樓和餐廳選擇囉！真係唔好預我會返轉頭幫襯了!…Read More

拉麵對我個人來說，唔係太偏愛，因為我要求高，所以都冇乜麵館可以做到我生意，更何況要成百元食一碗麵，更加要慎重去選擇啦！當然在日本當地食拉麵就最好不過啦！呢間日本拉麵館勁多人去食，又勁多人讚，咁我又去睇下係咪咁堅料啦！朋友食有海苔既，有三塊大紫菜，比多$10，都算抵既! 而我自己就唔要紫菜，麵既份量唔多，女人可能夠食，但我個人來說唔飽，男人一碗就更加唔夠飽啦！湯底我覺得偏鹹了少少，但朋友話OK，麵質彈牙程度還算可以吧！不過不失啦！塊叉燒就軟淋，好食，又有肉味，半熟蛋可以，冇驚喜!$35只有5隻餃子，$7一隻都算貴，餃子入口都軟綿綿，口感唔錯，味道都算幾好! 值得一試。總括來說，我是因為食評而去食的，整體方面我會比3/5，因為我太高要求了，所以食過這間拉麵館，亦覺得冇乜特別，冇乜野值得我難忘，所以嘗試過就算了，返兜指數.....唔好意思係 0。…Read More

係一個朋友食過好多間酒店，佢話印象之中呢間係佢食過既最多款式既buffet，而今次因為朋友生日，所以我請左佢黎呢間酒店試一試！嘩！唔黎過真係唔知呀！ 淨係食自助午餐都咁多野食，我未食過一間午餐都咁多款式呀！熱盤又多又好食，甜品又係勁多又係好好食，唉…我個胃唔爭氣啦！食唔到好多碟呀！午餐居然有生蠔，你話有幾抵呢！應有盡有，我已經係選擇性黎食，否則我真係行唔到嘞！有好多野我都未食，就已經攬住個肚了！好飽呀！$318仲要用埋coupon添，簡直人都巔呀！ 抵食到呢……我以後有乜野聚會都要簡呢間！希望讚完紅磡海逸酒店，佢唔好加價啦！因為我覺得好抵食，所以將來大把機會都會再食佢。我食完呢餐午餐，飽到晚上都食唔落飯呀！簡直一餐當兩餐。朋友食完呢餐，非常滿意我呢餐生日飯，勁開心，我都好開心喔！誠意推薦大家去食呢間自助餐，好多好多野食啊！我唔影相嘞！因為我掛住食野，唔得閒影相，而且我都見有好多食評家都有放相片，所以我唔放了！…Read More

