晴天布甸的個人專頁

因為朋友遲到，但個半鐘後就要還枱，我一個人都落左單先，所以我可以打一個即場食評。其實潮館曾經都係我家庭的飯堂，包括早茶同晚飯，最喜歡佢既滷水拼盤，蠔仔粥，不過近來少去了，到今日重來，原來成間鋪裝修左，現代感重左，都幾靚。服務明顯差左，因為佢將四人枱拆左做二人枱，但餐牌就只有一份，我就剛好比人拎走左個餐牌，問個侍應就只係得到主餐牌一個，其他推廣餐牌是沒有的，算，話晒曾經飯堂，無餐牌係難我唔到。今日點了花膠蠔仔肉碎粥，滷水拼盤，蒜蓉西蘭花。第一樣上桌的是拼盤，嘩，個擺盤真係有點兒那個，以前是用一個復古的雞公盤盛著，但家下一個怪形狀的碟，而滷水汁又掛住在怪碟的坑紋上，給人一個污糟碟的感覺，還好味道跟從前差不多。記得以前無花膠，家下有一舊完整的花膠仔，仲有一點點瓜粒，45大元一碗我覺得都幾抵食，不過d蠔偏少同唔鮮味。普通的炒西蘭花，普通，唔難食又唔係好好食。直播完畢，小妹的朋友到左啦，我繼續食了。…查看更多

一蘭，係之前的打卡熱點，排隊排幾個鐘隨時是等閒事。我就最怕排隊，所以好outdated咁，今時今日先去朝聖這個拉麵地。入去被帶到一人一格的自修室位，桌上方有拉麵的教學，一蘭指南。第一次幫襯都不用怕唔識下單。拉麵上桌，第一眼唔知點解的感覺是單薄，為何賣相是陽春麵的感覺。算了，先飲湯，濃而不膩的豬骨湯，無油淋淋的感覺黏住雙唇。繼而食麵，麵一入口，好大陣的梘水味啊，豬骨湯都遮蓋不到這陣味。一小片薄薄的叉燒，有等如無，所以想食叉燒的人請加肉。另加的木耳絲及溫泉蛋，木耳絲太少，不太值我加12蚊食佢，蛋又比我食過其他的拉麵店為熟，14蚊雖然唔算貴，但這個熟度的話我不會加錢食。食完成碗拉麵，不似我去其他拉麵店這麼飽足，甚至還有一點空虛的感覺，我都是覺得豚X比較吸引，連office附近的一X堂都豐富過這碗麵，究竟是我不懂吃，還是這兒被人神化左，我也不知道！…查看更多

八十後的你們, 還記唔記得讀中學的年代, 好流行玩電腦遊戲, 講緊仲係用隻CD-rom放入部電腦再install的遊戲.  開左個遊戲, 可以連飯都唔駛食, 廁所都差D唔駛去的遊戲 (從前的遊戲, 唔駛比錢買寶劍, 唔駛同人組隊殺敵, 就是最單純一個人玩的遊戲.  而最得我心的電腦遊戲, 其中的夢幻西餐廳可說是名列前芧.  為何我會用這個作為我的開場白, 介紹這家餐廳原因有兩個, 第一個原因是地點, 第二個原因是環境.是由於我是大角咀讀中學的人, 太子旺角一帶都係學生年代的四圍蒲的地方, 也是我這個唔會帶飯又唔會返屋企午飯的學生哥黎講, 食快飯的地方, 這家餐廳就位於我中學的附近, 當然我讀書時這家餐廳還未存在.  第二個原因, 這家餐廳的成個格局, 跟我玩的夢幻西餐廳遊戲入面, 我的餐廳的廚房, 收銀台, 座位的擺設, 簡直相似度接近90%, 好有親切感.入正題, 講番菜式, 今日跟人有野做來到太子, 路過見到一家西餐廳, 觀感不錯, 也看到門前的set dinner選擇不少, 是日晚餐有八款選擇, 想食意粉又得, 食扒餐都得, 而且價錢又不貴, 就決定試下.  我點了西冷牛扒, 餐湯揀了紅湯(唔知何解我是讀書年代會叫羅宋湯做紅湯, 粟米忌廉湯做白湯, 家下大左反而少左叫這個湯個花名).頭盤有水牛芝士配雜菜(芝麻汁), 其實我覺得水牛芝士配酸醋汁會夾過芝麻汁, 不過也算好味.  水牛芝士不是常常都可以食到的頭盤類.  紅湯蕃茄醬味濃, 如果用多點茄膏口感會更豐富.  除湯附上一小片香香脆脆的蒜蓉包, 味道不錯.主菜的西冷牛扒, 好多時去這些西餐廳, 雖然佢會問你想要牛扒幾成熟, 但唔係有好多間上桌時是你心儀的熟度.  不過今次這兒, 竟然上桌時正正是我想要的七成生熟度, 這個是值得讚美的地方.  當然一分錢一分貨, 不會寄望牛扒會有大扒房的牛肉味道, 但起碼沒有冷凍味, 煎熟的肉香, 這個價錢我覺得已經合格有餘了, 餐碟上還伴了很好吃的炸薯角, 對炸薯類真是零抵抗力呢, 香脆的薯角伴著切牛扒流下的肉汁, 配菜其實也可以是主角.…查看更多

