ReeChar的個人專頁

喺app度見到好多人話哩間好有特色好食，門面同裝修的確係。由兩層樓梯至兩度門，入到去坐底都有好復古嘅裝修，好有心思。雖然招牌菜應該係牛肉麵，但係對面個男人唔食麵，唯有叫咗佢想食嘅雞扒同埋兩碗飯，一碗$30。滷肉飯嘅香料味突出，唔會好油膩，調味適中。雞肉飯就冇乜特別，食唔出有乜特別調味。至於茶燻雞，一擺落枱非常之香，但係煮嘅時間應該要耐啲，佢好快就到咗...希望佢唔係叮出嚟啦😂⋯⋯肉質比較硬身，調味偏咸，但係個味道係特別嘅（如果佢做到嫩滑啲就好？）。…查看更多

唔係第一次食，但之前兩次都係食船麵，菜材味足，湯底夠濃，配埋雞腎，去骨爪同雞絲，加埋個三分煙韌嘅麵，唔同口感，一流。不過今次嚟同同事就食咗新嘢，佢哋個個都食雞飯，我叫咗雞麵。同事啲飯個個都係髀位，我心諗正啦，點知送到嚟我嗰碗係勁大塊雞胸，即刻sad咗，我真係好唔鍾意見到咁大塊乾肉，算啦唔好浪費食物，我食咗一兩啖麵之後就開始食雞胸。先講個湯，非常淡，話係椰汁雞湯，應該係椰子水，透明嗰隻🙃⋯⋯舊雞胸出乎意料地Juicy，唔鞋，加上個湯夠淡，仲食到雞味。不過我最後都有攞去點海南雞個醬，味道正常。另外提一提，調味架有個辣椒醋，值得一試，同埋，666船麵都係食返船麵好啲，除非你想清淡，咁你就要試上面嗰隻麵😂。…查看更多

今日係我實習嘅last day，同同事去咗新蒲崗Mikiki食泰國菜。就咁望門面唔算好特別，間餐廳採光位非常多，我哋坐咗喺窗邊。我地點咗沙律同其他小菜，無叫到飯，食埋甜品，非常飽。個鳳爪沙律大大份，中辣程度，配料新鮮，鳳爪爽口入味，唔會好酸又開胃。通菜份量較少，無乜特別，咖喱牛腩個牛腩偏瘦，咖喱有少少甜，半隻海南雞非常嫩滑，比較多皮，醬料調味正常（薑蓉可以無視）但份量唔多。食晒啲正餐突然之間送甜品，係椰汁紅豆糕，味道清甜，唔錯。呢個甜品我第一次試，裏面嘅嘢我全部都唔鍾意（脆，甜，椰絲），但係加埋一齊就非常之好食。一送到過嚟我比佢個size嚇親，用手續啲拆嚟食，裏面有煉奶同埋椰絲，花甜粒，夾到一流。呢個榴槤炸彈本身係我最期待嘅甜品，但係過到嚟之後發現佢外層非常厚（無味），同埋充滿油⋯裏面個榴槤餡雖然濃香，但係真係個皮非常影響口感同埋味道。服務方面，上菜速度好快。第二杯飲品半價。張單畀大家參考…查看更多

天啊，我實在等到要開始打食評，希望打完嘅時間佢會出到碟餃子畀我。話說今日星期六朝早，我11:30落單，等到12點，催咗一次，同我講個廚師煎燶咗要再再煎過🙃⋯⋯佢再煎過都無第一次咁好食。個皮薄，但痴埋一齊，佢似係要解凍嗰啲餃子，但裡面好Juicy，可惜間嘢嗰知做乜，入面又唔係忙，叫個$28餃子要等半粒鐘，嬲咗。鰻魚炒飯，用炒飯機炒，吹捧手炒同時，都要炒得好食先得，哩碟機炒嘅啲雙粒分明，每粒都包住鰻魚汁，仲有鮮蔥，紫菜等等配料，都幾好食，出餐又快。再講下個杯，一抹個底係橙黃色，大家小心啲好。講完…查看更多

午餐同同事去咗定食8，今次係第二次食，仲好食過第一次，雖然貨仔唔同高級壽司店，但哩個價錢係絕對無得彈。（上圖係我偷食咗壽司飯）左邊係係黑蒜豬軟骨烏冬，個蛋令人印象深刻，仲係流心，無煮過龍，烏冬唔會淋哂，豬軟骨份量好足，味道唔錯。左上有個煮過嘅海苔（有啲好似膠，透明，但唔好誤會😂），我將佢放咗落三文魚麵豉湯裡面焗熱，去到最後再飲都仲好熱，滿意。壽司最後先食蛋會比較好，海鮮都好新鮮，切得唔薄，三文魚唔瘦，近腩，好好食。帶子大大啖，口厚好好，個蛋係雪過嘅，最後食就無咁凍啦。哩個係同事叫嘅鰻魚飯，燒得比較焦（半條個皮係黑色）但佢話味道唔錯，食到一半佢已經開始飽，最後食哂條魚。最後講下餐廳環境，燈光比較暗，人手同屯門分店一樣都係少，出面會比較慢，衛生當然都唔係特別好。…查看更多