情人節又唔想成日鋸扒，於是簡左呢間有名既李公館食飯慶祝，睇相見到好多特色招牌菜，真係好想食晒 ，不過2個人食唔到咁多啊！唯有試住一部份先啦！【黃金脆啤梨】4個好大既金色啤梨形狀，配上一碟芥辣沙律醬點黎食，非常夾！啤梨叮係用金針去整，好似呀！😁 成個啤梨都係用蝦膠去做架，所以好彈牙，好好食！中間釀左蟹籽、啤梨肉粒和芥辣沙律醬，食一個實在太滿足了！不過我地2個人就每人食左2個，所以好飽喔！建議每人食一個夠了，否則食唔落其他餸。😥😥【翡翠鮑汁百靈菇伴柚皮鵝掌】呢碟餸有4樣食物，等我逐一介紹先，首先講(1)鵝掌，入口溶化，好入味，好好食，配埋個獻汁一流呀！👍👍 (2) 百靈菇，嘩……我好似從來未食過咁好食既菇，原來佢叫百靈菇，唔知自己買黎整有冇咁好食呢？點好食呢？大大塊，爽口到不得了，唔講……我仲以為自己食緊鮑魚呀！我覺得佢仲好食過鮑魚呀！我都想搵地方買呢隻百靈菇食呀！不過唔知去邊度買？🤔🤔 (3) 小唐菜，話說我係一個最憎食小唐菜既人，因為唔好食，一般酒家都係炒或白灼，只會係食到淋pat pat既口感，所以我從來都唔鍾意食，但今晚都比面食一條菜啦！嘩……食落去，不得了！😲😲 點解可以整到咁好食既？我一定要講得尸詳細啲比大家知，小唐菜係白灼煮法，口感係勁爽口，係咪覺得好出奇，我用“爽口”去形容小唐菜，因為佢真係爽口，而唔係一般酒家果種淋pat pat呀！但佢係全熟，而唔係未熟既果種脆身，我從來都未食過咁好食既小唐菜，我係一個最最最憎食小唐菜既人，但今晚我係搶住啲小唐菜黎食，太太太好味了，我相信搵唔到第二間整得咁好食！😋👅❤ (4) 柚皮，整得都好食，冇乜苦澀味，差在冇蝦籽撒上面，否則就完美嘞！【蟹粉蛋白金苗盞】呢碟餸，我係因為睇左其他食評家話好食，因為一口咬落有3種唔同層次既口感，所以我就想試一試有幾奇妙啦！但我個人既感覺，又唔係咁好食啫，一來蟹粉味道好淡，雖然蟹粉好大碟，但每次放上面既份量不能太多，否則會滿瀉晒出來，好似米通既苗盞，就唔會太脆身，可能係特登整成咁，方便食。唔係太惹味，又淡，又唔覺得好似人地話齋，有不同層次既口感，所以食唔晒，食剩2塊和一大碟蟹粉囉！【湘式牛展】黎到時，每一塊咬落都有雪，應該係雪櫃攞出來切，就攞出來比我地食，食落口好凍，雖然係有美中不足，但勝在牛展入味，每塊肉質都好食，所以都比佢合格啦！【芥香木耳伴海蜇】雖然係小食，但海蜇太細塊了，攪到冇乜咬口，木耳爽口，但唔覺得特別好食，我屋企既貓耳朵雲耳好食過佢多多聲，整體麻麻地，食唔晒，剩番半碟！原本我要叫冰陣排骨架，因為最想試，但服務員話驚我地2個人食唔晒咁多餸，所以建議我地唔好叫呢碟了，因為有成12塊小金沙骨既size，我都好感謝服務員既誠懇建議，收尾我地冇叫到，已經好飽了！因為食左2個黃金啤梨呀！頂住個肚，但我真係好想食個冰陣排骨囉！等幾時又再去食喎……都無解既！😢😢…Read More

今日搵地方食午餐，知道呢間野存在好耐，但一直未有心去試，因為今日實在冇其他選擇，所以一登門去嘗試下掂唔掂！【順化香茅豬扒湯河】湯底好味，河粉份量都好多，豬扒入味，軟淋淋，好好食，唔怪得在場食客大多數都係食豬扒。【順化香茅牛肉撈檬】好大碗，檬粉份量都係好多，十分足夠，牛肉……粉醬多左少少，冇牛肉味，但唔韌，叫錯呢樣野，應該要食生牛肉湯河，因為我聽到好多人食生牛肉湯河，咁應該係招牌野好食啲囉！【越北炸春卷】食午餐可以用$12升級，有2條，我見有2條才叫，點知黎到原來係1條剪開2段，真係文字誤導人，早知唔叫啦！味道可以，典型既越南春卷。【越式炸蝦餅】食午餐可以用$28升級，份量好少，好細塊，蝦餅好似比人抽乾晒水份咁樣，唔知係度食緊乜，冇蝦味，應該粉多過蝦，仲要$28添，早知就唔叫呢個乾煎蝦餅啦！仲有一杯奶茶……但完全唔好飲，唔似係奶茶囉！一杯係熱鹹檸水……完全係一杯無誠意既飲品。2人食了$140…Read More

約朋友食午餐，又想食咸，又想食甜，偶然間係openrice搵到呢間，所以就book位嘗試一下，見到有網上訂位，實在太歡喜，方便快捷，點知仲有驚喜，原來網上訂位有9折優惠，實在一石二鳥，好開心！【煙肉忌廉蘑菇湯】食set lunch只要加$10，就可以選擇多一個湯飲，好滑、好香，我自己就好喜歡嘞。朋友話好重牛油味喎。【豬扒配蘆筍薯蓉蘑菇汁】呢個係是日廚師選午餐，最平的$58，開頭以為唔好食，點知食落有驚喜，豬扒好淋、好入味、好有咬口，蘑菇汁配得好，小蘆筍非常幼嫩好食，最平果道菜，確實唔hea，抵食好味，好抵讚。【香煎魚柳配蘆笋筍薯蓉香草忌廉芝士汁】魚柳反而普通，炸魚本應是脆身，但出到黎已經成塊淋pat pat了！唔係我想像之中既形狀和味道，忌廉芝士汁亦唔出色，冇香味，早知選第二個午餐啦！【宇治抹茶紅豆卷、字治抹茶雪糕、梳乎窩夫】朋友選了這3款【宇治抹茶窩夫、宇治抹茶紅豆卷、法式梳乎蛋多士】我就簡左呢3款，食套餐只要加$28就可以選3款甜品，我地當然用盡quota啦！最好食係抹茶雪糕，因為抹茶味都幾濃，香滑，其次是窩夫，紅豆卷較為迷你，味道麻麻地，至於梳乎蛋多士我見有食評家推薦咪諗住試下囉！但味道普通，好似平時食既麵包布甸既口感，我認為可以選擇其他甜品好啲！總括黎講，食物味道都好食，甜品更加抵食，價錢大眾化，非常經濟，但希望甜品keep住呢個價錢唔好再加價，實在約$9一件小型蛋糕味道跟價錢成正比，只係為左飯後有些甜品過下口忍，如果再貴啲既話，我就未必會食囉！如果我有經過，而又冇其他選擇的話，我會再次幫襯架！大家未試過，推薦一試！2個人食了$212…Read More

