地茂食家的個人專頁

去維園踢波前，唔知食乜好，行尼行去，最終就係揀咗劣食，成日都係咁。門口有個平價D啲嘅餐牌show出嚟，但入到去佢並冇喱個餐牌，而我亦無打算追問，算數，叫咗個約$120嘅牛扒拼煎魚餐。牛扒叫咗7成熟，但用鐵板上到枱已經變全熟，牛扒都好厚，但冇咩肉味，條邊仲煎到好韌！唔好食，煎魚仲差，雖然知道係用雪藏魚扒，但食落D肉係散嘅，而且一路食一路覺得唔妥，完全唔好味，好差，但由於就嚟食完及趕住踢波，向侍應反映過後就埋單走人。一個質素差劣嘅扒餐，比茶餐廳幾十蚊一個嘅仲差，埃......晨早都知此餐廳係劣食，今次真係自作＂業＂。…查看更多

舊區閒遊，睇下有D咩野得意野，見佢貼滿晒雜誌介紹，就入去試下。叫咗個午餐加個豬扒飽，午餐嘅沙爹牛肉麵用咗丁麵，鮮牛肉切得大件，唔錯。牛油餐飽牛油下得夠多，揸滿曬，火煺奄列又係有好多火煺，炒蛋亦好滑。午餐用料充足，味道佳，抵食！唔夠喉再加豬扒飽，嘩！估唔到個飽咁大個！係我食過所有茶餐廳快餐店中最大嘅，豬扒較薄但較一般大塊，仲加有蕃茄同青瓜，好豐富，$17一個係好抵食！據聞蘇屋村就嚟拆，咁要試就要快手喇！ …查看更多

一間門面唔夠光鮮嘅日本料理店，平日行過都唔會入去，但到食飯時間就有好多人排隊，終於搵到日入去試下。叫咗個咖喱炸蠔飯，包一款小食及麵豉湯。小食就叫咗刺身，有三文魚兩件，魷魚、北寄貝、甜蝦及帶子各一件，三文魚好新鮮，厚切，超過1.5cm厚，好！北寄貝同甜蝦都ok，魷魚同帶子就好薄好細塊。麵豉湯其貌不揚，求其搵隻碗裝住，印象欠佳，但飲落又好飲，而且仲有幾隻蜆作料，幾好。咖喱炸蠔飯啲咖喱汁好好味，水準不下於出面名店，炸蠔即炸熱辣辣，好鮮甜，有4隻。全set餐只係$64，好抵食。可以再幫襯嘅。…查看更多

lunch食黎食去都係嗰d野，都幾悶，今次揀左間較小去嘅，冇set lunch選擇下全部a la carte，都幾貴，但味道緊係ok啦，小籠包好多肉汁，皮薄，正！銀絲卷真係一絲絲嘅，生煎包又係有肉汁，肉質鬆化，又唔油膩，一流。擔擔麵辣咗d，都ok。紅油抄手係必叫嘅，小弟唔食得辣都食咗兩隻。價錢唔平，每人平均70幾蚊，但真係一分錢一分貨，可以再去。…查看更多

天朗氣清之下無端落大雨被困新蒲崗，遲曬大到之下唯有放飛機，已經係late嘅lunch自行解決，被困之下已經冇咩選擇，求其入一間當避雨。叫咗個set lunch，有烏冬／刺身／三文魚手卷同飲品。烏冬唔掂，湯底唔得，叉燒好硬，手卷又係唔得，紫菜已經腍晒，咬唔開，三文魚好細舊，裝住手卷嘅木架甩皮甩骨，好核突。刺身就ok，但刺身新鮮就得，冇咩特別。全set野食完都好似冇咩落肚，收60幾蚊係唔抵食。…查看更多

一間經常路過嘅老店，在母親唔得閒嘅母親節，就入去試喇。應下節叫咗個母親節午餐，先嚟羅宋湯及餐包，羅宋湯好飲，冇肉，似雜菜湯，麵包上枱仲係熱辣辣，好，但盛載麵包嘅膠兜似乎核突咗d。主菜係魚柳及牛柳，魚柳一般，已經煎到好乾 ，牛柳就好食，約8成熟，夠腍又有肉汁。最後有餐飲及綠茶雪糕，好豐富。似乎佢啲扒都唔錯，佢店內另僻一角做扒房，有機會真係要再試佢啲牛扒.......…查看更多

舊區閒遊，睇下有咩新奇嘅野，見到蘇杭街新開咗間日本野，又冇咩人，唔使等位，就入去試下。有十幾款午餐便當選擇，咁我就揀咗個燒鰻魚，因為宜家市面上好多燒鰻魚同鰻魚壽司都係唔好食嘅。先上飲品同麵豉湯，然後就上便當，便當個盤係一個大盤，冇分隔，都幾特別。串燒有一串冬菇及一串雞肉，燒得唔錯，尤其係冬菇，主食燒鰻魚對辦，有四件，肉厚又重魚油，燒得剛好皮脆及有油香，係小數相近價格食店燒得較好食嘅。其他仲有枝豆、沙律、白飯，都ok，最後送上雪糕糯米滋做甜品。埋單$75唔使加1，唔算話平，但但到質素唔錯嘅串燒都係可以接受。…查看更多