“愛文芒果” 在台灣很出名, 而由於50年代台灣由外國引入這品種再發展, 所以變成了台灣出名的水果之一, 今年香港引入了一家小店, 就是這家專售愛文芒產品的, 小妹我身為一個台灣控當然吃過, 但朋友沒有所以就帶她來嚐一嚐……地點在尖沙咀最多甜品店的厚福街, 競爭都幾大, 但也有佢的特別之處!! 一望到個介紹, 彩虹梳打已經好吸引, 尤其對女生來說, 當然不能錯過~~入到店來店員都會幾NICE的介紹下他們的產品及材料, 等大家方便選擇, 店內還有幾隻芒果公仔作裝飾, 很可愛呢……芒果紅茶 ($16)~~~因為天氣凍朋友唔想飲凍野, 所以叫了個熱飲, 這個聞上來都幾香, 芒果及紅茶味的配搭應該後者較重, 但也能喝到芒果的味道, 而且冬天的話很和暖, 暖笠笠的感覺…….MANGO X’PRESSO系列 (配心心窩夫 $68/6件)~~~雖然我其實都想飲熱野, 但這個實在太搶眼球了, 不能錯過啊~~~除了窩夫外, 仲可以配搭雜錦炸物、炸雞、花枝丸同炸飯, 好得意~~個人來說初來配SIGNATURE的窩夫較好!! 沒多久一出來十分驚訝, 估不到比想像中大, 因為有兩層的關係, 所以感覺好大, 下層為飲品, 還有發光變色的珠在內會不停變色, 最底層為芒果汁, 中層為士多啤梨汁, 上層為梳打汽水, 最上層係6件窩夫及勁大舊CREAM!! 初初以為個舊係雪糕, 但原來係好滑的CREAM, 超大舊哈哈, 對想減肥的女士來說真係好誘惑啊!! 飲一啖果汁汽水, 底層芒果味濃, 中間的士多啤梨汁都好味, 梳打部份十分清涼, 天氣凍更滋味~~上面的CREAM看到有朱古力醬, 原來吃入口還有芒果醬, 好水果的味道, 而配上又香脆又飽肚的暖暖窩夫, 絕對是冷與熱之間啊~~~不過原來仲有玄機, 吃到CREAM的底層發現有很多芒果肉還有像雪糕一樣的芒果雪糕, 真係估佢唔到, 愛文芒的果肉好甜, 還有一種跟普通芒果不同的香味, 我覺得有少少桃的MIX感, 也令我回想起台灣的感覺, 呢杯野真係好多層次感啊!! 但一個人絕對食唔晒, 兩個人SHARE才剛剛好~~~這個真是令女生又想食又怕肥的超邪惡漂亮之物啊!! 但也推介, 哈哈~~~愛文芒果3.6牛乳布甸 ($28)~~~另外還選購了一杯回家吃, 第二天吃也一樣好味, 果肉新鮮同甜, 原來除了芒果還有芒果味的西米粒, 大大粒好得意, 牛乳布甸感覺好滑, 但又唔會好奶味, 混合的感覺跟味道很不錯!!!我應該會再來ENCORE的, 因為飲品及食品種類都不少, 很想試埋其他款, 同埋一解我思念家鄉之苦, 不過有少少建議, 如果將來店可以擴充少少加一些吧枱位就好了, 因為拿住一杯咁邪惡之物係街行, 真係好揚, 哈哈~~但可能這也是店的其中一樣無形宣傳之物!!…查看更多

