iamsofina的個人專頁

阿德係紅磡數一數二既街坊飯堂，尤其下午茶時段更加經常見到好多街坊係入面嘆tea hea下！由$24下午茶食到依家$33，咁多年都仍然照舊order咖哩雞扒飯同肉燥飯！咖哩雞扒飯既雞扒好大隻，咖哩唔係紅橙色辣個種，而係加左椰汁落去變成淺黃色帶甜同椰香既咖哩，送飯認真一流！肉燥飯無論飯量同肉燥量都好多，佢既肉燥同台灣既有小小唔同，肉燥比較深色同埋細粒，多左一種香口之餘仲帶點八角香料味道。肉燥撈飯又係另一好味推介！以下午茶計既話，真係好夠份量好飽肚！再跟一杯餐飲，屬於抵食之選！…查看更多

以前喺紅磡成日食福元湯圓，但自從佢執左之後就無再食過喇！今次嚟天后食晚餐前諗住食下佢嘅湯圓一嘗番以前嘅味道！叫左駌鴦湯圓可以一次過試哂芝麻同花生口味！湯圓好大粒，粒粒望落都好飽滿！一碗一共有5粒2種口味，第一啖飲薑湯水，嘩好夠薑！對於我呢種勁鐘意濃濃薑味嘅人，呢碗薑糖水簡直係無得彈啊！每飲一啖都覺得好暖身好健康！如果你都鐘意飲好薑嘅一定要試！湯圓皮薄身，咬落好軟綿綿！無論芝麻同花生都做到流心效果，唔似出面有d鋪頭好硬實！2種口味都好香好有口感，個人比較鐘意芝麻！…查看更多

嚟親九龍城主要都係食泰國菜，不過今次行行下竟然見到呢間豆類製品嘅老鋪，仲見到煎釀豆腐即刻忍唔住入去坐低慢慢嘆！店鋪唔算好大，陸續有客人入嚟食，門口外賣仲keep住做唔停，睇嚟呢間店都幾受街坊歡迎！2個人叫咗份$20青椒3寶同一碗$9熱豆腐花，唔洗3分鐘就上枱喇！（1）青椒3寶煎釀豆腐、煎釀茄子同煎釀青椒各2，即叫即炸熱辣辣，仲要好大份啊！個人認為雖然煎釀豆腐豆味無想像咁濃郁，但煎得好香好脆配埋個好好味嘅豉油汁$20真係好抵食啊！（2）熱豆腐花上面有落埋黃糖，唔算好熱但豆腐花好滑身食落味道未夠濃但每一啖都有淡淡嘅豆香！成間店好人情味感覺，聽到有街坊一口氣買咗7杯唔同口味嘅大菜糕，下次一於試下先！…查看更多

舊區土瓜灣一直有唔少街坊食堂，今日就介紹一下開咗唔係好耐但係值得一試嘅水餃店！食物選擇唔算好多，但勝在價錢平之餘味道真係好好味㗎！（1）8隻雙併蒸餃揀左雙併餃子：韭菜豬肉餃同椰菜雲耳餃各4隻！落完單唔夠5分鐘就有得食喇！餃子皮唔會太厚，料相當足仲幾大隻！好多餃子店通常都係湯餃或煎餃，好少會有蒸餃選擇，覺得蒸餃其實比湯同煎更好味！個人最推介係椰菜雲耳豬肉餃，食落好鮮甜juicy！8隻餃子都係$22超抵食啊，如果再熱少少就更加好喇！…查看更多

喺黃埔地鐡站對出新開咗呢間功夫點心，返工前諗住飲個快茶試新嘢，不過食完比較失望，真係食一次就夠！（1）蘿蔔糕算足料而且幾香，不過比較油，食落又太過硬身，覺得普通。（2）限量供應嘅黑芝麻松皮包諗住有驚喜，點止個包好乾身而且偏苦，味道有啲怪！（3）濃湯魚肚鮮竹卷味道好淡，而且餡料好似痴埋一齊咁，咬落口感麻麻。（4）燒賣大大粒味道唔錯，而且可以最少叫2粒，1粒$9，2個人食就可以唔洗叫咁多，留番肚食其他！…查看更多

Lunch同同事嚟食韓國菜，之前食過幾次Lunch menu好似改咗，啲菜式名變得好搞笑！（1）卡邦尼年糕 $68次次嚟到一定會叫呢個年糕，卡邦尼汁好濃郁配埋煙un年糕同埋粉絲，真係估唔到卡邦尼汁同韓國年糕都咁夾！食其他菜時都點下呢個汁嚟食！（2）韓國寵寵拌飯 $88有魚仔、肉撈埋泡菜同其他配菜一齊食，個人覺得偏咸，不過魚仔咬落幾有口感，份量都ok！（3）烏卒卒飯捲 $75好有特色嘅飯捲，用墨魚汁加上墨魚，墨魚好彈牙，味道都唔錯！…查看更多

