DinerD的個人專頁

知佢開咗好幾年，有朋友亦話過幾好食，但一直冇動力入去。最近由於趕趕哋，要快食，見佢唔洗等位，就叫咗個蜜雞扒+腸便當餐，配冬瓜茶。門口收銀處點餐後，會有一個牌，服務員會將餐送到。坐咗一陣，食物就送來，盤上有一份包裝餐具，以為係木嘅，哈，係似金屬嘅匙羹同木/竹筷子(唔識分)。雞扒上洒上芝麻，腸係台式風味，下面有估唔到咁多元嘅配菜，有小棠菜，粟米粒，台式米粉，半粒肉丸，蛋半隻，雜菜絲，紫菜絲，好有驚喜，覺得佢哋有考慮到膳食營養，有heart 的做法。…查看更多

因為第一次唔係叫出名嘅，冇試到名物，所以再嚟會一會。當時係純粹路過(冇做 research)肚餓嚟食，叫咗自己想食嘅伊麵，但過程發現客人多數叫蝦子麵。環境: 中意懷舊(如我)，必推。視覺: 今次食雲吞水餃蝦子撈麵，碟麵一嚟到，好有驚喜，從未見咁多蝦子，多到遮晒個麵咁，好犀利。好少見雲吞同水餃形狀同皮料咁似，可能想做到駌鴦嘅感覺吧，2款雖然冇漲爆嘅大粒，但一致性都係特色。湯上葱花嘅都好足。味覺: 麵好彈好爽，冇鹼水味，滿滿嘅蝦子令香味提升咗。我食食下將D湯加落麵度，oh no，D蝦子被水沖去，由「痴」住D麵變成「痴」住D水，浪費了。雲吞足料，水餃皮薄亦足料。overall 有D重味，所以加支樽裝汽水 balance 一下。…查看更多

第2次嚟，今日發現有新加menu，都多選擇，由於同枱的都揀好咗，咁我就叫咗「蠔仔炒蛋」。一嚟到感覺份量細咗D，諗住唔夠飽嘅就晏D食個包做tea。蠔仔都漲卜卜嘅，只係冇乜蠔味；蛋炒得香，如果兜少幾吓就嫩D好味D，依家似有少少overcooked；例湯偏淡味。雖然係泰國餐館，可能係咁，隨餐附上一式3份泰式醬油，試咗個酸醬但味道同依個菜式唔太夾。到底最後係咪唔夠飽呢？咁又無，食完飲完湯同餐茶即時覺得夠晒。…查看更多

第一次食呢個集團喺TKO，覺得幾好，早幾日同朋友食飯就提議去太子分店試下。有訂位，飯局日餐館有確認booking. 大廈好有特色，嚟遠已見到花園街尾有間掛咗燈籠嘅大廈，舊式感覺但淺色的外牆睇落乾淨嘅。入到去，門口左邊係廚部，右邊係收銀，中間走廊，行過幾張枱，右邊有樓梯上一樓，但上到去有D迷失，左定右呢？好彩有位侍應路過指示向左直行，揾枱期間見枱与枱夠濶落。佢哋飲品選擇幾特別，有涼茶，烏豆水，生果酒，同平時有嘅啤酒汽水。朋友中意飲涼茶，我叫了桑椹酒(中式燒酒咁 kán)。鵝片作為頭盤嘅話又要分比8人呢，係夠每人一片嘅，片厚度都正常。三拼(墨魚，生腸同元蹄)又係每人一片，但奇在墨魚同生腸都冇橙色。椒鹽白飯魚好大條，有驚喜，有近6嘅朋友都話未見過，肉質都ok。椒鹽九肚魚又係驚喜，好大塊，朋友們想encore，但最後都係留quota 食多幾款。蠔仔餅又係每人一塊，蠔仔size ok, 餅唔係用粉整到厚厚嗰種，所以就算食多幾件都唔滯。蠔仔粥就細碗咗D，侍應話一碗份量可以分到3碗餐碗，我哋人多叫2碗。炒芥蘭(冇映相)好脆嫩，加上落咗D魚乾(朋友估係柴魚乾)，又幾好食。反沙芋都好香甜，外皮夠脆。有款甜品(唔記得名)，味道同賣相似糖不甩嘅，又係幾好食。走時發現有嘅，仲要2部添，好方便。…查看更多

