thirty5ive的個人專頁

話說琴晚尖沙咀行完街，唔知食乜野好，於是到山林道睇睇。一路行到街尾見到呢間食放題好似都ok，條街好熱三十幾度熱到爆炸，唔想再行，就入左去。入到去所有野都ok，同一般日式放題食肆無分別。近門口有三隻龜迫喺個細缸游都游唔到幾得意。坐低拿拿臨Tick左紙叫野食。沙律小食好快上，食左無幾耐，戲肉來了。突然聽到隔離枱兩個人大叫，之後眼尾瞥見一大隻野從天而降，右手上臂感到有幾隻腳在上面。冷不提防，以為是大蜘蛛，慌亂之際用急忙揮動手臂，隻野跌落左大脾，電光火石間用手一撥，隻野跌落地上終於看到真身——手指公咁大飛曱甴。隻大飛曱甴極速爬過隔離屏風。有個似係話事人當時喺隔離執緊碗碟，以為佢會打，點知佢視若無到，直至我地兩張枱都同佢講佢先有反應，曱甴已經唔知喺邊。佢只係一味話作打風d曱甴又坑渠走出來，無其他表示。同行既女仔已經嚇得花容失色。1分鐘唔夠見到隻飛曱甴返轉頭，佢被嚇到彈到隔離枱。我一個箭步上前將隻大曱甴踩死。最驚既係轉頭個話事人同我地講話唔使驚，佢已經打死左隻曱甴，我望過去，見到另一隻細好多既死曱甴。原本好開心可以食大餐，點知咁既情況食龍肉都無味。之後d侍應就一直打曱甴，長打長有，一路打一路爆粗，打到興起，佢地勁興奮。一齊既女仔問我點解咁靜，其實心入面好內疚帶左佢去咁既餐廳，要佢咁驚，好對佢唔住。食左好少野就走，邊度食得落，仲要收我地兩個人六百幾。一定唔會再去。10粒星推介給曱甴愛好者，可以睇到曱甴滿天飛壯觀奇景。…查看更多