冬至飯年年都一家人食, 為何今年會"星級"呢, 因為APM利苑係2015的米芝連, 拎到一粒星, 所以當堂令到我們一家的冬至飯, 都係升級的感覺.  每年的冬至飯都是中午食, 不過我們點的菜跟晚飯沒有什麼大太差別, 只是頭盤是四款小點心而已.小點心包括常常都會點燒賣及小粉菓, 但另外兩款是我之前沒有食過的松露蘑菇包及XO醬炒腸粉, 我本身就是一個菇怪, 什麼菇都喜歡吃, 一上枱看見一籠子的菇型東西在我面前, 已經對其外表充滿好感, 因為佢的外表已經像是一粒冬菇的外貌, 好可愛!  咬開很香的松露味已湧出來, 是松露醬加上雜菌, 香氣四溢.  XO醬腸粉雖然在外面的酒樓也常點, 但不是太油, 就是醬油上得不均勻, 又或者根本沒有XO醬的蝦干瑶柱的鮮味.  不過這兒的腸粉, 每一段都上滿了醬油的顏色, 但不會過鹹, 伴著XO醬的鮮味, 還加上芽菜, 少許肉絲作伴炒, 各種材料有不同的口感及層次, 自己一個人都掃了很多條.小點心食完, 就順序開始主菜環節: 乳豬全體, 冬瑤海中寶, 芝蘭炒龍躉球, 德洲煎牛柳, 咕嚕蝦球, 脆皮燒雞, 輕濤拍岸乳豬燒雞都是常吃的東西, 這兒的出品當然沒有問題, 好味, 但因為我之前已經食過, 所以沒有什麼特別的感覺, 只有四個字形容...皮脆肉嫩.  冬瑤海中寶, 我每次都以為是餸來的, 原來是湯(其實上年團年飯時都已經點過這款湯, 只是我失憶!).  材料有連皮的冬瓜, 瑤柱, 螺頭, 雞, 排骨等等, 有以上材料的鮮味, 當然是好湯啦.  炒龍躉球是比較少食, 之前通常會點石窩魚.  一大片一大片的魚肉, 有魚肉的鮮味, 用筷子夾起魚肉也不會散開, 也沒有炒到魚肉碎濕濕, 伴著鮮綠爽脆的蜜糖豆.  不過如果是西蘭花便更好, 因為我鐘意食西蘭花多過蜜糖豆.今年的新意一是德洲牛柳, 還記得其中一人說帶過客戶來這邊食飯, 點了牛柳, 客人覺得好味到要encore兩次.  我想這個應該會是很好食的.  上枱前侍應們把一大片的牛柳切開, 還看到有少許肉汁濺出, 牛柳沒有大多調味料的味道, 淋淋的肉質, 也吃得出牛味, 加上煎得外面邊沿位有點焦焦, 那一種焦香感, 也令整件牛柳加分, 果然好味到唔停口.新意二有咕嚕蝦球, 平時我們點蝦一定是炒西芹那一款, 也吃過咕嚕肉, 但真的沒有點過咕嚕蝦, 大大隻的蝦球, 薄脆漿, 加上菠蘿, 紅椒青椒, 酸酸甜甜很開胃, 我個人也喜歡蝦球多過豬肉, 因為感覺上沒有豬肉咁膩, 可以食多幾粒.輕濤拍岸我記得之前有食過, 在我印象中是有蕃茄, 莧菜, 加其他東西, 總之夾在一起是怪怪的, 本來沒有期望, 但今次上枱後, 又不是之前食過的樣子.  今次豆苗, 加腐皮, 少許本菇, 上湯, 成件事當堂夾左很多很多.  還有這豆苗真是豆苗, 沒有找溫室豆苗來當豆苗 (最討厭溫室豆苗, 我也不是來吃沙律!)脆皮炸子雞都也很皮香肉滑.  都是一味常點的餸菜啦!每次也一定會點的蜜汁叉燒, 一碟叉燒真係可以送番一碗白飯.其實食完這麼多主菜, 已經飽到呢(有好幾款已經要打包, 包括是最後一味的海鮮炒飯)但甜品胃總是有的, 今次甜品依然是我最愛的脆麻花及我最不喜歡的蛋白杏仁茶, 當然不少得水果拼盤及好出名的紅棗糕啦.…查看更多

人生首次坐地鐵踏足西營盤, 十足大鄉里出城, 事情辦妥便去搵飯食, 路過一小店, 其實西營盤全個地區都是一些小店, 沒有其他地方的倒模商場, 倒模食店, 其實我只是想搵一家街坊的麵店, 吃一口家的味道, 而不是一式一樣的味精味兒.小店特色, 店鋪面積小, 座位不多, 但擺設及用具卻見其可愛之處, 店家枱面全用木紋木製的器具, 筷子筒, 辣椒粉瓶(用辣粉而不是辣醬辣油, 我也是第一次見), 給人一種溫暖的感覺.點了清湯河粉, 配上雞奕及手撕雞, 沒有驚艷的味道, 但就是一種家常的味道, 河粉是越式的河粉, 比中式的較幼身, 沒有太重油份的感覺.  雞奕是滷水還是醬油, 我自己也有一點分不清, 沒有過鹹的味道, 有一點甜甜的味道, 不過雞奕本身是一個很少會失敗的菜, 過關.  手撕雞的鹹鹹香香, 我想是因為芝麻及麻油的關係吧! 這間小店點餐就好像車仔麵一樣, 湯底, 餸菜自行剔紙, 自行配搭, 而我今日選的兩款餸也過關了, 有機會再來時再試試其車仔餸吧.還order了一款小食, 春卷, 這個實在太好味了, 除了新鮮炸出來, 還是我喜歡的粉絲菜絲饀料, 有一點似越南春卷, 但就用廣東的春卷皮, 香脆又不油, 好味!雖唔知佢是來貨還是自家製, 如果是自家製, 店家實在太有誠意了.  小店真係要好好支持一下呢!…查看更多