以前喺附近返工，偶爾會OT後嚟堂食，因為 lunch 呢區堂食都好多人，通常只有外賣。咁啱過嚟做完嘢，5點多啲，就嚟懷舊一番，本來想叫粥，但依度嘅炸鯪魚球好正，咁食依個就叫麵啦，今次叫碟炸醬麵啦。雖然都成6-7年無嚟，佢嘅鯪魚球仲係好彈，皮又帶點脆，配埋個蜆芥汁一流，細份有3粒，一個人食好滿足。炸醬麵又係好好味，肉又嫩，肉同醬+麵比例好好，個湯又唔太濃，飲完唔會好口渴。佢嘅餐具係傳統公雞圖案，員工都係做咗好多年好資深嘅，就算冇嚟咁耐，入嚟食都有種特別嘅感覺。…查看更多

睇到報導話依度做糖水promotion，一向中意食中式糖水，仲要係酒店喎，同朋友喺附近食完慶生飯就入嚟食埋甜品啦。我哋9.30左右入座，只剩得7款糖水同1款西式嘅，咁我哋好快就拍板要6款(冇叫紅豆沙)。甜品上枱都算快。食序如下:紅棗桂圓蓮子燉桃膠 - 紅棗「林」而偏結實，唔係㷛到溶爛，賣相ok，有口感。其他材料都有口感，甜度適中。$68，飲完感覺好清潤，推薦。桑寄生蓮子蛋(熱) - 桑寄生味道好香濃，蛋我留咗比壽星女。$48喺酒店食到，抵嘅。椰汁桃膠蓮子西米露 - 由於落单時太趕，冇留意此品喺凍，其實係冇詳細睇 menu，以為係椰奶什麼，所以入口時有啲突然嘅感覺。西米有啲分不開，唔痴埋一舊就更好。味道ok。$68相對唔太吸引。香芋椰汁紫米露 - 芋粒夠「林」又唔會太大粒，紫米有口感。$58性價比高，推薦。陳皮紅豆沙湯丸 - 可能已經食咗幾碗，30年陳皮係咩味已經食唔出，但粒芝麻湯丸嘅芝麻味未入口已芳香撲鼻。比多$10就有2粒湯丸，值呀。$88 有30年陳皮㷛，性價比都高嘅。擂沙湯丸 - 呢款甜品坊間已經少見，所以就算$48得3粒，我都會叫。唔係抵定唔抵了，係唔普及。味道正正常常，中規中距。…查看更多

週末午膳時間唔洗得位，梗係入啦。枱與枱之間好濶落，坐位都夠大，好舒服。餐具有公雞，走懷舊路線咁，加上聽住張國榮，陳慧嫻，獅子山下，仲有其他經典八十年代電視劇金曲，可惜裝修不是懷舊風，有少少投入唔到。未入嚟前只係隨意「立」下 menu, 以為飲茶，原來又唔完全係。因為諗住飲茶嘛，所以點咗點心嘆下。叫咗份炸両，百花釀魚肚同叉燒包。先上炸両，擺盤幾好，麻醬同甜醬喺一碟，豉油另一碟。食落呢，嗰條油炸鬼太多粉，唔夠脆。唔夠飽嘅，食依個可填肚。魚肚反而有驚喜，可能平時少飲茶，對我嚟講係唔常見嘅點心。佢一碟3件，魚肚上有蝦膠，再之上有蝦籽，味道清清哋。試過就咁食，又試過點炸両碟豉油，個人覺得有豉油好味啲。有1個叉燒包被蒸籠到汗水整濕包底，係依個瑕疵。好味㗎，又冇肥豬肉，甜度適中。…查看更多