睇到雜誌介紹，上OR又有好多好評，總想試下，但屯門店實在太遙遠，適逢灣仔分店開左，就決定嚟試下。點知........叫咗幾個餸，除咗碟燒味，其餘冇樣好食：燒味拼盤--幾種燒味都唔錯，份量小左啲，甘樣己經成$180，好似唔多抵。椒鹽魷魚--魷魚都算新鮮，但椒鹽味不足，唔夠香口，最敝上枱時已經凍晒。桂魚兩味--極差，有強烈淡水魚嗰種泥味，炒球完全食唔落口，石鍋上嘅頭腩泥味較小，但就好鹹，想用大量香料味掩蓋泥味，反而令頭腩食唔落口，差！金銀蒜絲瓜--非常之油膩，每一片瓜都浸滿油，好恐怖！菜心肉片--算係最正常嘅菜式，但菜心好硬，好難咬。薑蔥蠔--石鍋上，蠔非常之硬，完全無鮮味，感覺像食未煮過嘅蠔豉，可以話係小弟食過最差嘅蠔。芋頭鵝煲--又係石鍋上，芋頭好硬，好似唔熟咁，鵝肉又係硬實，雖然石鍋上係熱嘅，但鵝肉內部係凍嘅，唔好食。蒸扇貝--扇貝算新鮮，好食但冇難度嘅菜式。整晚嘅菜式味道同期望相去甚遠，大為失望，灣仔店絕對冇下次，屯門店有機會可以試下，俾次機會佢。…查看更多

要食平靚正早餐越嚟越難，下下都廿幾蚊，仲冇乜野食。而小弟最鐘意就係食南記嘅招牌麵早餐，$16一碗麵，加$2有豆漿，十分抵食。最正當然係魚肉春卷，炸得香氣四溢，牛丸都唔錯，魚蛋就差啲，水準不穩，有次咬落食出一泡水。粗麵底亦時有走梘不足嘅情況，但大致上都ok!喺灣仔想食$20以下早餐，南記係不二之選。…查看更多

放半天假，心情輕鬆，四處找食，去旺角閒遊，好多野都想食，花多眼亂。行到去家樂，見佢開左個＂大贏食＂咁耐都未落過去，咁就落去睇下。有幾間食店，就試下豚組先。叫左個吉列海鮮嘅set lunch，有5件炸物：2件蝦、1件蠔、1件魚同1件魷魚。炸蝦太乾身，好鞋口，一點汁也沒有，唔得。炸蠔好食，有蠔鮮味。唔錯。炸魚一般，都好，唔會炸乾曬，炸魷魚有D硬身。水準一般，銀座梅林好食D。連埋其他配菜要成$80，似乎有更好選擇。…查看更多

每日食麥皮同麵包做早餐，真係幾厭，所以有時早起身，都會去食下茶餐廳。而我嘅至愛當然係灣仔檀島喇。通常都係食通粉餐，味道冇咩特別，但食慣咗就好有街坊味道，最鍾意係個餐包，上枱個包仲係熱嘅，塗上牛油然後溶化，好食，好過一般茶餐廳凍餐包渣唔到牛油。而且佢沖嘅茶都俾一般茶餐廳嘅濃，除咗奶茶咖啡好飲，其他如華田同好立克都沖得好夠味。通粉餐$26，比一般茶餐廳都貴$3-4，但我仍會繼續支持嘅！…查看更多

食完晚飯，一班人去食甜品，由於時間尚早，唔使等幾耐就有位。幾條友，除左我叫燉蛋之外，其餘都叫芝麻糊 =.=本來想叫凍燉蛋，但嚟咗熟 ，都好，十分香滑，甜度又啱啱好，熱辣辣，好食。友人芝麻糊都好食，有濃濃芝麻香，但加一粒湯圓都要加$4似乎貴咗d。希望可以減下價喇。…查看更多

放工喺花墟踢完波，胃口淡淡，諗住食d輕食。喺旺角行行下，見到華星居然冇咩人，咁就入去喇。叫個常餐，同澳牛比較一下，叉燒意粉啲叉燒好薄，澳牛厚身小小有啲咬口，湯意粉都係差唔多。炒蛋好滑，半熟狀態，同澳牛不相伯仲，但多士就差小小，比較硬身，唔夠澳牛嘅多士軟淑。總體嚟講係澳牛好d，但華星都係好食，值得再試。…查看更多

又一間老店快要執粒!!真係好唔捨得,睇見某週刋嘅報導,即刻趕嚟食個餐蛋包.老實說並非什麼頂級美食,只欣賞他平實作風,即叫即煎嘅餐蛋包.尤其在寒冬中,手握著熱辣的餐蛋包,令人心倍覺温暖......…查看更多

喱間人氣拉麵店,由中環開張一刻已經開始想試,奈何人龍實在太長,作罷.至銅鑼灣分店開張,以為可以分散人流,點知又係長龍!!終於一次機緣巧合嘅機會,食到喇!!!真係好好食,豬骨湯底超濃,麵幼身,夾起掛晒湯,一流,叉燒有4大塊大大塊,夾起又係掛晒湯,超級滿足......另外附加紫菜,一大塊比一般厚身小小,所以冇咁脆,但浸完湯食就一流.....下次一定要試埋其作"王"......!!!…查看更多