朋友們生日會，選左呢間食飯，位置非常方便，就在旺角E2出口左手邊的大廈，初頭以為是一間普通的酒樓，入到去坐低後，細心留意周圍的裝修，原來都幾有氣派，環境舒適，仲有2層樓之大，又有好多卡位，係一個唔錯既選擇，下次要試下黎飲茶，因為見到點心既圖片都好吸引，多個選擇比自己嘛！【龍閣燒鵝皇半隻】盛盤下面有2個蠟燭仔，令燒鵝保持溫熱，亦唔會令油份變油膏，非常細心，燒鵝皮仍然有脆身，皮層下有一層肥膏，少少遜色，味道香濃，整體算唔錯，但不是最好。【風味黑椒豬手煲】睇見都感覺到骨膠原啊！切開後，除左皮之外，冇多餘既肥脂，全部都係瘦肉，皮層嫰滑，非常入味，雖然係黑椒，但一啲都唔覺得辣味，$88這個價錢，算係幾抵食了！【鮮露筍蝦球玉帶】原本可以攞5星星，但我比分較為嚴格，蝦球頗為大隻，非常非常之彈牙，好味極了。當中有4隻蝦、4粒帶子和露筍，我扣分是蝦隻太少了，我們8個人怎分配4隻蝦呢？所以有些人不能享受到鮮蝦既彈牙美味，而露筍……我厭佢稍稍淋身左少少，唔夠爽口，雖然份量攞唔足滿分，但值得推薦這道菜式。【脆米安格斯牛柳粒】入面有牛柳粒、雞脾菇切粒、冬菇切粒和少少脆米點綴，牛柳粒好稔，一啲都唔韌，菇粒配搭好夾，醬汁非常出色，份量適中，喜歡食牛的朋友，係一個幾好既選擇。【啫啫芥蘭蝦干煲】芥蘭軟硬程度適中、入味、碎肉和蝦干亦非常出色，唔會太咸，朋友們都將全煲的碎肉照鏡了，可想而知這道菜的吸引程度呢！【花膠金錢海參煲】其實我不太建議朋友叫這道菜，因為樣樣都有既時候，就可想而知東西是不會太好，我原先建議是紅腰豆海參，可惜意見不接納呢！海參是稔pat pat，而且極細條，花膠亦係好細，金錢更加。。所以我還是不評述了！【麵醬勝瓜黑豚肉片】只看外表，就已經唔吸引了！勝瓜炒得唔翠綠，肉片冇驚喜，這道菜似家常小菜，似媽媽煮出來的模樣，但如果出自大酒樓，這道菜便不合格了，因為色、香、味，已經首先缺乏了食慾既……色了！【藍莓鮮淮山】未食過藍莓汁配上淮山，所以特意叫來品嚐一下，原來都幾得意，淮山本身冇味，配以香味既藍莓，甜甜地，好特別呀！原本叫左2道甜品，但落單後半小時都未黎，最後取消佢囉！原來有生意都唔做，所以呢……Read More