今晚嚟到尖沙咀韓國街附近，見到呢間上海小食店keep住有人入去食，咁就跟住行入去試新嘢喇！店內坐位唔多，最多坐到10個人左右，牆上貼住好多明星光顧嘅合照，成間店好懷舊！（1）東坡肉擔擔麵 $48擔擔麵好有驚喜！食落麵條彈牙煙韌之餘，湯底花生味好濃，加埋勁香蝦味嘅配醬口感好豐富！東坡肉好入味，唔會好肥！（2）正宗北京水餃雙拼白菜香菇水餃 $44一嚟到見到咁大碗覺得好足料，每款有4粒共8粒，粒粒都好大粒皮身較厚！正宗北京水餃餡料係韭菜加肉，食落好香韭菜味，不過略嫌偏咸。（3）蕃薯豆沙 $223粒大大粒即叫即炸上枱熱騰騰，紅豆味道唔會太甜，好香口而且仲見到有蕃薯絲，做飯口甜品嘅唔錯選擇！2個人食完勁飽，最值得一試嘅首推擔擔麵！…查看更多

收工同朋友嚟試吓呢間未食過嘅大長今，店內地方唔大，最多只可以坐到十幾人，門口仲有2張對街嘅枱。可能正直食飯時間，入面full哂，我哋就揀咗坐出面，成餐飯有涼風吹拂反而好舒服！老闆娘아줌마 好親切，一個人落單、送餐、收錢、執枱一腳踢！佢用簡單英文幫我哋落單之後仲比咗壺水同杯我哋，好似去咗韓國咁啊！（1）前菜前菜分別有泡菜、薯仔同波菜，樣樣味道都好正宗！個人最鐘意呢到泡菜唔酸而且辣味夠出，咬落爽囗，送飯一流！另外薯仔好有驚喜，甜甜哋好好味，仲要一啲都唔粉！最重要最重要最重要係有得refill！（2）海鮮辣豆腐湯豆腐湯跟一碗白飯，同想像有小小唔同，唔係辣濃味個種，味道反而清甜偏淡，但夠足料有豆腐、蝦、雞蛋、芽菜、翠玉瓜等。（3）豬肉雞肉牛肉烤肉拼盤同白飯一齊送嚟，好香，份量都算OK！正宗韓式烤肉味道，入口甜甜哋！不過可能坐係出面，個拼盤好快就凍咗，如果趁熱食應該會好味啲！今日天氣好清涼，坐係出面食好舒服！無論環境、食物都好有韓國家庭式小店感覺，會為咗個可以refill嘅泡菜再嚟食！…查看更多

紅磡有好多糖水店，無論新式糖水定傳統糖水都有好多選擇！今次要推介嘅呢間糖水店開咗唔夠一年，但已經晚晚都有唔少街坊喺門口排哂隊！自從試過一次之後，嚟親紅磡都必定嚟食，因為好味足料、價錢超平、人情味濃啊！（1）桑寄生蓮子蛋茶 $20記得開店初期去親源記都係叫蕃薯糖水，到後嚟佢地新推出呢個桑寄生蓮子蛋茶後，即刻榮升為我嘅最最最愛！每次必叫走蛋多蓮子，蓮子好甜份量好足，一碗起碼有十幾粒！而且桑寄生味好濃，加埋紅棗、龍眼肉，真係好啱女士們，飲完成個人感覺好健康！（2）泰式鳳爪 $30源味雖然主要賣傳統糖水，不過佢嘅自家製小食一樣做得非常出色！呢個泰式鳳爪酸度同辣度適中，咬落好彈牙，入味之餘夠新鮮夠開胃！（3）蕃薯糖水 $13呢碗蕃薯糖水真係充飢恩物！$13有咁多舊蕃薯，真材實料好抵食！而且佢嘅薑味好濃郁，唔會過甜過辣。源味雖然地方細細，但人情味濃，員工好有禮貌之餘，老闆同老闆娘周不時會同客人傾計，好親切！從佢哋嘅定價、用心製作、碗碗足料嚟講，真係一間好值得支持嘅小店！…查看更多

星期日晚喺九龍城唱完K，梗係順便去食泰國茶喇！平時嚟九龍城食泰國菜多數食小曼谷或者䧂伯耶，今次就由朋友介紹第一次試隆姐！一行4人咁啱有位唔洗等，見有好多枱客都幾full，而且成間店嘅職員都講泰文，感覺好正宗啊！叫咗馬拉盞炒通菜、炒金邊粉、泰式炸蝦餅、雞肉併豬肉燒烤串、蒜蓉飽同埋一人一杯泰式飲品！（1）馬拉盞炒通菜落咗單5分鐘都無個菜就嚟咗喇！比想像中細碟，幾入味，唔算好辣！（2）炒金邊粉金邊粉賣相唔錯，雖然有小小酸，但都幾香，味道就中規中矩，分量OK，無碟菜咁細碟。（3）泰式炸蝦餅咁多樣菜式入面我最滿意呢個炸蝦餅！佢有5大件每件幫你切開咗一半，細細件方便擺入口！點埋泰式辣醬一齊食，外脆內軟好彈牙，蝦味好出，唔會太油仲好香！（4）雞肉併豬肉燒烤串一共6串，雞肉豬肉各3串。串燒燒得幾好，一啲都唔燶！雞肉質地幾滑咬落唔乾身，不過沙爹醬好浠，味道太淡，食落好似有小小花生粒，個人覺得個沙爹醬可以再濃稠啲！（5）蒜蓉包一共4件，有手掌咁大件之餘夠厚身！咬落都幾脆唔硬，入口好鬆軟，蒜蓉好足料好香！（6）黑珍珠龍眼冰一人一杯泰式飲品我揀咗黑珍珠龍眼冰，好大杯、好足料！好多龍眼肉，黑珍珠幾爽口。如果甜度可以減番小小就好喇！4個人埋單每人都係$87好抵食，有機會可以Encore再食！…查看更多