近日發現依間新開的餐館，見佢午餐時間都多人，所以都冇入去。終於最近喺非繁忙時間過嚟，一於試吓。店舖裝修比較簡單，見menu 有款順化豬手，好奇問下係咩，原來順化係廚師的家鄉，係越南嘅地方，長知識了。不過，我最後點了豬扒飯加蒸粉卷同熱老薑蜜。豬扒鬆軟入味，飯面的青葱有油香，加上酸菜好開胃，我見有壺酸汁就加到飯同豬扒上，估唔到味道更好。個蒸粉卷都好足料，漲卜卜嘅。薑蜜，呢個飲品比較少食肆提供，佢甜度適中，亦有薑味，好潤喉。…查看更多

同好友聚會，要可以慢慢坐慢慢食，又夠靜嘅地方，酒店菜館係首選，好友又將範圍收窄至潮州菜，咁就拍板喇。地點喺觀塘，因為唔太熟悉呢區，一直以為喺大街，原來喺工廈堆中。約咗平日7.30pm，上到去唔太多客，我哋仲有得揀枱坐，可惜窗口位置係大枱，我哋要傾計當然揀合自己的。講到明傾計為主題，就先叫黑炭豆腐2件，鵝片墨片拼鵝翼，可以慢慢食。好友對豆腐讚嘆不已，它的確有特色，黑色脆皮包住軟滑豆腐。三拼都中規中矩。經理推介了檸檬特飲，我哋都叫咗試下，檸檬香夠，又唔太甜，好啱食住傾住飲。傾到咁上下，又點了當日特別推薦-金錢鱔，我哋選了豉汁煮，鱔肥大夠厚，又夠彈牙。冇菜喎，唔夠balance，又點個芥蘭。傾到口乾，又叫咗過豬肺湯，呢個超驚喜，佢係一個類似紫砂茶壺+2隻杯仔，因為我掛住講，聽唔清楚侍應上菜時所講，雖然睇住侍應喺茶壺倒滿2杯，當好友問嗰個係咩，我仲答係汁，好友打開壺蓋一睇，原來係湯，而其實茶具盤早已寫了「湯」。個湯好潤，我哋將杯一飲而盡又繼續傾繼續食枱上食物。過咗一段時間再斟湯，好神奇，啲湯仲暖，個壺保温力奇好。其間，侍應傳菜路過時，見我哋好奇眼光，會主動講出手中菜名，好醒目的舉動。…查看更多

約咗朋友嚟午膳，趁未到繁忙時間先嚟攞位，侍應先遞上餐牌，然後我就慢慢揀，但由於有啲唔舒服，就叫侍應比杯暖水再繼續睇餐牌。因為怕人多時出餐會慢，估計朋友10分鐘後出現，於是叫定諗住朋友嚟到就剛剛出餐，做到懶係時間啱啱好咁，所以冇特別要求延遲出餐，點知餐少於10分鐘已送到，而朋友又咁啱遲到，隨即有啲唐突地問侍應可唔可以拎返個餐入廚房，侍應好客氣並禮貌地拒絕，而又轉個頭攞咗個工具蓋住啲食物令它保温，超讚侍應的靈活細心舉動。到朋友嚟時，食物仲暖暖哋，太好了。…查看更多

下午茶時間，諗住食個 tea set，但原來呢度係冇嘅，雖然係咁，見 menu 都有食物吸引到我，就繼續吧。佢哋有好幾款涼拌小食，叫份豬耳啦，有幾種辣，但我係超少辣喎，老闆就話出聲就ok，因為即叫即調(辣度)，咁就 tailor-made 我的辣味豬耳喇。由於即調，就算得我一枱客，都要等等，坦白講，呢種等係值得嘅，因為個味道真係啱我。另外叫咗份豬手麵，老闆話個麵係同出面不同嘅，似上海湯麵同幼身烏冬。一嚟到就試咗件豬手，嘩，估佢唔到咁'林'，超正，而且有好多芽菜，好味。個麵呢，就互相纏繞住，食時有啲論盡，味道... 如老闆所言似烏冬。小小的店，竟然見到有獨立洗手間。…查看更多