大鄉里第一次踏足西營盤地鐵站, 約人食完碗麵決定再遊一遊這地方, 因為平時真係沒什麼機會來這兒.  打開openrice搵甜品店, 發現這間甜品店, 入面全部的枱櫈全部是課室用的枱櫈, 連餐牌也好像一本手冊一樣, 真係有少少返學的感覺, 好得意!二人叫了綠茶心太軟伴紅豆雪糕, 另一款是牛角麵包布丁.  其實明明二人都食飽了dinner才過來, 不知為何又叫兩款咁飽的甜品, 女人果然有個甜品胃.  先來的是綠茶心太軟, 心太軟現在很多甜品店都會有供應, 可能食得太多次, 現在對心太軟的要求也不似從前咁只追求流心.  現在我覺得一個好味的心太軟, 除了心是太軟, 個外皮就不能太軟, 外皮暖暖地, 脆脆地, 才算是一個成功.  今次食的心太軟, 綠茶流心是好味的, 但個外皮也未免太軟, 刮了一下, 成個外皮軟呼呼黏著了匙羹, 口感不是脆脆的, 所以這個心太軟有待改進.牛角麵包布丁實在太得意了, 我朋友好喜歡麵包布丁, 平常自助餐供應的麵包布丁, 佢一定會食, 不過今次佢話這個外表不錯, 但不是他想像中的味道.  我試了幾口, 我想或者一個酥皮的牛角包, 用麵包布丁的做法, 酥皮層會變靱, 不似方包軟淋淋滑滑的口感吧, 所以這個甜品也得不到朋友的歡心.希望再有機會黎食, 看看會不會有進步啦.…查看更多

PMQ聽就聽得多, 但始終沒有去過, 是日終有人約我去遊一下這個文創之地, 我這個偽文青也要去感受一下文創的氣息, 扮下真文青.  入面的小店果然特色十足, 雖然地方不算大, 比起一式一樣的倒模shopping mall, 這兒真的是十分獨特.扮完文青也要醫肚, 因為之前行來PMQ時盪失了很多路, 真的十分肚餓, 那就去了sohofama食中菜, 這個時刻覺得cafe型的餐廳唔夠飽肚.  為何餐廳叫料理農務, 原來他是叫比較健康的有機食材路線.先來數個點心, 用蒸籠上桌, 走中國風路線, 我想跟外國朋友來, 他們應該會很喜歡這種中國風.  這幾款點心都不是蒸出來的, 有熏蛋, 素鵝, 生煎包, 春卷, 椒鹽魷魚鬚, 熏蛋糖心精瑩通透, 淡淡的酒香. 生煎包外皮煎得香脆, 春卷是素菜, 雖然是油炸點心, 但入面的菜絲不少, 減低熱氣感.  椒鹽魷魚炸粉很薄, 肉質唔會硬, 份量以小點心來說是比較大的.  樟茶鴨, 竟然以平常上牛扒的大木碟型式上桌, 伴上醃菜及甜麵醬, 平常在外面的中菜館, 多是一大圍人才會點片皮鴨, 樟茶鴨這些大菜, 今次都是我第一次人少少也可以品嘗這些大菜, 是一個新鮮的體驗.  味道也不錯, 肉質細嫩.另一款的主菜: 我會叫佢做紅蟳米糕, 這個叫法我看台灣的美食節目常常介紹, 即是蟹糯米飯, 蟹的鮮味, 在煮的過程全部的鮮味在糯米飯入面, 所以這個菜, 我第一下不是夾蟹, 而是先食糯米飯, 看飯的顏色以為是重口味, 但入口又不太覺太濃味.最後一個是黑蒜小白菜, 現在美食的潮流黑蒜都佔了一個很大的位置, 現在我家也常備黑蒜, 不過我們是當零食, 好少用來煮食, 今次用來取來平時的蒜蓉, 真的很特別, 而黑蒜其獨特的味道, 令到平凡的炒菜, 變得有趣一點, 甜甜地的黑蒜, 新鮮的有機白菜仔, 很健康的小菜.…查看更多