麥記最近同Kit Kat 合作推出咗一系列綠茶雪糕，身為綠茶控嘅我點可以錯過？諗住去誠品前試下，見到好多人排隊都係叫綠茶新口味，等咗一陣終於到我。同店員講可唔可以加多啲朱古力，佢好有禮貌話無問題！（1）綠茶朱古力新地$8拎到上手成杯綠色好靚啊，而且真係好多朱古力，份量好足好重手！第一啖食落去覺得綠茶味唔夠濃，相比起綠茶，奶味反而過重同埋有啲偏甜。不過加埋朱古力同花生食落都幾好食，$8當下午茶甜品超值！…查看更多

之前同事們食咗紅磡一間新開茶餐廳嘅早餐，個個都對佢杯奶茶讚不絕口！於是趁星期六晏就去試下，茶餐廳店鋪前身係松記糖水，店入面環境好光猛，座位都多同寬落，我諗開咗應該大概有2個月左右。2個人叫咗一個地道常餐同埋香煎雞扒飯配凍檸茶同熱奶茶！侍應用手機幫我哋落單，仲同我地講多謝，好有禮貌！好快野飲嚟到，已經聞到茶香味，先飲一啖熱奶茶果然無令人失望，同事無介紹錯！奶茶茶味好濃，而且仲要幾夠滑，好好飲！（1）地道常餐$35常餐自由配搭，揀咗秘製豬排米粉連炒蛋同牛油多士。米粉上面有豬扒、菜同埋腸仔，豬扒中規中矩，炒蛋滑，牛油多士入面有好多牛油好足料！（2）香煎雞扒飯$35雞扒飯一嚟就嘩咗一聲，覺得好大碟，完全名副其實係飯桶餐！我揀咗洋蔥汁、煎熟蛋，無論飯、汁、蛋同雞扒都好夠份量，仲有埋火腿同午餐肉加一杯嘢飲，$35超抵食！雞扒煎得岩岩好，唔會好老！洋蔥汁散佈每一個角落，味道有小小甜，下次可以少汁。成餐飯最值得推介除咗個杯奶茶之外，就係佢個自家製辣椒醬！試咗一次就返唔到轉頭，味道好似陳記魚蛋個秘製辣汁，唔算好辣但好香！我哋2個人不斷咁唧，就咁撈飯食都好好味！到最後差唔多唧咗成半枝！過嚟紅磡食嘢可以試吓呢間，好味又抵食！…查看更多

何文田勝利道一直都有唔少特色食店，星期五晚就諗住去附近搵下有咩好食！見到呢間食魚生飯、丼飯、鍋物，價錢由$48起覺得都算幾平於是就入去試下。成間店地方唔大，一眼睇哂啊！有3個Bar枱位可以望住街出面，入面座位大概只有10個，加埋鋪出面2個。雖然地方細，坐埋一齊會覺得有小小小迫，不過呢個價錢完全可以接受！2個人唔洗等好快坐低咗，睇下個menu叫左一個牛肉壽喜鍋同埋一個五色丼飯。大概等左一陣五色丼飯連前菜同埋麵豉湯有得食喇！前菜係沙律分量唔多，同麵豉湯一樣普普通通無咩特別。（1）五色丼飯$78 有三文魚、甜蝦、蟹籽、北寄貝、油甘魚刺身係面，賣相幾靚！每款大概有2件左右，連埋飯份量都算OK，男仔食都夠飽！幾款刺身食落都夠新鮮，呢個價錢真係幾抵食！（2）牛肉壽喜鍋$78等咗大概15分鐘左右，壽喜鍋熱喇喇上枱！雖然個賣相麻麻，但趁熱第一啖飲咗佢個湯先，好鮮甜！入面有肥牛、娃娃菜、蛋、獅子狗、金菇、嗚門等，再加碗飯，份量都算幾多！我覺得呢個壽喜鍋幾有驚喜，由於個湯實在太鮮甜所以我連湯都飲哂，食左半碗飯已經飽到上心口！唔怪得有唔少客人都叫左呢個！總括嚟講咁嘅價錢仲要唔洗加一，食到咁嘅質數真係抵食！其他客人主要都係叫角切魚生飯，睇到隔離枱個碗好似好足料，下次有機會再嚟試先！…查看更多