喺 KT training 完，就去了好出名嘅駱駝漆大廈揾食，見到呢間食肆被報導推薦，一於試下。午飯時間好多人，心諗冇位就走，哈，剛巧有位唔洗等。點了牛舌尖加牛腱飯套餐，等食期間周圍望吓，open kitchen, 餐廳有自己洗手間，座位擺設不算迫，全店走深色設計連制服都是黑色，感覺好統一。食物: 沙律菜好新鮮，醃物蘿蔔酸度好醒胃，厚厚的牛舌尖好「林」好 juicy，反而牛腱有啲乾。超讚個飯加了醃物同紫菜，簡直將飯的層次升呢幾倍，而且提升食慾，如果只是白飯，食呢個餐會覺得有啲膩。…查看更多

有 bookmark 想嚟試，今日同 elegant 契媽聚會，佢話想去近屋企嘅，就約佢嚟啦，原來佢之前已經嚟過，亦話好食。一坐低，契媽已選定叫3寶套餐，難得有人作主，我二話不說就點了。套餐有肥叉，荷飯同雲吞雞湯加花膠，2個女人食必定打包啦。肥叉，又不是想像中肥，反而覺得佢嘅焦黑蜜糖可以係賣點，叉燒入口鬆化，又不太甜，仲有伴碟嘅蜜豆，此物真係冇乜幾多間食肆提供，識欣賞嘅就知佢係寶，唔怪得係皇牌。雲吞雞從來不是我杯茶，但我就好欣賞個湯同花膠仲有幾棵菜(細津白?)，雖然不是我杯茶，啲雲吞好足料，又大粒，雞...大概都有半隻份量。荷飯，好耐冇食了，有成粒瑤柱乾，又有蝦乾(並非蝦米乾呀)，仲有啲肉，足料㗎。之後仲送腐竹蛋糖水，我們倆清了肥叉，同湯，個飯就打包2/3，隨後享受糖水。個人覺得套餐夠3-4人份量。…查看更多

一直想嚟試，竟然今日無意間經過，又見唔洗排隊，就買咗條原味自隊。比完錢，攞完，坐低，突然店員話買一送一，送多條比我，勁驚喜。再坐返低，享受一下賣飛佛甜點，ummm，坦白講，同西班牙食到嘅係有分別，但so what？呢度嘅，一入口就有濃厚嘅 cinnamon 香，中意 cinnamon 嘅(如我)就啱哂，不過佢啲糖太多，食完個身都有，好彩不是糖漿，只要拍拍就掉甩。店舖不大，全店簡約設計，座位係一排面壁的bar 枱，但枱有啲窄。…查看更多

之前睇報道介紹全港10大蛋撻，咁啱去大埔揾朋友，就問地胆呢間蛋撻係咪咁出名，佢答係，於是一齊去食啦。當日叫了叉燒意,太陽蛋，利賓納同蛋撻;朋友的不介紹了。本身都中意食蛋撻，奈何近年食唔到有水準的。今次慕名而來，好開心冇失望，蛋撻熱熱的，甜度同蛋漿都係同以前香港的味道，想買多2個帶走，但凍咗係冇咁好食同當日落雨，免舟車勞頓完令外賣折騰。叉燒意的叉燒有D凍，好在湯夠熱可以浸暖，意粉當然有茶記嘅特色，少少發脹同「林」。近年少見的利賓納都可以喺度 order, surprise 值得一讚，伙記叔叔精明地幫我呢個餐包改蛋撻，既省錢了，又唔洗食多個包…查看更多