大坑已經現成一個獨特得美食天堂, 而每一間店都是各有特色的小店格局, 沒有其他地方一式一樣的大集團餐廳, 豐儉由人.  在這區, 只會愁選擇太多, 肚仔容量太少.是日跟朋友來二人來到這間日式燒烤餐廳, 店面走精品路線, 跟一般的燒烤店嘈鬧的氣氛很不同, 坐地下的那一層, 只有數張座位, 可以安安靜靜地吃個精緻晚餐, 非常適合二人世界.  大廚是日本人, 見到他走來跟鄰桌的熟客用日文傾計.  日本廚師對食材應該很講究, 他們的身材全是日本空運抵港. 侍應們也告知有時有一些食村可能當日才有, 是睇返貨的時間, 單是這點已顯示了身材會有幾新鮮呢?先來一個牛肉他他, 見到黃黃的日本雞蛋黃, 加上爽口的梨絲, 配上西冷部位的牛肉絲, 實在太幸福了.  每一啖都好順滑, 雖然牛肉味未算好濃, 但這個配搭真的很好, 是一個我很滿意的前菜.  還有前菜的分量來說, 分量好足, 兩個人來說有點多.之後點了三款不同的牛, 碟上還配上少許蔬菜, 有我很喜歡的秋葵, 燒秋葵真的很好食, 又有營養.  言歸牛肉正傳, 分別是京蔥牛小排, 西冷薄切以及牛柳肉. 這個牛小排的油份是三款最重的, 肉味是最淡那個, 以我牛魔王以言, 我就覺得這個滿足不了我.  不過就是他油份最多, 肉質是最冧滑的一個, 軟軟的, 很香油脂的味道.我個人比較喜歡西冷, 所以覺得西冷是最好味的那個.  還有這兒的牛柳肉, 是牛柳心的肉, 即是牛柳最中心的位置, 用想的也知道會是何其細嫩的肉質, 加上肉本身質素好, 不用加上大量的調味已經很好食.  不過店家還是有三款不同的醬汁比喜歡重口味的你, 有燒肉汁, 甜甜地麵豉醬及燒汁, 不過我最喜歡食靚牛時就是食其牛肉味, 所以也沒有點醬汁.之後點了一個我人生沒有食過的東西, 牛橫隔膜, 我沒有讀Bio, 其實也不太知道是什麼, 我只會覺得是牛的內臟, 初時都有點怕怕內臟這東西, 本著試試的心態, 發現這是驚天地好味, 牛味最濃, 又不是食油脂那種口感, 有其特別的口感, 竟變成全晚最喜歡的食材.大食積的我們當然唔夠, 最後決定食個牛尾湯拉麵作結, 我初時以為好以牛尾湯咁蕃茄為主, 但結論上桌時有點似清湯腩的湯底,  湯底是用牛骨煲出來, 牛味香濃但不算油膩. 而其麵質不似一般的日式拉麵的麵質, 其麵反而有一點似韓國水冷麵那種, 這個配搭都幾新奇, 也很好味.…查看更多

女仔總有個甜品胃，食完晚餐已心思思睇定去那兒食下一場，因為唔想走來走去，就去回同商場的馬卡龍名店。雖然馬卡龍不是我杯茶，但這間店的焦糖燉蛋真是超級好食, 所以我也介紹孖妹食這個, 而這間店有少許座位, 可以堂食甜品了.而我當日食得太多蛋, 所以我就點了雜莓蘋果金寶, 兩款甜品大家一齊試.  而孖妹好少食焦糖燉蛋, 都話這個好多好滑, 而整燒的焦糖面暖暖地, 又很脆, 蛋入面加入了不少的雲喱拿籽, 令到全個甜品都是那種香香的味道, 真係非常吸引.蘋果金寶店家會焗熱一下, 上面的金寶鬆鬆脆脆, 很可口, 蘋果加莓醬酸酸甜甜, 很開胃, 所以明明晚餐已經好飽, 食下食下又食晒兩款甜品啦.…查看更多

一到夏天, 雖會唸起香香甜甜的芒果.  是日經過大坑店, 就入去看看買那一款蛋糕回家, 留待第二日回公司跟同事們開心share.  我之前食過伯爵茶口味的流心蛋糕, 本來想揀蛋卷, 但見到夏天的期間款式, 就二話不話選擇了芒果口味.  很喜歡店家好貼心地提供了紙碟同小叉, 令到在公司食也無難度.一打個盒可愛的貓貓做型餅盒, 大家立即發出嘩嘩聲, 因為上面鋪滿了黃黃的新鮮芒果肉, 煞是吸引.  切開蛋糕 (因為小的刀功甚差, 所以沒有影相呃like), 中間的流心, 無蜂蜜口味的咁液態, 我覺得有一點芝士蛋糕的味道, 好香好滑, 大家都大讚好味, 可以和同事們食下呻下, 返工的苦悶生活也有一點樂趣.唔知過左芒果季節, 還會有什麼其他新口味呢!  …查看更多