跟朋友相約在九龍塘食野，好幾間食肆選擇，最後決定食呢間，因為價錢抵，食物質素都見食評話好有保證，試過之後，都係預期中，環境坐得好舒服，枱與枱之間有距離，傾計唔會咁容易比人聽到，有私隱。【燒蝦柚子沙律】朋友本身想叫有沙律菜果款，點知黎到原來係咁樣，叫錯左，但都要照食啦！燒蝦size中型，非常之彈牙好味，但只有2隻，一人一隻，實在唔夠喉呀！柚子味道清甜，可惜份量太少了！呢次係誤解之下叫錯，如果68蚊呢個價錢，我就唔會簡柚子沙律了！因為份量太少，貴係貴在2隻蝦身上囉！【香芒米紙卷】選擇呢個係因為見到相片好靚，所以我要叫來試下，薄薄既米紙包住全部蔬菜既切絲，當中有甘筍絲、白蘿蔔絲、棗紅色那個我唔知係乜東東呀！仲有芒果肉、同埋一片唔知係生菜，還是係薄荷葉呢？因為冇拆開研究。然後點芒果醬來食，所有蔬菜絲都係爽口的，點埋個汁，成件事好清新，好好味！原來咁簡單既食材用米紙包起來食，可以咁好食喎！所以呢個菜式，我一定會係屋企自己整黎食，真係入口非常之fresh架！不過我好想知道棗紅色切絲係乜野蔬菜囉？【鮮茄水牛芝士薄餅】叫呢款薄餅係因為我鍾意食芝士，齋pizza，只有蕃茄片、蕃茄醬、水牛芝士組成，咁簡單既組合，但出來既味道好好食，水牛芝士非常軟滑，薄餅軟淋淋，朋友未食過，都讚原來齋薄餅都咁好食喎！【酸果出擊】呢杯野由橙、西柚、紅蘋果、百里香、檸檬組成，飲落唔會太酸，好開胃、清新既感覺，係一個唔錯既選擇！如果約朋友傾計食野，呢間exp係一個好既選擇，我會再次幫襯既餐廳2個人食左$308…Read More

偶然之下，搵到呢間餐廳，見到食評都唔錯，食物相片亦都吸引，加上又有位，所以就簡左呢間餐廳食野，抱住開心既心情去食，可惜味道都係參半，一些水準正常，一些就難食，所以每間餐廳都要一試才可下定論。【西班牙沙律】大家可以見到由粟米、蕃茄粒、青瓜粒、紫椰菜、青椒、紫洋蔥、2條類似煙仔餅而組成的沙律，另上的甜辣汁，沙律汁都幾辣，唔食得辣既人最好另外用碟上，至於呢個蔬菜沙律，本人食完一次唔會再幫襯，因為用以上既材料組成的，又何來值$118的價錢呢？我見到其他枱都食唔晒，估計應該係放棄了！【牛肉墨西哥玉米片】味道還可以，惹味，但我厭佢餡料芝士不夠，不能覆蓋每一塊都沾有，所以美中不足。【King Crab Legs Spaghetti】呢個意粉好少人叫，但我見到又蕃茄又奶油組成的醬汁，所以我想試下，味道係幾得意，有意外驚喜，有蕃茄甜味有辣味有奶油味，幾種味道集合而成，蟹肉就有鹹味，但好難開，即使有鋏，都開不成，因為蟹殼係軟身的，所以我用了餐刀鎅開佢，好牙煙架，而且食到成手都係汁液，好鬧攪！【芝士龍蝦忌廉飯】我見食評好多人都讚口不絕 又埋晒5粒星星，咁我當然就要叫啦！點知就上當了！先講龍蝦有半邊，龍蝦肉都彈牙既，仲有膏添，味道唔錯，但啲飯就幣家伙了，我唔知係咪廚師煮野唔得穩定，點解我果碟飯硬身到不得了，好似半熟咁，非常韌胃，食完到第二朝都未消化完，但我見有些食評讚不絕口，究竟係我唔好彩？還是食評各有出入呢？飯都食剩一半，因為太硬了，費時令胃部負荷過重。還是建議食芝士龍蝦意粉吧！【青檸蜜桃沙冰】呢杯野，最唔掂，見佢好似大大杯，好抵！可惜淡某某呢！唔知係我叫左青檸味，所以淡到無論，還是本身問題，好似飲緊檸檬汁+幾粒罐頭蜜桃+沙冰，既味覺，唉…我都算唔好彩，叫左5樣野，有3樣都唔好食！浪費我既金錢。冇下次啦！2人食了$730…Read More