喺佢新開張時試過一次，外賣，想畀多次機會佢，但佢水準難得地一樣，唯有寫一次食評。鹽酥雞扒肉燥飯，份量好足，睇圖就見到，亦都會見到雞排炸得好乾，驟眼落望粉亦都好多，直情見到一兩舊痴住件扒，飛起埋。食落覺啦太多胡椒粉，定唔知味精，個調味令人好口渴，有啲仲痴住條脷好耐搞到唔係好舒服。肉質當然一般，咁重嘅調味下都唔會食到有雪味，配埋個厚粉濃妝，食落個口感可想而知。其他配料無問題，嘢飲大大杯，叫小冰好似走冰咁，唔緊要。其他同事食嘅餐都畀埋大家睇。…查看更多

上次講完佢杯黑糖珍珠鮮奶茶唔好飲，今次叫返鮮奶，諗住正氣啲，點知一飲極失望。先講溫度，佢個冰同糖係無得先選，以往好飲嘅經歷係個糖仲有少少熱，啲冰啱啱熔到原來嘅一半或多少少，去凍住啲珍珠畀佢唔好咁軟，將啲奶保鮮，喺正常嘅。但今晚我9點鐘左右去買，啲珍珠變到好淋，就咁用條脷都壓得扁，個黑糖亦都唔夠濃，成大半杯都係冰，沖淡哂啲奶同糖，大失水準🤢⋯⋯所以飲一芳真係好睇彩數，強烈建議佢哋試下啲珍珠先好出街，杯嘢唔平㗎⋯⋯…查看更多

嗨大家，夜晚喺將軍澳可以試下廿一堂啊～佢喺區內係罕有嘅日式燒肉飯，其他食厭咗或者覺得太貴都可以去望下餐牌，總有個啱你，因為佢有埋烏冬㗎😋掛住食影得衰唔好意思😬 叫咗多飯多汁都唔算多就知咩料啦，但都算夠食嘅。味道同溫度都好好，肉邊有焦香，啲油keep住舊肉啲溫度，入口即化，連埋啲飯一齊食就非常幸福（單身狗的浪漫🙃）。價錢方面我覺得有少少偏貴，因為份量唔多，揀嘅肉都係普通貨色，唔係特別突出，環境同服務都一般。…查看更多

今朝試咗個限定嘅沙嗲通粉，利申唔鍾意通粉亦唔愛沙嗲，但為咗試新嘢都係硬住頭皮點。個湯一打開好清，通粉有雜豆同碎咗嘅茶，上面有幾片切咗都仲有一邊連住嘅牛肉片，牛肉質地同出面食開嘅唔同（請看圖）上面就有沙嗲汁。我撈勻咗佢，意外地個沙嗲味好港式，好惹味，個牛有牛肉味，口感有少少似舌，唔難咬開，通粉就當然一般般啦，一嚟本身唔鍾意，二嚟佢真係每次都overcooked，M記可以哩一世都唔會control到通粉煮嘅時間或者用料。…查看更多

第一次試哩間嘢，同三個朋友一齊，因為餐點嘅份量好足，叫三樣都夠四個人食☺️。今食試咗卡邦尼意粉，蛋沙律窩夫同埋慢煮豬軟骨配飯（飯上面有個蛋黃）。意粉正常水準，但煙肉條厚身，比較硬，以為食緊臘肉😫。窩夫最少要等20分鐘，但味道口感同價錢絕對值得一試（記得最少兩個人share一份）。個餅一焗起外身有少少鬆脆，入面就焗得好軟，蛋糕味好香，一試難忘😋😋。慢煮豬軟骨同肉唔算非常淋身，但味道唔係出面食烏冬食碟頭飯嘅水準，佢個汁濃得嚟有少少甜。最正嘅係佢唔會同你慳，份量夠兩個女仔食😂，加$15連湯有嘢飲，仲有個果味雪糕。記得會收加一㗎:)但今日侍應哥哥姐姐嘅態度都非常好，好關心客人（彎身聽我落單），問我個熱茶要唔要少甜，收碟之前問聲仲要唔要...🥰🥰…查看更多