再次同孖妹好友去搵食同傾密計啦, 雖然我們已經不是同一家公司, 還好我的公司跟她仍相距不遠, 我們可以繼續做孖妹, 真開心.  今次我們第一次二個人都去食烚下烚下, 也是第一次幫襯這餐廳, 估不到有二人卡位, 坐得很舒服, 只係張枱好似細左少少, 放左個爐, 加兩碟肉, 都無什麼多餘空間.有睇開台灣食尚玩家的關係, 食尚天團早前有介紹過台北的火鍋也流行綿花糖壽喜燒湯底, 雖然本人從來都不太喜歡壽喜燒, 因為怕這麼甜的湯底再烚野食. 但今次就是窩上面放一團綿花糖咁得意的關係, 拍照放上facebook絕對可以呃幾個like (OK, 我認我是一個港女!!), 就算這一團綿花糖要加十蚊, 我們二人都決定試這個特式湯底了.  一開始店員先炒香牛油, 洋蔥大蔥等配料, 之後再下甜醬油湯, 再放下一糰白白的綿花糖, 一個比我放上網呃like的綿花糖壽喜燒鍋就完成了.我今次的主題是孖妹和牛, 主角除左我們二個孖妹, 當然還有牛, 什麼牛?? 和牛是也. 牛肉一上桌, 見到雪花咁靚, 未食已經覺得味道會很不錯, 個人也喜歡帶點紅的牛, 所以沒有煮至全熟就食啦, 入口軟滑, 牛肉味很出, 也沒有太肥的感覺.  雖然是甜湯底, 但也沒有蓋過牛味, 可能個湯底沒有我想像中的甜到漏 (剛開始的打的時候, 之後我會收番我這句說話!) 店家還附上生雞蛋用來點牛肉食, 奈何自這個世界上有禽流感的東西, 已介左打邊爐點生雞蛋, 所以我地二人偷偷地將佢變左蛋花湯.  這個和牛放題除了牛, 還有豚肉, 二人份海鮮, 三文魚刺身, 還有自助蔬菜丸類吧枱.  但因枱面空間有限, 我們要續一擊破.  豚肉片也不錯, 只係我要專心對付和牛, 所以豬我食得比較少, 這兒的豬唔會有一陣豬蘇味, 又不會太肥的腩肉.  而海鮮類也算不錯, 帶子, 青口及蠔尚算新鮮, 只是蠔肉不太肥美, 加上湯底關係, 和海鮮唔多夾味, 不過這兒不是海鮮做主打, 這種質素我已經收貨了.  不過魷魚就跟這個湯底很夾, 甜甜地, 煮完又不會硬, 正.  而三文魚刺身也夠新鮮, 而不食生的朋友還偷放了兩片下鍋煮熟, 她也說熟食也很好食, 我地兩個人成日都偷偷地東西入鍋中, 前有雞蛋, 後有三文魚, 還好我地兩個太好朋友, 絕對唔會介意對方咁做.   兩個人食完一碟和牛, 唸住再叫多一碟, 初時我唸這些餐廳, 第一round的肉食是最好食, 第二round的質素要比個九折, 甚至八折, 而估不到這間, 第二round的和牛比第一round更靚, 還有份量仲多左, 其實兩round調轉就好啦, 因為食到第二round, 湯底的甜度開始增加, 令到我覺得好漏了, 好彩店員出現, 話下次加湯加清湯, 唔好再加甜湯底, 否則只會越煮越甜.  終於有位食下其他東西, 每樣東西都只拿了每人一粒, 因為食和牛其實已經好夠飽了, 丸類最好食的是黑色的墨魚丸, 夠特別.  其他的配料全部都很正常, 不錯.  咁多款配料, 金菇冬菇最夾這個甜湯底, 食下食下, 又差不多夠鐘, 到甜品時間.見到佢既甜品, 有乳酪雪糕, 還有綠茶雪糕, 但食和牛食得過份左, 連甜品胃都用埋, 所以只唧了一小杯, 兩個人開心share, 食酸酸地孔酪雪糕, 清一清番個味蕾, 真係好爽.  還見到有和果子, 布甸, 奶凍, 但真係食唔落啦, 唯有下次有機會再食啦!…查看更多