平時幫襯開筲箕灣越華會，冇左之後第一次去銅鑼灣分店食，一踏入餐廳既感覺，覺得好乾淨，晚上6：40到達，服務員話冇訂位，需要在8點前交枱，因為我主要同媽媽去食晚飯，所以我答應冇問題，食完即走了，反正我都要返屋企睇電視。睇到個餐牌，覺得樣樣野都好好食，於是乎叫了4個餸。叫餸後，唔洗10分鐘就即刻上菜，效率好驚人，係越華會食飯，相信一定唔洗催單，又唔會漏單，一碟接住一碟好快上菜，我都明白老闆既心態，快啲上菜，快啲食完，再做下一枱客，理所當然的，你上菜上得快，我又配合你食飯食得快，唔阻你做生意。【蔥油走地雞】真係好多蔥呀！我平時唔多食蔥，但呢碟係佢既招牌菜，所以我都照食啦！雖然明知係冰鮮雞，但啲雞整得幾好食，鹹香味，加埋啲蔥食，好香既蔥油味。【脆皮炸豆腐】外脆內軟既豆腐，一直係我在越華會食到既味道，好鍾意食，可惜自己有辦法煮到，所以要幫襯人地。【窩貼蝦多士】從未見過咁大塊蝦多士，仲大過隻碗 其實麵包係好平，所以越華會比到咁大塊多士顧客食，佢都明白顧客既心理，我地消費者都會覺得好抵食，所以呢方面越華會好聰明，炸得好香口，唔覺油膩，蝦肉夠多，而且彈牙，附上沙律醬，喜歡的可以點來食，唔錯呀！多人食既話，每人可以分一塊，食左好滿足了！【咸蛋黃炒涼瓜】係我人生中第一次食呢個餸係在東來順餐館食到，佢地切涼瓜既size，我認為岩岩好，大約4x5cm般大，唔大唔細，而咸蛋黃既份量係薄薄地一層包住涼瓜，唔會太厚，唔覺太膩，我食完一件接一件，味道好食到令我唔會忘記佢既呢碟餸。至於越華會……我覺得呢碟餸比較失水準了！首先涼瓜切得太細條太幼身了，然後咸蛋黃太多粉漿太厚，好似咸蛋粉漿奪去主角涼瓜既味道，再者，粉漿好多油在裡面，食完2條已經覺膩，之後食唔晒，我地都拆開粉漿，只食涼瓜條，唔好浪費嘛！比我感覺……涼瓜切得咁細條，感覺比我好小家，唔得大方，涼瓜唔係貴，可以既話，切大塊一些啲比人食，咸蛋黃唔洗太厚，其實食咸蛋黃本身已經唔太健康了，但又想食，所以最好就係薄薄地一層包住就最好了！最後，想讚一讚越華會，有餸菜食唔晒，我需要打包，取盒仔，詢問幾多錢一個？因為唔同餐館都有唔同外賣盒價錢，服務員居然答我……唔洗收錢，我當唐好驚訝！殺那間……我覺得越華會老闆好似天使，而且在發泡膠盒裡舖上一層錫紙，太窩心了！當然我唔會濫用外賣盒，我都知要環保，所以我只攞一個盒盛有汁既餸，我自己有保鮮袋，用來盛放乾身的食物，因為我都係環保使者，原先應該要自備外賣盒，但我冇諗過呢一餐會食唔晒啲食物，所以冇自備囉！曾經去過一些餐館，外賣盒需要$3一個，我眼都突埋，後來向服務員了解後，才明白餐館既出發點，都係唔想食客濫用外賣盒，一小件都話要用個盒來盛，知道$3個咁貴，就現場食埋果一件兩件囉！…Read More

今日唔想去太遠食飯，諗住近近地，就簡左呢間食晚飯啦！點知就出事了！阿媽鍾意食乳鴿，所以叫左一隻，味道一般水準啦！不過不失。芝士味好淡，太少汁，攪到伊麵醮唔到芝士汁，太乾身，好難食，帶子細粒到不存在也不覺得可惜，蝦球比想像之中大粒，彈牙，就係芝士汁太杰身，呢方面差了少少。有帶子$68，冇帶子$48，如果我一早知道帶子係細粒又薄痴痴既話，我就叫冇帶子，慳返$20啦！我不嬲都好鍾意食呢道菜式，貪佢夠鬆化，佢整得唔錯，假如$48就可以食到，係值得食既，大家可以試試。呢碟小菜最失敗，魚肚鬆泡泡，好似食緊發漲既豬皮，冇味道，鵝掌爛晒，4隻冇一隻係完整，而且質感難食，冬菇厚身可取，底下有些蔬菜，但淡而無味，同樣一味餸，譽宴好食到暈底，呢間就覺得好後悔叫左呢個餸。…Read More