向來肉食嘅我跟咗老細出去食哩間「從心素食」，食咩當然唔係我話事，所以我神咁早order咗蕎麥茶，非常好飲。午餐12點左右到場，都陸續有好多上班族入黎坐底食嘢，隔離嗰台叫咗個花雕雞，我淨係可以隔岸觀火😔⋯⋯第一碟餸係炸米通餅配咕嚕醬炸菇（我唔知菜名係咩但我會盡量形容😂），我個人係好唔鍾意食煎炸脆嘢，個米通餅真係唔係好啱我食，但我諗對於鍾意食脆嘢嘅人嚟講應該好好味。個咕嚕醬比起裡面嘅素，同埋米通實在係太重味，成碟菜覺得一般般。第二碟係天婦羅（我已經好想死），有秋葵，紫薯，芋頭，金菇，金菇係最難食，因為油炸物抽乾水份，個味道變到非常濃，加上佢嘅沾粉面積比係世界之最，我食粉食得好痛苦。不過秋葵同紫薯係好食嘅，整體味道比較淡。第三碟係壽司🍣，賣相係good good嘅，我第一舊食咗軟腳蟹卷，無乜味，第二舊試三文魚，個口感整得都有五成似，加上配埋芥末豉油遮咗啲豆味，都幾得意。之後食咗吞拿魚，個味同口感都同上一件差好遠，個假味食到我反胃🤢，我再食多舊牛油果定驚就無事了。💥所以最後同大家講，肉食朋友第一次食就應該根據自己口味點餐，唔好同時食太多豆製/芋製假肉（聽講會消化不良）。祝大家好運👍🏻！…查看更多

上次喺旺角食過一次，原來屋企附近都開咗一間，所以嚟返尋味😋。點左一個鐵板生薑豚肉配飯，另外跟咗一杯柚子特飲（飲品有好多選擇而且唔使另外加錢）。成個餐連麵豉湯，有嘢飲，麵豉湯裏面有好大塊肥豬肉片，如果你唔係非常肚餓就唔好食，因為啲肥肉入口即溶，飽肚。留肚嘅原因係一大塊有瘦有肥嘅豬扒，同埋索晒啲生薑汁嘅椰菜絲，唔使驚多肉少菜。隔離仲有沙律醬，配埋一碗白飯非常夾，飯嘅份量唔算多，但成個餐一定夠你食得飽😛。唯一不足嘅地方係佢啲生薑絲係分開擺，令到個豬扒嘅薑味唔係好夠，但就性價比，味道嚟講係值得一試嘅👍🏻…查看更多

今晚探索將軍澳中心嘅‘food corner’，雖然地方有少少隱蔽，但大茶飯係眾食肆裡面裝修得最清新嘅一間，台式文青小店。今晚試咗雞扒肉燥飯同花雕雞麻香拌麵。雞扒肉燥飯嘅雞扒炸得有少少硬，上面有啲香茅絲，味道偏咸，但佢配咗個幾好味嘅青瓜粒，都算唔錯。拌麵出乎意料地好味，有咬口（嚼勁），有好少好少麻辣味，而個花雕雞係完全無花雕味（我隔離嗰個話有少少，但完全唔覺），亦都無醉雞味。翼位碎骨比較多，但肉質算嫩。雖然唔係想像中咁但都唔係唔好食，味道幾特別。另外一杯珍珠奶茶（記得叫少甜？）都有驚喜，我唔鍾意甜野，但佢個黑糖入到口非常醇厚兼滑，有少少苦味，唔係齋甜。整體嚟講都算唔錯😋…查看更多

朝早去食Mosburger，早餐有好多款可以揀，配埋個粟米湯一定夠飽。今日我叫咗雞肉火腿牛角包，裡面仲有生菜，芝士同蕃茄，好新鮮😋。隔離嗰位叫咗魚柳包，裡面啲鮮洋蔥，蛋黃醬同芥末令到個包升爆級，以$28蚊呢個價錢同埋味道跟埋野飲覺得好值。店內嘅員工比較安靜，朝早無乜歡迎氣氛，明嘅，大家都未訓醒🙃。另外仲試咗個大芝士火腿多士，兩個人食一份都一樣夠飽🙃⋯⋯大食嘅朋友必點，唔鍾意食脆嘢嘅朋友可先叫店員飛邊。…查看更多

今日做外賣仔，順便買幾粒醫肚餓，我試咗個三文魚腩壽司（大塊無燒過嗰隻），結果其他壽司畀細佬一個人食哂🙃 隻魚食落口感一般，切得唔夠厚無計（平嘛），但魚脂滲入成個口，包住舊硬飯，都算係一點點安慰。…查看更多