有沒有發覺, 朋友相處耐點, 會對其口味越見了解, 特別在打邊爐點食物的時候, 你會知道點什麼大家會一致讚成的.  好像今次我們五個人去打邊爐, 這間店有個很特別的湯底, 我們五個人一致決定要試這個湯底.  這個是什麼呢, 是近來專家們都很推介的天然運動飲品 - 椰青水的變奏, 椰青礦泉水走地雞鍋. 店員係我們面前, 倒下一瓶我喜愛牌子的礦泉水, 再倒了兩個椰青水, 之後就刮了椰青肉, 水滾後就將半隻走地雞下鍋, 大火煮三分鐘, 再熄火焗三分鐘, 一鍋即做的湯底已完成, 而我們也急不及等每人各自品嘗一碗.  而店家也貼心的奉上了海鹽, 以防各位不夠味而自行提味.  而我在家中煲湯都好少咁重口味, 所以我不用下也已經覺得夠味, 淡淡的椰子水味道, 淡淡的雞味, 淨飲湯我已經覺得很好了.  其實很想繼續飲的, 但我怕食唔落其他東西.飲完湯, 自行混醬, 都係一般的幾款, 而我都係一般咁混, 就是生熟蒜麻醬混豉油.  而我地得五個人仔, 所以肉類只點了兩款, 就是手牛切肥牛同為我個唔太食牛肉的朋友而點的黑豚肉.  我已經無食肥牛好耐, 在家打邊爐只會食手切牛, 因為肥牛真係沒什麼牛肉味, 又比較肥, 雖然手切牛同肥牛的價錢差天共地, 但鮮牛肉真的比肥牛好吃很多.  而這店的牛肉, 每一片都是差不多大小, 形式也差不多, 明顯是大廚將一片肉去頭去尾, 才可以切出這種形狀.  而夾住一片牛肉下鍋, 我喜歡生一點的牛肉, 涮兩三下就食得, 牛肉味很濃, 加上我是清的湯底, 牛肉味更加明顯, 身為牛魔王的我, 食完一片忍不住已想食兩二片了.黑豚肉是機切的, 一卷卷整齊放在碟上, 我以為豬肉點都會有一點鞋口, 估不到這個豬肉同牛肉的口感都差不多, 而冄黑豚肉也不會很肥, 今餐這兩款肉食我覺得都很好食.海鮮類我們都點了兩款, 一款是美國桶蠔, 另一款是珊瑚蚌. 我一定要影這張煮完的相, 一隻咁肥美的桶蠔, 煮完仍然有咁大隻, 一啖咬下, 蠔的鮮味直衝到味蕾, 真的很鮮美.  我覺得這個真是必點之選.  而珊瑚蚌也是十分新鮮, 非常爽口.  但二選一我一定是揀桶蠔的.  丸類我們也點了兩款, 一款是蝦丸, 另一款是比較少食的芝士牛丸.  兩款丸都是手打的, 不是一般街市買到的合成丸類.  手打丸的特色, 就是彈牙爽口.  蝦丸沒有下重味去調味, 是吃本身蝦肉的鮮味, 不會像咁成丸咁鹹又淋滋滋.  而芝士牛肉我以為會跟芝心丸一樣, 芝士味多於一切, 但這個不會, 牛肉同芝士味配合著, 但食時真係要小心, 芝士會噴出來, 辣到個咀或者整到件衫就唔好啦.蔬菜類今次唔止點了兩款, 女仔都是喜歡多一點蔬菜, 所以我們點了五款, 雞脾菇, 粟米, 唐生菜蘿白片同一款好新奇的火鍋料, 鮮淮山, 平時可能煲湯會用淮山, 用來打邊爐我都是第一次食, 原來鮮淮山打邊爐都幾好食, 佢的外表同白蘿白片差不多, 但口感就是粉粉地的, 伴著獨特的淮山味, 好食.  而其他的蔬菜都很新鮮, 不會有爛菜的感覺.當然我地點為食, 唔止點咁少, 仲有蜂巢豆腐, 響鈴, 雲吞, 水餃, 韭菜餃同紫洋蔥香菇餃. 我朋友就喜歡滑豆腐, 而我就覺得如果個湯底正, 一定要點蜂巢豆腐, 因為夠晒吸湯汁.  而響鈴也是, 我喜歡食半脆的質感, 放湯只數十秒, 而朋友就喜歡淋的口感, 務求響鈴吸到最多的湯汁, 這兒的響鈴很不錯, 最怕有些店家用質量不好的油去炸響鈴, 什麼湯底只沒用, 因只會吃到一口油味.  而這兒的不會一口油, 也不多炸到過左火位.水餃同雲吞很真材實料, 兩者到大大粒, 食一粒已經有滿足感, 而我不吃韭菜, 所以食了香菇餃.  而紫洋蔥比普通洋蔥更有營養價值, 更加有洋蔥的甜味, 加上我本身都是一個好喜歡冬菇的人, 這個餃很得我的歡心.  最後加點了伊麵, 我好少打邊爐食粉麵, 不過有人想食, 而店員則推介我們試伊麵, 原來湯伊麵都幾好食, 可能伊麵屬於吸湯的麵類吧.  五個女人一個爐, 美味的食物, 大家吹下水, 睇下電視, 食下美食, 乾了一大瓶酸梅湯及蘋果雪梨茶就過了一個愉快飽足的一晚. …查看更多

很久很久沒有寫過食評了，我真是太懶了吧，希望寫了這篇之後自己會努力點。平時經常出沒旺角的我也吃了不少的美食，而且公公婆婆的家也在附近，所以也很經常來，今次朋友說起去吃韓國菜這家不錯，我也很久沒有吃過所以就一起來了。在旺角的中心，兆萬的樓上真的很多食肆，一出就看到韓式傳統的鐵箱燒，雖然時間早但也有幾桌的客人在，我最喜歡吃牛，人稱牛魔王，所以一定要吃韓牛，於是我們就點了幾樣。安排了坐位就來幾款前菜跟豆腐，嫩滑美味，當然前菜是可以無限添加的，雖然我不太能食辣，但這個泡菜可以吃到也可以。也放了不同的醬料待烤肉好了再享用…….五花肉厚肥美，配上醬、蒜粒、蘿蔔，用生菜包來吃，很地道的感覺，美味的耶！韓牛呀！最愛吃牛的我真的覺得很肉嫩不韌，而且肉汁也能鎖住，很想再食。豬皮平時也很喜歡吃，雖然有人會覺得很膩，但當知道骨膠原很重的時候就會很喜歡吃，而且質感很強，不過要跟朋友們分享，因為吃得多會有點飽跟舔喉的。本來以為是成隻八爪魚上，原來是寫了串，所以是已經切了的！(早知點小的原隻來吃，真白痴啊！) 不過真的蠻爽口煙韌的，如果放在鍋物裡一起也應該很好吃。之前看到一些相片跟食評說海鮮很不錯，所以就點了，果然是不錯！很多很大很新鮮，尤其我喜歡吃帶子蠔等海鮮類，真的很鮮味，款蠻多每款有兩隻左右，跟一班朋友分配就最好，不錯的選擇。不是太勝酒力的我，竟然跟朋友們點了這個嚐試，但真的對酒類飲品不太合適，這個我知道是燒酒的混合體，所以酒味很濃，還好這個點了荔枝味中和一下，也有很大粒的荔枝在裡面，如果喜歡酒的朋友一定喜歡，就像我的朋友一樣說好。第一次試這間後覺得蠻不錯，服務也蠻好，不會叫不到人的情況，也很自動自覺的跟客人換板跟燒烤，有機會可以再來！ …查看更多

大角咀, 是我中學讀書的地方, 所以在這兒食飯, 無論去那一間餐廳, 都令我好像回到中學傻下傻下, 開開心心的時代, 真係好回味.  今次晚飯去了一間主打魚湯的地方. 天氣熱加上自己本身腸胃不適, 清清地品嚐一碗魚湯吧!兩個人, 一個叫普通的魚湯, 跟燕餃及魚腐.  我就叫了番茄魚湯, 蜂巢豆腐及芝士丸, 可以大家交換試下不同的配料, 兩餸變四餸!  個人真的喜歡番茄湯底, 淡淡清新的番茄味, 沒有茄汁的感覺, 是新鮮番茄煲出來的味道.  蜂巢豆腐剛好用來索湯, 當湯底美味的時候, 豆腐真的是好重要的角色.  試食了友人的燕餃, 比起之前食的很不同, 因為佢既皮薄到我以為佢甩左, 肉質彈牙, 又令到記掛台北打邊爐必點的蛋餃及燕餃.  魚腐同芝士丸就一般味道.本來魚湯一般都係配米線比較岩口味, 不過今日我又真係唔想食米線, 所以就叫左米粉, 誰知就遇到得意野, 老闆跟我們說這個米粉其實不是米粉, 叫就米絲, 那即是不會被湯浸冧的米粉, 肉眼睇米粉是偏透明顏色, 真的有點似粉絲, 但就不是粉絲的QQ口感, 一些是米粉的味道, 就好似東莞米粉比較粗的米粉, 我覺得比米線更索湯.本來一人一碗米線就算, 但老闆介紹辣雞翼好多人叫, 問我地試唔試, 但因為我地唔食得辣, 又介紹了一味香蒜豬柳, 蒜味很足, 不過豬柳就冧左少少, 無左豬肉的質感.  …查看更多